Sơn La: Mua phồn nong cau tèo pày ma dạk cha

          Cau tèo bản Na Nga, xã Chiềng Hặc, huyện Yên Châu, tỉnh Sơn La đảy tẳng tánh dáo 20 pì ma lẹo. Cau tèo nị cọ cận hà đối cắp 200 chua hươn dần khòng 2 bản Huổi Nga cánh Na Nga. Pưa xủ hầng pì lẹo, nả cau lỏ pưng xểm mạy póng cọ lók cánh hắc.

          Mỏi pì 2 tưa, po nọng cọ cóp hôm mạy tók, mự cồng vạy sảng pành cau. Phạ phồn đét báu ngau cọ dệt hẳư cau lók văn, lài bón cọ hắc pé lài. Côn dần cọ chau lò chơ pày cài cau Na Nga, lưn xưa lỏ chơ nặm nong khửn xùng nặm lày tiêu. Cọ mi san ưởi nọng cánh làn nọi tốc lông nặm, bùn đì cọ đảy cứu lợp tăn.

          Nọk cau tèo Na Nga, nặp siềng nẳng me nặm Sặp dan pày cài huyện Yên Châu khạy mi dáo 10 khẳng cau mạy chuốp hắc pé cận văn phạo đảy xảng pành, nho cấp. Cau tèo bản Khá, xã Sặp Vạt mi luông hy dáo 50 thứk, quảng thứak thóng, nả cau xùng xưa 7 thứak vẹt xắư nả nặm. Hạng mự, dáo 100 chua hươn dần khòng bản cánh pưng bản dú xẳư chằm lâng pày ma cài cau. Pưa cau àu khảu xủ hầng pì lẹo, côn nưng báu cọ 2 côn nhang pày cài cau lỏ cau bày pày bày ma lẹo. Ốc vít, sài cáp cau tèo cọ khảu niểng mi xương chí chuốp khát, dệt cau khắc đắn. Pưng piếng pẻn, mạy póng dệt nả cau đảy àu sài lếch phúk cọ báu nhẳn pao tiêng àn.

          Toi lung Nguyễn Tuấn Anh, phó chủ tịch uỷ bàn dần mương xã Chiềng Hặc, huyện Yên Châu: Lài đoàn khòng cơ quàn mi chức quyên  cọ ma bấng le pưng khẳng cau tèo nẳng xã, hák va pưa ngơn cốc báu mi lài xương nặn pưng khẳng cau tèo hắc pé cọ hê đảy sảng pành. Khạy phân lài côn dần hák xảng pành àu piếng pẻn, mạy póng ma phúk tam xắư xương nặn cọ báu nhẳn pao tiêng àn. Cuồng pưng mự phạ phồn nong, chính quyên xã cọ chiên páo hẳư pi nọng báu pền pày ma cài lài chơ nặm nhưng khửn xùng.

          Pưng khẳng cau tèo đàng cái diên phổng cuồng lắc cày cắp pưng phổng mả khày xưa khòng tỉnh Sơn La. Vạy vịa nị cựt đảy lang đì, vịa xày mắư cánh nho cấp pưng khẳng cau hắc pé lỏ khù cận hà, cận mi luông pồng chằư khòng chu cấp chính quyên cánh chu côn cuồng bản mương./.

T Thuỷ-Huyền dịch

꫄ꪎꪙ ꪨꪱ: ꪣꪺ ꪶꪠꪘ ꪙꪮꪉ ꪹꪁꪱ ꪵꪔꪫ ꪼꪜ ꪣꪱ ꪥꪱꪀ ꪋꪱ

ꪹꪁꪱ ꪵꪔꪫ ꪚꪱꪙ ꪙꪱ ꪉꪱ, ꪎꪱ ꪋꪉꪸ ꪭꪀꪰ, ꪭꪫꪙꪸ ꪮꪙꪸ ꪹꪊꪱ, ꪔꪉꪲ ꫄ꪎꪙ ꪨꪱ ꪼꪒ ꪔꪉꪰ ꪵꪔꪉ ꪤꪱꪫ ꪏꪱꪫ ꪜꪲ ꪣꪱ ꪵꪩꪫ. ꪹꪁꪱ ꪵꪔꪫ ꪙꪲ ꪁꪷ ꫄ꪁꪙ ꪬꪱ ꪶꪒꪥ ꪀꪚꪾ 200 ꪋꪺ ꪹꪭꪙ ꫄ꪤꪙ ꪄꪮꪉ ꪚꪱꪙ ꪬꪺꪥ ꪉꪱ ꪵꪀꪉ ꪙꪱ ꪉꪱ. ꪹꪝ ꪎꪴ ꫄ꪬꪉ ꪜꪲ ꪵꪩꪫ ꪘꪱ ꪹꪁꪱ ꪨꪷ ꪝꪉꪳ ꫃ꪎꪣ ꪼꪣ ꪜꪮꪉ ꪩꪮꪀ ꪵꪀꪉ ꪬꪀꪰ.

ꪢꪮꪥ ꪜꪲ 2 ꪹꪕ ꪝꪲ ꪙꪮꪉ ꪁꪷ ꪀꪮꪚ ꪶꪭꪣ ꪼꪣ ꪔꪮꪀ ꪣꪳ ꪶꪀꪉ ꪼꪫ ꪎꪱꪉ ꪵꪜꪉ ꪹꪁꪱ. ꪡꪱ ꪶꪠꪙ ꪵꪒꪒ ꪁꪷ ꫃ꪥꪒ ꪻꪬ ꪹꪁꪱ ꪩꪮꪀ ꪫꪽ. ꫛ ꫄ꪤꪙ ꪁꪷ ꪹꪋꪱ ꪨꪷ ꫄ꪊ ꪼꪜ ꪀꪱꪥ ꪹꪁꪱ ꪙꪱ ꪉꪱ, ꪹꪩꪙ ꪹꪏ ꪨꪷ ꫄ꪋ ꪙꪣꪾ ꪙꪮꪉ ꪑꪉꪳ ꪄꪙꪳ ꪎꪴꪉ ꪙꪣꪾ ꪼꪨ ꪕꪫꪸ. ꪁꪾ ꪣꪸ ꪏꪱꪙ ꪹꪮꪥ ꪙꪮꪉ ꪶꪔꪀ ꪶꪩꪉ ꪙꪣꪾ ꪚꪴꪙ ꪒꪲ ꪁꪷ ꪼꪒ ꪀꪫꪲ ꫄ꪩꪚ ꪕꪽ.

ꪙꪮꪀ ꪹꪁꪱ ꪵꪔꪫ ꪙꪱ ꪉꪱ, ꪙꪚꪾ ꪤꪉꪸ ꪘꪉꪰ ꪵꪣ ꪙꪣꪾ ꪏꪚꪾ ꪥꪱꪙ ꪼꪜ ꪀꪱꪥ ꪭꪫꪙꪸ ꪮꪙꪸ ꪹꪊꪱ ꪼꪅ ꪣꪲ ꪤꪱꪫ 10 ꪄꪉꪰ ꪹꪁꪱ ꪼꪣ ꪊꪺꪚ ꪬꪀꪰ ꪵꪜ ꫄ꪁꪙ ꪫꪽ ꪡꪱꪫ ꪼꪒ ꪎꪱꪉ ꪵꪜꪉ ꪑꪷ ꫄ꪀꪚ. ꪹꪁꪱ ꪵꪔꪫ ꪚꪱꪙ ꪄꪱ, ꪎꪱ ꪏꪚꪾ ꪫꪱꪒ ꪣꪲ ꪩꪺꪉ ꪭꪲ ꪤꪱꪫ 50 ꪹꪖꪀ ,ꪀꪫꪱꪉ ꪹꪖꪀ ꪖꪮꪉ ,ꪘꪱ ꪹꪁꪱ ꪎꪉꪴ ꪹꪏ 7 ꪹꪖꪀ ꪵꪫꪒ ꪼꪎ ꪘꪱ ꪙꪣꪾ. ꪭꪱꪉ ꪣꪳ ꪤꪱꪫ 100 ꪋꪺ ꪹꪭꪙ ꫄ꪤꪙ ꪄꪮꪉ ꪚꪱꪙ ꪵꪀꪉ ꪝꪉꪳ ꪚꪱꪙ ꪤꪴ ꪻꪎ ꪊꪣꪾ ꫄ꪩꪉ ꪼꪜ ꪣꪱ ꪀꪱꪥ ꪹꪁꪱ. ꪹꪝ ꪹꪁꪱ ꪹꪮꪱ ꪹꪄꪱ ꪎꪴ ꫄ꪬꪉ ꪜꪲ ꪵꪩꪫ ,ꫛ ꫜ ꪹꪚꪱ ꪁꪷ 2 ꫛ ꪑꪱꪉ ꪼꪜ ꪀꪱꪥ ꪹꪁꪱ ꪁꪷ ꪜꪚ ꪼꪜ ꪼꪚ ꪣꪱ ꪵꪩꪫ. ꪶꪮꪀ ,ꪎꪱꪥ ꪀꪱꪚ ꪹꪁꪱ ꪵꪔꪫ ꪁꪷ ꪹꪄꪱ ꪘꪉꪸ ꪣꪲ ꪹꪏꪉ ꪋꪲ ꪊꪺꪚ ꪄꪱꪒ ꫃ꪤꪒ ꪹꪁꪱ ꪬꪀꪰ ꪒꪽꪌ ꪝꪉꪳ ꪜꪉꪲ ꪵꪜꪙ ꪼꪣ ꪜꪮꪉ ꫃ꪥꪒ ꪘꪱ ꪹꪁꪱ ꪼꪒ ꪹꪮꪱ ꪎꪱꪥ ꫃ꪩꪀ ꪠꪀꪴ ꪁꪷ ꪹꪚꪱ ꪐꪽ ꪝꪱꪫ ꪔꪉꪸ ꪮꪱꪙ.

ꪕꪮꪥ ꪩꪉꪴ ꪈꪫꪙꪸ ꪵꪮꪉ ꪔꪺꪙ ꪠꪷ ꪊꪴ ꪕꪀꪲ ꪮꪫꪲ ꪚꪱꪙ ꫄ꪤꪙ ꪹꪣꪉ ꪎꪱ ꪋꪉꪸ ꪭꪀꪰ, ꪭꪫꪙꪸ ꪮꪙꪸ ꪹꪊꪱ: ꪨꪱꪥ ꪒꪫꪱꪙ ꪄꪮꪉ ꫄ꪀ ꪀꪫꪱꪙ ꪣꪲ ꪊꪀꪳ ꪁꪫꪙꪸ ꪁꪷ ꪣꪱ ꫄ꪚꪉ ꪵꪩ ꪝꪉꪴ ꪄꪉꪰ ꪹꪁꪱ ꪵꪔꪫ ꪘꪉꪰ ꪎꪱ, ꪭꪱꪀ ꪫꪱ ꪹꪝ ꪹꪚꪱ ꪣꪲ ꪝꪷ ꫄ꪉꪙ ꪶꪀꪀ ꪹꪏꪉ ꪙꪽ ꪝꪉꪳ ꪄꪉꪰ ꪹꪁꪱ ꪵꪔꪫ ꪬꪀꪰ ꪵꪜ ꪁꪷ ꫃ꪭ ꪼꪒ ꪎꪱꪉ ꪵꪜꪉ. ꪼꪅ ꫄ꪡꪙ ꪨꪱꪥ ꫛ ꫄ꪤꪙ ꪭꪱꪀ ꪹꪮꪱ ꪜꪉꪸ ꪵꪜꪙ ,ꪼꪣ ꪜꪮꪉ ꪣꪱ ꪠꪀꪴ ꪎꪱꪉ ꪵꪜꪉ. ꪀꪺꪉ ꪝꪉꪳ ꪣꪳ ꪡꪱ ꪶꪠꪙ ꪙꪮꪉ , ꪊꪉꪲ ꪁꪫꪙꪸ ꪎꪱ ꪁꪷ ꪋꪙꪸ ꪜꪱꪫ ꪻꪬ ꪝꪲ ꪙꪮꪉ ꪹꪚꪱ ꫃ꪜꪙ ꪼꪜ ꪣꪱ ꪀꪱꪥ ꫄ꪋ ꪙꪣꪾ ꪑꪉꪳ ꪄꪙꪳ ꪎꪴꪉ.

ꪝꪉꪳ ꪄꪉꪰ ꪹꪀꪱ ꪵꪔꪫ ꪒꪱꪉ ꪀꪱꪥ ꪥꪙꪸ ꪶꪠꪉ ꪀꪺꪉ ꪨꪀꪰ ꪼꪀ ꪀꪚꪾ ꪝꪉꪳ ꪶꪠꪉ ꪢꪱ ꪼꪄ ꪹꪏ ꪄꪮꪉ ꪔꪉꪲ ꫄ꪎꪙ ꪨꪱ. ꪼꪫ ꪘꪱ ꪫꪀꪸ ꪙꪲ ꪁꪒꪳ ꪼꪒ ꪩꪱ ꪒꪲ, ꪫꪀꪸ ꪼꪎ ꪻꪢ ꪵꪀꪉ ꪑꪷ ꫄ꪀꪚ ꪝꪉꪳ ꪄꪉꪰ ꪹꪁꪱ ꪬꪀꪰ ꪵꪜ ꪨꪷ ꫄ꪁꪙ ꪬꪱ, ꫄ꪁꪙ ꪣꪲ ꪩꪺꪉ ꪶꪜꪉ ꪻꪊ ꪄꪮꪉ ꪋꪴ ꫄ꪀꪚ ꪊꪉꪲ ꪁꪫꪙꪸ ꪵꪀꪉ ꪋꪴ ꫛ ꪀꪺꪉ ꪚꪱꪙ ꪹꪣꪉ.

ꪹꪩꪉ ꪬꪫꪙꪸ ꪥꪀꪲ