Gia Bắc lah nkual jru, ngai bah nkuăl Di Linh, n’gor Lâm Đồng, đah 95% lah rnoi K’ho. Ndrel nau kơl an bah Đảng ndrekl Ngih dak mpeh ăp ding, nau nsôih bah ăp nŭih tâm ƀon lah nau dơi gay hun hao văng sa, nau rêh. Ndơn kloh nau nê, dnrel ma ăp đảng viên êng bah nkuăl ntơm bah rnôk geh lăp Đảng, nô K’Bơn, cán bộ mom bah xã Gia Bắc, nkuăl Di Linh, n’gor Lâm Đồng nsôih lôch n’hâm tâm nau nkoch trêng, bonh đă ƀon lan ƀư nau ntrŭnh đă. K’Bơn mbơh, gay ƀon lan gĭt ndrel kơt tĭng, ăp cán bộ đảng viên lah nŭih leo trong hăn lor tâm nau kan:

            “Rnôk geh jêng đảng viên, gâp geh nau dơi gĭt kloh lơn ăp nau ntrŭnh, ntrong kan bah Đảng, nau ntrŭnh pháp luật bah Ngih dak. Rnơm nê, gâp mơ dơi ƀư ueh nau kan geh Đảng uỷ, n’gâng kan jao. Ntơm bah nê, kơl an kônh wa geh âk lơn tâm nau hun hao văng sa, ndâk njêng ƀon lan mhe geh săk tam lơn”.

            Ntơm bah ntŭk uănh khlay nau ndâk đảng, chính trị nâp nâl, tât rnôk aơ, Đảng bộ xã Gia Bắc hŏ nglăp geh 96 nŭih đảng viên, âk ngăn lah rnoi mpôl đê̆ tâm 9 chi bộ. Tĭng wa K’Thanh, Bí thư chi bộ ƀon Ka Sa, xã Gia Bắc, nkuăl Di Linh, đảng viên lah nŭih leo trong ƀư nau ntrŭnh, ntrong kan bah Đảng ndrel pháp luật bah Ngih dak. Ndrl ma, êng nau nsôih nchiăr nti gay gĭt ăp nau mhe, gay mbơh tay ma ƀon lan, ăp đảng viên tâm chi bộ râng ngăn nau bonh đă ƀon lan ntrơn rgâl tơm tăm, mpa rong, pă neh fay ma nkra trong, ndâk njêng ƀon lan mhe...Rnơm nê, nau rêh văng sa bah ƀon Ka Sa lah nsum, xã Gia Bắc lah êng hŏ ngăch ntrŭt jăng lơi ji ngor, ach o, hao jêng xã geh dơi ƀon lan mhe. Wa K’Thanh, Bí thư chi bộ ƀon Ka Sá, ngơi:

            ‘Ƀư tĭng Bôk nau kan mrô 04 bah nkuăl uỷ, bah Trung ương mpeh “Ndâk njêng ƀon lan mhe”, kônh wa ƀon lan tâm ƀon kơt tĭng ueh ngăn, pă êng neh gay ma pơk hvi trong hăn. Đah nau ƀư lah Bí thư chi bộ ƀon, gâp mro nkoch trêng, bonh đă băl mpôl, rnăk vâl, ƀon lan nơm hun hao tuch tăm, n’hao nau rêh, ƀư rgâl nau geh dơi bah ƀon lan”.

            Mô êng knŭng geh cán bộ đảng viên bah ăp ƀon, ăp đảng viên lah rđau kan UBND ăp xã, nkuăl têh bah nkuăl Di Linh kŏ ƀư ueh nau leo trong lor đah ăp nau kan n’hêl ngăn. Đah đảng viên K’Ly, Groi Kruanh UBND xã Tân Thượng, nkuăl Di Linh, mô êng lah ƀư ueh nau kan geh jao, nô kŏ joi trong hun hao văng sa mhe tâm nau tăm ƀăng tây. K’Ly mbơh, ŭch rgâl nau mĭn nau kan bah ƀon lan na geh ân saơ ma nau geh ƀư ngăn:

            ‘Gay văng sa bah ƀon lan hun hao đăp mpăn, nâp nâl, êng tăm cà phê, ri xã bonh đă ƀon lan tăm nsum, ntrơn neh tăm mô jêng gay tăm tơm sa play geh rnoh văng sa kơt bơ, sầu riêng, mắc ca... Săk gâp nơm hŏ leo trong tâm nau tăm măng tây gay ƀon lan kơt tĭng ƀư. Rnôk aơ, măng tây geh ntŭk tăch ueh, rnoh ntơm 70 rbăn tât 100 rbăn/kg, âk nŭih joi rvăt tât mir ma mô tŏng geh gay ma tăch”.

            Rnôk aơ lam nkuăl Di Linh, n’gor Lâm Đồng geh rlau 4.400 đảng viên, tâm nê geh bơi tât 900 đảng viên rnoi mpôl đê̆. Ăp nŭih đảng viên aơ lah ăp nŭih leo trong ƀư lor, hăn lor tâm ăp nau kan, rgop nau ƀư rgâl nau mĭn nau kan tâm ăp ƀon lan rnoi mpôl đê̆, rgop nau ngăn tâm hun hao văng sa, rêh jêng tma nkuăl neh yôk Di Linh./.