ꪭꪒꪲ ꪜꪒꪰ ꪣꪸ ꪄꪮꪉ ꪝꪲ ꪙꪮꪉ ꪹꪋ ꫛ ꪶꪣꪉ

ꪕꪮꪥ ꪏꪱꪙ ꫛ ꪹꪖꪱ ꪵꪀ, ꪹꪊꪉ ꪚꪱꪙ ꪝꪲ ꪙꪮꪉ ꪹꪋ ꫛ ꪶꪣꪉ ꪘꪉꪰ ꪒꪙꪸ ꪚꪙꪸ: ꪭꪲꪒ ꪩꪱꪀ ꪣꪸ ꪄꪮꪉ ꪝꪲ ꪙꪮꪉ ꪹꪋ ꫛ ꪶꪣꪉ ꪁꪷ ꪣꪸ ꪵꪔ ꪹꪋꪱ ꪵꪔ ꪨꪱꪥ, ꪵꪔ ꪜꪱꪉ ꪚꪱꪙ ꪹꪣꪉ ꪹꪜꪸꪙ ꪹꪎꪷꪀ. ꪬꪱꪀ ꪫꪱ ꪵꪔ ꪚꪱꪙ ꪹꪣꪉ ꪤꪱꪥ ꪠꪮꪶ, ꪹꪊꪷꪚ ꪙꪣꪾ ꪜꪺꪉ ꪀꪲꪙ ꪩꪺꪉ ꪤꪴ ꪻꪣ , ꪨꪱꪥ ꪭꪒꪲ ꪅꪮꪉ ꪹꪀꪱ ꪵꪀ , ꪀꪺꪉ ꪙꪽ ꪣꪲ ꪭꪲꪒ ꪩꪱꪀ ꪣꪸ ꪁꪷ ꪼꪒ ꪝꪲ ꪙꪮꪉ ꪜꪱ ꪫꪱꪉ ꪎꪸ. ꪫꪱ ꪣꪲ, ꪩꪱꪀ ꪣꪸ ꪁꪷ ꪹꪩꪸ ꪭꪀꪸ ꪹꪥꪸꪒ ꪹꪋꪷ ꪋꪱꪥ ꪚꪱꪫ ꪑꪉꪲ ꪎꪱꪫ ꪣꪀꪰ ꪵꪣꪙ ꪵꪀꪫꪙ ꪁꪫꪱꪣ ꪀꪽ ꪵꪩꪫ , ꪵꪮꪀ ꪹꪮꪱ ꪠꪴ ꪎꪱꪫ ꪣꪱ ꪹꪥꪸꪒ ꪣꪸ ꪹꪊꪱ ꪭꪳ ꪠꪴ ꪋꪱꪥ ꪄꪣꪾ ꪵꪄꪙ ꪩꪱꪀ ꪣꪱ.

ꪨꪱꪥ ꪝꪲ ꪙꪮꪉ ꪘꪉꪰ ꪮꪙꪸ ꪹꪊꪱ, ꪔꪲꪉ ꪹꪎꪷꪙ ꪨꪱ ꪁꪷ ꪫꪱ ꪭꪀꪸ: ꪵꪔ ꪹꪊꪷ ꪹꪭꪙ ꪹꪣꪉ ꪜꪙꪴ ꪮꪮꪀ ꪩꪺꪒ ꪹꪮꪱ ꪠꪺ ꪹꪮꪱ ꪣꪸ ꪵꪔꪉ ꪹꪭꪙ ꪨꪱ ꪤꪱꪫ , ꪀꪺꪉ ꪙꪽ ꪣꪲ ꪩꪺꪒ ꪼꪜ ꪋꪳ ꪁꪫꪙꪸ ꪄꪮꪉ ꪠꪴ ꪑꪉꪲ ꪵꪀꪉ ꪨꪱꪙ ꪙꪮꪥ , ꪊꪉꪲ ꪁꪫꪙꪸ ꪋꪴ ꪹꪨꪷꪚ , ꪋꪴ ꪵꪈꪉ ꪁꪷ ꪋꪙꪸ ꪜꪱꪫ , ꪘꪫꪸ ꪹꪋ ꪝꪲ ꪙꪮꪉ ꪜꪱ ꪫꪱꪉ ꪎꪸ ꪝꪉꪳ ꪭꪒꪲ ꪅꪮꪉ ꪹꪀꪱ ꪵꪀ. ꪵꪔ ꪙꪽ ꪁꪷ ꪹꪚꪱ ꪣꪲ ꪬꪲꪒ ꪩꪱꪀ ꪣꪸ ꪵꪩꪫ.

ꪢꪱ ꪕꪱꪉ ꪫꪀꪸ ꪘꪉꪰ ꪡꪮꪉ ꪒꪙꪸ in tơ net ꪣꪲ ꪮꪮꪀ ꪏꪱꪙ ꪹꪖꪀ ꪡꪣꪲ , ꪋꪱꪥ ꪚꪱꪫ ꪹꪋ ꫛ ꪶꪣꪉ ꪜꪒꪰ ꪣꪸ ꪘꪉꪰ ꪀꪱꪉ ꪕꪱꪉ , ꪚꪮꪙ ꪣꪲ ꪨꪱꪥ ꫛ ꪼꪜ ꪣꪱ ꪨꪷ ꪫꪀꪸ ꪹꪥꪸꪒ ꪹꪚꪱ ꪵꪣꪙ ꪀꪚꪰ ꪹꪉꪙ ꪩꪱꪉ ꪪꪽ ꪬꪫꪱ ꪅꪽ ꪋꪽ ꪄꪮꪉ ꪹꪋ ꫛ ꪶꪣꪉ , ꪵꪩꪫ ꪫꪀꪸ ꪹꪥꪸꪒ ꪙꪲ ꪑꪉꪰ ꪠꪲꪒ ꪖꪳꪀ ꪭꪮꪒ ꪩꪺꪒ ꪹꪮꪱ ꪠꪺ ꪹꪮꪱ ꪣꪸ ꪵꪔꪉ ꪹꪭꪙ ꪨꪱ ꪤꪱꪫ.

ꪁꪷ ꪹꪏꪉ ꪋꪴ ꪹꪋ ꫛ ꪀꪺꪉ ꪀꪱ ꪹꪣꪉ , ꪝꪲ ꪙꪮꪉ ꪹꪋ ꫛ ꪶꪣꪉ ꪁꪷ ꪣꪲ ꪨꪱꪥ ꪭꪲꪒ ꪅꪮꪉ ꪔꪮꪉ ꪋꪽ, ꪝꪉꪳ ꪹꪉꪙ ꪩꪱꪉ ꪪꪽ ꪬꪫꪱ ꪦꪉꪸ. ꪝꪉꪳ ꪭꪒꪲ ꪅꪮꪉ ꪋꪮꪚ ꪶꪎꪣ ꪁꪷ ꪼꪒ ꪝꪲ ꪙꪮꪉ  ꪋꪳ ꪬꪣꪸ ꪵꪀꪉ ꪹꪜꪸꪉ ꪼꪄ, ꪵꪩꪫ ꪝꪉꪳ ꪭꪲꪒ ꪅꪮꪉ ꪹꪀꪱ ꪵꪀ , ꪹꪚꪱ ꪋꪮꪚ ꪶꪎꪣ ꪭꪳ ꪁꪷ ꪼꪒ ꪝꪲ ꪙꪮꪉ ꪜꪱ ꪫꪱꪉ ꪎꪸ.

ꪀꪱꪥ ꪋꪴ ꪫꪀꪸ ꪙꪲ ꪻꪬ ꪹꪬꪸꪙ , ꪘꪱ ꪫꪀꪸ ꪋꪙꪸ ꪜꪱꪫ ꪠꪱꪚ ꪩꪺꪒ ꪨꪷ ꪫꪀꪸ ꪹꪁꪷꪙ ꪼꪒ ꪹꪊꪷꪚ ꪙꪾꪣ ꪹꪩꪷꪉ ꪹꪋꪷ ꪵꪀꪉ ꪹꪬꪷꪉ ꪭꪲ, ꪼꪫ ꪐꪷ ꪎꪴꪉ ꪩꪺꪉ ꪭꪴ ꪏꪉꪸ ꪄꪮꪉ ꪝꪲ ꪙꪮꪉ ꪹꪋ ꪙꪮꪥ ꫛ, ꪩꪳꪙ ꪻꪏ ꪨꪷ ꪘꪉꪰ ꪶꪠꪉ ꪀꪺꪉ , ꪩꪀꪰ ꪼꪀ ,ꪶꪠꪉ ꪵꪒꪙ ꪹꪣꪉ./.