Jêh 7 năm tĭng đah nău nkra njêng dŭng nkra njêng tay bah ndơ jean ơm, yuh Lý Thị Kim Bình, ta ƀon Păn Lăm, nkual ƀon têh Buôn Ma Thuột, n’gor Dak Lak lĕ lĕ ndâk ƀư ntŭk tăch rgâl đah 5 nuĭh kan. Du năm, ntŭk kan tăch an ƀon lan rlău 7.500 ndơ dŭng bok ăp ntil, geh prăk rlău 1,5 rmen prăk. Yuh Lý Thị Kim Bình nkoch, bôk năp lah nkra njêng tay kho ao ơm jêng ndơ dŏng mhe, jêh nĕ nău ntop kơl bah năch rwăt  ntrôl ntŭk nkra njêng bah yuh ƀư luh tay âk ndơ mhe.

Kon gâp ê nkra jêh nĕ gâp ka choh. Wa lah kon tăch online, tăch dŭt âk. Êp tât gâp mbra ƀư trong tăch offline gay an ăp nuĭh bu urr kơt gâp geh du trong uănh nsum mpeh nău khuch ntŭk ntô gŭ âm, khuch tât nău rêh jêng, n’hŭch rnoh ndŏk nja luh ntŭk gŭ rêh n’hanh ntrŭt tât nău geh bah gâp.

Hôm đah yuh Đào Thị Vân, ta phương Tự An, nkual ƀon têh Buôn Ma Thuột, nău mĭn ndâk njêng nău kan đah rlŭ nga ƀư bah mo cau jêng bah du rơh hăn uănh ntrong kan nkra njêng ta n’gor Quảng Ngãi. Jêh mĭn njêng nkual tăm ta Dak Lak, bah n’gul năm 2023 yuh ntrŭnh an ntuh kơl rwăt măy nkra njêng. Tât aƀaơ, rĭng du khay yuh ƀư luh rlău 30.000 ngan rlŭ, mang, rlŭ ăp ntil, rnoh tăch rĭng 2.300 prăk du mlâm ndơ. Yuh Đào Thị Vân an gĭt, ndơ ƀư luh bah mo cau dơi dơn âk nău uănh tât bah năch yor nău dơh uĕh đah ntŭk ntô gŭ âm.

Aƀaơ ntŭk kan dôl tăch ta website n’hanh ta ntŭk tăch điện tử. Năm bah năp dŭt âk ntŭk kan ntop kơl an ăp bôk nău kan bah kon hŏk, sinh viên dŏng tâm choanh rlu rlău rƀŏng tât ntŭk ntô gŭ âm uĕh kloh, dŏng uĕh kloh. Nsuôp cau ri bah ndơ geh ơm, tâm rnôk mkra dơh nơih, knŭng trăm dak n’hanh rao kloh jêh nĕ jăng tâm khuôn ep luh ăp ndơ jêh nĕ nchrat tia UV rao puh kaman geh tâm di uĕh nâp.

Bah ăp rse ka su jăng ta ăp ntŭk ndâk ƀư ngih wâl mô lah ăp ntŭk tăch biăp play ta chợ. yuh H’ Âu Niê, ta bvbon Tlung, nkuăl têh Ea Kar, nkuăl Ea Kar, n’gor Dak Lak lĕ ƀư jêng ăp ndơ dŏng. Bơi n’gul năm aơ, yuh rgum ăp oh yuh ƀư ndrel n’hanh knơm ăp rmôt kan nsum mpôl tâm rgop, pơk hvi ntŭk tăch. Ăp dŭng djôt ndơ, yŭl ndŏk nja, rsau djăr mô lah r’i ndơ hăn chợ tanh đah rse ka su khlay bah 80 rbăn tât 200 rbăn. Tĭng Yuh H’Âu, nău kan aơ dŭt dơh jêng ăp nuĭh dơi ƀư ta jay ăp rnôk ru.

Aƀaơ geh 7-8 nuĭh ƀư ndrel. Ƀư du ndơ roh bah 3-7 mông tĭng ndơ, dơi ndăn ƀư ăp rnôk ru. Ndơ ƀư i ty, ê nkra tay bah rse anh nơm rgum sĭt dơi ƀư kloh uĕh. Tât aƀaơ ndơ bah gâp lĕ dơi ntoh ăp thôn, ƀon bah nơm, tĭng năch nchăm ndơ.

Wa Tô Thị Tâm, Kruanh Hội liên hiệp bu ur n’gor Dak Lak an gĭt, ƀư tĭng bôk nău rgop tâm nchră 939 bah Thủ tướng Chính phủ mpeh “Ntop kơl bu ur rdâk njêng nău kan lvang 2017-2025”, âk bu ur lĕ dơi ntop kơl, nta an rdâk njêng nău kan. Tâm rnoh aơ, âk yuh lĕ dŏng ăp ndơ geh âk ta ntŭk, đê̆ đŏng dơi uănh lah ndŏk nja, gqay ƀư jêng ăp ndoh ndơ dŏng.

 Rmôt bu ur mât uĕh ngăn, nău mĭn ƀư mhe n’hanh nsrôih hao bah săk nơm, joi ăp nău geh, ndơ âk, dơh ơm geh ta ntŭk, dŭt lah dơh n’hanh geh bah jŏ. Joi ƀư ăp ndơ dơh nĕ jêng ndoh ndơ, nkre rhŏ an nău ŭch tâm nău rêh ăp nar bah ăp rnăk wâl n’hanh nkre geh prăk, mkra nău kan n’hanh nkra rgâl ntŭk ntô uĕh kloh.

Đah nău blău, mĭn ƀư mhe, âk bu ur ta Dak Lak lĕ njêng ăp ndơ ndŏk nja jêng ăp ndoh ndơ dŏng. Lôch uĕh nĕ mô knŭng nsĭt tay nău geh ma hôm rgop jêng nău rêh kloh uĕh, mât njrăng ntŭk ntô gŭ âm.