Ntŭk Ntop kơl nău rêh jêng rgum lĕ n’gor Gia Lai bah jŏ lĕ jêng jay nsum bah âk kon se kon đơi, geh nău rêh jêr jŏt. Du đêt kon se tĭng đah ntŭk aơ bah rnôk mhe deh, âk oh êng tât ta aơ rnôk rnăk wâl geh nău mô lap. Oh Kpuih H’Kiều, nkoch:  

Kon n’hanh oh kon gŭ ta aơ bơi 7 năm. Bah rnôk lăp ta aơ ăp yơ dŭt n’hâm mât uănh, lah uĕh ăp yơ ta ntŭk aơ lĕ mât rong mpôl kon têh n’hanh jêng nuĭh uĕh.

Wa Tạ Thị Anh Đào, Giám đốc Ntŭk ntop kơl nău rêh jêng kon nuĭh n’gor Gia Lai, an gĭt, ntŭk aơ aƀaơ dôl mât rong rlău 60 kon se kon đơi n’hanh kon se koet nte. Ăp nai, nuĭh kan ŭch rŏng mro, mât rong ăp oh kơt nuĭh du jay.

Rlău ma nău ƀư tĭng nău kơl bah ngih dak lah Nghị định 20, ăp mon geh prăk sa, prăk gŭ âm, kho ao.... Bah meng nĕ, ntŭk kan dơn geh nău uănh tât, kơl bah ăp rmôt kan, êng nuĭh gay an ăp mon geh nău rêh nar lơ uĕh lơn. M’hâm ƀư ăp mon gŭ ta ntŭk aơ saơ he kơl na nao, rgum ty nking n’gang bah nsum mpôl.

Nău mbơh bah N’gâng kan Lao động thương binh n’hanh Xã hội n’gor Gia Lai, lam n’gor aƀaơ geh rlău 5000 kon se geh nău rêh dŭt jêr jŏt. Ndrel đah nĕ hang rhiăng rbăn kon se ta ăp nkual jêr jŏt. Đah nău ŭch đăp mpăn nău dơi kon se n’hanh nking n’gang ăp nău rmoh rmanh, lơh mbram, ăp nău kan, n’gor lĕ ƀư âk nău nkoch trêng, n’hao nău wât n’hanh lĕ đah nău kan bah nsum mpôl. Wa Phạm Trần Anh, Groi Giám đốc N’gâng kan Lao động thương binh n’hanh xã Hội n’gor Gia Lai, lah:

Gia Lai lơn lah ta ăp ntŭk nkual jru ngai, ntŭk pâl an kon se dŭt mô tŏng. N’gâng kan lĕ đă ăp rmôt kan, nsum mpôl tâm khay rlu nti ƀư ăp ntuk pâl an ăp mon tâm rnôk ăp mon rlu nti gay geh ntŭk pâl đăp mpăn; dêr nău ăp mon hăn tât ăp ntŭk mô đăp mpăn an geh ăp nău rmanh dŭt yô̆.

Năm e, Tơm prăk nkrem Ntop kơk kon se n’gor Gia Lai lĕ rgŏ jă rlău 3,380 rmen prăk, geh prăk măt n’hanh ndơ bah ăp nuĭh ntop kơl. Bah tơm prăk aơ, tâm năm 2023 n’hanh 6 khay bôk năm 2024, Ban Mât uănh prăk nkrem lĕ an 2,435 rmen prăk ƀư rek play nuih an 20 kon se geh nău rêh jêr jŏt, 17 kon se ƀah hot ta yôi; an 50 ndeh bôk wah jâng an kon se geh nău rêh jêr jŏt.

Nô Đỗ Đức Thanh, Groi Bí thư N’gor đoàn Gia Lai, nkoch, tâm Khay pah kan yor kon se năm aơ, druh ndăm tâm n’gor lĕ an hang rbăn nklâm ndơ, ăp ntrong ƀư joi nău rêh, ƀư bôk nău kan rgâl ndŏk nja ka su sŏk ndơ, an ndeh wah jâng an ăp kon hŏk ach o rlet rlău jêr jŏt, gay ntrŭt nsôr an ăp oh:

 Bah chấp hành N’gor đoàn lĕ n’gluh an rnoh ƀư lah ăp rmôt kan đoàn dơn tay ntop kơl ƀa ƀơ kon se geh nău rêh jêr jŏt, geh săk n’hanh nău ƀư na nê̆ mô knŭng đah ndơ, prăk n’hanh ăp nklâm ndơ ma hôm ƀư tât chop khâl, ntrŭt nsôr ntop kơl ăp oh nti nsơm n’hanh nău rêh.

Bôl, đah nău geh êng lah n’gor geh âk rnoi mpôl đêt, wăng sa hôm e âk jêr jŏt, joi nău nsrôih na nao n’hanh nău nsum ty bah lĕ rngôch kon nuĭh tâm nău mât uănh an kon se.

Mât njrăng, uănh rong n’hanh ntĭm nti kon se nar aơ lah nta an nuĭh kan uĕh, nkô̆ nău nta an hun hao nâp nâl bah neh dak tâm rgŏ năp. Khay pah kan yor kon se lah di an ăp gưl, nău kan, nuĭh lŏng bôk tôr tâm n’gor ƀư lĕ nău kan tâm trong kan mât uănh, n’hanh ntĭm nti kon se. N’gâng kan Lao động thương binh n’hanh Xã hội n’gor Gia Lai kuăl jă ăp rmôt kan, êng nuĭh, nuĭh lŏng bôk tôr ndrel ty kơl prăk gay ntop kơl ngăn ngên, săk rnglăy an kon se geh nău rêh dŭt jêr jŏt, kon se mô lap... tă bah Tơm prăk ntop kơl kon se n’gor Gia Lai. Đah âk nău nsrôih bah lĕ kon nuĭh, kon se geh nău rêh jêr jŏt ta Gia Lai dôl n tơm dơi mât uănh, njrăng n’gang n’hanh geh nău rêh uĕh lơn.