ꪶꪭꪣ ꪵꪭꪉ ꪋꪮꪥ ꪭꪮꪀ ꪎꪉꪲ ꪶꪠꪉ ꪵꪒꪙ ꪹꪣꪉ ꪹꪣꪉ ꪵꪕ ꪼꪜ ꪹꪋꪉ ꪵꪮꪚ ꪎꪳ

        ꫄ꪋ ꪮꪮꪀ ꪮꪙꪲ, ꪕꪉꪳ ꪢꪴ ꪭꪮꪀ ꪎꪉꪲ ꪮꪀꪀ ꪣꪱ ꪠꪉꪸ ꪹꪋꪉ ꪮꪙꪲ ꪣꪺꪙ ꪤꪮꪀ ꪀꪽ ꪡꪮꪙ ꪹꪙꪉ. ꪕꪉꪳ ꪢꪴ ꫛ ꪠꪴ ꪨꪒꪲ ꪕꪮꪥ ꪎꪱꪥ ꪠꪴ ꪕꪮꪒ ꪹꪁꪱ... ꫃ꪭ ꪣꪲ ꪜꪲ ꪻꪒ ꪹꪋꪉ ꪔꪫꪥꪸ ꪭꪮꪀ ꪝꪱ ꫃ꪫ ꪎꪴ, ꪭꪫꪙꪸ ꪹꪣꪉ ꪵꪕ ꪣꪲ ꪶꪎ ꪭꪮꪀ ꪎꪉꪲ ꪎꪀꪷ ꪣꪱ ꪹꪋꪉ ꪵꪮꪚ ꪎꪳ ꪕꪀꪴ ꪝꪷ ꪹꪏꪉ ꪜꪲ ꪙꪲ, ꫄ꪋ ꪤꪱꪫ 250 ꪙꪮꪉ ꪬꪮꪀ ꪎꪉꪲ ꫄ꪩꪉ ꪣꪲ ꪘꪱ ꪘꪉꪾ ꫄ꪨꪚ. ꪋꪣꪾ ꪫꪱ ꪹꪭꪙ ꪹꪋꪉ ꪹꪚꪱ ꪣꪲ ꫃ꪊ ꪶꪓ ꪚꪱꪙ ꪊꪴ, ꪹꪭꪙ ꪤꪱꪫ ꪄꪮꪉ ꪝꪉꪳ ꪙꪮꪉ ꪑꪉꪷ ꪝꪷ ꪨꪱꪥ ꪥꪱꪀ ꪋꪱ, ꪬꪱꪀ ꪪꪱ ꪭꪮꪀ ꪎꪉꪸ ꪹꪋ ꫛ ꪢꪱꪉ , ꪶꪀꪉ ꪨꪱ ꪬꪴ ꪳꪻꪠ ꪁꪾ ꪎꪀꪷ ꪣꪱ ꪹꪋꪉ ꪵꪮꪚ ꪭꪙꪸ ꪎꪳ ꪎꪱꪙ.

          ꪙꪮꪉ ꪠꪉꪴ ꪢꪷ ꪵꪤ ꪭꪮꪀ ꪎꪉꪲ ꫄ꪨꪚ 5, ꪹꪋꪉ ꪔꪫꪥꪸ ꪭꪮꪀ ꪝꪱ ꫃ꪫ ꪎꪴ ꪻꪬ ꪭꪴ; ꪹꪭꪙ ꪙꪮꪉ ꪣꪲ 5 ꪙꪮꪉ ꪝꪸ ꪭꪳ ꪀꪱ 5 ꪙꪮꪉ ꪝꪸ ꪝꪮꪣ ꪣꪱ ꪹꪋꪉ ꪵꪮꪚ ꪎꪳ. ꪣꪱ ꪹꪋꪉ ꪵꪮꪚ ꪼꪒ ꪝꪷ ꪝꪲ ꪙꪮꪉ ꪛꪱꪙ ꪭꪺꪣ ꪜꪙꪴ ꪩꪱꪙ ꫃ꪕꪉ ꪵꪮꪚ ꫃ꪕꪉ ꪼꪒ ꪮꪙꪲ ꪣꪺꪙ ꪹꪏꪉ ꪙꪽ ꪙꪮꪉ ꪵꪀꪉ ꪝꪸ ꪙꪮꪉ ꪛꪱꪙ ꪻꪠ ꪁꪷ ꪣꪺꪙ. ꪙꪮꪉ ꪋꪲ ꪊꪮꪉ ꪵꪮꪚ ꪭꪮꪀ ꪻꪬ ꪼꪒ ꪩꪱꪉ ꪒꪲ ꪼꪫ ꪨꪉꪾ ꪩꪙꪳ ꪣꪱ ꪋꪮꪥ ꪝꪲ ꪙꪮꪉ ꪚꪱꪙ ꪄꪺꪉ ꪤꪮꪙ ꪎꪸ ꪁꪒꪷ ꪁꪉꪴ.

          ꪋꪣꪾ ꪫꪱ ꪹꪚꪱ ꪣꪲ ꪹꪊꪉ ꪊꪉꪸ ꪚꪱꪙ ꪊꪴ, ꪶꪀꪀ ꪹꪉꪙ ꪎꪉꪲ ꪄꪮꪉ ꪹꪚꪱ ꪣꪲ, ꪹꪋꪉ ꪄꪯꪉ ꪋꪺꪉ ꪭꪮꪉ ꪫꪀꪸ ꪚꪮꪀ ꪵꪀꪉ ꪵꪮꪚ ꪒꪴꪒ ꪖꪫꪥꪸ, ꪬꪱꪀ ꪫꪱ ꪊꪣꪴ ꪢꪴ ꪮꪲ ꪯꪱꪥ ꪼꪏ ꪹꪋꪉ ꪔꪫꪥꪸ ꪭꪮꪀ ꪝꪱ ꫃ꪫ ꪎꪴ ꫄ꪩꪉ ꪎꪱꪫ ꪬꪱ ꪋꪴ ꪩꪺꪉ ꪼꪫ ꪵꪀ ꪁꪣꪾ.

          ꪶꪒꪥ ꪀꪚꪾ ꪘꪱ ꪫꪀꪸ ꪋꪙꪸ ꪀꪱꪥ ꪚꪮꪀ ꪎꪮꪙ , ꪊꪣꪴ ꪢꪴ ꪮꪲ ꪯꪱꪥ ꪼꪏ ꫄ꪩꪉ ꪊꪱꪉ ꪈꪣꪾ ꪜꪙꪴ, ꪎꪱꪫ ꪬꪱ ꪨꪱꪥ ꪩꪺꪉ ꪚꪮꪀ, ꪹꪮꪱ ꪝꪉꪳ ꪔꪱꪉ ꪹꪋꪉ ꪄꪮꪉ ꪣꪲ ꪀꪺꪉ ꪜꪺꪉ ꪀꪙꪲ ꪩꪺꪉ ꪤꪴ  ꪄꪙꪳ ꫄ꪨꪚ ꪼꪫ ꪻꪬ ꪝꪉꪳ ꪙꪮꪉ ꪭꪴ ꪫꪽ ꪊꪳ ꪱꪥ. ꪙꪮꪀ ꫄ꪋ ꪄꪙꪳ ꫄ꪨꪚ ꪹꪭꪙ ꪹꪋꪉ ꪑꪉꪷ ꪼꪒ ꪚꪮꪀ ꪎꪮꪙ ꪻꪬ ꪝꪉꪳ ꪙꪮꪉ ꪩꪺꪉ ꪀꪙꪲ ꪤꪴ ꪜꪱꪀ ꪹꪫꪱ ꪹꪄꪱ ꪊꪱ ꪵꪀꪉ ꪨꪱꪥ ꪫꪀꪸ ꫃ꪥꪒ ꪮꪙꪳ ꪻꪢ , ꪕꪱꪀ ꫃ꪜꪙ ꪚꪮꪙ ꪮꪣꪲ ꪣꪺꪙ, ꪻꪎ ꪊꪣꪾ, ꪋꪮꪥ ꪝꪉꪳ ꪙꪮꪉ ꪹꪚꪱ ꪵꪘꪀ ꪀꪺ ꪤꪱꪙ ꪵꪀꪉ ꫄ꪩꪉ ꪁꪱꪒ ꪁꪙꪸ ꪀꪚꪾ ꪹꪋꪉ ꪹꪏꪉ ꪹꪭꪙ ꪹꪊꪱ.

          ꪜꪲ ꪵꪮꪚ 2017 - 2018 ꪭꪫꪙꪸ ꪹꪣꪉ ꪵꪕ ꪣꪲ 51 ꪹꪋꪉ ꪵꪀꪉ 14 ꪝꪽ ꪭꪮꪀ ꪎꪉꪲ ꪘꪉꪷ 3 ꫄ꪀꪚ ꪵꪮꪚ; ꫄ꪢꪣ ꪙꪮꪙ ꪔꪫꪥꪸ ꪭꪮꪀ ꪵꪀꪉ ꪋꪉꪴ ꪭꪮꪀ ꫄ꪀ ꫄.ꪌ ꪀꪺꪉ ꪙꪽ ꪣꪲ 24 ꪀꪺꪉ 51 ꪹꪋꪉ ꪭꪮꪀ ꪎꪉꪲ ꪣꪲ ꫃ꪊ ꪶꪓ ꪚꪱꪙ ꪊꪴ. ꪙꪮꪀ ꫄ꪊꪘ ꪙꪣꪾ ꪒꪲ ꪝꪉꪳ ꪊꪉꪲ ꪵꪎꪀ ꪶꪠꪉ ꪝꪲ ꪙꪮꪉ ꪹꪋ ꪙꪮꪥ ꫛ, ꫄ꪀꪚ ꪮꪫꪥꪲ ꪊꪉꪲ ꪁꪫꪙꪸ ꪓꪸ ꪹꪠꪉ ꪁꪷ ꪊꪮꪉ ꪵꪭꪉ ꪵꪄꪀ ꪭꪸ, ꪹꪊꪉ ꪹꪋ ꪝꪉꪳ ꪶꪔ ꪊꪀꪳ ꪊꪉꪲ ꪋꪲ ꪎꪱ ꪶꪭꪥ, ꪝꪉꪳ ꫛ ꪭꪀꪷ ꪵꪝꪉ ꪀꪮꪚ ꪶꪭꪣ ꪊꪯꪥ ꪹꪥ ꪭꪮꪀ ꪎꪉꪲ. ꪹꪝ ꪹꪏꪉ ꪙꪽ, ꪜꪺꪉ ꪀꪙꪲ ꪩꪺꪉ ꪤꪴ ꪄꪮꪉ ꪝꪉꪳ ꪙꪮꪉ ꪁꪷ ꪶꪎꪣ ꪝꪷ ꪼꪒ ꪑꪷ ꪎꪉꪴ, ꪋꪮꪥ ꪝꪉꪳ ꪙꪮꪉ ꪭꪒꪳ ꪄꪙꪳ ꪀꪺꪉ ꪫꪀꪸ ꪵꪮꪚ ꪭꪮꪀ.

          ꪝꪮꪣ ꪀꪚꪾ ꪩꪺꪉ ꪶꪜꪉ ꪻꪊ ꪄꪮꪉ ꪋꪴ ꫄ꪀꪚ ꪋꪴ ꪵꪈꪉ, ꪩꪺꪉ ꪭꪀꪷ ꪵꪝꪉ ꪮꪲꪙ ꪹꪏꪉ ꪵꪀꪉ ꪩꪺꪉ ꪶꪜꪉ ꪻꪊ ꪄꪮꪉ ꪢꪮꪥ ꪼꪏ ꪤꪱꪫ ꪨꪷ ꪩꪺꪉ ꪵꪭꪉ ꪼꪫ ꪋꪮꪥ ꪝꪉꪳ ꪙꪮꪉ ꪋꪴ ꪹꪋ ꫛ ꪘꪉꪷ ꪵꪒꪙ ꪹꪣꪉ ꪹꪣꪉ ꪵꪕ ꪊꪮꪉ ꪵꪭꪉ ꪵꪮꪚ ꪭꪙꪸ ꪎꪳ ꪎꪱꪙ ꪼꪫ ꪨꪉꪷ ꪩꪙꪴ ꪣꪱ ꪵꪔꪉ ꪚꪱꪙ ꪨꪱ ꪹꪣꪉ ꪭꪉꪷ ꪣꪲ ꪒꪲ ꪢꪱ.

                                                           ꪄꪀꪷ ꪁꪙꪸ - ꪵꪭꪉ ꪥꪀꪲ

Hôm hanh choi hảu học sinh phổng đen mương

Mương Te pày trương ép sư

          Chơ ók ỉn, tựng mú học sinh ók phiêng trương ma ỉn muôn dók căn phọn nương. Tựng mú côn, phủ lít toi sài, phủ ỉn tọt cầu mư...Hê mi pì ép đàư, Trương Tiểu học Pa Vệ Sủ, huyện Mương Te mi số học sinh sắc ma trương èp sư tục po xương pi nị, chơ dáo 250 nọng học sinh lâng mi nả nẳng lớp. Chăm va hươn trương báu mi chế độ bán trú, hươn dảo khong pưng nọng nhăng pọ lai dạk cha, hák va pưng nọng học sinh chựa côn Mảng, Cống, La Hủ phaư cọ sắc ma trương ép hiên sừ sàn.

          Nọng Phùng Mò Dé, học sinh lớp 5, Trương Tiểu học Pa Vệ Sủ hảu hụ: Hươn nọng mi 5 nọng pi hư cá 5 nọng pi pọm ma trương ép. Ma trương ép sừ, đảy pọ pi nọng bạn huôm pun lan, tênh ép tênh đảy ỉn muôn xương nặn nọng cánh pi nọng bạn phaư cọ muôn. Nọng chi chóng hanh ép học hảu đì vạy lăng ma choi pi nọng cuông bản dón xia cặt cung.

          Chăm va báu mi chươn trình bán trú, cốc ngươn sính khong, chương khong chuông hong bók cánh ép nhăng đút thiếu, hák va chủm mú ý ai say Trương Tiểu học Pa Vệ Sủ lâng sáo lai luông vạy kẻ cặm. Đối cắp nả vịa chiên cái bók xon, chủm mú ý ai say lâng chang ngắm pun, sáo hà lai luông bók, àu pưng tang chương khong mi cuông puông kin luông dú khửn lớp vạy hảu pưng nọng hụ văn, chứ ngai. Nọk chơ khửn lớp, hươn trương nhăng bók xon hảu pưng nọng pưng luông kin dú, pák vạu khảu cha cánh lai vịa dệt khặc khọ, tạk pên bón ỉn muôn, sảư chăm, choi pưng nọng báu nék cùa dản cánh lâng cạt kiên cắp trương xương hươn  chảu.

          Pi ép 2017 – 2018, huyện Mương Te mi 51 trương, 653 lớp cánh 14 păn học sinh nẳng 3 cấp ép; mầm non, tiểu học cánh trung học cơ sở. Cuông nặn mi 24 cuông 51 trương học sinh mi chế độ bán trú. Nọk chấp năm đi pưng chính sách phổng pi nọng chựa nọi côn, cấp uỷ, chính quyên địa phương cọ chóng hanh khék hịa, chướng chưa pưng  tổ chức chính trị xã hội, pưng côn hặc panh cóp hôm choi dừa học sinh. Pưa xương nặn, puông kin luông dú khong pưng nọng cọ xôm po đảy nho xùng, choi pưng nọng hựt khửn cuông vịa ép học.

          Pọm cắp luông pông chàư khong chu cấp, chu ngành; luông hặc panh ín xương cánh luông pông chàư khong mỏi say giáo lỏ luông hanh vạy choi pưng nọng chu chựa côn nẳng phổng đen mương Mương Te chóng hanh ép hiên xư san vạy lăng lun ma tánh bản mương hăng mi đi mả./.

                                                         Khắc Kiên - Hạnh dịch