N’gor Kon Tum geh rlău 54% rnoh nuĭh lah rnoi mpôl đê̆, tâm nê geh 7 rnoi nuĭh ƀon tơm ta ntŭk, lah: Xơ Đăng, Ba Na, Gié -Triêng, Gia Rai, Brâu, Rơ Măm n’hanh Hrê. Ntoh bah nău ŭch geh ngăn ngăn, khay 4/2021 n’gor Kon Tum an ƀư rơh rgŏ jă “Ƀư rgâl nău mĭn, nău kan ta nkual rnoi mpôl đê̆, ƀư an ƀon lan rnoi mpôl đê̆ nsan hao klaih rlău ach o jŏ jong”. Đah nău lăp  kan bah lam trong kan chính trị, tât aƀaơ rlău 3 năm “dêh ƀon lan, grêt dăch rnăk wâl” n’hanh “nhŭp ti nchŏng kan”, âk trong mĭn, trong kan ơm bah kônh wa rnoi mpôl đê̆ hŏ mbrơi rgâl njêng nău rgâl uĕh tâm pah kan jan sa n’hanh nău rêh bah nuĭh ƀon lan.

Ƀư êng ngai đah jay gŭ, ndrung sŭr bah ur sai yuh nô A Tuấn n’hanh Y Chéc, rnoi Gié- Triêng, thôn Dục Nhầy 3, xã n’har bri Đăk Dục, nkuâl Ngọc Hồi dơi ƀư nâp uĕh. Ndrel đah ndrung sŭr tâm pă nduang trong hăn klang n’gul an dơh rsong hăn rnôk mât chăm, rnăk wâl hôm n’gar mpêr loih bah dih an sŭr luh pâl rsong hăn hvi rlău 100m2 đŏng. Nô A Tuấn an gĭt, bah nău ntop kơl, ntĭm nti bah cán bộ Hội Liên hiệp bu ur xã Đăk Dục n’hanh cán bộ Pôih n’har bri Dục Nông, rnăk hŏ mât  rong rơ̆ jêng đŏng nkre bah hôm mƀơk lêng sŭr:

“Mpeh bu ur ntop kơl 6 rkeh prăk, ur sai rvăt tay bar mblâm sŭr me dăm. Tât aƀaơ hŏ deh 6 lông an tay lĕ 6 lông dĭl aƀaơ rơ̆ geh kơt aơ. Ur sai nchră ƀư ndrung ta aơ. He ƀư nsĭt tay an rnăk wâl đăp mpăn mpeh nău rêh geh tŏng prăk ma nkơng nkơng nău rêh”.

Tĭng ƀư rơh rgŏ jă “Ƀư rgâl nău mĭn, nău kan bah ƀon lan rnoi mpôl đê̆, ƀư an ƀon lan rnoi mpôl đê̆ nsan hao klaih rlău ach o jŏ jong”, 3 năm aơ nkuâl Kon Plông rgum rdâk njêng trong ntĭt leo n’hŭch ach o nkre đah mât ndray văn hoá gay hun hao pâl nđaih. Nkre ntrôl dăng nău nkoch trêng, rgŏ jă kônh wa Xơ Đăng, Hrê rgâl uĕh jêng rlău 155 héc-ta mir tăm rlŭ. Tât khay 9 mhe aơ rhiăng rnăk ƀon lan rnoi mpôl đê̆ tâm nkuâl hŏ rgâl uĕh jêng rlău 50 héc-ta mir tăm rlŭ lêng lang jêng tăm tơm sa play, biăp, kao bri nđik. Wa Châu Văn Lâm, Groi Bí thư Đảng uỷ thị trấn Măng Đen, nkuâl Kon Plông an gĭt, gay rgâl nău mĭn, nău kan bah ƀon lan rnoi mpôl đê̆ geh nău khlay tâm đảng viên tâm Chi bộ thôn ƀon:

“Chi bộ ăp thôn nkoch trêng, rgŏ jă kônh wa tĭng ƀư rgâl mir tăm rlŭ rlĕ jêng tăm tơm sa play, tăm bum biăp, bri nđik gay rgâl geh nău rêh ăp nar tâm ban kơt n’hao nău geh bah ƀon lan. Chi bộ tâm pă tĭng đảng viên mât uănh rnăk, mât uănh rmôt rnăk. Mpôl hên sŏk đảng viên lah n’gâng tơm, đảng viên mât uănh rnăk rmôt rnăk ƀư lor, lôch nê rnăk, rmôt rnăk ƀư tĭng bah kơi”.

Nkuâl Tu Mơ Rông, n’gor Kon Tum geh rlău 95% rnoh nuĭh lah rnoi Xơ Đăng. Gay rgâl nău mĭn, nău kan bah ƀon lan rnoi mpôl đê̆ tâm nău kan ƀư njêng, tăch rgâl, n’gâng kan ta ntŭk n’hanh ăp nsum mpôl bah nkuâl tĭng ƀư trong rƀŏng “dêh ƀon lan, grêt dăch rnăk wâl” n’hanh “nhŭp ti nchŏng kan”. Wa Ka Ba Thành, Bí thư Huyện uỷ, an gĭt: nău dơi dŭt têh bah nkuâl lah hŏ rgâl dơi nău mĭn trong ƀư ân tŏng sa, rnam manh, klach manh tơm prăk ngân hàng bah kônh wa, lơn  lah đah ăp rnăk ach o:

“Nuĭh ƀon lan hŏ  nănh hun hao tuch tăm mât rong. Rnoh an manh ntơm bah năm 2021 tât năm 2023 lah rlău 280 rmen prăk. Rĭng ăp năm geh nklăp 80 rmen tâm rnoh prăk manh lah rnăk ach o, rnăk  dăch kêng ach o n’hanh rnăk dơi kơl. Bah nê hŏ an saơ dơi nău rgâl trong mĭn, trong kan bah kônh wa bah nău ndrât glo, kâp nơm hŏ nănh lơn, lor nchrăp manh tơm prăk gay tuch tăm mât rong tâm nê  geh tăm sâm, tăm  tơm dak si, mât rong”.

Lôch 3 năm an tĭng ƀư rơh rgŏ jă “Ƀư rgâl nău mĭn, nău kan bah ƀon lan rnoi mpôl đê̆, ƀư an ƀon lan rnoi mpôl đê̆ nsan hao klaih rlău ach o jŏ jong”, ăp gưl, ăp n’gâng kan bah n’gor Kon Tum hŏ rdâk njêng, hun hao 866 ntŭk ntĭt leo tâm kơl  hun hao wăng sa, rgâl mir tăm rlŭ rlĕ wăch rgum bơi 10.600 tơ̆ rnăk ach o, dăch kêng ach o ƀon lan rnoi mpôl đê̆ râng. Ăp trong ntĭt leo hŏ rgum geh rlău 96 rmen prăk ntop kơl ntil, tơm prăk kỹ thuật kơl rlău 5.500 rnăk ach o ƀon lan rnoi mpôl đê̆ nsan hao klaih rlău ach o jŏ jong.  

Ndrel dah nê, rnoh rnăk ƀon lan rnoi mpôl đê̆ ntlơi mbrơi nău way ơm rluk mâl, dŏng khoa học kỹ thuật tâm nău kan tuch tăm mât rong hao âk, rnoh rnăk râng tâm hợp tác xã, rmôt tâm boh dơi tât n’hanh rlău rnoh ndơ̆ luh…wa Dương Văn Trang, Bí thư Tỉnh uỷ, Kruanh HĐND n’gor Kon Tum, an gĭt, ngoăy tâm ăp rnoh ŭch tât kan khlay ma rơh rgŏ jă dôl rƀŏng tât lah rgâl dơi nău mĭn, nău kan bah rlău 9.700 rnăk ƀon lan rnoi mpôl đê̆ hôm ƀa ƀă gay nsan hao klaih rlău ach o:

“Nkô̆ rgâl nău mĭn nău kan dŭt âk ntil yơn tâm nê rgum an nău kan tuch tăm mât rong. Tuch tăm nsĭt geh wăng sa, tơm geh âk ri mbra klaih rlău ach o. Xã pơk hvi, nkuâl pơk hvi, n’gor pơk hvi trong ntĭt leo n’hanh n’glĕ dŭt nsĭt geh nău dơi tam bah rơh rgŏ jă lah hŏ ƀư rgâl nău mĭn n’hanh hŏ ƀư rgâl nău kan bah ƀon lan rnoi mpôl đê̆ gay kônh wa he nsan hao klaih rlău ach o jŏ jong ngăn”.

Ndrel đah trong kơl an ntuh kơl lor, ntop kơl bah Đảng, Ngih dak, Rơh rgŏ jă “Ƀư rgâl nău mĭn, nău kan bah ƀon lan rnoi mpôl đê̆, ƀư an ƀon lan rnoi mpôl đê̆ nsan hao klaih rlău ach o jŏ jong” tă bah n’gor Kon Tum an tĭng ƀư dôl rgop njêng nău rgâl uĕh tâm  nău kan tuch tăm mât rong n’hanh nău rêh bah ƀon lan rnoi mpôl đê̆ tâm n’gor. Gay rơh rgŏ jă lăp tâng jru tay, nsĭt geh nău dơi ngăn ngăn n’gor Kon Tum nkre  đah rơh rgŏ jă đah nău tĭng ƀư ăp bôk nău kan, nghị quyết, nău ntrŭnh bah Tỉnh uỷ, UBND n’gor lơn lah ăp nkô̆ geh tât pah kan n’hŭch ach o n’hanh bôk nău kan gưl neh dak rdâk njêng ƀon lan mhe tâm nkual ƀon lan rnoi mpôl đê̆.