Ngon tô khù po hay me na cận hụ số 13

          Chiêng pi nọng hặc xường! Mù long lai lỏ tàng tồ cựt đảy ca con xùng, ngon tô khù po hay me na cận hụ tuân nị, xum khỏi xò chiên xú pi nọng san luông pùn ma tang liệng mù long lai vạy pi nọng chấp năm.

Pưng khù cận pồng chằư chơ liệng mù long lai

          Mù long lai lỏ lụk khòng tồ mù long po lai cắp mù me  địa phường pói pháng khòng pi nọng chựa nọi côn lâng liệng, tồ mù lai cọ hanh chỏng đảy bệnh. Chơ tồ mù nhắư tồ po lâng nắc cần xưa tồ me, tồ po nắc té 50 họt 70 cần, tồ me nắc té 30 họt 40 cần. Mù long lai cọ chọp xồm cắp vịa pói liệng nẳng xuần. Mù long lai cọ liệng ngai, cựt đảy lang đì kinh tế xùng.

          Mù long lâng xáo kìn tênh cưn, tênh vên lỏ lỏ non. Nhứa mù long lai báu đành xương mù bản, hák va lài nhứa chình, nọi pi, nằng bàng, nhứa kìn ài hòm, chất Cholerteron tắm, lài côn mặc kìn xương nặnkhài đảy panh.

          Pi nọng pền pồng chằư tẳng cọk bâng chọp xồm vạy liệng. Cọk bâng tảnh liệng mù long lai cận xày quảng dáo 4 thứak môn. Cok bâng cận mi mung, pựn cọk bâng dệt pựn đìn báu pền pù xi măng. Pền mi phiềng đìn vạy pói mù nọi àu hụa lếch ma lọm xìa. Cuồng phiềng pền púk san tàng cò xương cò mák mịk, cò mạy póng vạy dệt hôm. Bón liệng cọ đảy mi nặm pẹk.

          Pi nọng mi xương liệng mù long lai xằng cuồng cọk báu cọ pói pháng nẳng pưng phổng mi cò mạy, mi hụa lọm. Hụa lọm đảy dệt mẳn đì. Mi xương àu hụa lếch ma ỏm lọm, mỏi xuần liệng quảng té 50 họt 100 thứak môn( tàm toi đìn quảng hư va kẹp)

          Chương kìn phân lài lỏ chương kìn đíp xương phắc, mak nuối, hạ mạy, chương kìn bột xương bột mák thúa, bột khảu li mi xương tứm ten cừa khoáng xương tau phay, đìn he…Nọk nặn ók, mi xương tứm ten hẳư tồ mù kìn xương bột đúk, chương kìn tổng hợp…Pi nọng cận piến nặm pẹk vạy chự phong bệnh chếp pùm.

          Pi nọng báu pền hẳư kìn lài chương kìn mi lài chất  pưa măn dệt hẳư chất lượng nhứa dón lông. Chương kìn chọp sồm cắp mù long lai ặn lỏ phắc bủng, phắc cát, pưng tàng nhả, mák nuối. Chương kìn bột hăm khảu, hăm khảu li, bột mák thúa, măn ngồ, măn cò…

          Mỏi mự hẳư tồ kìn 2 pựa chính( tứn chạu cánh tênh căm, chương kìn lỏ hăm khảu cánh hăm tổng hợp), tênh vên hẳư kìn tứm phắc, nhả, mák nuối.

          Hạng mự đảy tọn cọk bâng, tọn chương kìn xưa ók xìa, suối lạng hang hăm, hang nặm…

          Chơ mù long lai pền san tàng bệnh ma tang chếp pùm tháo tọng mi xương hẳư kìn dà…mi xương hẳư kìn té 5 họt yển nưng phắc póp báu cọ hẳư kìn tứm nặm xương nặm bằư uổi, nặm cà ốt, nặm hạ cò mák pạo, cọ mi xương hóm. Chơ phạ đìn piến thái báu ngau hèn tồ mù báu é kìn hăm hư cận hẳư kìn dà kháng sinh qua xắư chương kìn báu cọ qua xắư nặm hẳư mù kìn hẳư kìn dà cuồng dan 3 mự, hẳư dặng té 7 báu cọ 10 mự, xứp pày chắng hẳư kìn dà tứm 3 mự mắư, cứ xương nặn tặm họt chơ mù hóm hảo hanh ók.

          Ngon tô: Khù po hay me na cận hụ họt nị xò dặng cón. Ngon tô nị đảy Đài quam pák Việt nàm Việt Nàm cạt kiên cắp Trung tâm khuyến nông chấp năm./.

Huyền dịch

ꪄꪴ ꫄ꪁꪙ ꪶꪜꪉ ꪻꪊ ꫄ꪋ ꪩꪉꪸ ꪢꪴ ꪩꪮꪉ ꪩꪱꪥ

          ꪢꪴ ꪩꪮꪉ ꪩꪱꪥ ꪨꪷ ꪩꪴꪀ ꪄꪮꪉ ꪶꪔ ꪢꪴ ꪩꪮꪉ ꪝꪷ ꪩꪱꪥ ꪀꪚꪾ ꪢꪲ ꪵꪣ ꪒꪸ ꪹꪠꪉ ꪜꪮꪥ ꪠꪱꪉ ꪄꪮꪉ ꪝꪲ ꪙꪮꪉ ꪹꪋ ꪙꪮꪥ ꫛ ꫄ꪩꪉ ꪩꪉꪸ ,ꪶꪔ ꪢꪴ ꪩꪱꪥ ꪣꪲ ꪵꪭꪉ ꪊꪮꪉ ꪼꪒ ꫃ꪛꪉ. ꪢꪴ ꪻꪐ ꪶꪔ ꪝꪷ ꪘꪀꪰ ꪹꪏ ꪶꪔ ꪵꪣ ,ꪶꪔ ꪝꪷ ꪘꪀꪰ ꪵꪔ 50 ꪭꪮꪒ 70 ꫄ꪀꪙ ,ꪶꪔ ꪵꪣ ꪘꪀꪰ ꪵꪔ 30 ꪭꪮꪒ 40 ꫄ꪀꪙ. ꪢꪴ ꪩꪮꪉ ꪩꪱꪥ ꪋꪮꪚ ꪶꪎꪣ ꪀꪚꪾ ꪩꪉꪸ ꪜꪮꪥ ꪘꪉꪰ ꪎꪺꪙ. ꪢꪴ ꪩꪮꪉ ꪩꪱꪥ ꪩꪉꪸ ꪉꪱꪥ ,ꪁꪒꪳ ꪼꪒ ꪩꪱꪉ ꪒꪲ ꪀꪉꪲ ꫃ꪔ ꪎꪴꪉ.

          ꪢꪴ ꪩꪮꪉ ꫄ꪩꪉ ꪎꪱꪫ ꪀꪙꪲ ꫃ꪕꪉ ꪁꪙꪳ ꫃ꪕꪉ ꫃ꪫꪙ ꪨꪷ ꪙꪮꪙ. ꪹꪐ ꪢꪴ ꪩꪮꪉ ꪩꪱꪥ ꪹꪚꪱ ꪵꪒꪉ ꪹꪏꪉ ꪢꪴ ꪚꪱꪙ ꪬꪱꪀ ꪫꪱ ꪣꪲ ꪨꪱꪥ ꪹꪐ ꪊꪉꪲ ꪙꪮꪥ ꪝꪲ, ꪹꪐ ꪀꪙꪲ ꪮꪱꪥ ꪬꪮꪣ ,ꪨꪱꪥ ꫛ ꪣꪀꪰ ꪀꪙꪲ ꪹꪏꪉ ꪙꪽ ꪀꪱꪥ ꪼꪒ ꪁꪱ ꪵꪝꪉ.

          ꪝꪲ ꪙꪮꪉ ꫃ꪜꪙ ꪶꪜꪉ ꪻꪊ ꪔꪉꪰ ꪀꪮꪀ ꫄ꪛꪉ ꪋꪮꪚ ꪶꪎꪣ ꪼꪫ ꪩꪉꪸ. ꪀꪮꪀ ꫄ꪛꪉ ꪵꪔꪉ ꪩꪉꪸ ꪼꪒ ꪼꪎ ꪀꪫꪱꪉ ꪤꪱꪫ 4 ꪵꪖꪀ ꪶꪣꪙ. ꪀꪮꪀ ꫄ꪁꪙ ꪣꪲ ꪣꪴꪉ ,ꪝꪙꪳ ꫃ꪥꪒ ꪝꪙꪳ ꪒꪙꪲ ꪹꪚꪱ ꪜꪴ ꪏꪲ ꪣꪉꪰ .꫃ꪜꪙ ꪣꪲ ꪠꪉꪸ ꪒꪲꪙ ꪼꪫ ꪜꪮꪥ ꪢꪴ ꪙꪮꪥ ꪹꪮꪱ ꪬꪺꪀ ꫃ꪨꪀ ꪣꪱ ꪩꪮꪣ ꪎꪸ. ꪀꪺꪉ ꪠꪉꪸ ꫃ꪜꪙ ꪜꪴꪀ ꪎꪱꪙ ꪔꪱꪉ ꪀꪷ ꪼꪣ ꪹꪏꪉ ꪀꪷ ꪣꪲ, ꪀꪾ ꪼꪣ ꪜꪮꪉ ꪼꪫ ꫃ꪥꪒ ꪶꪭꪣ. ꪚꪮꪙ ꪩꪉꪸ ꪼꪒ ꪣꪲ ꪙꪣꪾ ꪵꪝꪀ.

          ꪹꪋꪉ ꪀꪙꪲ ꪻꪬ ꪢꪴ ꪩꪮꪉ ꫄ꪡꪙ ꪨꪱꪥ ꪨꪷ ꪹꪋꪉ ꪀꪙꪲ ꪒꪚꪲ ꪹꪏꪉ ꪠꪀꪰ , ꪢꪱꪀ ꪘꪺꪥ , ꪭꪱ ꪼꪣ ,ꪹꪋꪉ ꪀꪙꪲ ꪶꪛꪒ ꪹꪏꪉ ꪶꪛꪒ ꪢꪱꪀ ꪖꪺ ,ꪶꪛꪒ ꪹꪄꪱ ꪩꪲ. ꪙꪮꪀ ꪙꪽ ꪮꪮꪀ ꪣꪲ ꪹꪏꪉ ꪔꪣꪳ ꪵꪕꪙ ꪻꪬ ꪶꪔ ꪢꪴ ꪀꪙꪲ ꪶꪛꪒ ꪒꪴꪀ ,ꪹꪋꪉ ꪀꪙꪲ ꪶꪔꪉ ꫄ꪭꪚ. ꪜꪲ ꪙꪮꪉ ꫄ꪁꪙ ꪜꪙꪸ ꪙꪣꪾ ꪵꪝꪀ ꪼꪫ ꪋꪳ ꪡꪮꪉ ꫃ꪛꪉ ꫃ꪊꪚ ꪜꪴꪣ.

          ꪝꪲ ꪙꪮꪉ ꪹꪚꪱ ꫃ꪜꪙ ꪼꪬ ꪢꪴ ꪀꪙꪲ ꪹꪋꪉ ꪀꪙꪲ ꪣꪲ ꪨꪱꪥ ꫄ꪊꪒ ꪹꪝ ꪣꪽ ꪋꪲ ꫃ꪥꪒ ꪻꪬ ꫄ꪊꪒ ꪹꪨꪉ ꪹꪐ ꪤꪮꪙ ꪶꪩꪉ. ꪹꪋꪉ ꪀꪙ ꪶꪚꪒ ꪭꪣꪾ ꪹꪄꪱ, ꪭꪣꪾ ꪹꪄꪱ ꪩꪲ ꪶꪛꪒ ꪢꪱꪀ ꪖꪺ , ꪣꪽ ꪀꪽ.

          ꪢꪮꪥ ꪣꪳ ꪻꪬ ꪶꪔ ꪢꪴ ꪀꪙꪲ 2 ꪹꪝ ꪊꪉꪲ ꪔꪙꪳ ꪋꪹꪱ ꪵꪀꪉ ꫃ꪕꪉ ꪁꪣꪾ ꪹꪋꪉ ꪀꪙ ꪲ ꪨꪷ ꪭꪣꪾ ꪹꪄꪱ ꪵꪀꪉ ꪭꪣꪾ ꪶꪔꪉ ꫄ꪭꪚ. ꫃ꪕꪉ ꫃ꪫꪙ ꪻꪬ ꪀꪙꪲ ꪔꪣꪳ ꪠꪀꪰ ꪐꪱ ꪢꪱꪀ ꪘꪺꪥ.

          ꪭꪱꪉ ꪣꪳ ꪼꪒ ꪕꪮꪙ ꪀꪮꪀ  ꪵꪝꪀ ꪻꪎ ꪕꪮꪙ ꪹꪋꪉ ꪀꪙꪲ ꪹꪏ ꪮꪮꪀ ꪎꪸ, ꪎꪺꪥ ꪩꪱꪉ ꪭꪱꪉ ꪭꪣꪾ ꪭꪱꪉ ꪙꪣꪾ.

          ꫄ꪋ ꪢꪴ ꪩꪮꪉ ꪩꪱꪥ ꫃ꪜꪙ ꪏꪱꪙ ꪔꪱꪉ ꫃ꪛꪉ ꪣꪱ ꪕꪱꪉ ꫃ꪊꪚ ꪜꪴꪣ  ꪣꪲ ꪹꪏꪉ ꪻꪬ ꪀꪙꪲ ꪤꪱ. ꪻꪬ ꪀꪙꪲ ꪔꪣꪳ ꪵꪔ 5 ꫄ꪀꪙ ꪭꪮꪒ 10 ꫄ꪀꪙ ꪠꪀꪰ ꪜꪮꪚ ꪹꪚꪱ ꪁꪷ ꪻꪬ ꪀꪙꪲ ꪔꪣꪳ ꪙꪣꪾ ꪻꪚ ꪮꪺꪥ ,ꪙꪣꪾ ꪭꪱꪀ ꪀꪷ ꪢꪱꪀ ꪜꪱꪫ. ꫄ꪋ ꪡꪱ ꪒꪙꪲ ꪜꪙꪲ ꪖꪱꪥ ꪹꪚꪱ ꪹꪉꪱ ꫃ꪬꪙ ꪶꪔ ꪢꪴ ꫃ꪊ ꪭꪣꪾ ꫄ꪁꪙ ꪻꪬ ꪀꪙꪲ ꪤꪱ ꪁꪫꪱ ꪻꪎ ꪭꪣꪾ ꪹꪚꪱ ꪁꪷ ꪙꪣꪾ ꪻꪬ ꪢꪴ ꪀꪙꪲ  ꪀꪺꪉ ꪥꪱꪙ 3 ꪣꪳ ꪵꪩꪫ ꪻꪬ ꪥꪉꪰ ꪵꪔ 7 ꪭꪮꪒ 10 ꪣꪳ, ꪎꪚꪳ ꪜꪼ ꪊꪉꪰ ꪻꪬ ꪀꪙꪲ ꪔꪣꪳ 3 ꪣꪳ ꪻꪢ ꪁꪳ ꪹꪏꪈ ꪙꪽ ꪕꪣꪾ ꪭꪮꪒ 7ꪋ ꪶꪔ ꪢꪴ ꪬꪮꪣ.

ꪹꪩꪉ ꪬꪫꪙꪸ ꪥꪀꪲ