Rnăk yuh Đinh Thị Phước, deh năm 1996, tâm ƀon Đăk Kjông, xã Lơ Ku, nkuăl Kbang, n’gor Gia Lai tă lah rnăk ach o yor mô geh neh tuch tăm ndrel mhe nkhah rnăk. Ur sai yuh geh 2 kon jê̆, nsing tâm 5 sào neh me mbŏ ân ndrel hăn kan ma bu. Nau rêh mô lăng geh, ƀư mâp âk nau jêr.

            Ndơn saơ nau rêh bah yuh, chi bộ ƀon Đăk Kjông hŏ pă đảng viên hăn ntĭm, bonh đă yuh Phước râng ndơn mât 12 ha bri; ntĭm yuh mât chăm ân tâm di. Ntơm bah nê, yuh geh prăk 36 rkeh/năm ntơm 2014 tât rnôk aơ. Tâm nâm ơm si, rnôk tơm hôm jê̆, yuh tăm tuh, rnơm gơih kan, tât rnôk aơ ur sai yuh Phước geh tay 2 ha neh, nchrăp dŭt năm aơ lah rklaih ach o:

            ‘Rnăk gâp lah rnăk ach o, lah ueh cán bộ kơl an hên. Gâp mra nsôih pah kan jan sa, têm nkrem gay geh prăk rvăt ne ƀư ngih ndrel hun hao văng sa. Nau rêh rnăk hên rnôk aơ rđil ma bah năp nê ri ueh lơn âk ngăn”.

            Ƀon Đăk Kjông, xã Lơ Ku, nkuăl Kbang, n’gor Gia Lai geh 84 rnăk đah 426 nŭih. Ta aơ, 95% nŭih rnoi Bahnar. Bah năp nơh, ƀon tâm nkuăl thuỷ điện An Khê-Knak. Năm 2009, ƀon ntrơn prêh lơn, ngai ma ntŭk ơm 14km. Đah neh 8 sào ndrel 1,7 ha ba dak 2 yan geh pă ân ăp rnăk, bôk năp nau rêh ƀon lan hôm jêr. Yơn rnơm geh rđau kan, đă rjăp bah chi bộ thôn ndrel ban ƀon lan thôn, ƀon lan hŏ geh ngih mhe ndrel nsôih ndrel ngih dak ƀư trong hăn ndrel ngih rƀŭn ƀon. Ƀon lan nkra êng n’gar, mpông ndrel mât ƀon lan ân ndrih, kloh, ueh.

            Mô êng kơt nê, kônh wa ƀon Đăk Kjông hôm geh kơl prăk, pă ndrôk ndrel âk nau kan êng gay ma n’hao nau geh. Jêh âk năm nsôih, nchrăp tât khay 11/2024 ƀon Đăk Kjông mra geh dơi ƀon lan mhe, nkah nau rgâl mhe khlay bah ƀon lan. Wa Đinh Bới-Bí thư chi bộ ƀon Đăk Kjông, xã Lơ Ku, nkuăl Kbang, Gia Lai mbơh:

            ‘Gâp lah bí thư chi bộ, ri ma pă nau ân đảng viên kơl an rnăk ach o, jêr jŏt. Gâp kŏ nkoch mbơh tât ăp rnăk jêr jŏt ach o ân nsôih pah kan jan sa, joi nau săk geh ân rnăk vâl, gay nau rêh ueh lơn, hơm răm lơn, ngăch rklaih ach o. Nsôih hun hao văng sa ân rnăk vâl”.

            Ăp năm rlau aơ, nau ndâk njêng ƀon lan mhe nkuăl rnoi mpôl đê̆ tĭng nau ntrŭnh mrô 12 lơ 13/2/2018 bah Rnâng kan n’gor uỷ Gia Lai, ăp năm Đảng uỷ xã Lơ Ku, nkuăl Kbang kŏ ndâk nau ntrŭnh, nau kan ngăn tĭng ăp nau ntrŭnh bah nkuăl jao. Đảng uỷ pă cán bộ, công chức ndrel ăp ntŭk kan kơl an ăp thôn, ƀon, ngăn lah ăp rnăk ach đăng kí rklaih ach o. Nŭih ƀon lan geh kơl an tuch tăm, mât rong ndrel nau kan êng tâm tuch tăm.

            Xã Lơ Ku, nkuăl Kbang, n’gor Gia Lai kŏ rgop âk nau kan bah neh dak kơt hun hao văng sa, rêh jêng nkuăl rnoi mpôl đê̆ ndrel bôk nau kan huch ach o nâp nâl, pă kon ntil tăm, mpa rong, phân poh ndrel máy móc ân ƀon lan gay ƀư kan. Đảng viên geh pă hăn tât ăp ƀon gay rƀŭn ndrel chi bộ, nkoch trêng, kơl an rnăk ach o. Bol ma moh nau kan, nau huch ach o bah nkual kŏ geh nau dơi, ăp nhoat kơl kônh wa rnoi Bahnar n’hao nau rêh ndrel hun hao nâp nâl. Tâm ăp năm êp aơ, rnoh rnăk ach o bah ƀon Đăk Kjông huch ntơm 38,46% năm 2021 hôm knŭih 5,8% tâm năm 2023. Wa Trần Xuân Nam, Groi Bí thư Đảng uỷ, Kruanh UBND xã Lơ Ku, nkuăl Kbang, n’gor Gia Lai mbơh:

            ‘Cán bộ, đảng viên geh pă nau kan jur ri ăp khay ân geh nau mbơh ân đảng uỷ mpeh nau geh, uănh n’ôi kơl an ân ăp rnăk ach o, ndrel ăp đồng chí bí thư chi bộ tâm ƀon nê tâm nau nkoch trêng, kơl an ăp nŭih ƀon lan rklaih ach o nâp nâl; ƀư ueh nau rgŏ jă rgâl nau mĭn, nau kan tâm nkuăl rnoi mpôl đê̆. Bol ma nau huch ach o bah xã ê geh kơt nau uch, yơn uănh nsum ri kŏ geh nau hun hao lah ueh đăp mpăn tŏng nau huch ach o tâm xã”.

            Ndrel ma nau rđau kan ngăn ndrel hăn ndrel bah Đảng uỷ ndrel n’gâng kan bah nkuăl, kônh wa rnoi Bahnar tâm ƀon Đăk Kjông, xã Lơ Ku, nkuăl Kbang, n’gor Gia Lai hŏ đăp mpăn nau rêh, huch ach o ngăch gay ndâk njêng ƀon lan mhe nâp nâl, ueh m’ak. Nau kan aơ ân saơ nuih n’hâm tâm rnglăp bah ƀon lan Bahnar ndrel nau kan khlay bah Đảng tâm nau hăn ndrel n’hanh nhao nau rêh ân ƀon lan nkuăl rnoi mpôl đê̆./.