Ngon tô: Khù po hay me na cận hụ số 16

Liệng cáy đằm báu dạk hák va cựt đảy thù nhập xùng

          Ai Sỹ hẳư hụ, ai liệng cáy đằm, liệng pết nẳng phổng quảng cài 2 héc ta. Mưa khoẹ, chơ liệng san tàng cáy đằm, pết Sín Chéng, pết phạ cánh chua hươn khỏi cọ pọ lài dạk cha mi chơ nhăng đút lồm.

          Té pưng bai ép, kinh nghiệm thót ók đảy, hùa pì 2016 ma họt khạy, ai Sỹ cọ xỏn hôm xắư liệng cáy đằm. Ai cọ sủ hụa lếch ỏm lọm tênh mết phổng púk cò kìn mák vạy liệng cáy. Trang trại khòng chua hươn ai lâng đảy tọn tăm sáng bàng, chự phong dịch bệnh tục po, men dan xương nặn pưng cáy cọ báu chuốp pền bệnh. Chua hươn ai tênh liệng cáy nhứa, tênh pặc cáy chựa xương nặn, cuồng trang trại khòng chua hươn ai lâng mi té 5 păn họt 6 păn tồ. Ai tô chơ lựa chọn cáy chựa, pền lựa pưng tồ văn dọc, tà hung, khồn bồng, pùm nọi, tìn tăm. Báu pền lựa chọn pưng tồ tìn khồ, pùm dột, khồn lóp.

          Vạy hẳư cáy mi chất lượng nhứa chẹp, pền liệng pói nẳng xuần mi hụa lọm vạy hẳư tồ cáy xáo kìn tứm bổng manh.

          Toi ai Sỹ, é cựt đảy lang đì cuồng vịa tảnh liệng hư cận lài khù: cuồng nặn mi vịa tọn tăm pẹk xằư bón tảnh liệng cánh chự phong dịch bệnh hẳư tồ tảnh liệng. Cọk bâng tảnh liệng đảy nhẳn pao sáng bàng cuồng mua họn, úm chơ mua nào, pựn cọk bâng đảy dú sùng, nặm lày ngai. Mi xương xủ phương báu cọ kép hong pựn dài nà té 5 họt 7 phần. Báu pền liệng cặp lài.

          Cắp luông pùn chự phong bệnh lỏ chính, đảy nhẳn pao pưng tặt pùn ma tang tọn tăm bón tảnh liệng pẹk xằư cánh chự phong dịch bệnh. Mi xương tiềm vắc xin phong bệnh cánh xủ dà kháng sinh dàu dà chơ cáy pền bệnh. Cận tọn tăm cọk bâng pẹk xằư, hăm cừa cánh nặm kìn đảy nhẳn pao pẹk xằư.

          Ai Sĩ cọ pồng chằư đù đì họt chất lượng hăm cừa cáy. “ Cáy pói xương nặn nhứa kìn chẹp, ài hòm.

          Nọk vịa cáy xáo hà kìn, khỏi cọ hẳư cáy kìn khảu li, mák thúa tường cánh bột đúk’.

          Nhứa cáy đằm mi chất lượng xùng, nhứa hằn, ài hòm cánh mi lài chất đảy lài côn mặc kìn. Ca khài nhứa cáy đằm xùng cộp dáo 2 tưa vẹt xắư chựa cáy ứn.

          Dan chằm nị, ai Sỹ cọ xứp tàm khày quảng trang traị vạy chự mẳn trang trại lâng mi té 7 păn tồ cáy nhứa, xòng ma, nhại chiên ma liệng chựa cáy đằm cón nị.

ꪩꪉꪸ ꪼꪀ ꪒꪣꪾ ꪹꪚꪱ ꪥꪱꪀ ꪭꪱꪀ ꪫꪱ ꪁꪒꪳ ꪼꪒ ꪖꪴ ꫄ꪑꪚ ꪎꪉꪴ

          ꪯꪱꪥ ꪎꪲ ꪻꪬ ꪭꪴ ꪯꪱꪥ ꪩꪉꪸ ꪼꪀ ꪒꪣꪾ, ꪩꪉꪸ ꫃ꪜꪒ ꪘꪉꪰ ꪶꪠꪉ ꪀꪫꪱꪉ ꪀꪱꪭ 2 ꪵꪬꪀ ꪕꪱ. ꪹꪣ ꪵꪅꪫ ꫄ꪋ ꪬꪉꪲ ꪩꪉꪸ ꪼꪀ ꪒꪣꪾ, ꫃ꪜꪒ ꪎꪙꪲ ꪵꪊꪉ , ꫃ꪜꪒ ꪡꪱ ꪋꪺ ꪹꪭꪙ ꪄꪮꪥ ꪝꪷ ꪨꪱꪥ ꪥꪱꪀ ꪋꪱ ꪣꪲ ꫄ꪋ ꪑꪉꪰ ꪒꪴꪒ ꪶꪨꪣ.

          ꪵꪔ ꪝꪉꪳ ꪛꪱꪤ ꪵꪮꪚ ꪀꪉꪲ ꪉꪣꪸ ꪖꪮꪒ ꪮꪮꪀ ꪼꪒ ꪵꪔ ꪬꪺ ꪜꪲ 2016 ꪣꪱ ꪭꪮꪒ ꪼꪅ ꪯꪱꪥ ꪎꪲ ꪁꪷ ꪎꪮꪙ ꪶꪭꪣ ꪻꪎ ꪩꪉꪸ ꪼꪀ ꪒꪣꪾ. ꪯꪱꪥ ꪁꪷ ꪎꪴ ꪭꪺ ꫃ꪩꪀ ꪮꪮꪣ ꪩꪮꪣ ꫃ꪕꪉ ꫃ꪢꪒ ꪶꪠꪉ ꪜꪴꪀ ꪀꪷ ꪀꪙꪲ ꪢꪱꪀ ꪼꪫ ꪩꪉꪸ ꪼꪀ. ꪋꪱꪉ ꪋꪱꪥ ꪄꪮꪉ ꪋꪺ ꪹꪭꪙ ꪯꪱꪥ ꫄ꪩꪉ ꪼꪒ ꪕꪮꪙ ꪕꪣꪾ ꪎꪱꪉ ꪚꪱꪉ, ꪋꪳ ꪡꪮꪉ ꪥꪀꪲ ꫃ꪛꪉ ꪕꪀꪴ ꪝꪷ, ꪵꪣꪙ ꪥꪱꪙ ꪹꪏꪉ ꪙꪽ ꪝꪉꪳ ꪼꪀ ꪁꪷ ꪹꪚꪱ ꪊꪺꪚ ꫃ꪜꪙ ꫃ꪛꪉ. ꪋꪺ ꪹꪭꪙ ꪯꪱꪥ ꫃ꪕꪉ ꪩꪉꪸ ꪼꪀ ꪹꪐ , ꫃ꪕꪉ ꪡꪀꪰ ꪼꪀ ꪹꪋ ꪀꪺꪉ ꪋꪱꪉ ꪋꪱꪥ ꪄꪮꪉ ꪋꪺ ꪹꪭꪙ ꪯꪱꪥ ꫄ꪩꪉ ꪩꪉꪸ ꪵꪔ 5 ꪝꪽ ꪭꪮꪔꪤ 6 ꪝꪽ ꪶꪔ ꪼꪀ. ꪯꪱꪥ ꪶꪕ ꫄ꪋ ꪹꪩꪀ ꪹꪋ ꫃ꪜꪙ ꪹꪩꪀ ꪝꪉꪳ ꪶꪔ ꪫꪽ ꪥꪮꪀ , ꪔꪱ ꪭꪴꪉ ꪶꪄꪙ ꪶꪚꪉ ,ꪜꪣꪴ ꪙꪮꪥ , ꪔꪙꪲ ꪕꪣꪾ. ꪹꪚꪱ ꫃ꪜꪙ ꪹꪩꪀ ꪝꪉꪳ ꪶꪔ ꪔꪙꪲ ꪶꪄ , ꪜꪣꪴ ꪶꪥꪒ , ꪶꪄꪙ ꪩꪮꪚ.

          ꪼꪫ ꪻꪬ ꪼꪀ ꪣꪲ ꫄ꪊꪒ ꪹꪩꪉ ꪹꪐ ꪵꪋꪚ , ꫃ꪜꪙ ꪩꪉꪸ ꪜꪮꪥ ꪘꪉꪰ ꪎꪺꪙ ꪣꪲ ꪭꪺ ꪩꪮꪣ ꪼꪫ ꪻꪬ ꪼꪀ ꪎꪱꪪ ꪀꪙꪲ ꪔꪣꪳ ꪶꪚꪉ ꪵꪣꪉ.

          ꪕꪮꪥ ꪮꪱꪥ ꪎꪲ ꪵꪮ ꪁꪒꪳ ꪼꪒ ꪩꪱꪉ ꪒꪲ ꪀꪺꪉ ꪫꪀꪸ ꪵꪔꪉ ꪩꪉꪸ ꪭꪳ ꫄ꪁꪙ ꪨꪱꪥ ꪄꪴ: ꪀꪺꪉ ꪙꪽ ꪣꪲ ꪫꪀꪸ ꪕꪮꪙ ꪕꪣꪾ ꪵꪝꪀ ꪻꪎ ꪚꪮꪙ ꪵꪔꪉ ꪩꪉꪸ ꪵꪀꪉ ꪋꪳ ꪡꪮꪉ ꪥꪀꪲ ꫃ꪛꪉ. ꪀꪮꪀ ꫄ꪛꪉ ꪵꪔꪉ ꪩꪉꪸ ꪼꪒ ꪐꪽ ꪝꪱꪫ ꪎꪱꪉ ꪚꪱꪉ ꪀꪺꪉ ꪣꪺ ꪭꪮꪘ , ꪮꪙꪴ ꫄ꪋ ꪣꪺ ꪘꪱꪫ , ꪜꪙꪳ ꪀꪮꪀ ꫄ꪛꪉ ꪼꪒ ꫃ꪥꪒ ꪎꪉꪴ, ꪙꪣꪾ ꪼꪨ ꪉꪱꪥ. ꪣꪲ ꪹꪏꪉ ꪎꪴ ꪹꪡꪉ ꪹꪚꪱ ꪁꪷ ꪵꪀꪚ ꪭꪮꪉ ꪝꪙꪳ ꪘꪱ ꪵꪔ 5 ꪭꪮꪒ 7 ꫄ꪠꪙ. ꪹꪚꪱ ꫃ꪜꪙ ꪩꪉꪸ ꪁꪚꪾ ꪨꪱꪥ.

          ꪀꪚꪾ ꪩꪺꪉ ꪜꪴꪙ ꪋꪳ ꪡꪮꪉ ꫃ꪛꪉ ꪨꪷ ꪊꪉꪲ ꪼꪒ ꪐꪽ ꪝꪱꪫ ꪝꪉꪳ ꪕꪒꪰ ꪜꪙꪴ ꪣꪱ ꪕꪱꪉ ꪕꪮꪙ ꪕꪣꪾ ꪚꪮꪙ ꪵꪔꪈ ꪩꪉꪸ ꪵꪝꪀ ꪻꪎ ꪵꪀꪉ ꪋꪳ ꪡꪮꪉ ꪥꪀꪲ ꫃ꪛꪉ. ꪔꪣꪸ ꪕꪴꪀ ꪝꪷ ꪤꪱ ꪪꪀꪰ ꪏꪙꪲ ꪡꪮꪉ ꫃ꪛꪉ. ꪭꪣꪾ ꪹꪀ ꪵꪀꪉ ꪙꪣꪾ ꪀꪙꪲ ꪼꪒ ꪐꪽ ꪝꪱꪫ ꪵꪝꪀ ꪻꪎ.

          ꪯꪱꪥ ꪎꪲ ꪁꪷ ꪶꪜꪉ ꪻꪊ ꪒꪴ ꪒꪲ ꪭꪮꪒ ꫄ꪊꪒ ꪹꪩꪉ ꪭꪣꪾ ꪹꪀ ꪼꪀ “ ꪼꪀ ꪜꪮꪥ ꪹꪏꪉ ꪙꪽ ꪹꪐ ꪀꪙꪲ ꪵꪋꪚ ,ꪮꪱꪥ ꪬꪮꪣ. ꪘꪮꪀ ꪫꪀꪸ ꪼꪬ ꪼꪀ ꪎꪱꪫ ꪬꪱ ꪀꪙꪲ , ꪄꪮꪥ ꪁꪷ ꪼꪬ ꪼꪀ ꪀꪙꪲ ꪔꪣꪳ ꪹꪄꪱ ꪩꪲ, ꪢꪱꪀ ꪖꪺ ꪵꪔꪉ ꪵꪀꪉ ꪶꪛꪒ ꪨꪴꪀ”

          ꪵꪐ ꪼꪀ ꪒꪣꪾ ꪀꪙꪲ ꪵꪮꪚ, ꪵꪐ ꪬꪽ ꪮꪱꪥ ꪬꪮꪣ ꪼꪒ ꪨꪱꪥ ꫛ ꪣꪀꪰ ꪀꪙꪲ. ꪁꪱ ꪄꪱꪥ ꪹꪐ ꪼꪀ ꪒꪣꪾ ꪎꪉꪴ ꪶꪁꪚ ꪤꪱꪫ 2 ꪹꪕ ꪵꪫꪒ ꪻꪎ ꪹꪋ ꪼꪀ ꪮꪙꪳ.

          ꪥꪱꪙ ꪊꪣꪾ ꪙꪲ ꪯꪱꪥ ꪎꪲ ꪎꪚꪳ ꪔꪱꪣ ꪼꪄ ꪀꪫꪱꪉ ꪋꪱꪉ ꪋꪱꪥ ꪼꪫ ꪋꪳ ꪢꪽ ꪘꪉꪰ ꪀꪮꪀ ꫄ꪛꪉ ꫄ꪩꪉ ꪣꪲ ꪵꪔ 7 ꪝꪽ ꪶꪔ ꪼꪀ ꪹꪐ , ꪎꪮꪉ ꪣꪱ ꪑꪱꪥ ꪋꪙꪸ ꪣꪱ ꪩꪉꪸ ꪹꪋ ꪼꪀ ꪒꪣꪾ ꪀꪮꪙ ꪙꪲ.

ꪹꪩꪉ ꪬꪫꪙꪸ ꪥꪀꪲ