ꪩꪱꪫ ꪀꪱꪥ ꪔꪣꪴ ꪝꪺ ꪁꪾ ꪔꪰ ꪡꪱ ꪘꪱꪫ ꪁꪣꪳ ꪻꪬ ꪭꪮꪀ ꪎꪉꪲ ꪶꪠꪉ ꪎꪉꪴ ꪀꪺꪉ ꪣꪺ ꪘꪱꪫ

          ꪘꪉꪰ ꪹꪋꪉ ꫄ꪣꪣ ꪙꪮꪙ ꪭꪫꪱ ꪒꪱꪫ ꪖꪲ ꫄ꪊꪙ ꪏꪱ ꪝꪱ ꪀꪺꪉ ꪝꪉꪳ ꪣꪳ ꪡꪱ ꪘꪱꪫ ꪁꪣꪳ ꪭꪱꪥ ꪬꪀꪳ, ꪀꪱ 12 ꪬꪮꪉ ꪵꪮꪚ ꪝꪮꪣ ꪼꪒ ꪬꪚꪾ ꪔꪴ ꪵꪙꪙ , ꪩꪰ ꪠꪉꪲ ꪮꪙꪴ ꫄ꪩꪉ ꪼꪒ ꫃ꪤꪒ ꪮꪙꪴ, ꪫꪀꪸ ꪚꪮꪀ ꪵꪀꪭ ꪵꪮꪚ ꫄ꪡꪙ ꪨꪱꪥ ꪼꪄ ꪮꪮꪀ ꪘꪉꪰ ꫄ꪨꪚ ꪻꪋ ꪻꪒ ꪡꪱ ꪵꪒꪒ ꪹꪭꪉ ꪊꪉꪰ ꪻꪬ ꪝꪉꪳ ꪙꪮꪉ ꪮꪮꪀ ꪼꪜ ꪕꪱꪉ ꪙꪮꪀ. ꪹꪝ ꪝꪉꪳ ꪙꪮꪉ ꪭꪮꪀ ꪎꪉꪲ ꪑꪉꪰ ꪙꪮꪥ, ꪝꪀꪰ ꪵꪭꪉ ꪮꪫꪸ, ꪹꪏꪉ ꪙꪽ ꪀꪱꪙ ꪶꪛ ꪹꪭꪙ ꪹꪋꪉ, ꪩꪙꪳ ꪹꪏ ꪼꪏ ꪤꪱꪫ ꪡꪴ ꪵꪊꪀ ꫄ꪨꪹꪚꪑꪉ ꪼꪒ ꪒꪴ ꪒꪲ ꪹꪏ.

          ꪤꪴ ꪘꪉꪰ ꪶꪠꪉ ꪎꪱ ꪎꪒꪴ ꪕꪲ ꪝꪰ ꪨꪱꪥ ꪥꪱꪀ ꪋꪱ ꪀꪚꪾ 70% ꪭꪮꪀ ꪎꪉꪲ ꪨꪰ ꪩꪀꪴ ꪙꪮꪉ ꪝꪉꪳ ꪋꪺ ꪹꪭꪙ ꪁꪒꪰ ꪁꪉꪴꪶ ꪼꪈ ꪵꪔ ꪬꪺ ꪣꪺ ꪘꪱꪫ, ꪹꪋꪉ ꪶꪠ ꪶꪖꪉ ꫄ꪤꪙ ꪶꪕꪀ ꪚꪱꪙ ꪊꪴ ꪊꪉꪴ ꪭꪮꪀ ꪎꪱ ꪊꪉꪴ ꪊꪱꪥ ꪭꪫꪙꪸ ꪏꪱ ꪝꪱꪁꪰ ꪎꪱꪉ ꪵꪜꪉ, ꪼꪜ ꪩꪮꪣ ꪹꪩꪱ ꪝꪉꪳ ꫄ꪨꪚ ꪵꪮꪚ ꪐꪰ ꪝꪱꪫ ꪶꪩꪣ ꪹꪚꪱ ꪔꪮꪉ.

          ꪏꪱꪙ ꫜ ꪣꪲ ꪬꪺ ꪻꪊ ꪭꪀꪰ ꪵꪝꪉ ꪼꪈ ꪀꪮꪙ ꪋꪴ ꪘꪫꪱ ꪁꪣꪳ ꪁꪰ ꪶꪑꪣ ꪎꪮꪉ ꪻꪬ ꪝꪉꪳ ꪙꪮꪉ ꪢꪮꪥ ꫛ ꪖꪱꪫ ꪎꪺꪉ ꪹꪎ ꪘꪱꪫ ꫜ ꪼꪫ ꪙꪉꪳ ꪮꪙꪴ ꪝꪮꪣ ꪣꪲ ꪣꪴ ꪵꪩꪙ ꪵꪀꪉ ꪭꪱꪥ ꪮꪉꪴ, ꪹꪝ ꪹꪏꪉ ꪙꪽ ꪶꪎ ꪭꪮꪀ ꪎꪉꪲ ꪣꪱ ꫄ꪨꪚ ꪵꪮꪚ ꪀꪺꪉ ꪝꪉꪳ ꪣꪳ ꪠꪱ ꪘꪱꪫ ꪁꪣꪳ ꪁꪽ ꪮꪱꪫ ꪕꪀꪴ ꪝꪰ. ꪩꪙꪳ ꪹꪏ ꪀꪱ ꪹꪋꪉ ꪣꪲ 135 ꪭꪮꪀ ꪎꪉꪲ ꪚꪱꪙ ꪊꪴ, ꪬꪮꪉ ꪙꪮꪙ ꪄꪮꪉ ꪝꪉꪳ ꪙꪮꪉ ꪝꪮꪣ ꪣꪲ ꪹꪎ ꪠꪱ ꪙꪮꪙ ꪮꪙꪴ, ꪹꪝ ꪀꪙꪲ ꪝꪽ ꫄ꪊꪒ ꪁꪰ ꪼꪒ ꪹꪭꪙ ꪹꪋꪉ ꪶꪜꪉ ꪻꪊ.

          ꪼꪄ ꪀꪱ ꪭꪫꪙꪸ ꪏꪱ ꪝꪱ ꪣꪲ ꪊꪲ ꪮꪱꪫ ꪭꪮꪒ 60 ꪹꪋꪉ ꪵꪮꪚ ꪵꪔ ꫄ꪢꪣ ꪙꪮꪙ ꪭꪮꪒ ꪊꪉꪴ ꪭꪮꪀ ꫄ꪊ ꫄ꪎ ꪀꪚꪾ ꪤꪱꪫ 18 ꪝꪽ ꪬꪮꪀ ꪎꪉꪲ. ꫄ꪊꪚ ꪙꪾ ꪮꪺꪙ ꪝꪱ ꪄꪮꪉ ꪊꪉꪲ ꪁꪫꪙꪸ ꪓꪸ ꪹꪠꪉ, ꪭꪮꪒ ꪼꪅ ꪘꪉꪰ ꪋꪴ ꪹꪭꪙ ꪹꪋꪉ, ꪵꪔ ꪊꪉꪴ ꫄ꪔꪣ ꪭꪫꪸꪙ, ꪎꪱ ꪭꪮꪒ ꪝꪉꪳ ꪚꪮꪙ ꪹꪋꪉ ꪤꪴ ꪨꪀꪰ ꪢꪉꪰ  ꪶꪠꪉ ꪀꪺꪉ, ꪨꪀꪰ ꪼꪀ , ꪶꪠꪉ ꪝꪽ ꪨꪱꪥ ꪤꪱꪀ ꪋꪱ, ꪝꪉꪳ ꪄꪴ ꪁꪾ ꪔꪰ ꪡꪱ ꪘꪱꪫ ꪁꪣꪳ ꫄ꪡꪙ ꪨꪱꪥ ꪁꪰ ꪼꪒ ꪐꪽ ꪝꪱꪫ.

          ꪕꪮꪥ ꪕꪒꪰ ꪜꪙꪴ ꪊꪉꪴ ꪭꪳ ꪬꪮꪀ ꪎꪉꪲ ꪝꪉꪳ ꪹꪭꪙ ꪹꪋꪉ ꪼꪒ ꪤꪉꪰ ꪎꪳ ꫄ꪋ ꪡꪱ ꪘꪱꪫ ꪁꪣꪳ ꪨꪱꪥ ꪶꪩꪉ ꪀꪮꪉ 10 ꪶꪓ. ꪬꪱꪀ ꪫꪱ, ꪀꪚꪾ ꪶꪠꪉ ꪏꪱ ꪝꪱ, ꪹꪄꪱ ꪣꪺ ꪘꪱꪫ ꪁꪣꪳ ꪀꪮꪉ 10 ꪶꪓ ꪀꪺꪉ ꪨꪱꪥ ꪣꪳ ꪥꪙꪸ, ꪹꪏꪉ ꪙꪽ ꪫꪀꪸ ꪚꪮꪀ ꪵꪀꪉ ꪵꪮꪚ ꪁꪰ ꪹꪚꪱ ꪥꪉꪰ ꪼꪒ. ꪹꪝ ꪹꪏꪉ ꪙꪽ ꪕꪮꪥ ꪕꪒꪴ ꪜꪙꪴ ꪤꪉꪸ ꪄꪮꪉ ꪓꪸ ꪹꪠꪉ, ꫄ꪋ ꪡꪱ ꪘꪱꪫ ꪁꪣꪳ ꪶꪩꪉ ꪀꪮꪉ 6 ꪶꪓ, ꪝꪉꪳ ꪹꪭꪙ ꪹꪋꪉ ꪋꪲ ꪬꪱꪀ ꫄ꪝꪉ ꪻꪎ ꪡꪱ ꪒꪙꪲ ꫄ꪋ ꪙꪽ ꪼꪫ ꪻꪬ ꪭꪮꪀ ꪎꪉꪲ ꪥꪉꪽ ꪎꪳ.

                                                                   ꪯꪱꪙ ꪁꪙꪸ - ꪵꪭꪉ ꪥꪀꪲ

Lao Cài; tủm pua cặm tó phạ nao cưm hảu học sinh

phổng xùng cuông mua nao

          Nẳng Trương mầm non Hoa Đào, thị trấn Sa Pa, cuông pưng mự phạ nao cưm hại hức, cá 12 hỏng ép pọm đảy hắp tu nẻn, lo phinh ún lâng đảy dệt ún, vịa bok cánh ép phân lai khày ók nẳng lớp, chơ đàư phạ đét hượng chắng hảu pưng nọng ók pày tang nọk. Pưa pưng nọng học sinh nhăng nọi, pặc hanh yếu, xương nặn cán bộ hươn trương, lưn xưa say giáo phụ trách lớp nhương đảy  đu đì xưa.

Dú cuông phổng xã xút ty pọ lài dạk cha cắp 70% học sinh lỏ lụk nọng pưng chua hươn cặt cung, ngay té hùa mua nao, Trương phổ thông Dân tộc bán trú Trung học cơ sở xã Trung Chải, huyện Sa pa cọ sảng panh, pảy lọm lau pưng lớp ép nhẳn pao lôm báu tỏng. San côn mi hùa chàư hặc panh ngay cón chu nao cưm cọ nhôm xỏng hảu pưng nọng mỏi côn tháo xuổng xửa nao nưng vạy nung ún pọm mụ len cánh hai ủng, pưa xương nặn số học sinh ma lớp ép cuông pưng phạ nao cưm cọ áo tục po. Lưn xưa cá trương mi 135 học sinh bán trú, hỏng non khong pưng nọng pọm mi sáư pha non ún, pựa kin po chất cọ đảy hươn trương pông chàư.

          Khay cá huyện Sa Pa mi chi áo họt 60 trương ép té mầm non họt trung học cơ sở cắp dáo 18 păn học sinh. Chấp năm uôn pa khong chính quyên địa phương, họt khạy nẳng chu hươn trương, té nẳng trung tâm huyện, xã họt pưng bón trương dú lắc nẳng phổng cuông, lắc cày, phổng pọ lai dạk cha, pưng khu cặm tó phạ nao cưm phân lài cọ đảy nhẳn pao.

          Toi tặt pun chung hư học sinh pưng hươn trương đảy dặng sừ chơ phạ nao cưm lài lông cỏng 10 độ. Hák va, cắp phổng Sa pa, khảu mua nao, phạ lâng nao cưm cỏng 10 độ cuông lai mự diên, xương nặn vịa bók cánh ép cọ báu dặng đảy. Pưa xương nặn, toi tặt pun riêng khong địa phương, chơ đàư phạ nao cưm lông cỏng 6 độ, pưng hươn trương chi hák pâng sáư phạ đin chơ nặn vạy hảu học sinh dặng xừ.

                                                                    An Kiên - Hạnh dịch