Bah năm 2009, wa Đinh Văn Bới nuĭh Bahnar ta ƀon Đăk Kjông, xă Lơ Ku, nkuăl Kbang, n’gor Gia Lai lĕ rgum lĕ rngôch prăk gay tăm 4ha keo. Wa hôm manh tay 50 rkeh prăk bah Ngân hàng Chính sách Xã hội nkuăl Kbang tăm 5 ha bạch đàn. Jêh âk năm mât chăm, wa lĕ sreh rnoh neh keo n’hanh tăch geh 85 rkeh prăk/ha. Wa Đinh Văn Bới an gĭt, nău tăm bri lĕ kơl rnăk wâl geh ndơ sa ndơ ntêm:

Tăm bri ri dơh n’hanh geh prăk âk lơn. Tăm mbô mô săk geh đah tơm keo, ma keo bôl jŏ năm yơn knŭng an sreh du tơ̆ lah đăp mpăn. Kỹ thuật dơh đŏng, knŭng rwăt ntil, rwăt dak si nchiăr, muih pih du năm 2 tơ̆.

Wa Phùng Văn Minh rnoi nuĭh Mường ta thôn 2, xă Lơ Lu, nkuăl Kbang, n’gor Gia Lai lĕ hao ƀư ndrŏng knơm tăm bri. Ntơm tât tâm năm 2010, rnôk wa râng du nău nchrăp ƀư tăm bri dơi ngih dak ntop kơl ntil keo an dơm. Đah 3 ha keo bôk năp dơi sreh năm 2016, rnăk wâl trok lĕ rnon n’hanh geh prăk ntuh kơl. Wa Phùng Văn Minh rhơn, bri lĕ kơl nău rêh rgâl lĕ rngôch:

Tăm bri mô geh roh. Âk năm aơ, geh prăk bah bri nkre âk nkre dơh. Bu tăch tĭng ha hôm gâp tăch ta ngih măy. Tăch ri rwăt ndeh ô tô gay rdêng ndơ bah bri sĭt jay măy. Nar bah năp tăm đêt nar ri knŭng tŏng sa, manh ngân hàng na nao. Yơn bah rnôk tăm bri, nău rêh lĕ sâm geh âk lơn.

Bah năm 2021-2023, nkuăl Kbang lĕ tăm bơi 3.200ha bri. Êng xă Lơ Ku geh rlău 700ha bri, tâm nĕ n’gul dôl tâm lvang rseh. Wa Trần Xuân Nam-Kruanh UBND xă Lơ Ku, nkuăl Kbang, an gĭt xă tâm rgop đah Ngân hàng Chính sách Xã hội gay ntop kơl nuĭh ƀon lan manh prăk rwăt ntil n’hanh mât chăm bri. Nuĭh ƀon lan dơi ntrŭt đă tăm tâm srah ăp ntil tơm đêt nar kơt bum, mbô, tuh, gay ntop tay geh prăk. Nău tăm bri mô knŭng nta an nău kan ma hôm kơl nuĭh ƀon lan dŏt neh yôk, neh sop, njrăng n’gang rchoh neh n’hanh n’hao nău geh, lơn lah ƀon lan rnoi mpôl đêt. Wa Trần Xuân Nam an gĭt:  

Ăp năm, xă tâm rgop đah Jrô kan Tuch tăm mât rong n’hanh Ntŭk rhŏ kan Tuch tăm mât rong nkuăl Kbang ƀư ăp jrô ntĭm kỹ thuật tăm n’hanh mât chăm bri. Kônh wa dơi ntĭm ntơm bah kuih ntu tât jik pih n’hanh mât chăm si tâm lvang bôk năp.

Gia Lai aƀaơ geh rlău 732.000 ha neh dăp rgum tăm bri, tâm nĕ geh 152.470ha bri tăm. Rnoh uĕh jêng bri 47%. Wa Nguyễn Văn Hoan-Groi Giám đốc N’gâng kan tuch tăm mât rong n’hanh hun hao ƀon lan Gia Lai an gĭt, ƀư tĭng Nghị quyết 06-NQ/TU năm 2017 bah N’gor ủy Gia Lai mpeh hun hao bri nâp nâl n’hanh tâm di đah rgâl trôk nar lvang 2021-2030, tât aƀaơ n’gor lĕ tăm geh rlău 16.721 ha bri.

Mpôl hên mĭn tu tơm prăk bah kon nuĭh tâm rgop lah nkô̆ nău khlay gay dơi geh ăp nău rƀŏng bah Nghị quyết. Mpôl hên rgŏ jă soan ƀon lan, dŏng nuĭh pah kan n’hanh neh ta ntŭk, rgâl bah lŏ mir an tăm bri nmâp nâl gay hao nău geh prăk an nuĭh ƀon lan. Ăp Ngih pah kan way kan dơi jao an na nê̆ gay hun hao wăng sa bri n’hanh geh săk rnglăy âk.

Knơm nchrŏng di trong n’hanh nău kơl tâm di đah nău hun hao bri, nuĭh rnoi mpôl đêt ta Gia Lai lĕ n’hanh dôl tĭng đah bri, rgop mât uănh ntŭk ntô gŭ âm bri n’hanh kơl nău rêh nar lơ đăp mpăn, sâm geh lơn.