Bai thứ 3 mự 5/12/2017

Lài chua hươn dần nẳng huyện phổng xùng Trạm Táu, tỉnh Yền Bái hê mi đìn dú lằng chu nong lạt

---------------

Lằng chu nong lạt hại hức, chua hươn pả Lồng Thị Tề, dú nẳng bản Hát, xã Hát Lừu cọ nhăng to phák mư páu, pưa tênh cá hươn dảo, chương khòng cọ lăm báu le chuốp lày pày toi nong xìa mết. Chu nong lạt cọ cài pày bườn nưng, hák va 3 côn cuồng hươn pả cọ nhăng đảy dú tô nẳng hỏng ép khòng trương Tiểu học cánh THCS xã Hát Lừu.

Cắp luông choi dừa khòng hươn nước cánh pưng côn hùa chằư quảng, khay nị chua hươn pả Tề cọ mi chi áo họt 100 triệu mằn pọm cắp lài tàng chương khòng ứn vạy chuông hong puồng kìn đơi dú. Mi ngơn, hák va chua hươn pả nhăng đảy pày dú tô pưa báu hê xáo đảy đìn vạy dệt hươn.

Chu nong lạt hại hức mưa bừon 10, tênh cá xã Hát Lừu mi 11 làng hươn chuốp lày nong, 25 làng  dú cuồng phổng chọ đảy nhại chiên họn sẳn. Họt khay, lài chua hươn mi hươn dảo chuốp lày nong nhăng đàng đảy pày dú tô, 25 chua hươn dú cuồng phổng chọ đảy nhại chiên cọ kìn dú báu mổm. Toi UBND xã Hát Lừu, khay nị pưng chua hươn hê mi đìn đàng thả huyện Trạm Táu  tẳng tánh ók pưng phổng nhại dần mắư, hák va họt khay nả vịa nị nhăng hê đảy huyện chấp năm lẹo.

Xã Xà Hồ cọ mi 30 làng hươn chuốp hắc đắn, lày nong cánh đảy nhại chiên họn sẳn. khay nị hính mi san chua hươn mi đìn vạy dệt hươn, nhăng to đằư hư cọ đàng xáo hà bón dú mắư, chăm va ngơn choi dừa khòng hươn nước cánh pưng côn hùa chằư quảng cọ chiên ma họt mư côn dần.

Họt khay hính mi ngăn thóng cuồng số 121 chua hươn mi hươn dảo chuốp hắc đắn, lày nong pằn pằn đìn dú mắư lằng chu nong lạt, nhăng to đằư pưng chua hươn nị cọ đàng đảy dú tô. Côn dần nẳng phổng nong lạt Trạm Táu đàng cận hà pưng cờ quàn mi chức quyên khòng huyện, khòng tỉnh xứp tàm mi pưng luông pùn kẻ khày, pằn dài bón dú mắư vạy côn dần văn phạo tẹt tiêng puồng kìn đơi dú./.

ꪨꪱꪥ ꪋꪺ ꪹꪭꪙ  ꪹꪤꪷꪙ ꪘꪉꪰ ꪭꪫꪙꪸ ꪶꪠꪉ ꪎꪴꪉ ꪋꪱꪣ ꪹꪔꪱ ꪔꪉꪲ ꪮꪙꪸ ꪚꪱꪥ ꪹꪭꪸ ꪣꪲ ꪒꪙꪲ ꪤꪴ ꪨꪉꪰ ꪋꪴ ꪙꪮꪉ ꪩꪱꪒ

ꪨꪉꪰ ꪋꪴ ꪙꪮꪉ ꪩꪱꪒ ꪭꪱꪥ ꪬꪀꪳ , ꪶꪋ ꪹꪭꪙ ꪜꪱ ꪶꪨꪉ ꪖꪲ ꪹꪔꪸ , ꪤꪴ ꪘꪉꪰ ꪚꪱꪙ ꪬꪱꪒ , ꪎꪱ ꪬꪱꪒ ꪩꪫꪲ ꪁꪷ ꪑꪉꪰ ꪕꪷ ꪠꪱꪀ ꪣꪳ ꪹꪜꪱ , ꪹꪝ ꪹꪕꪸꪉ ꪀꪱ ꪹꪭꪙ ꪤꪱꪫ , ꪹꪋꪉ ꪄꪮꪉ ꪩꪾ ꪹꪚꪱ ꪵꪩ ꪁꪷ ꪊꪺꪚ ꪼꪨ ꪼꪜ ꪕꪮꪥ ꪙꪾ ꪙꪮꪉ ꪎꪸ ꪹꪢꪸꪒ. ꪋꪴ ꪙꪮꪉ ꪩꪱꪒ ꪀꪱꪥ ꪼꪜ ꪹꪚꪙ ꫜ ꪵꪩꪫ , ꪬꪱꪀ ꪫꪱ 3 ꫛ ꪀꪺꪉ ꪹꪭꪘ ꪜꪱ ꪁꪷ ꪑꪉꪰ ꪼꪒ ꪤꪴ ꪶꪕ ꪙꪉꪰ ꪬꪮꪉ ꪵꪮꪚ ꫜ ꪄꪮꪉ ꪹꪋꪉ ꪔꪫꪸ ꪭꪮꪀ ꪵꪊꪉ ꪊꪉꪴ ꪭꪮꪀ ꪹꪊꪷ ꪹꪎꪷ ꪬꪱꪒ ꪩꪫꪲ.

ꪀꪚꪰ ꪩꪺꪉ ꪋꪮꪥ ꪹꪤ ꪄꪮꪉ ꪹꪭꪘ ꪹꪣꪉ ꪵꪀꪈ ꪝꪉꪳ ꫛ ꪬꪺ ꪻꪊ ꪀꪫꪱꪉ , ꪼꪅ ꪙꪲ ꪶꪋ ꪹꪭꪙ ꪜꪱ ꪹꪔꪸ ꪁꪷ ꪣꪲ ꪋꪲ ꪮꪱꪫ ꪭꪮꪒ 100 ꪋꪫꪸ ꪢꪽ, ꪝꪮꪣ ꪀꪚꪰ ꪨꪱꪥ ꪔꪱꪉ ꪹꪋꪉ ꪄꪮꪉ ꪮꪙꪳ ꪼꪫ ꪋꪺꪉ ꪭꪮꪉ ꪻꪬ ꪜꪺꪉ ꪀꪙꪲ ꪹꪓꪷꪥ ꪤꪴ. ꪣꪲ ꪹꪉꪷꪙ , ꪬꪱꪀ ꪫꪱ ꪋꪺ ꪹꪭꪙ ꪜꪱ ꪑꪉꪰ ꪼꪒ ꪀꪴ ꪶꪕ ꪹꪝ ꪹꪚꪱ ꪹꪭꪸ ꪎꪱꪫ ꪬꪱ ꪼꪒ ꪒꪙꪲ ꪼꪫ ꪹꪥꪸꪒ ꪹꪭꪙ.

ꪋꪴ ꪙꪮꪉ ꪩꪱꪒ ꪭꪱꪥ ꪬꪀꪳ ꪹꪣ ꪹꪚꪙ 10 , ꪹꪕꪸꪉ ꪀꪱ ꪎꪱ ꪬꪱꪒ ꪩꪫꪲ ꪣꪲ 11 ꪨꪱꪉ ꪹꪭꪘ ꪊꪺꪚ ꪼꪨ ꪙꪮꪉ , 25 ꪨꪱꪉ ꪹꪭꪙ ꪤꪴ ꪘꪉꪰ ꪚꪮꪙ ꪋꪷ ꪼꪒ ꪑꪱꪥ ꪋꪙꪸ ꪭꪮꪙ ꪎꪽ . ꪭꪮꪒ ꪼꪅ ꪨꪱꪥ ꪶꪋ ꪹꪭꪙ ꪣꪲ ꪹꪭꪙ ꪤꪱꪫ ꪊꪺꪚ ꪼꪨ ꪙꪮꪉ ꪑꪉꪰ ꪒꪱꪉ ꪼꪒ ꪤꪴ ꪶꪕ , 25 ꪋꪺ ꪹꪭꪙ ꪤꪴ ꪘꪉꪰ ꪚꪮꪙ ꪋꪷ ꪼꪒ ꪑꪱꪥ ꪋꪙꪸ ꪁꪷ ꪀꪙꪲ ꪀꪴ ꪹꪚꪱ ꪶꪢꪣ . ꪕꪮꪥ ꪮꪫꪲ ꪚꪱꪙ ꪹꪤꪷꪘ ꪹꪣꪉ ꪎꪱ ꪬꪱꪒ ꪩꪫꪲ ꪼꪅ ꪙꪲ ꪝꪉꪳ ꪶꪋ ꪹꪭꪙ ꪹꪭꪸ ꪣꪲ ꪒꪲꪙ ꪒꪱꪉ ꪖꪱ ꪭꪫꪙꪸ ꪋꪱꪣ ꪹꪔꪱ ꪵꪔꪉ ꪮꪮꪀ ꪶꪠꪉ ꪑꪱꪥ ꪹꪤꪷꪙ ꪻꪢ , ꪬꪱꪀ ꪫꪱ ꪭꪮꪒ ꪼꪄ ꪘꪱ ꪫꪀꪸ ꪙꪲ ꪑꪉꪰ ꪹꪭꪸ ꪼꪒ ꪭꪫꪙꪸ ꪹꪊꪷꪚ ꪙꪾ ꪵꪩꪫ.

ꪎꪱ ꪎꪱ ꪶꪬ ꪁꪷ ꪣꪲ 30 ꪨꪱꪉ ꪹꪭꪙ ꪶꪊꪚ ꪬꪀꪰ ꪒꪽ, ꪼꪨ ꪙꪮꪉ ꪵꪀꪉ ꪹꪁꪷꪙ ꪼꪒ ꪑꪱꪥ ꪋꪙꪸ ꪭꪮꪙ ꪎꪽ. ꪼꪅ ꪙꪲ ꪬꪉꪲ ꪣꪲ ꪏꪱꪙ ꪶꪋ ꪹꪭꪘ ꪣꪲ ꪒꪙꪲ ꪼꪫ ꪹꪥꪸꪒ ꪹꪭꪙ , ꪑꪉꪰ ꪕꪷ ꪻꪒ ꪁꪷ ꪒꪱꪉ ꪎꪱꪫ ꪬꪱ ꪚꪮꪙ ꪤꪴ ꪻꪢ , ꪋꪾ ꪫꪱ ꪹꪉꪷꪙ ꪊꪮꪥ ꪹꪤ ꪄꪮꪉ ꪹꪭꪙ ꪹꪣꪉ ꪵꪀꪉ ꪝꪉꪳ ꫛ ꪬꪺ ꪻꪊ ꪁꪫꪱꪉ ꪁꪷ ꪣꪱ ꪭꪮꪒ ꪣꪳ ꫛ ꪹꪤꪷꪙ.

Thừa Xuân – Thành dịch