Điện Biên pâng xắư luông hanh dệt du lịch nẳng nòng luồng lừng nặm Thuỷ điện Sơn La

          Thị xã Mương Lay dú nẳng bón mi 3 me nặm lày ma tọp hôm: Me Nặm Te, me Nặm Na, me Nặm Lay. Ăn nị cọ men địa phường đảy nhẳn danh mi lài luông hanh ma tang du lịch toi tang nặm cánh mả khày kinh tế té nặm nay khòng tỉnh Điện Biên. Khạy nị, chăm va thị xã cọ báu quảng nhắư lài, hák va cọ đảy lài khék hụ họt, cài nặn púc chuân đảy lài khék du lịch ma ỉn dàm bấng le nẳng lòng luồng lừng nặm thuỷ điện nhương mự nhương lài. Nọk vịa púc pua mả khày kinh tế, túc pắt pà củng, côn dầng mương Lay cọ khâng dòm ngơn cốc xự hưa pe vạy táng khék chuông hong vịa dệt du lịch.

          Nọk luông hanh dệt du lịch té nòng luòng thuỷ điện, puồng kìn đơi dú vằn hoá, hịt khong tòng chặn khòng pi nọng chựa nọi côn nẳng thị xã Mương Lay cọ mi lài tàng lài dong. Nẳng nị cọ hiềm chự cánh pếnh khày pưng ngươn lang vằn hoá té pàng chạu khòng phủ Tay Đón. Lưn xưa lỏ xe vòng cánh pàng hội Kin Pang Then. 2 nen vằn hoá đảy cồng nhẳn lỏ di sản vằn hoá cấp phén mương cuồng pì 2016.

          Lung Vàng Văn Thức, côn chang khắp Then nẳng thị xã Mương Lay hẳư hụ: mi luông púc chuân khòng chính quyên địa phường, khạy nị pưng côn chang khắp nẳng cuồng phổng cọ chóng hanh xọk xáo pưng ngươn lang vằn hoá ứn mi xương chuốp lồng lưm xừa. Té nặn tẳng tánh lau pếnh khày pưng ngươn lang vằn hoá nị vạy hôm phân choi địa phường mả khày tứm luông hanh ma tang du lịch.

          Cuồng dan pày nả Thị xã Mương Lay nhẳn danh mả khày du lịch nẳng nòng luồng thuỷ điện chí cựt pền ngành cốc chính mả khày kinh tế khòng địa phường. Khày ók pưng luông hanh  mả khày du lịch nẳng nòng luồng xương: bấng le pưng thuỷ điện; luông tảnh liệng, túc pắt pà củng; pưng bản vằn hoá khòng pi nọng phủ Tay cắp pưng ngươn lang vằn hoá khặn chăn, pưng bón ngươn lang chiên lang.

          Hùa pì 2015, thị xã Mương Lay cọ tủm pua lau pàng hội khánh bải hưa hàng én. Té nặn ma họt khạy, cứ họt mự cốc khoẹ khòng pì mắư, địa phường lỏ tổ chức khánh bải hưa phọn nương, púc chuân đảy luông chôm hặp khòng pưng đội thì  ma té Sơn La, Lai Châu cánh cá mương bạn Lao. Cuồng pưng mự khày ók pàng hội hạng păn vặt khék du lịch cọ hụ cánh ma cá Mương Lay, tựng dan tạ pền bón quén khươi cuồng dan hùa pì mắư choi địa phường nị tống páo cánh mả khày du lịch.

          Thị xã Mương Lay cuồng dan mả khày cọ khảm cài lài khù piến thái cuồng ngươn lang chiên lang. Họt khạy, bón nị nhăng đảy đù lỏ Trung tâm vằn hoá khòng pi nọng phủ Tay, cắp chứng mài lỏ phổng kìn lô dú khòng “ Pùa Tay” Đèo Văn Long dú chằm phổng him Nặm Te, bón biền mài chiên lang Pú Vạp dú nẳng pòm pu xùng cài păn nưng thứak vẹt xắư nả nặm bể. Cắp pưng ngươn lang chiên lang riềng, pọm cắp vịa tẳng có ók pưng thằn hươn hạn liệp him nòng luồng; lừng nặm thuỷ điện cuồng dan tẳng tánh bản mương cọ dệt hẳư Mương Lay pền thị xã nưng cuồng pưng thị xã khặn chăn khòng phổng Tày Bắc. Cài nặn cọ khày ók luông mả khày du lịch mắư tẹt tiêng té phổng nặm nay hẳư phổng đìn nị./.

ꪓꪙꪸ ꪚꪙꪸ ꫃ꪥꪒ ꪤꪴ ꪩꪀꪲ ꪘꪉꪰ ꪘꪮꪉ ꪨꪺꪉ ꪨꪉꪳ ꪙꪾ ꪖꪫꪲ ꪓꪙꪸ ꫄ꪎꪙ ꪨꪱ

          ꪖꪲ ꪎꪱ ꪹꪣꪉ ꪼꪩ ꪤꪴ ꪘꪉꪰ ꪚꪮꪘ ꪣꪲ 3 ꪵꪣ ꪙꪾ ꪼꪨ ꪣꪱ ꪕꪮꪚ ꪶꪭꪣ: ꪵꪣ ꪙꪾ ꪵꪕ ,ꪵꪣ ꪙꪷ ꪙꪱ ,ꪵꪣ ꪙꪾ ꪼꪩ. ꪯꪽ ꪙꪲ ꪁꪷ ꪵꪣꪙ ꪓꪲ ꪹꪠꪉ ꪼꪒ ꪐꪽ ꪵꪥꪉ ꪣꪲ ꪨꪱꪥ ꪩꪺꪉ ꪵꪭꪉ ꪣꪱ ꪔꪱꪉ ꪤꪴ ꪩꪀꪲ ꪕꪮꪥ ꪕꪱꪉ ꪙꪾ ꪵꪀꪉ ꪢꪱ ꪼꪄ ꪀꪉꪲ ꫃ꪔ ꪵꪔ ꪙꪷ ꪼꪙ ꪄꪮꪉ ꪔꪉꪲ ꪓꪙꪸ ꪚꪙꪸ. ꪼꪅ ꪙꪲ ,ꪋꪾ ꪫꪱ ꪖꪲ ꪎꪱ ꪁꪷ ꪹꪚꪱ ꪀꪫꪱꪉ ꪻꪐ ꪨꪱꪥ ,ꪭꪱꪀ ꪫꪱ ꪁꪷ ꪼꪒ ꪨꪱꪥ ꪵꪄꪀ ꪭꪴ ꪭꪮꪒ ,ꪀꪱꪥ ꪙꪽ ꪁꪷ ꪜꪀꪴ ꪋꪺꪙ ꪼꪒ ꪨꪱꪥ ꪵꪄꪀ ꪤꪴ ꪩꪀꪲ ꪣꪱ ꪮꪙꪲ ꪤꪱꪣ ꫄ꪚꪉ ꪵꪩ ꪘꪉꪰ ꪘꪮꪉ ꪨꪺꪉ ꪖꪫꪲ ꪓꪙꪸ. ꪙꪮꪀ ꪫꪀꪸ ꪜꪀꪴ ꪝꪺ ꪢꪱ ꪼꪄ ꪀꪉꪲ ꫃ꪔ ,ꪔꪀꪴ ꪜꪒꪰ ꪜꪱ ꪀꪉꪴ ,ꫛ ꫄ꪤꪙ ꪹꪣꪈ ꪼꪩ ꪁꪷ ꪤꪮꪣ ꫄ꪉꪙ ꪶꪀꪀ ꪏꪳ ꪹꪭ ꪼꪫ ꪔꪱꪉ ꪵꪄꪀ ꪋꪺꪉ ꪭꪮꪉ ꪫꪀꪸ ꫃ꪥꪒ ꪤꪴ ꪩꪀꪲ.

          ꪙꪮꪀ ꪩꪺꪉ ꪵꪭꪉ ꫃ꪥꪒ ꪤꪴ ꪩꪀꪲ ꪵꪔ ꪘꪮꪉ ꪨꪺꪉ ꪖꪫꪲ ꪓꪙꪸ ,ꪜꪺꪉ ꪀꪙꪲ ꫄ꪓꪥ ꪤꪴ ꪊꪽ ꪬꪫꪱ ,ꪝꪉꪳ ꪭꪲꪒ ꪅꪮꪉ ꪔꪮꪉ ꪋꪽ ꪄꪮꪉ ꪝꪲ ꪙꪮꪉ ꪹꪋ ꪙꪮꪥ ꫛ ꪘꪉꪰ ꪖꪲ ꪎꪱ ꪹꪣꪉ ꪼꪩ ꪁꪷ ꪣꪲ ꪨꪱꪥ ꪔꪱꪉ ꪨꪱꪥ ꪥꪮꪉ. ꪘꪉꪰ ꪘꪲ ꪀꪷ ꪬꪣꪸ ꪋꪳ ꪵꪀꪉ ꫃ꪜꪉ ꪼꪄ ꪝꪉꪳ ꪹꪉꪙ ꪩꪱꪉ ꪪꪽ ꪬꪫꪱ ꪵꪔ ꪜꪱꪉ ꪹꪋꪱ ꪄꪮꪉ ꪠꪴ ꪼꪕ ꪒꪮꪙ. ꪹꪩꪘ ꪹꪏ ꪨꪷ ꪵꪏ ꪫꪮꪉ ꪵꪀꪉ ꪜꪱꪉ ꪶꪭꪥ ꪀꪙꪲ ꪜꪱꪉ ꪵꪖꪙ. 2 ꪵꪙꪙ ꪪꪽ ꪬꪫꪱ ꪼꪒ ꪶꪀꪉ ꪐꪽ ꪨꪷ ꪤꪲ ꪎꪱꪘ ꪪꪽ ꪬꪫꪱ ꫄ꪀꪚ ꪵꪠꪙ ꪹꪣꪉ ꪀꪺꪉ ꪜꪲ 2016.

          ꪩꪉꪴ ꪪꪱꪉ ꪊꪽ ꪖꪀꪳ, ꫛ ꪋꪱꪉ ꪄꪚꪾ ꪵꪖꪙ ꪘꪉꪰ ꪖꪲ ꪎꪱ ꪹꪣꪉ ꪼꪩ ꪻꪬ ꪭꪴ: ꪣꪲ ꪩꪺꪉ ꪶꪋꪣ ꪋꪮꪥ ꪄꪮꪉ ꪊꪉꪲ ꪁꪫꪙꪸ ꪓꪸ ꪹꪠꪉ ,ꪼꪅ ꪝꪉꪳ ꫃ꪉ ꫄ꪐꪙ ꪘꪉꪰ ꪀꪺꪉ ꪶꪠꪉ ꪁꪷ ꪊꪮꪉ ꪵꪭꪉ ꪎꪮꪀ ꪎꪱꪫ ꪝꪉꪳ ꪹꪉꪙ ꪩꪱꪉ ꪪꪽ ꪬꪫꪱ ꪮꪙꪳ ꪣꪲ ꪹꪏꪉ ꪊꪺꪚ ꪶꪨꪉ ꪩꪣꪳ ꪎꪸ. ꪵꪔ ꪙꪽ ꪔꪉꪰ ꪵꪔꪉ ꪹꪩꪱ ꪵꪀꪉ ꫃ꪜꪉ ꪼꪄ ꪝꪉꪳ ꪹꪉꪙ ꪩꪱꪉ ꪪꪽ ꪬꪫꪱ ꪙꪲ ꪼꪫ ꪶꪭꪣ ꫄ꪡꪙ ꪋꪮꪥ ꪓꪸ ꪹꪠꪉ ꪢꪱ ꪼꪄ ꪔꪣꪳ ꪩꪺꪉ ꪵꪭꪉ ꪣꪱ ꪕꪱꪉ ꪤꪴ  ꪩꪀꪲ.

          ꪬꪺ ꪜꪲ 2015, ꪖꪲ ꪎꪱ ꪹꪣꪉ ꪼꪩ ꪁꪷ ꪔꪣꪴ ꪝꪺ ꪹꪩꪱ ꪜꪱꪉ ꪶꪭꪥ ꪵꪄꪉ ꪚꪱꪥ ꪹꪭ ꪬꪱꪉ ꪵꪮꪙ. ꪵꪔ ꪙꪽ ꪣꪱ ꪭꪮꪒ ꪼꪅ ꪁꪳ ꪭꪮꪒ ꪣꪳ ꪶꪀꪀ ꪵꪅꪫ ꪄꪮꪉ ꪜꪲ ꪻꪢ ꪓꪸ ꪹꪠꪉ ꪶꪔ ꪊꪀꪳ ꪵꪄꪉ ꪚꪱꪥ ꪹꪭ ꪡꪮꪙ ꪹꪙꪉ ,ꪜꪀꪴ ꪋꪺꪙ ꪼꪒ ꪩꪺꪉ ꪶꪋꪣ ꪭꪚꪾ ꪄꪮꪉ ꪝꪉꪳ ꪶꪓꪥ ꪖꪲ ꪣꪱ ꪵꪔ ꫄ꪎꪙ ꪨꪱ ,ꪨꪱꪥ ꪹꪊꪱ ꪵꪀꪉ ꪝꪉꪳ ꪶꪓꪥ ꪵꪔ ꪹꪣꪉ ꪛꪱꪙ ꪩꪱꪫ. ꪀꪺꪉ ꪝꪉꪳ ꪣꪳ ꪼꪄ ꪮꪮꪀ ꪜꪱꪉ ꪶꪭꪥ ꪭꪱꪉ ꪝꪽ ꪫꪒꪰ ꪵꪄꪀ ꪁꪷ ꪭꪴ ꪭꪮꪒ ꪵꪀꪉ ꪣꪱ ꪁꪱ ꪹꪣꪉ ꪼꪩ.

          ꪖꪲ ꪎꪱ ꪹꪣꪉ ꪼꪩ ꪀꪺꪉ ꪥꪱꪙ ꪢꪱ ꪼꪄ ꪁꪷ ꪣꪲ ꪨꪱꪥ ꪄꪴ ꪜꪙꪸ ꪖꪱꪥ ꪀꪺꪉ ꪹꪉꪙ ꪩꪱꪉ ꪋꪙꪸ ꪩꪱꪉ. ꪭꪮꪒ ꪼꪅ ꪚꪮꪙ ꪙꪲ ꪑꪉꪰ ꪼꪒ ꪒꪴ ꪨꪷ ꪊꪉꪴ ꫄ꪔꪣ ꪪꪽ ꪬꪫꪱ ꪄꪮꪉ ꪝꪲ ꪙꪮꪉ ꪠꪴ ꪼꪕ ,ꪀꪚꪾ ꪊꪉꪳ ꪢꪱꪥ ꪨꪷ ꪶꪠꪉ ꪀꪙꪲ ꪶꪩ ꪤꪴ ꪄꪮꪉ “ ꪜꪺ ꪼꪕ” ꪵꪒꪫ ꪪꪽ ꪨꪮꪉ ꪤꪴ ꪊꪾ ꪶꪠꪉ ꪭꪣꪲ ꪙꪾ ꪵꪕ ,ꪚꪮꪙ ꪚꪙꪸ ꪢꪱꪥ ꪋꪙꪸ ꪩꪱꪉ ꪝꪴ ꪫꪱꪚ ꪤꪴ ꪘꪉꪰ ꪜꪮꪣ ꪝꪴ ꪎꪉꪴ ꪀꪱꪥ ꪝꪽ ꫜ ꪵꪖꪀ ꪹꪫꪒ ꪻꪎ ꪘꪱ ꪙꪾ ꫃ꪚ. ꪀꪚꪾ ꪝꪉꪳ ꪹꪉꪙ ꪩꪱꪉ ꪥꪉꪸ, ꪝꪮꪣ ꪀꪚꪾ ꪫꪀꪸ ꪔꪉꪰ ꪀꪷ ꪮꪮꪀ ꪝꪉꪳ ꪖꪽ ꪹꪭꪙ ꪭꪱꪙ ꪩꪚꪸ ꪭꪣꪲ ꪘꪮꪉ ꪨꪺꪉ ꪨꪉꪳ ꪙꪾ ꪖꪫꪲ ꪓꪙꪸ ꪀꪺꪉ ꪥꪱꪙ ꪔꪉꪰ ꪵꪔꪉ ꪚꪱꪙ ꪹꪣꪉ ꪁꪷ ꫃ꪥꪒ ꪻꪬ ꪹꪣꪉ ꪼꪩ ꪁꪒꪳ ꫃ꪜꪙ ꪖꪲ ꪎꪱ ꫜ ꪀꪺꪉ ꪝꪉꪳ ꪖꪲ ꪎꪱ ꪅꪽ ꪋꪽ ꪘꪉꪰ ꪶꪠꪉ ꪼꪔ ꪚꪀꪰ. ꪀꪱꪥ ꪙꪽ ꪁꪷ ꪼꪄ ꪮꪮꪀ ꪩꪺꪉ ꪢꪱ ꪼꪄ ꪤꪴ ꪩꪀꪲ ꪻꪢ ꪵꪔꪒ ꪕꪉꪸ ꪵꪔ ꪶꪠꪉ ꪙꪷ ꪼꪙ ꪘꪉꪰ ꪶꪠꪉ ꪒꪙꪲ ꪙꪲ.

                                                                                                                                                                   ꪹꪩꪉ ꪬꪫꪙꪸ ꪤꪀꪲ