Puồng kìn đơi dú mắư khòng pi nọng chựa côn Cống nẳng phổng đèn mương Điện Biền

--------------

Cón nị, chủm mú pi nọng chựa côn Cống nẳng bản Púng Bòn, xã Pa Thơm, huyện Điện Biền dú riềng cắp tang nọk, puồng kìn đơi dú phân lài lỏ hák dệt hák kìn, kếp phắc hà nó cuồng pá. Chơ nặnm bản lâng chơ báu mi côn dú hươn pưa chu côn pọm khảu pá xáo hà chương kìn. Mi tưa pày họt bườn chắng táo ma hươn. Chơ nặn cuồng bản báu mi phằư hụ xừ, báu mi phằư hụ pák quam kèo, puồgn kìn đơi dú cặt cung, khổ báp:

Púng Bòn mự nị cọ mi pưng luông piến thái chảnh chék, cắp pưng làng hươn hạn lặp lan cuồng xuần cò kìn mák. Tang khảu bản cọ đảy nho cấp, làn nọi đảy pày trương ép xừ, côn thảu ké đảy khám dà bệnh tục po.

Pì 2005, điện phén mương đảy lạk mưa họt bản, cọ dệt piến thái lài khù nẳng phổng nị. Côn dần báu đảy xủ tiên nặm măn, mi đải, mi ti vi vạy le choi hẳư côn dần nho xùng luông hụ xiêng. Họt khay côn dần bản Púng Bòn cọ hụ tí thàng tông na púk xăm đằm khảu cắp tà đìn dáo 10 héc ta, cuồng nặn mi 3 -4 héc ta dệt đảy 2 mua, té nặn puồng kìn đơi dú khòng pi nọng cọ đảy nho xùng.:

Cài 6 pì chấp năm đề án cọ cựt ma lưng lang đì nhắư luồng, xương chự mẳn pưng pàng hội, tủm pua dệt lau pưng tàng chương nhạc, chiên páo vằn hoá chựa côn Cống cánh tựng dan pả vang xìa pưng hịt khong cáu ké. Khay nị chựa côn Cống nẳng Púng Bòn cọ pày ma, ỉn muôn, dệt kìn cắp lài chựa côn ứn. Té nặn nho xùng puồng kìn đơi dú, hôm phân tủm pua nghịa cạt sàn cánh tạ đảy luông tin chưa khòng chủm mú chựa côn Cống đối cắp Đảng, hươn nước, hôm phân chự mẳn tiêng àn chính trị, tiêng àn bản mương nẳng phổng đèn mương./.

ꪝꪺꪉ ꪀꪲꪙ ꪹꪒꪷꪥ ꪤꪴ ꪻꪣ ꪄꪮꪉ ꪝꪲ ꪙꪮꪉ ꪹꪋ ꫛ ꪶꪀꪉ ꪘꪉꪰ ꪔꪉꪲ ꪒꪙꪸ ꪚꪙꪸ

-------------------------

ꪀꪮꪙ ꪙꪲ ꪊꪴꪣ ꪢꪴ ꪝꪲ ꪙꪮꪉ ꪹꪋ ꫛ ꪶꪀꪉ ꪘꪉꪰ ꪚꪱꪙ ꪜꪉꪴ ꪚꪮꪙ , ꪎꪱ ꪜꪱ ꪹꪗꪷꪙ , ꪭꪫꪙꪸ ꪒꪙꪸ ꪚꪙꪸ ꪤꪴ ꪦꪉꪸ ꪀꪚꪰ ꪕꪱꪉ ꪙꪮꪀ , ꪜꪺꪉ ꪀꪲꪙ ꪹꪓꪷꪥ ꪤꪴ ꪹꪡꪷꪙ ꪨꪱꪥ ꪬꪱꪀ ꪹꪥꪸꪒ ꪬꪱꪀ ꪀꪲꪙ , ꪹꪀꪸꪚ ꪠꪀꪰ ꪬꪱ ꪘꪷ ꪀꪺꪉ ꪜꪱ. ꪹꪋꪷ ꪘꪽ ꪚꪱꪘ ꪹꪩꪷꪉ ꪹꪋꪷ ꪹꪚꪱ ꪣꪲ ꫛ ꪤꪴ ꪹꪭꪙ ꪹꪝ ꪋꪴ ꫛ ꪝꪮꪣ ꪹꪄꪱ ꪜꪱ ꪬꪱ ꪹꪋꪉ ꪀꪙꪲ. ꪣꪲ ꪹꪕ ꪼꪜ ꪬꪮꪒ ꪹꪚꪙ ꪊꪉꪰ ꪣꪱ , ꪹꪋꪸ ꪙꪽ ꪀꪺꪉ ꪚꪱꪙ ꪁꪷ ꪹꪚꪱ ꪣꪲ ꪻꪠ ꪭꪴ ꪎꪳ , ꪜꪺꪉ ꪀꪲꪙ ꪹꪓꪷꪥ ꪤꪴ ꪁꪒꪰ ꪁꪉꪴ.

ꪜꪉꪴ ꪚꪮꪙ ꪣꪳ ꪙꪲ ꪁꪷ ꪣꪲ ꪩꪺꪉ ꪜꪙꪸ ꪖꪱꪥ ꪵꪊꪉ ꪵꪊꪀ , ꪀꪚꪰ ꪝꪉꪳ ꪨꪱꪉ ꪹꪭꪙ ꪭꪱꪙ ꪩꪚꪰ ꪩꪱꪙ ꪁꪺꪉ ꪎꪺꪙ ꪊꪷ ꪀꪲꪙ ꪢꪱꪀ. ꪔꪱꪉ ꪹꪄꪱ ꪚꪱꪙ ꪼꪒ ꪑꪷ ꪹꪀꪷꪚ , ꪨꪱꪙ ꪙꪮꪥ ꪼꪒ ꪼꪜ ꪹꪋꪉ ꪵꪮꪚ ꪎꪳ, ꫛ ꪹꪖꪱ ꪼꪒ ꪹꪤꪱ ꪤꪱ ꪹꪛꪸꪉ ꪕꪀꪴ ꪝꪷ

ꪜꪲ 2005, ꪒꪙꪸ ꪵꪠꪙ ꪹꪣꪉ ꪼꪒ ꪨꪱꪀ ꪹꪣ ꪭꪮꪒ ꪚꪱꪙ , ꪁꪷ ꪹꪥꪸꪒ ꪜꪙꪸ ꪖꪱꪥ ꪨꪱꪥ ꪄꪴ ꪘꪉꪰ ꪶꪠꪉ ꪙꪲ. ꫛ ꪹꪤꪷꪙ ꪹꪚꪱ ꪼꪒ ꪎꪴ ꪕꪙꪸ ꪙꪣꪾ ꪣꪽ , ꪣꪲ ꪒꪱꪥ , ꪕꪲ ꪫꪲ ꪼꪫ ꪵꪩ ꪑꪷ ꪎꪴꪉ ꪩꪺꪉ ꪭꪴ ꪏꪉꪸ. ꪭꪮꪒ ꪼꪅ ꫛ ꪹꪤꪷꪙ ꪚꪱꪙ ꪜꪉꪴ ꪚꪮꪙ ꪁꪷ ꪭꪴ ꪔꪲ ꪖꪱꪉ ꪶꪕꪉ ꪙꪱ ꪜꪴꪀ ꪏꪣꪾ ꪒꪣꪾ ꪹꪄꪱ ꪀꪚꪰ ꪔꪱ ꪒꪙꪲ ꪤꪱꪫ 10 ꪵꪬꪀ ꪕꪱ ꪀꪺꪉ ꪙꪽ ꪣꪲ ꪭꪮꪒ 3 – 4 ꪵꪬꪀ ꪕꪱ ꪹꪥꪸꪒ ꪼꪒ ꪀꪱ 2 ꪣꪺ , ꪵꪔ ꪙꪽ ꪜꪺꪉ ꪀꪲꪙ ꪹꪓꪷꪥ ꪤꪴ ꪄꪮꪉ ꪝꪲ ꪙꪮꪉ ꪁꪜ ꪼꪒ ꪐꪷ ꪎꪉꪴ.

          ꪀꪱꪥ 6 ꪜꪲ ꪹꪊꪷꪚ ꪙꪣꪾ ꪹꪒꪸ ꪮꪱꪙ ꪢꪱ ꪼꪄ ꪶꪠꪉ ꪝꪲ ꪙꪮꪉ ꪹꪋ ꫛ ꪶꪀꪉ ꪁꪷ ꪥꪒꪳ ꪣꪱ ꪝꪉꪳ ꪩꪱꪉ ꪒꪲ ꪻꪐ ꪨꪺꪉ , ꪹꪏꪉ ꪋꪳ ꪢꪽ ꪝꪉꪳ ꪜꪱꪉ ꪶꪭꪥ , ꪝꪉꪳ ꪔꪱꪉ ꪹꪋꪉ ꪑꪱꪀ ꪁꪷ ꪼꪒ ꪹꪤꪸꪒ ꪹꪩꪱ , ꪹꪉꪙ ꪩꪱꪉ ꪪꪽ ꪬꪱꪫ ꪼꪒ ꪋꪳ ꪬꪣꪸ , ꪵꪩꪫ ꪝꪉꪳ ꪭꪲꪒ ꪅꪮꪉ ꪹꪀꪱ ꪵꪀ ꪁꪷ ꪼꪒ ꪜꪱ ꪪꪱꪉ ꪎꪸ. ꪼꪅ ꪙꪲ ꪻꪋ ꫛ ꪶꪀꪉ ꪘꪉꪰ ꪚꪱꪙ ꪜꪉꪴ ꪚꪮꪙ ꪁꪷ ꪼꪜ ꪢꪱ , ꪮꪙꪲ ꪣꪺꪙ , ꪹꪥꪸꪒ ꪀꪲꪙ ꪀꪚꪰ ꪨꪱꪥ ꪹꪋ ꫛ ꪮꪙꪳ. ꪵꪔ ꪙꪽ ꪑꪷ ꪎꪉꪴ ꪜꪺꪉ ꪀꪲꪙ ꪹꪒꪷꪥ ꪤꪴ ꪼꪒ ꪑꪷ ꪎꪉꪴ, ꪶꪭꪣ ꪹꪡꪷꪙ ꪋꪳ ꪢꪽ ꪕꪉꪸ ꪮꪱꪙ ꪊꪉꪲ ꪋꪲ , ꪕꪉꪸ ꪮꪱꪙ ꪚꪱꪙ ꪹꪣꪉ ꪘꪉꪰ ꪶꪠꪉ ꪵꪒꪙ ꪹꪣꪉ.

 Vũ Lợi – Thành dịch