ꪚꪱꪙ ꪹꪔꪉ ꪀꪱ ꪢꪮꪉ ꪁꪮꪉ ꪣꪲ ꫃ꪎꪣ ꪕꪱꪉ ꪻꪢ ꪨꪉꪷ 40 ꪜꪲ ꪑꪱꪥ

ꪼꪜ ꪤꪴ ꪚꪮꪙ ꪹꪝ ꪖꪫꪥꪲ ꪓꪙꪸ ꪬꪫꪱ ꪚꪉꪲ

        ꫃ꪎꪣ ꪕꪱꪉ ꪒꪙꪲ ꪙꪮꪥ ꪵꪀꪚ ꪭꪲ ꪀꪱꪥ 2 ꪼꪀ ꪶꪎ ꪵꪔ ꪀꪱꪉ ꪮꪮꪉ ꪎꪱ ꫃ꪔꪙ ꪩꪱꪉ ꪄꪙꪳ ꪹꪣ ꪚꪱꪙ ꪹꪔꪉ ꪀꪱ ꪨꪉꪷ ꪢꪮꪤ ꪬꪱ ꪶꪠꪙ ꪨꪷ ꪣꪙꪳ ꪶꪝꪉ ꫄ꪀ ꪪꪱ ꪕꪱ ꪝꪲ, ꪹꪝ ꪒꪙꪲ ꪬꪱ ꪼꪨ ꪣꪱ. ꪁꪷ ꪣꪲ ꪹꪕ ꪶꪠꪙ ꪻꪐ ꪁꪷ ꪁꪮꪒ ꪎꪮꪥ ꪎꪸ ꪒꪙꪲ ꪶꪝꪉ ꪑꪉꪷ ꪣꪲ ꪕꪷ ꪀꪮꪙ ꪒꪱꪙ ꪻꪐ ꪙꪮꪥ ꪶꪩꪀ ꪶꪀꪀ,  ꫛ ꪹꪖꪱ ꪵꪀꪉ ꫃ꪩꪀ ꪙꪮꪥ ꪭꪳ ꪑꪱꪉ ꪔꪙꪲ ꪔꪱ ꪫꪱ ꪕꪱꪉ ꪨꪀꪷ. ꪁꪷ ꪣꪸ ꪨꪱꪥ ꫛ ꪊꪺꪚ ꪶꪩꪣ ꪎꪺꪉ ꪹꪎ ꪮꪺꪥ, ꪣꪲ ꫄ꪋ ꪑꪉꪷ ꫃ꪊꪚ ꪚꪱꪒ. ꪝꪉꪳ ꫛ ꪵꪀ ꫃ꪊꪚ ꪬꪱꪥ ꪼꪎ ꪘꪱꪫ, ꪠꪴ ꪑꪉꪲ ꪤꪴ ꪝꪱ ꫄ꪖꪉ ꪹꪚꪙ ꪋꪲ ꫃ꪬꪙ ꪘꪱ ꪝꪮꪢ ꪼꪒ ꪊꪱꪉ ꫛ ꪬꪱꪢ ꪶꪩꪉ ꪼꪜ ꪊꪉꪴ ꫄ꪔꪣ ꪎꪱ, ꪹꪝ ꪹꪚ ꪱꪹꪏꪉ ꪻꪒ ꪄꪲ ꪵꪎ ꪼꪢ ꪼꪒ ꪘꪉꪷ ꫃ꪎꪣ ꪕꪱꪉ ꪙꪲ.

          ꪁꪳ ꪤꪱꪫ 2 – 3 ꪹꪚꪙ, ꪝꪲ ꪙꪮꪉ ꪀꪺꪉ ꪚꪱꪙ ꪹꪊꪉ ꪀꪽ ꪼꪜ ꪎꪱꪉ ꪵꪜꪉ ꪕꪱꪉ ꪹꪕ ꫜ, ꪬꪱꪀ ꪫꪱ ꪼꪒ ꪀꪲ ꪥꪱꪙ ꪨꪷ ꫃ꪜꪙ ꪹꪏꪉ ꪹꪀꪱ. ꪨꪱꪥ ꪝꪲ ꪙꪮꪉ ꪭꪮꪀ ꪎꪉꪲ ꪼꪜ ꪵꪮ ꪎꪳ ꪀꪱ ꪎꪱ ꪼꪒ ꪔꪙꪴ ꪵꪔ ꪹꪋꪱ, ꪬꪱꪀ ꪫꪱ ꪣꪲ ꪙꪮꪉ ꪁꪷ ꪊꪺꪚ ꪒꪴꪒ ꫄ꪋ ꪫꪱ ꪣꪳ ꪻꪒ ꪼꪜ ꪀꪱꪉ ꪔꪱꪉ ꪊꪺꪚ ꪡꪱ ꪶꪠꪙ ꪹꪚꪱ ꪁꪷ ꪢꪮꪀ ꪁꪺ ꪹꪢꪥ ꪭꪣꪾ.

          ꪑꪱꪥ ꫄ꪤꪙ ꪹꪣ ꪤꪴ ꪚꪱꪙ ꪻꪢ ꪼꪒ 12 ꪜꪲ ꪵꪩꪫ, ꫜ ꫄ꪤꪙ ꪚꪱꪙ ꪹꪔꪉ ꪀꪱ ꪎꪀꪷ ꪋꪮꪉ, ꪣꪳ ꪻꪒ ꪁꪾ ꪹꪣ ꪼꪭ ꪼꪜ ꪙꪱ ꪊꪮꪉ ꪵꪭꪉ ꫃ꪤꪒ ꪹꪥꪙ ꪬꪱꪀ ꪫꪱ ꪹꪝ ꪕꪱꪉ ꪬꪱꪥ ꪨꪱꪥ ꪵꪎ ꪶꪕ ꪁꪷ ꪹꪚꪱ ꪵꪮ ꪹꪄꪱ ꪹꪣ ꪀꪱ ꪚꪱꪙ , ꪹꪋꪉ ꪼꪭ ꪄꪮꪉ ꪙꪱ ꪹꪏꪉ ꪹꪄꪱ ꪩꪲ, ꪣꪽ ꪀꪷ ꫃ꪤꪒ ꪮꪮꪀ ꪹꪚꪱ ꪄꪱꪥ ꪼꪒ ꪄꪱꪥ ꪼꪒ ꪁꪷ ꪊꪺꪚ ꫛ ꪁꪱ ꪶꪄꪣ ꪙꪱꪚ ꪁꪱ. ꪹꪝ ꪹꪏꪉ ꪙꪽ ꪁꪒꪷ ꪁꪉꪴ ꪁꪳ ꪊꪚꪷ ꪒꪽ ꪜꪺꪉ ꪀꪙꪸ ꪩꪺꪉ ꪤꪴ ꪄꪮꪉ ꪝꪲ ꪙꪮꪉ.

          ꪼꪅ ꪀꪱ ꪚꪱꪙ ꪹꪔꪉ ꪀꪱ ꪣꪲ 32 ꪋꪺ ꪹꪭꪙ ꫄ꪤꪙ ꪭꪳ ꪣꪲ ꪭꪮꪒ 32 ꪬꪺ ꫛ ꪹꪚ ꪱꪣꪲ ꪘꪱ ꪘꪉꪷ ꪹꪭꪙ ꪼꪜ ꫃ꪥꪒ ꪊꪱꪉ ꪀꪱ ꪣꪙꪸ ꪘꪱꪣ , ꪶꪝ ꪒꪴꪒ ꪖꪫꪥꪸ ꪒꪙꪲ ꫃ꪥꪒ ꪹꪥꪙ ꪔꪱꪈ ꪼꪜ ꪣꪱ ꪥꪱꪀ ꪋꪱ ꪹꪚ ꪱꪼꪄ ꪀꪫꪱꪉ ꪬꪮꪉ ꫃ꪤꪒ ꪩꪺꪉ ꪹꪥꪙ. ꪝꪲ ꪙꪮꪉ ꪑꪱꪥ ꪹꪣ ꪤꪴ ꪚꪱꪙ ꪻꪢ ꪹꪚꪱ ꪊꪀꪷ ꪀꪲ ꪎꪚꪲ ꪝꪲ ꪵꪩꪫ ꪬꪱꪀ ꪪꪱ ꪜꪺꪉ ꪀꪙꪲ ꪩꪺꪉ ꪤꪴ ꪑꪉꪷ ꫃ꪭ ꪵꪕꪒ ꪕꪉꪸ. ꫛ ꫄ꪤꪙ ꪚꪱꪙ ꪹꪔꪉ ꪀꪱ ꪁꪷ ꪻꪠ ꪣꪮꪙ ꪣꪲ ꫃ꪎꪣ ꪕꪱꪉ ꫜ ꪀꪫꪱꪉ ꪎꪱꪉ ꪼꪜ ꪣꪱ ꪉꪱꪥ ꪒꪲ ꪻꪬ ꪕꪱꪉ ꪮꪱꪙ.

                                                Hồng Việt - Hạnh dịch

Bản Tường Cà mong cong mi xểm tang máư lằng 40 pi

nhại pày dú bón máư pưa thuỷ điện Hoà Bình

          Xểm tang đin nọi kẹp hy cài 2 cày số té càng ong xã Tân Lang khửn mưa bản Tường Cà lăng mỏi há phôn lỏ mưn pông cơ va ta pi, pưa đin há lày ma. Cọ mi tưa phôn nháư cọ cọt xia đin há nhăng mi to cỏn đán nháư nọi, dệt côn dân pày ma dạk cha. Mi to côn pày máy ngan chắng dám pày, con thảu cánh lếch nọi hư nhang tin ta va tang lắc. Cọ lai côn chuốp lộm, uối xuổng xửa, mi chơ nhăng chếp bát. Pưng côn thảu ké pên bệnh, yếu xem, phủ nhinh dú pa thâng bươn chi hên nả pọm đảy chảng côn ham lông pày cá trung tâm xã, pưa báu xương đàư khí xe máy đảy nẳng xểm tang nị.

          Cư sáo 2 - 3 bươn, pi nọng cuông bản chướng căn pày sảng panh tang tưa nưng, hák va đảy kỷ dan lỏ pên xương cáu. Lai nọng pày ép cá xã đảy tứn té chạu, hák va mi nọng cọ chuốp pày lớp đút chơ va mự đàư pày càng tang chuốp phạ phôn báu cọ mók cụa mươi hăm.

          Nhại dân mưa dú bản máư đảy 12 pi lẹo, côn dân bản Tường Cà sắc chọng, mự đàư cọ mưa hay pày na chóng hanh dệt dượn, hak va pưa tang hại lài, xe tô cọ báu é khảu mưa cá bản, chương hay khong na, xương khảu li, măn co dệt ók báu khài đảy, báu cọ chuốp côn cạ khốm nẹp ca. Pưa xương nặn, cặt cung cư chắp đẳn puông kin luông dú khong pi nọng.

          Khay cá bản Tường Cà mi 32 chua hươn dân hư mi họt 32 hùa côn báu mi nả nẳng hươn, pày chảng dệt vịa cá Miên Nam, pộ đút thiếu đin dệt dượn, tang pày ma dạk cha báu khày quảng hỏng dệt luông dượn. Pi nọng nhại mưa dú bản máư báu chắc kỷ xíp pi lẹo hak va puông kin luông dú nhăng hê tẹt tiêng. Côn dân bản Tường Cà phaư mon đảy dom ngơn dệt xểm tang nưng quảng sáng pày ma ngai đi hảu tiêng an./.     

                                                Hồng Việt - Hạnh dịch