Ôi 13/6, ta Hà Nội, Kruanh dak Tô Lâm hŏ  pah kan đah Viện Kiểm sát ƀon lan gưl têh. Lah ta rơh pah kan, Kruanh dak Tô Lâm lah rjăp tâm trong rlăch ndăng sa khâm, tih djơh, n’gâng kan Kiểm sát ƀon lan hŏ lor nchrăp, lăp kan lĕ n’hâm suan ndrel ăp nhih pah kan dơi kan, jêng nău rgâl uĕh tâm nău ban saơ n’hanh nkra rmal sa khâm, tih djơh.

N’gâng kan ƀư nsum đah ăp  nhih pah kan nchrăp lah trong ntrôl ngăch nkra ăp nău tih, lơn lah ăp nău tih sa khâm, wăng sa, rvăt ƀư kruanh jru hô, krit jêr, mpeh săk Ban rđău đă Trung ương mpeh njrăng n’gang, sa khâm, tih djơh tĭng groi nđôi, rđău đă, geh ăp nău jru hô lĕ mpeh rnoh âk n’hanh rnoh têh, mô hŏ tă geh; nkre đăp mpăn rmal lhăt nuĭh tih, nkre đăp mpăn geh nău rŏng nuĭh, bonh leng. Nău khlay n’hanh nău rgop bah n’gâng kan  Kiểm sát ƀon lan tâm rnôk rdâk njêng n’hanh hun hao, Kruanh dak nsing nơm an lah, tâm let năp tay, n’gâng kan Kiểm sát mbra geh ăp njuat hun hao têh lơn, lam lĕ rngôch n’hanh dăng lơn, rgop khlay tâm nău tĭng ƀư geh nău dơi Nghị quyết Đại hội tâl XIII bah Đảng, tĭng ƀư rnoh tât rgâl dơh glêh siƀŭt n’hanh rdâk njêng, lôch jêh Ngih dak pháp quyền xã hội chủ nghĩa Việt Nam tâm rơh mhe.