Pít xùi xìa bệnh pền ày ók lượt, pít xùi xìa cặt cung

        Toi biền mài khòng hươn dà lao cánh pót tỉnh Quảng Ninh, cuồng 6 pì té pì 2010-2016, địa phường nị hụ hền ók dáo 3500 côn pền bệnh lao mắư cuồng nặn mi dáo 3 păn côn pùn tuổi té 15 họt 64 pì. Nọk nặn ók nhăng mi lài côn pền bệnh lao hê đảy hụ hền ók. Ăn nị lỏ khù đáng chau lò, pưa va pưng côn pền bệnh lao hê đảy hụ hền ók chí dệt bệnh pét pan xắư côn ứn.

          Lằng lài chu chiên páo ma tang khù hiểm hại khòng bệnh lao, chếp pót, côn dần cận khâng chằư xưa cuồng vịa chự phong tàng bệnh nị. Cài nặn dón xìa đảy luông pét pan xắư côn ứn.

          Pưng pì cài ma nả vịa hụ hền, chự phong bệnh lao, chếp pót cọ nhăng pọ lài dạk cha pưa mi lài cốc pài lá cằn. Pọm cắp luông hụ xiêng nhăng tắm, lẹo côn dần nhăng nái chăng côn pền bệnh lao, xương nặn côn pền bệnh cọ po lê báu vạu hẳư phằư hụ, lài côn pền bệnh lao lỏ côn cặt. Lài côn pền bệnh lao, lưn xưa lỏ côn dú phổng xùng đìn pu chơ pền bệnh cọ báu pày khám cá cơ sở y tế hư bók ải mò ma dàu dà thồi. Cánh va dan chơ dàu dà bệnh lao hư hầng hy xương nặn cọ dệt dạk cha hẳư côn chếp chơ pày dàu dà bệnh.

          Vạy nả vịa chự phong bệnh cựt đảy lang đì, khù cận hà nhất lỏ chí bók hẳư côn dần pưng luông hụ xiêng ma tang chự phong bệnh lao vạy pi nọng khâng chằư xưa cuồng vịa hụ hền, chự phong bệnh hẳư lăm mo chảu cọ xương chu côn cuồng bản mương. Ăn nị báu chư hịa trách nhiệm khòng cơ quàn mi chức quyên lẹo cận mi luông cạt kiên khòng mỏi côn dần. Dệt đảy xương nặn chắng chí pít xùi xìa đảy bệnh lao hôm phân nho xùng chất lượng pảy chự , lăm đù pặc hanh khòng dần mương, lan lay xìa cặt cung, púc pua kinh tế mả khày./.

                        ꪜꪒꪲ ꪎꪴꪥ ꪎꪸ ꫃ꪛꪉ ꫃ꪜꪙ ꪼꪮ ꪮꪮꪀ ꪹꪩꪒ, ꪜꪒꪲ ꪎꪴꪥ ꪎꪸ ꪁꪒꪰ ꪁꪴꪉ

          ꪕꪮꪥ ꪚꪙꪸ ꪢꪱꪥ ꪄꪮꪉ ꪹꪭꪙ ꪤꪱ ꪩꪱꪫ ꪵꪀꪉ ꪜꪮꪒ ꪀꪫꪱꪉ ꪙꪉꪲ ꪀꪺꪉ 6 ꪜꪲ ꪵꪔ ꪜꪲ 2010 ꪭꪮꪒ ꪜꪲ 2016 ꪒꪲ ꪹꪠꪉ ꪭꪴ ꫃ꪬꪙ ꪮꪮꪀ ꪤꪱꪫ 3500 ꫛ ꫃ꪜꪙ ꫃ꪛꪉ ꪩꪱꪫ ,ꪀꪺꪉ ꪙꪽ ꪣꪲ ꪤꪱꪫ 3 ꪝꪽ ꫛ ꪜꪴꪙ ꪔꪺꪥ ꪵꪔ 15 ꪭꪮꪒ 64 ꪜꪲ. ꪙꪮꪀ ꪙꪽ ꪮꪮꪀ ꪑꪉꪰ ꪣꪲ ꪨꪱꪥ ꫛ ꫃ꪜꪙ ꫃ꪛꪉ ꪩꪱꪫ ꫃ꪭ ꪼꪒ ꪭꪴ ꫃ꪬꪙ ꪮꪮꪀ. ꪯꪽ ꪙꪲ ꪨꪷ ꪄꪴ ꪒꪱꪉ ꪹꪋꪱ ꪨꪷ ꪹꪝ ꪫꪱ ꪝꪉꪳ ꫛ ꫃ꪜꪙ ꫃ꪛꪉ ꫃ꪭ ꪼꪒ ꪭꪴ ꫃ꪬꪙ ꪮꪮꪀ ꪋꪲ ꫃ꪥꪒ ꫃ꪛꪉ ꪵꪜꪒ ꪝꪱꪙ ꪻꪎ ꫛ ꪮꪙꪳ.

          ꪨꪉꪰ ꪨꪱꪥ ꪋꪴ ꪋꪙꪸ ꪜꪱꪫ ꪣꪱ ꪕꪱꪉ ꪄꪴ ꪬꪣꪸ ꪭꪱꪥ ꪄꪮꪉ ꫃ꪛꪉ ꪩꪱꪫ, ꫃ꪊꪚ ꪜꪮꪒ ,ꫛ ꫄ꪤꪙ ꫄ꪁꪙ ꪭꪴ ꪵꪊꪉ ꪹꪏ ꪀꪺꪉ ꪫꪀꪸ ꪋꪳ ꪡꪮꪉ ꪔꪱꪉ ꫃ꪛꪉ ꪙꪲ. ꪀꪱꪥ ꪙꪽ ꪤꪮꪙ ꪎꪲ ꪼꪒ ꪩꪺꪉ ꪵꪜꪒ ꪝꪱꪙ ꪻꪎ ꫛ ꪮꪙꪳ.

          ꪝꪉꪳ ꪜꪲ ꪀꪱꪥ ꪣꪱ ꪘꪱ ꪫꪀꪸ ꪭꪴ ꫃ꪬꪙ ,ꪋꪳ ꪡꪮꪉ ꫃ꪛꪉ ꪩꪱꪪ ,꫃ꪊꪚ ꪜꪮꪒ ꪁꪷ ꪑꪉꪰ ꪝꪷ ꪨꪱꪥ ꪤꪱꪀ ꪋꪱ ꪹꪝ ꪣꪲ ꪨꪱꪥ ꪶꪀꪀ ꪜꪱꪥ ꪨꪱꪀ ꪀꪽ. ꪝꪮꪣ ꪀꪚꪾ ꪩꪺꪉ ꪭꪴ ꪏꪉꪸ ꪄꪮꪉ ꫛ ꫄ꪤꪙ ꪑꪉꪰ ꪔꪣꪾ ꪘꪱꪥ ꪋꪉꪰ ꫛ ꫃ꪜꪙ ꫃ꪛꪉ ,ꪹꪏꪈ ꪙꪽ ꪨꪱꪥ ꫛ ꫃ꪜꪙ ꫃ꪛꪉ ꪁꪷ ꪹꪚꪱ ꪹꪫꪱ ꪻꪬ ꪼꪠ ꪭꪴ, ꪨꪱꪥ ꫛ ꫃ꪜꪙ ꫃ꪛꪉ ꪩꪱꪫ ꪨꪷ ꫛ ꪁꪒꪰ. ꪹꪩꪙ ꪹꪏ ꪨꪷ ꫛ ꪤꪴ ꪶꪠꪉ ꪀꪺꪉ ꪨꪀꪰ ꪼꪀ ꫄ꪋ ꫃ꪜꪙ ꫃ꪛꪉ ꪹꪚꪱ ꪼꪜ ꪄꪱꪣ ꪘꪉꪰ ꫄ꪀ ꫄ꪎ ꪮꪲ ꫃ꪔ ꪹꪚꪱ ꪮꪱꪥ ꪢꪷ ꪣꪱ ꪤꪱ ꪀꪛꪾ ꪹꪭꪙ ꪶꪖꪥ .ꪵꪀꪉ ꪫꪱ ꪥꪱꪙ ꫄ꪋ ꪼꪜ ꪤꪱ ꫃ꪛꪉ ꪩꪱꪫ ꪭꪳ ꫄ꪬꪉ ꪭꪲ ꪹꪏꪉ ꪙꪽ ꪁꪷ ꫃ꪥꪒ ꪤꪱꪀ ꪋꪱ ꪼꪬ ꫛ ꫃ꪊꪚ ꫄ꪋ ꪼꪜ ꪹꪤꪱ ꪤꪱ ꫃ꪛꪉ.

          ꪼꪫ ꪘꪱ ꪫꪀꪸ ꪋꪳ ꪡꪮꪉ ꫃ꪛꪉ ꪁꪒꪳ ꪼꪒ ꪩꪱꪉ ꪒꪲ, ꪄꪴ ꫄ꪁꪙ ꪬꪱ ꫄ꪐꪒ ꪀꪷ ꪋꪲ ꪚꪮꪀ ꪼꪬ ꫛ ꫄ꪤꪙ ꪝꪉꪳ ꪩꪺꪉ ꪭꪴ ꪏꪉꪸ ꪣꪱ ꪕꪱꪉ ꫃ꪛꪉ ꪩꪱꪫ ꪼꪫ ꪝꪲ ꪙꪮꪉ ꪭꪴ ꫄ꪅꪉ ꪻꪊ ꪹꪏ ꪀꪺꪉ ꪫꪀꪸ ꪭꪴ ꫃ꪬꪙ ꪋꪳ ꪡꪮꪉ ꫃ꪛꪉ ꪻꪬ ꪩꪣꪾ ꪣꪷ ꪹꪊꪱ ꪁꪷ ꪹꪏꪉ ꪋꪴ ꫛ ꪀꪺꪉ ꪚꪱꪙ ꪹꪣꪉ. ꪯꪽ ꪙꪲ ꪹꪚꪱ ꪋꪳ ꪭꪀꪸ ꪵꪊꪉ ꪑꪣꪸ ꪄꪮꪉ ꫄ꪀ ꪀꪫꪱꪙ ꪣꪲ ꪊꪀꪳ ꪀꪫꪙꪸ ꪩꪱ ꫄ꪁꪙ ꪣꪲ ꪩꪺꪉ ꪁꪱꪒ ꪀꪙꪸ ꪄꪮꪉ ꪢꪮꪥ ꫛ ꫄ꪤꪙ. ꫃ꪥꪒ ꪼꪒ ꪹꪏꪉ ꪙꪽ ꪊꪉꪰ ꪋꪲ ꪜꪒꪲ ꪎꪴꪥ ꪎꪸ ꪼꪒ ꫃ꪛꪉ ꪩꪱꪫ ,ꪶꪭꪣ ꫄ꪡꪙ ꪑꪷ ꪎꪴꪉ ꫄ꪊꪒ ꪹꪨꪉ ꪼꪜ ꪋꪳ, ꪩꪣꪾ ꪒꪴ ꪝꪀꪰ ꪵꪭꪉ ꪄꪮꪉ ꫄ꪤꪙ ꪹꪣꪉ ,ꪩꪱꪙ ꪼꪩ ꪎꪲ ꪁꪒꪰ ꪁꪴꪉ.