ꪩꪺꪉ ꪜꪙꪴ ꪻꪒ ꪼꪫ ꪀꪫꪱꪙ ꪨꪲ ꪒꪲ ꪕꪉꪸ ꪮꪱꪙ  ꪁꪾ ꪀꪙꪲ?

ꪐꪽ ꪵꪥꪉ ꪊꪉꪴ ꪣꪱ ꪕꪱꪉ ꪫꪀꪸ ꫄ꪊꪚ ꪙꪾ ꪊꪉꪲ ꪵꪎꪀ ꪠꪱꪚ ꪩꪺꪒ ꪣꪱ ꪕꪱꪉ ꪩꪺꪒ ꪕꪉꪸ ꪮꪱꪙ ꪁꪾ ꪀꪙꪲ, ꪶꪛ ꪮꪲ ꫃ꪔ ꪻꪬ ꪭꪴ, ꪵꪔ ꪜꪲ 2011 ꪭꪮꪒ ꪜꪲ 2015ꪶ ꪀꪱ ꪹꪣꪉ ꪁꪷ ꪵꪖꪉ ꪊꪱ ꪀꪣꪸ ꪊꪱ ꪀꪱꪥ  3 ꪋꪫꪸ ꪫꪒꪰ ꫄ꪀ ꫄ꪎ ꫃ꪥꪒ ꪹꪋꪉ ꪀꪙꪲ, ꪶꪎ ꫄ꪀ ꫄ꪎ ꪠꪒꪲ ꪖꪀꪳ ꪤꪱꪫ 20%, ꪶꪎ ꫄ꪉꪙ ꪡꪱꪒ ꪤꪱꪫ 100 ꫜ ꪔꪲ ꪣꪽ. ꪀꪱꪥ ꪩꪣꪾ ꪵꪩ ꫄ꪩꪉ ꫄ꪋ ꪵꪔ ꪜꪲ 2011 ꪭꪮꪒ ꪜꪲ 2016 ꪁꪷ ꪻꪬ ꫃ꪬꪙ ꪹꪚ ꪹꪣꪱ ꪹꪋꪉ ꪀꪙꪲ ꪒꪱꪉ ꪨꪷ ꪘꪱ ꪫꪀꪸ ꪭꪮꪙ ꪭꪙꪳ. ꪀꪱ ꪹꪣꪉ ꪣꪲ ꪀꪱꪥ 1000 ꫜ ꪋꪴ ꪀꪚꪾ ꪀꪱꪥ 30 ꪝꪽ ꪵꪀꪉ 164 ꫛ ꪔꪱꪥ. ꪜꪽ ꫄ꪝꪉ ꪣꪲ 170 ꪋꪴ ꪀꪚꪾ ꪀꪱꪥ 5 ꪝꪽ ꫛ ꪊꪺꪚ ꪻꪚ ꪹꪣꪱ ꪵꪀꪉ ꪤꪱꪫ 30 ꫛ ꪔꪱꪥ ꪊꪺꪚ ꪹꪚ ꪹꪣꪱ ꪢꪮꪥ ꪜꪲ. ꪶꪛ ꪹꪊꪉ ꪶꪛ ꪶꪘꪉ ꪉꪚꪸ ꪢꪱ ꪵꪝ ꪚꪱꪙ ꪙꪱ ꪘꪫꪙꪸ ꪎꪺꪙ ꪹꪀꪉ ꪫꪱ ꪭꪀꪸ, ꪵꪫꪒ ꪻꪎ ꪥꪱꪙ ꪀꪮꪙ ꪫꪀꪸ ꪀꪣꪸ ꪊꪱ ꪀꪺꪉ ꪜꪲ ꪀꪱꪥ ꪣꪱ ꪁꪷ ꪁꪒꪳ ꪼꪒ ꪩꪱꪉ ꪒꪲ.

ꪁꪷ ꪕꪮꪥ ꪶꪛ ꪹꪊꪉ ꪶꪛ ꪮꪲ ꫃ꪔ ꪘꪫꪙꪸ ꪗꪲ ꪁꪣꪲ ꪔꪙꪸ ꪻꪬ ꪭꪴ, ꪝꪮꪣ ꪀꪚꪾ ꪵꪊꪀ ꪑꪣꪸ ꪄꪮꪉ 3 ꪶꪛ ꪘꪺꪉ ꪝꪱꪙ ꫄ꪁꪙ ꪔꪉꪲ ꪔꪱ ꪭꪮꪒ ꪵꪊꪀ ꪑꪣꪸ ꪄꪮꪉ ꪊꪉꪲ ꪁꪫꪙꪸ ꪒꪸ ꪹꪠꪉ ꪋꪴ ꫄ꪀꪚ. ꪹꪏꪉ ꪋꪴ ꪹꪚ ꪹꪣꪱ ꪹꪋꪉ ꪀꪙꪲ ꪘꪉꪰ ꪔꪉꪲ ꪨꪱꪥ ꪹꪊꪱ, ꪶꪛ ꪹꪊꪉ ꪮꪲ ꫃ꪔ ꪫꪱ ꪭꪀꪸ, ꪚꪮꪙ ꪻꪒ ꪼꪫ ꪹꪀꪒ ꪎꪉꪲ ꪮꪮꪀ ꫃ꪥꪒ ꪹꪨꪱ ꪤꪱ, ꪬꪫꪱ ꫄ꪊꪒ ꪹꪐ ꪢꪴ ꪤꪱ ꫃ꪜꪙ ꪹꪐ ꪉꪺ ꪶꪄ... ꪭꪳ ꪊꪉꪲ ꪁꪫꪙꪸ ꫄ꪀ ꫄ꪎ ꪙꪽ ꪼꪒ ꪣꪲ ꪵꪊꪀ ꪑꪣꪸ. ꪖꪳ ꪹꪊꪉ ꪶꪛ ꪶꪀꪉ ꪹꪖꪉ ꫄ꪊꪙ ꪀꪺꪀ ꪵꪄꪉ ꪹꪫꪱ ꪵꪊꪉ:

ꪘꪉꪰ ꪒꪸ ꪹꪠꪉ ꪻꪒ ꪣꪲ ꪩꪺꪉ ꪮꪺꪙ ꪝꪱ ꪒꪲ ꪭꪳ ꪘꪱ ꪫꪀꪸ ꪁꪷ ꪤꪮꪙ. ꪕꪳ ꪫꪱ ꪣꪲ ꪚꪮꪙ ꫃ꪥꪒ ꪼꪒ ꪣꪲ ꪚꪮꪙ ꪹꪚꪱ ꫃ꪥꪒ ꪼꪒ.

ꪔꪱꪉ ꪘꪱ ꪝꪉꪳ ꪶꪛ ꪎꪷ ꪼꪫ ꪙꪮꪀ ꪵꪖꪉ ꪊꪱ, ꪀꪣꪸ ꪊꪱ ꫄ꪁꪙ ꪡꪱꪒ ꪘꪀꪰ ꪝꪉꪳ ꫛ ꪠꪒꪲ ꪖꪀꪳ ꪕꪉꪸ ꪮꪱꪙ  ꪁꪾ ꪀꪙꪲ. ꪎꪮꪉ ꪣꪱ ꪑꪮꪉ ꪑꪷ ꪝꪉꪳ ꪩꪺꪉ ꫃ꪥꪒ ꪹꪥꪙ ꪵꪝꪀ ꪻꪎ. ꪩꪺꪉ ꪜꪙꪴ ꫄ꪬꪉ ꪭꪲ ꪨꪷ ꪫꪀꪸ ꪀꪫꪱꪙ ꪨꪲ ꪵꪜꪀ ꪻꪎ ꪁꪾ ꪀꪙꪲ ꪵꪔ ꫃ꪥꪒ ꪮꪮꪀ ꪭꪮꪒ ꪝꪱꪙ ꪀꪙꪲ; ꪀꪣꪸ ꪎꪫꪱꪒ ꪵꪙꪙ ꪘꪱ ꪝꪉꪳ ꪚꪮꪙ ꫃ꪥꪒ ꪹꪥꪙ ꫃ꪊ ꪚꪙꪸ ꪹꪋꪉ ꪼꪭ ꪄꪮꪉ ꪙꪱ ꪣꪲ ꪹꪏꪉ ꪋꪲ ꪹꪚꪱ ꪐꪽ ꪝꪱꪫ ꪕꪉꪸ ꪮꪱꪙ. ꪎꪚꪸ ꪩꪒꪰ ꪊꪣꪴ ꪢꪴ ꪀꪫꪱꪙ ꪨꪲ ꪵꪀꪉ ꪵꪖꪉ ꪊꪱ ꪊꪫꪙꪸ ꪵꪈꪉ ꪣꪱ ꪕꪱꪉ  ꪕꪉꪸ ꪮꪱꪙ ꪵꪝꪀ ꪻꪎ ꪁꪾ ꪀꪙꪲ.

ꪠꪷ ꪊꪴ ꪕꪀꪲ ꪀꪺꪀ ꪶꪭꪥ ꪠꪉꪴ ꪀꪺꪀ ꪬꪙꪸ- ꪹꪊꪉ ꪒꪫꪱꪙ ꪩꪣꪾ ꪵꪩ ꪔꪒꪲ ꫄ꪔꪙ ꪋꪴ ꪶꪛ ꫄ꪁꪙ ꪣꪲ ꪁꪫꪱꪣ ꪎꪷ ꪼꪫ ꪵꪊꪉ ꪖꪲ ꪋꪮꪚ ꪶꪎꪣ ꪀꪚꪾ ꪄꪴ ꪣꪲ ꪵꪕ ꪵꪝ ꪯꪽ ꪙꪲ ꪨꪷ ꪘꪱ ꪫꪀꪸ ꫄ꪁꪙ ꪬꪱ ꪼꪫ ꪔꪉꪰ ꪵꪔꪉ ꪉꪲ ꪀꪫꪒꪸ ꪩꪣꪾ ꪵꪩ ꪀꪺꪉ ꪥꪱꪙ ꪼꪜ ꪘꪱ.

                                              ꪊꪉꪴ ꫄ꪔꪣ ꪔꪙꪲ- ꪕꪮꪉ ꪵꪯꪉ ꪥꪀꪲ