Ôi 25/6 (tĭng mông ta ntŭk) ta Đại Liên, Trung Quốc, Thủ tướng Chính phủ Phạm Minh Chính hŏ geh nău lah mha êng ta rơh ntơm pơk lam  lĕ rngôch ta Tâm nchră way ăp năm ăp nuĭh dâk leo lor bôk năp tâl 15 bah Rgum nchră wăng sa lam ntŭr neh ta Đại Liên (WEF Đại Liên) ndrel đah Thủ tướng Trung Quốc Lý Cường, Tổng thống Ba Lan Andrzej Duda, Kruanh rgum nchră wăng sa lam ntŭr neh Klaus Schwab.

Ndrel lah ta rơh ntơm pơk, Thủ tướng Chính phủ Phạm Minh Chính rnê âk nău  khlay kan leo bôk bah wăng sa Trung Quốc đah hun hao wăng sa lam ntŭr neh. Lah dak tâm kâng n’har dêh bên, “yôk ntêng lêng yôk”, “dak ntêng lêng dak”, ndrel rdâk njêng “Mpôl tâm pă nsum let năp Việt Nam - Trung Quốc geh nkô̆ khlay têh jong”, Việt Nam rhơn bah năp nău hun hao bah Trung Quốc. Việt Nam nsing nơm Trung Quốc ntik n’hao tay nău khlay kan, ntrŭt ntrôl ăp suan hun hao mhe; ntrŭt ntrôl dăng trong tĭng âk ding, n’hao dăng tâm rnglăp,  tâm boh lam ntŭr neh, mât ntŭk gŭ rêh đăp mpăn, bah tâm lơh tâm su, tâm boh, hun hao têh ndrŏng ta nkual n’hanh lam ntŭr neh. Du jâng wăng sa Trung Quốc nsrôih êng, têh dăng, lăp  rgum jru hvi mbra nsĭt tay ăp nău tât ring tam lam ntŭr neh.