Lao Cài: hạng păn học sình páy la pưng bón trương nọi

pày ép nẳng trương chính.

Cài ky ép nưng ép nẳng bón trương nẳng thôn Hoàng Thu Phố B chiên ma, Giàng Minh Páo-học sình lớp 2 khòng Trương phổ thông Dân tộc bán trú Tiểu học xã Mản Thẩn, huyện Si Ma Cai, tỉnh Lao cài cọ quén khưới cắp vịa ép nẳng trung tâm. Hươn dú lắc 5 cày số, Páo đảy xay xiếp lặt hẳư kìn dú ép học nẳng trương vạy ngai đì hẳư vịa kìn dú, ép học, cài nặn, vịa ép học khòng nhọng cọ nhăng ven ók.

          Trương chính khòng Giàng Minh Páo đàng toi ép khạy mi cài 100 học sình, trương lớp mẳn đìn cắp mi tục po chương khòng ép học. Học sình nẳng nị báu đảy ép cộp cằn, pưng môn ép mi say bók riềng xương môn kỹ thuật, âm nhạc, mi phọng máy tính, thư viện nẳng trương cáu hư báu mi, pưa xương nặn đảy nhại ma ép nẳng trương chính pưng nọng cọ muôn hòm lài.

          Báu chư hịa riềng nẳng trương Tiểu học Mản Thẩn lạ, té pì ép 2015-2016 ma họt khạy, tênh cá tỉnh lao cài mi dáo 2 păn học sình té lớp nhắư họt lớp nọi đảy tọp hôm ma ép nẳng trương chính xương Giàng Minh Páo. Cài nặn, 22 trương, 44 lớp cánh 85 cán bộ quản lý cọ đảy dón xìa vạy xỏn hôm chu luông hẳư trương chính, nho xùng lang đì bók xòn khòng tỉnh. Vịa dệt nị cọ nhẳn đảy luông chôm choi khòng địa phường, cuồng pưng hươn trương cọ xương lướm lài ải êm học sình.

          Toi lung Nguyễn Anh Ninh, Giám đốc sở giáo dục đào tạo tỉnh Lao cài, họt pì 2020 tỉnh Lao Cài chí chóng hanh chự mẳn 584 trương mi khạy, tánh ók mắư 7 trương mầm non tư thục, nhăng 130 bón trương chí đảy huộp hôm khảu ma trương chính vạy hựt họt vịa piến mắư giáo dục. Hák va cuồng dan chấp năm cọ chí báu đảy dệt phạo dệt phu hư cận chấp năm toi tựng dan men toi tặt pùn.

          Lằng pì nưng chấp năm, vịa tọp hôm học sình ma trương chính ép khòng tỉnh Lao Cài cọ hền cựt đảy lang đì. Chăm va xương nặn chơ huộp hôm pưng bón trương khảu ma ép nẳng trương chính cọ pọ san khù dạk cha cuồng vịa pảng pành cốc ngươn sính khòng trương lớp, khảy quảng trương lớp, tủm pua chủm mú cán bộ quản lý nẳng pưng trương trung tâm. Pưa xương nặn, ngành giáo dục cận đảy chôm hặp chắng chí cựt đảy toi tặt pùn ặn lỏ họt pì 2020, giáo dục Lao cài chí dú cuồng mú uồn cón khòng 15 tỉnh đìn pu bưởng Bắc cánh xiếp cốc khoẹ ma tang giáo dục phổng xùng khòng cá mương./.

An Kiên-Huyền dịch

ꪩꪱꪫ ꪀꪱꪥ: ꪭꪱꪉ ꪝꪽ ꪭꪮꪀ ꪎꪉꪲ ꪼꪜ ꪩꪱ ꪝꪉꪳ ꪚꪮꪙ ꪹꪋꪉ ꪼꪜ ꪵꪮꪚ ꪘꪉꪰ ꪹꪋꪉ ꪊꪉꪲ

          ꪀꪱꪥ ꪁꪲ ꪵꪮꪚ ꫜ ꪵꪮꪚ ꪘꪉꪰ ꪚꪮꪙ ꪹꪋꪉ ꪘꪉꪰ ꪶꪗꪙ ꪭꪫꪱꪉ ꪖꪴ ꪶꪠ B ꪋꪙꪸ ꪣꪱ ꪤꪱꪉ ꪣꪉꪲ ꪜꪱꪫ ꪭꪮꪀ ꪎꪉꪲ ꫄ꪨꪚ 2 ꪄꪮꪉ ꪹꪋꪉ ꪶꪠ ꪶꪖꪉ ꫄ꪤꪙ ꪶꪕꪀ ꪶꪘꪥ ꪊꪴ ꪔꪫꪸ ꪭꪮꪀ ꪎꪱ ꪢꪱꪙ ꫄ꪖꪙ ,ꪭꪫꪙꪸ ꪏꪲ ꪣꪱ ꪁꪱꪥ ,ꪔꪉꪲ ꪩꪱꪫ ꪀꪱꪥ ꪁꪷ ꪵꪀꪫꪙ ꪹꪅꪥ ꪀꪚꪾ ꪫꪀꪸ ꪵꪮꪚ ꪘꪉꪰ ꪚꪮꪙ ꪻꪢ. ꪹꪭꪙ ꪤꪴ ꪨꪀꪰ ꪹꪋꪉ 5 ꪼꪀ ꪶꪎ ꪜꪱꪫ ꪼꪒ ꪼꪏ ꪎꪚꪸ ꪩꪒꪰ ꪀꪙꪲ ꪤꪴ ꪵꪮꪚ ꪭꪮꪀ ꪘꪉꪰ ꪹꪋꪉ ꪼꪫ ꪉꪱꪥ ꪒꪲ ꪻꪬ ꪫꪀꪸ ꪀꪙꪲ ꪤꪴ ꪵꪮꪚ ꪭꪮꪀ.

          ꪹꪋꪉ ꪊꪉꪲ ꪄꪮꪉ ꪜꪱꪫ ꪕꪮꪥ ꪵꪮꪚ ꪼꪅ ꪣꪲ ꪀꪱꪥ 100 ꪭꪮꪀ ꪎꪉꪲ ,ꪹꪋꪉ ꫄ꪨꪚ ꪢꪽ ꪒꪲ ꪣꪲ ꪕꪴꪀ ꪝꪷ ꪹꪋꪉ ꪄꪮꪉ ꪵꪮꪚ ꪭꪮꪀ.ꪭꪮꪀ ꪎꪉꪲ ꪘꪉꪰ ꪘꪲ ꪹꪚꪱ ꪼꪒ ꪵꪮꪚ ꪶꪁꪚ ꪀꪽ, ꪝꪭꪳ ꪶꪣꪙ ꪵꪮꪚ ꪣꪲ ꪼꪏ ꪚꪮꪀ ꪤꪉꪸ, ꪹꪝ ꪹꪏꪉ ꪙꪽ ꪼꪒ ꪑꪱꪥ ꪣꪱ ꪵꪮꪚ ꪘꪉꪰ ꪹꪋꪉ ꪊꪉꪲ ꪝꪉꪳ ꪙꪮꪉ ꪁꪷ ꪣꪺꪙ ꪬꪮꪣ ꪨꪱꪥ.

          ꪹꪚꪱ ꪋꪳ ꪭꪀꪸ ꪤꪉꪸ ꪘꪉꪰ ꪹꪋꪉ ꪔꪫꪸ ꪭꪮꪒ ꪢꪱꪙ ꫄ꪖꪙ ꪩꪱ ꪵꪔ ꪜꪲ ꪵꪮꪚ 2015-2016 ꪣꪱ ꪭꪮꪒ ꪼꪅ ,꫃ꪕꪉ ꪀꪱ ꪔꪉꪲ ꪩꪱꪫ ꪀꪱꪥ ꪣꪲ ꪤꪱꪫ 2 ꪝꪽ ꪭꪮꪀ ꪎꪉꪲ ꪵꪔ ꫄ꪨꪚ ꪻꪐ ꪭꪮꪒ ꫄ꪨꪚ ꪙꪮꪥ ꪼꪒ ꪕꪮꪚ ꪶꪭꪣ ꪣꪱ ꪵꪮꪚ ꪘꪉꪰ ꪹꪋꪉ ꪊꪉꪲ. ꪀꪱꪥ ꪙꪽ 22 ꪹꪋꪉ ,44 ꫄ꪨꪚ ꪵꪀꪉ 85 ꪀꪱꪙ ꪶꪛ ꪼꪒ ꪤꪮꪙ ꪎꪸ ꪼꪫ ꪎꪮꪙ ꪶꪭꪣ ꪋꪴ ꪩꪺꪉ ꪻꪬ ꪹꪋꪉ ꪊꪉꪲ ,ꪑꪷ ꪎꪴꪉ ꪩꪱ ꪒꪲ ꪫꪀꪸ ꪚꪮꪀ ꪎꪮꪙ ꪄꪮꪉ ꪔꪉꪲ. ꪫꪀꪸ ꫃ꪥꪒ ꪙꪲ ꪁꪷ ꪐꪽ ꪼꪒ ꪩꪺꪉ ꪶꪋꪣ ꪋꪮꪥ ꪄꪮꪉ ꪒꪸ ꪹꪠꪉ ꪁꪷ ꪹꪏꪉ ꪹꪨꪣ ꪨꪱꪥ ꪮꪱꪥ ꫃ꪯꪣ ꪭꪮꪀ ꪎꪉꪲ.

          ꪕꪮꪥ ꪩꪴꪉ ꪈꪫꪙꪸ ꪵꪯꪉ ꪙꪉꪲ ꪤꪱꪣ ꪶꪒꪀ ꫄ꪎ ꪤꪱꪫ ꪥꪴꪀ ꪒꪱꪫ ꪔꪱꪫ ꪔꪉꪲ ꪨꪱꪫ ꪀꪱꪥ ,ꪭꪮꪒ ꪜꪲ 2020 ꪔꪉꪲ ꪩꪱꪫ ꪀꪱꪥ ꪊꪮꪉ ꪵꪭꪉ ꪋꪳ ꪢꪽ 584 ꪹꪋꪉ ꪣꪲ ꪼꪅ ,ꪔꪉꪰ ꪵꪔꪉ ꪳꪢ 7 ꪹꪋꪉ ꫄ꪢꪣ ꪙꪮꪙ ꪕꪳ ꪖꪴꪀ ,ꪑꪉꪰ 130 ꪚꪮꪙ ꪹꪋꪉ ꪋꪲ ꪼꪒ ꪶꪭꪚ ꪶꪭꪣ ꪹꪄꪱ ꪣꪱ ꪹꪋꪉ ꪊꪉꪲ ꪼꪫ ꪭꪒꪳ ꪭꪮꪒ ꪜꪙꪸ ꪻꪢ ꪤꪱꪫ ꪥꪴꪀ. ꪬꪱꪀ ꪫꪱ ꪀꪺꪉ ꪥꪱꪙ ꫄ꪊꪚ ꪙꪣꪾ ꪁꪷ ꪹꪚꪱ ꪼꪒ ꫃ꪥꪒ ꪡꪱꪫ ꪡꪴ ꪭꪳ ꫄ꪁꪙ ꫄ꪊꪚ ꪙꪣꪾ ꪵꪣꪙ ꪕꪮꪥ ꪕꪒꪰ ꪜꪴꪙ.

          ꪨꪉꪰ ꪜꪲ ꫜ ꫄ꪊꪚ ꪙꪣꪾ ꪫꪀꪸ ꪕꪮꪚ ꪶꪭꪣ ꪭꪮꪀ ꪎꪉꪲ ꪣꪱ ꪹꪋꪉ ꪊꪉꪲ ꪄꪮꪉ ꪔꪉꪲ ꪨꪱꪫ ꪀꪱꪥ ꪁꪷ ꫃ꪬꪙ ꪁꪒꪳ ꪼꪒ ꪩꪱꪉ ꪒꪲ. ꪋꪣꪾ ꪫꪱ ꫄ꪋ ꪭꪺꪚ ꪶꪭꪣ ꪝꪉꪳ ꪚꪮꪙ ꪹꪋꪉ ꪹꪄꪱ ꪣꪱ ꪹꪋꪉ ꪊꪉꪲ ꪁꪷ ꪝꪷ ꪏꪱꪘ ꪄꪴ ꪥꪱꪀ ꪋꪱ. ꪹꪝ ꪹꪏꪉ ꪙꪽ, ꪵꪈꪉ ꪤꪱꪫ ꪥꪴꪀ ꫄ꪁꪙ ꪼꪒ ꪺꪋꪣ ꪭꪚꪾ ꪊꪉꪰ ꪋꪲ ꪁꪒꪳ ꪼꪒ ꪕꪴꪥ ꪩꪺꪉ ꪜꪴꪙ ꪯꪽ ꪨꪷ ꪭꪮꪒ ꪜꪲ 2020 ꪥꪱꪫ ꪥꪴꪀ ꪩꪱꪫ ꪀꪱꪤ ꪋꪲ ꪤꪴ ꪀꪺꪉ ꪢꪴ ꪮꪺꪙ ꪀꪮꪙ 15 ꪔꪉꪲ ꪒꪙꪲ ꪝꪴ ꪹꪚꪉ ꪚꪀꪰ ꪵꪀꪉ ꪎꪚꪸ ꪶꪀꪀ ꪵꪅꪫ ꪣꪱ ꪕꪱꪉ ꪤꪱꪪ ꪥꪴꪀ ꪶꪠꪉ ꪎꪴꪉ ꪄꪮꪉ ꪀꪱ ꪹꪣꪉ.

ꪬꪫꪙꪸ ꪥꪀꪲ