ꪛꪱꪥ ꪖꪳ 2 ꪣꪳ 17.7.2017

ꪨꪱꪥ ꪹꪊꪱ ꫛ ꫄ꪤꪙ ꪑꪉꪰ ꪒꪴ ꪉꪱꪥ ꪀꪚꪾ ꪶꪠꪙ ꪙꪮꪉ

ꪭꪫꪙꪸ ꪶꪠꪉ ꪎꪉꪴ ꪎꪙꪲ ꪶꪬ ꪨꪷ ꪒꪸ ꪹꪠꪉ ꪶꪠꪙ ꪨꪱꪥ ꪀꪺꪉ ꪝꪭꪳ ꪣꪴ ꪀꪱꪥ ꪣꪱ. ꪭꪮꪒ ꪼꪅ ꪊꪉꪲ ꪁꪫꪙꪸ ꪵꪀꪉ ꪝꪉꪳ ꪵꪈꪉ ꪣꪲ ꪊꪀꪳ ꪁꪫꪙꪸ ꪘꪉꪰ ꪭꪫꪙꪸ ꪁꪷ ꪑꪱꪥ ꪋꪙꪸ ꪼꪒ ꪀꪱꪥ 40 ꪋꪺ ꪹꪭꪙ ꫄ꪤꪙ ꪀꪺꪉ ꪶꪠꪉ ꪣꪲ ꪹꪏꪉ ꪋꪲ ꪊꪺꪚ ꪁꪱꪙ ꪶꪋꪒ ꪼꪜ ꪤꪴ ꪚꪮꪙ ꪕꪉꪸ ꪮꪱꪙ. ꪬꪱꪀ ꪫꪱ ꪵꪔ ꪬꪺ ꪣꪺ ꪶꪠꪙ ꪭꪮꪒ ꪼꪅ ꪒꪸ ꪹꪠꪉ ꪁꪷ ꪣꪲ 4 ꫛ ꪊꪺꪚ ꪏꪒꪸ ꪣꪷ ꪘꪺꪉ ꪝꪱꪙ ꪭꪮꪒ ꪶꪠꪙ ꪙꪮꪉ ꫄ꪡꪙ ꪨꪱꪥ ꪝꪮꪣ ꪶꪝ ꪒꪴ ꪉꪱꪥ ꫄ꪋ ꪄꪱꪣ ꪙꪣꪾ ꪙꪮꪉ. ꪊꪣꪾ ꪙꪲ ꫄ꪐꪒ ꫛ ꫄ꪤꪙ ꫜ ꪊꪺꪚ ꪏꪒꪸ ꪣꪷ ꪘꪉꪰ ꪚꪱꪙ ꪪꪱꪉ ꪛꪮꪙ ꪎꪱ ꪨꪉꪴ ꪖꪱꪉ ꪊꪺꪚ ꪔꪱꪥ ꪼꪨ ꪙꪮꪉ ꪀꪲ ꪣꪳ ꪨꪉꪰ ꪊꪉꪰ ꪎꪱꪫ ꫃ꪬꪙ.

ꪭꪫꪙꪸ ꪖꪱꪙ ꪮꪫꪙꪸ ꪶꪠꪉ ꪶꪀꪀ ꪊꪉꪲ ꪶꪠꪙ ꪙꪮꪉ ꪄꪮꪉ ꪔꪉꪲ ꪨꪱꪥ ꪹꪊꪱ ꪀꪺꪉ ꪋꪴ ꪶꪠꪙ ꪙꪮꪉ ꪵꪔ ꪨꪱ ꪹꪚꪙ 6 ꪣꪱ ꪭꪮꪒ ꪼꪅ ꪁꪷ ꫃ꪥꪒ 2 ꫛ ꪊꪺꪚ ꪏꪒꪸ ꪣꪷ ꪶꪝ ꪼꪜ ꪔꪀꪴ ꪜꪱ ꪙꪣꪾ ꪙꪮꪉ ꪵꪀꪉ ꪄꪱꪣ ꪙꪣꪾ ꪙꪮꪉ.

ꪔꪷ ꪥꪱꪙ ꪡꪱ ꪶꪠꪙ ꪙꪮꪉ ꪹꪚꪱ ꪹꪉꪱ ꪊꪉꪲ ꪁꪫꪙꪸ ꪭꪫꪙꪸ ꪁꪷ ꪣꪴ ꪨꪱꪥ ꪊꪸ ꪩꪱꪥ ꪕꪒꪰ ꪜꪙꪴ ꪡꪱꪀ ꪼꪬ ꪝꪉꪳ ꪎꪱ ꪗꪲ ꫄ꪊꪙ ꪁꪱꪒ ꪁꪙꪸ ꪀꪚꪾ ꪝꪉꪳ ꪶꪔ ꪊꪀꪳ ꪒꪫꪱꪙ ꫃ꪖ ꪚꪱꪙ ꪔꪣꪴ ꪝꪺ ꪋꪙꪸ ꪜꪱꪫ ꪻꪬ ꫛ ꫄ꪤꪙ ꪩꪺꪉ ꪋꪳ ꪡꪮꪉ ꪶꪠꪙ ꪙꪮꪉ.

ꪶꪠꪙ ꪙꪮꪉ ꪁꪷ ꫃ꪥꪒ ꪏꪒꪸ ꪭꪱꪥ ꪘꪀꪰ ꪘꪱ ꪻꪬ ꪝꪉꪳ ꪔꪉꪲ ꪼꪔ ꪚꪀꪰ. ꪘꪉꪰ ꪨꪱꪥ ꪹꪊꪱ 9 ꫛ ꪊꪺꪚ ꪏꪒꪸ ꪣꪷ ꪙꪚꪾ ꪵꪔ ꪬꪺ ꪣꪺ ꪶꪠꪙ ꪣꪱ ꪭꪮꪒ ꪼꪅ. ꪯꪽ ꪙꪲ ꪨꪷ ꪁꪫꪱꪣ ꪶꪔꪉ ꪜꪱꪫ ꪻꪬ ꪩꪺꪉ ꪒꪴ ꪉꪱꪥ ꪄꪮꪉ ꫛ ꫄ꪤꪙ ꪶꪠꪉ ꪙꪣꪾ ꪙꪮꪉ. ꪊꪉꪲ ꪁꪫꪙꪸ ꪁꪷ ꫄ꪅꪉ ꪻꪊ ꪜꪙꪴ ꪮꪮꪀ ꪨꪱꪥ ꪩꪺꪉ ꪵꪀ ꪁꪣꪾ ꪬꪱꪀ ꪫꪱ ꪼꪫ ꪤꪮꪙ ꪼꪒ ꪔꪣꪾ ꫄ꪐꪒ ꪏꪒꪸ ꪭꪱꪥ ꪣꪱ ꪕꪱꪉ ꪠꪴ ꫛ ꫛ ꫄ꪥꪙ ꫄ꪁꪙ ꪶꪜꪉ ꪻꪊ ꪹꪏ ꪻꪢ ꪼꪫ ꪼꪜ ꪋꪳ ꪩꪣꪾ ꪣꪷ ꪹꪊꪱ ꪵꪀꪉ ꪼꪕ ꪹꪭꪙ ꪹꪊꪱ ꫄ꪋ ꪣꪲ ꪶꪠꪙ ꪙꪮꪉ ꪹꪀꪒ ꪎꪉꪲ ꪮꪮꪀ.

Bài thứ 2 mự 17/7/2017

Lài Chầu côn dần nhăng đù ngai cắp phạ phồn nong

HUyện phổng xùng Sìn Hồ lỏ địa phường mi phồn lài nhất cuồng pưng mự cài ma. Họt khạy chính quyên cánh pưng ngành mi chức quyên nẳng huyện cọ nhại đảy cài 40 chua hươn dần cuồng phổng mi xương chi chuốp cạn chột cánh nong lạt pày họt bón tiêng àn. Hák va té hùa mua phồn ma họt khạy, địa phường cọ mi 4 côn chuốp xiệt mo nuống pan họt phồn nong, phân lài pọm pộ báu pồng chằư đù đì chơ khảm nặm nong chơ phồn luồng. Chằm nị nhất, côn dần nưng chuốp xiệt mo nẳng bản Vàng Bon, xã Lùng Thàng chơ khảm nặm chuốp lày nong kỷ mự lằng chắng xáo hền.

Pả Trần Thị Thu Hiền, trưởng phọng nồng nghiệp cánh mả pe bản na, Phó bàn uồn pa chự phong phồn nong cánh xáo hà cứu choi côn chuốp chọ nạn huyện Sìn Hồ tô: Cuồng hùa mua phồn, pì đằư huyện cọ mi cồng vằn tít tờn, uồn pa pưng địa phường họn khâng mi luông pùn kẻ cặm. Mỏi chu phồn nong, huyện nhăng hẳư cán bộ lông pày cạt kiên cắp chính quyên địa phường cánh pưng tổ chức đoàn thể họp bản vạy chiên páo niếu chưa côn dần báu non nẳng thiềng hay thiềng na, báu khảm nặm nong, báu túc pắt pà cánh báu tỏn lùa lày nong. Hák va côn dần nhăng đù ngai, pưa xương nặn pì đằư địa phường cọ mi côn chuốp xiệt mo pộ phồn nong.

Huyện Than Uyên phổng cốc chính chuốp phồn nong lài khòng tỉnh Lài Chầu, cuồng chu phồn nong lả bườn 6 ma họt khạy cọ mi 2 côn chuốp xiệt mo pộ đù ngai chơ pày túc pà cá nặm luồng cánh khảm nặm chơ nặm nong.

Tó gian phạ phồn đét báu ngau, chính quyên huyện cọ tặt pùn lài chỉa lai cồng điện chị bók pưng xã thị trấn cạt kiên cắp pưng tổ chức đoàn thể bản, tủm pua chiên páo hẳư côn dần luông chự phong vện ník.

Phồn nong cọ đàng dệt xiệt hại nắc nà hẳư pưng tỉnh Tày Bắc. Nẳng tỉnh Lài Chầu 9 côn chuốp xiệt mo nặp té hùa mua phồn nong. Ặn nị lỏ khù tống páo hẳư côn dần pộ báu pồng chằư đù đì chự phong phồn nong. Chính quyên cọ khâng chằư pùn ók lài luông kẻ khày, hák va vạy dón đảy tắm nhất xiệt hại ma tang lăm côn tồn phủ, côn dần cận pồng chằư đù đì vạy pảy chự lăm mo chảu cánh tay hươn chơ phồn nong cướt sình ók./.

                                                          CQTTTB-Anh dịch