ꪝꪷ ꪼꪭ ꪵꪣ ꪙꪱ ꫄ꪁꪙ ꪭꪴ ꪶꪎ 4

ꪝꪉꪳ ꪩꪺꪉ ꫃ꪥꪒ ꪀꪉꪲ ꫃ꪔ ꪁꪒꪳ ꪼꪒ ꪩꪱꪉ ꪒꪲ

              ꪋꪺ ꪹꪭꪙ ꪩꪉꪴ ꪩꪷ ꪪꪽ ꪣꪙꪸ ꪚꪱꪙ ꪙꪱ ꪵꪕꪙ 1 ꪎꪱ ꪬꪺ ꪵꪖꪉ ꪭꪫꪙꪸ ꪒꪙꪸ ꪚꪙꪲ ꪔꪉꪲ ꪒꪙꪸ ꪚꪙꪸ ꪣꪲ ꪊꪱꪉ ꪋꪱꪥ ꪀꪫꪱꪉ ꪻꪐ ꪩꪉꪸ ꪤꪱꪫ 40 ꪶꪔ ꪢꪴ ꪩꪮꪉ ꪀꪱꪥ 600 ꪶꪔ ꪉꪺ ꪁꪫꪱꪥ ꫃ꪜꪒ ꪼꪀ ꪨꪱꪥ ꪔꪱꪉ ꪀꪚꪾ 3 ꪝꪽ ꪹꪖꪀ ꪶꪣꪙ ꪘꪮꪉ ꪜꪱ. ꪩꪉꪴ ꪣꪙꪸ ꫄ꪅꪉ ꪻꪊ ꪼꪜ ꪨꪱꪥ ꪚꪮꪙ ꫄ꪚꪉ ꪵꪩ ꪵꪮꪚ ꪭꪮꪀ ꪩꪺꪉ ꪕꪮꪣ ꪉꪱ ꪀꪱ ꪀꪷ ꪹꪋ ꪢꪱꪀ ꪀꪉꪸ ꪢꪱꪀ ꪵꪉ ꪢꪱꪀ ꪜꪀꪴ ꪚꪱꪙ ꪼꪒ ꪨꪱꪤ ꫛ ꪣꪀꪰ ꪎꪴ. ꪩꪺꪉ ꫃ꪥꪒ ꪀꪉꪲ ꫃ꪔ ꪙꪲ ꪄꪮꪉ ꪩꪉꪴ ꪁꪒꪳ ꪼꪒ ꪖꪴ ꫄ꪑꪚ ꪭꪱꪉ ꪔꪲ ꫄ꪉꪙ ꪢꪮꪥ ꪜꪲ.

              ꪩꪉꪴ ꪢꪺ ꪎꪱꪥ ꪔꪮꪉ ꪘꪉꪰ ꪚꪱꪙ ꪶꪨꪉ ꪎꪱ ꪔꪫꪱ ꪔꪉꪲ ꪭꪫꪙꪸ ꪔꪺꪙ ꪤꪱꪫ ꪔꪉꪲ ꪒꪙꪸ ꪚꪙꪸ ꪜꪀꪴ ꪀꪱ ꫃ꪠ ꪢꪱꪀ ꪶꪀꪉ ꪢꪱꪀ ꪁꪱꪥ ꪩꪱꪥ ꪵꪀꪉ ꪀꪷ ꪤꪱ ꪘꪷ ꪵꪘꪉ ꪯꪲ ꪥꪲ ꪝꪮꪣ ꪀꪚꪾ ꫃ꪥꪒ ꪙꪱ ꪒꪣꪾ ꪹꪄꪱ ꪩꪉꪸ ꪭꪱꪉ ꪭꪮꪥ ꪶꪔ ꪉꪺ ꪁꪫꪱꪥ ꫃ꪜꪒ ꪼꪀ ꪵꪀꪉ ꪘꪮꪉ ꪜꪱ ꪁꪒꪳ ꪼꪒ ꪖꪴ ꫄ꪑꪚ ꪜꪽ ꫄ꪝꪉ ꪼꪜ ꪢꪮꪥ ꪜꪲ ꪼꪒ 500 ꪋꪫꪸ ꪢꪽ.

                ꪁꪷ ꪜꪀꪴ ꪀꪷ ꪼꪣ ꫃ꪥꪒ ꪤꪱ ꪬꪱꪀ ꪫꪱ ꪯꪱꪥ ꪡꪱꪣ ꪵꪮꪉ ꪤꪉꪴ ꪶꪓꪥ 7 ꪎꪱ ꪵꪖꪉ ꪮꪙꪸ ꪭꪫꪙꪸ ꪒꪙꪸ ꪚꪙꪸ ꪎꪮꪙ ꪶꪭꪣ ꪻꪎ ꪜꪀꪴ ꪀꪷ ꪓꪉꪲ ꪩꪉꪰ ꪵꪀꪉ ꪢꪱꪀ ꪹꪄꪱ ꪩꪉꪸ ꪖꪷ ꪶꪙꪀ ꪀꪷ ꪵꪀ ꪵꪀꪉ ꫃ꪜꪒ ꪼꪀ ꪨꪱꪥ ꪔꪱꪉ ꪖꪴ ꫄ꪑꪚ ꪀꪱꪥ 900 ꪋꪫꪸ ꪢꪽ ꪢꪮꪥ ꪜꪲ.

               ꪋꪺ ꪹꪭꪙ ꪩꪉꪴ ꪩꪷ ꪪꪽ ꪤꪱꪉ ꪘꪉꪰ ꪚꪱꪙ ꪕꪱꪫ ꪵꪎꪙ ꪎꪱ ꪼꪩ ꪹꪘ ꪗꪲ ꪎꪱ ꪹꪣꪉ ꪼꪩ ꪣꪲ ꪊꪱꪉ ꪋꪱꪥ ꪀꪫꪱꪉ ꪀꪱꪤ 20 ꪵꪬꪀ ꪕꪱ. ꪀꪱ ꪶꪠꪉ ꪝꪴ ꪀꪫꪱꪉ ꪻꪐ ꪩꪉꪴ ꪜꪽ ꪶꪠꪉ  ꪜꪀꪴ ꪶꪚꪉ ꪵꪊꪉ ꪵꪊꪀ 10 ꪵꪬꪀ ꪕꪱ ꪒꪙꪲ ꪝꪴ ꪨꪷ ꪜꪀꪴ ꪀꪷ ꪼꪣ ꪹꪮꪱ ꪘꪷ, ꪕꪱꪉ ꪝꪴ ꪻꪙ ꪨꪷ ꪜꪀꪴ ꪼꪣ ꪹꪮꪱ ꪵꪜꪙ. ꪶꪠꪉ ꪮꪮꪣ ꪹꪭꪙ ꪩꪉꪴ ꪜꪀꪴ 5 ꪵꪬꪀ ꪕꪱ ꪀꪷ ꪀꪙꪲ ꪢꪱꪀ ꪶꪭꪣ ꪣꪲ ꪢꪱꪀ ꪁꪱꪥ ꪢꪱꪀ ꪣꪺꪉ ꪢꪱꪀ ꪝꪱꪫ…ꪕꪱꪉ ꪀꪮꪉ ꪩꪉꪴ ꪄꪒꪴ 4 ꪝꪽ ꪹꪖꪀ ꪶꪣꪙ ꪘꪮꪉ ꪜꪱ ꪵꪀꪉ ꪩꪉꪸ ꪶꪔ ꪀꪉꪴ ꪀꪱꪣ ꪵꪄꪫ. ꪙꪮꪀ ꪘꪽ ꪮꪮꪀ ꪩꪉꪴ ꪑꪉꪰ ꪜꪀꪴ ꪀꪱꪥ 60 ꪝꪽ ꪀꪷ ꪚꪱꪥ ꪒꪲ ꫃ꪕꪉ ꪼꪫ ꫃ꪥꪒ ꪭꪺ ꪩꪮꪣ ꪼꪜ ꪋꪳ ꪜꪱ ꪼꪣ ꫃ꪕꪉ ꪼꪫ ꪄꪱꪥ ꪻꪬ ꪝꪉꪳ ꫛ ꫃ꪥꪒ ꫃ꪉ ꪎꪱꪙ ꪹꪋꪉ ꪼꪣ ꪄꪮꪉ ꪕꪮꪀ ꪎꪴ ꪚꪱꪥ. ꪊꪱꪉ ꪋꪱꪥ ꪋꪺ ꪹꪭꪙ ꪩꪉꪴ ꪕꪱꪀ ꪣꪲ ꪫꪀꪸ ꫃ꪥꪒ ꫄ꪩꪉ ꫄ꪋ ꪻꪬ 10 ꫛ ꪵꪀꪉ ꪭꪱꪉ ꪎꪚꪲ ꫛ ꫃ꪥꪒ ꪫꪀꪸ ꪕꪮꪥ ꪣꪺ ꪑꪱꪙ.

                                                                                               ꪕꪮꪉ ꪵꪯꪉ ꪥꪀꪲ

Po hay me na cận hụ ( số 4)

Pưng luông dệt kình tế cựt đảy lang đì

      Chua hươn lung Lò Văn Miên, bản Na Ten 1, xã Hùa Thành, huyện Điện Biền, tỉnh Điện Biền mi trang trại quảng nhắư liệng dáo 40 tồ mù long, cài 600 tồ ngua quai pét cáy lài tàng cắp 3 păn thứak môn nòng pà. Lung Miên khâng chằư pày lài bón bấng le ép học luông tom nga cả chựa mák kiểng mák nghe, mák pục bàn, pôi mák, đảy lài côn mặc xủ. Luông dệt kình tế toi lài luông nị hẳư thù nhập hạng tỷ ngơn mỏi pì.

           Lung Mùa Sái Tòng nẳng bản Lồng, xã Toả Tình, huyện Tuần Giáo púk cả phề, mák công, mák cai lai cánh cò dà nó nảnh, y dĩ pọm cắp dệt na đằm khảu, liệng hạng họi tồ ngua quai, pết cáy cánh nòng pà, cựt đảy thù nhập pằn pâng pày mỏi pì đảy 500 triệu mằn.

          Cọ púk cò mạy dệt dà hák va ai Phạm Anh Dũng, đội 7 xã Thanh Yền, huyện Điện Biền xỏn hôm xắư púk cò đinh lăng cánh mák khảu, liệng thỏ, nộc cò kè cánh lài tàng pết cáy, thù nhập cài 900 triệu mằn mỏi pì.

          Chua hươn lung Lò Văn Giảng nẳng bản Tạo Sen, xã Lay Nừa, Thị xã Mương Lay mi tràng trại quảng cài 20 héc ta. Cá phổng pu quảng nhắư, lung pằn phổng púk bồng chảnh chék, 10 héc ta đìn pu lỏ púk 10 héc ta cò mạy àu nó khèo chăn, tang pu năư lỏ púk pưng cò mạy àu mạy pẻn đàng pống nga. Phổng ỏm hươn lung púk 5 héc ta cò kìn mák, hôm mi cò mák cại, mák muông, mák pạo…cọ đảy pít mák. Tang cỏng, lung khút 4 păn thứak môn nòng pói pà cánh liệng tồ củng cảm khèo. Nọk nặn ók, lung GIảng nhăng púk cài 60 păn cò bài đì tênh vạy dệt hụa lọm pảy chự pá mạy, tênh dệt chương khài hẳư pưng côn bản dệt nghê xàn chương mạy khòng tók xủ mạy bài. Trang trại khòng chua hươn lung tạk mi vịa dệt hẳư 10 côn lâng chơ cánh hạng xíp côn dệt vịa toi mua nham./.