Mák mặn hậu Sơn La hùa mua đảy ca

          Chua hươn ai Leo Vằn Công, dú bản Sét, xã Chiêng Đèn, thành phố Sơn La púk mák mặn té pì 1994. Mưa khoẹ tay hươn cọ púk mák mặn xắp báng xắư toi cò mák phùng cánh cò cà phề, hền púk cò mák mặn hậu púk nẳng nị nuối nhắư cánh kìn chẹp, cọ báu mết lài cồng hanh lăm đù lẹo cựt đảy ca con kinh tế xùng, tay hươn cọ hằn hanh dòm ngơn cốc púk tứm hạng păn cốc. Họt khạy chua hươn cọ mi 2 héc ta púk mák mặn hậu xắp báng toi cò mák phùng, cò cà phề, xịa xìa tênh mết ngơn, mỏi pì thù nhập tẹt tiêng cài 100 triệu mằn.

          Xã Chiêng Đèn mi 14 bản púk mák mặn hậu cắp tà đìn cài 500 héc ta, cuồng nặn cài 300 héc ta đàng đảy pít mák, năng xuất pằn pâng pày dáo 10 tấn mỏi héc ta. Mák mặn hậu cọ chọp cắp nặm đìn nẳng nị, mák nuối nhắư kìn chẹp, xổm bàn, phói đảy lài côn mặc kìn.

          Pưa phạ nào cưm té hùa pì dệt hẳư mák mặn hậu nẳng xã pì nị báu cựt đảy năng xuất xùng, dón té 2 họt 3 tưa vẹt xắư chu pì, hák va khài đảy ca. Pì nị mák mặn hậu khài nẳng xuần mi ca té 15 păn họt 20 păn mằn mỏi cần, lưn té 8 păn họt 10 păn mằn mỏi cần vẹt xắư chu pì, choi côn púk mák mặn chăm va báu đảy mua, hák va pi nọng cọ muôn hòm pưa khài đảy ca.

          Nhẳn danh cò mák mặn hậu lỏ tàng cò nưng cuồng pưng tàng cò púk bồng cốc chính khòng xã, lung Cà Văn Danh, chủ tịch uỷ bàn dần mương xã Chiêng Đèn, thành phố Sơn La hẳư hụ: Pì nị mák mặn hạu chăm va báu đảy mua, hák va xã cọ chiên páo, niếu chưa pi nọng xứp tàm púk tứm mák mặn hậu nẳng tà đìn pu.     Quam va: “ Đảy mua, báu đảy ca-báu đảy mua, khài đảy ca” lâng lỏ khù chau lò khòng po hay me na. Mua mák mặn hậu pì nị chăm va báu đảy mua xương chu pì, hák va khài đảy ca. Khù nặn choi côn dần púk mák mặn hậu nẳng xã Chiêng Đèn cọ yền chằư mả khày kinh tế, tẹt tiêng puồng kìn đơi dú./.

Hoàng Long-Huyền dịch

ꪢꪱꪀ ꪣꪽ ꪹꪭꪱ ꫄ꪎꪙ ꪨꪱ ꪬꪺ ꪣꪺ ꪼꪒ ꪁꪱ

          ꪋꪺ ꪹꪭꪙ ꪯꪱꪥ ꪵꪩꪫ ꪪꪽ ꪶꪁꪉ ꪤꪴ ꪚꪱꪙ ꪵꪎꪒ ꪎꪱ ꪋꪉꪸ ꪵꪒꪙ ,ꪵꪖꪉ ꪶꪠ ꫄ꪎꪙ ꪨꪱ ꪜꪴꪀ ꪢꪱꪀ ꪣꪽ ꪵꪔ ꪜꪲ 1994. ꪹꪣ ꪵꪅꪫ ꪼꪕ ꪹꪭꪙ ꪁꪷ ꪜꪴꪀ ꪀꪱꪢ ꪣꪽ ꪎꪚꪾ ꪚꪱꪉ ꪕꪮꪥ ꪀꪷ ꪢꪱꪀ ꪠꪴ ꪵꪀꪉ ꪀꪷ ꪀꪱ ꫃ꪠ , ꫃ꪬꪙ ꪢꪱꪀ ꪣꪽ ꪹꪭꪱ ꪜꪴꪀ ꪘꪉꪰ ꪙꪲ ꪘꪺꪥ ꪻꪐ ꪀꪙꪲ ꪵꪋꪚ ,ꪵꪩꪫ ꪹꪚꪱ ꫃ꪢꪒ ꪨꪱꪤ ꪶꪀꪉ ꪵꪭꪉ ꪩꪣꪾ ꪒꪴ, ꪁꪓꪳ ꪼꪒ ꪁꪱ ꪁꪮꪙ ꪀꪉꪲ ꫃ꪔ ꪎꪴꪉ. ꪭꪮꪒ ꪼꪅ ꪼꪕ ꪹꪭꪙ ꪀꪷ ꪢꪲ 2 ꪵꪬꪀ ꪕꪱ ꪜꪴꪀ ꪢꪱꪀ ꪣꪽ ꪹꪭꪱ, ꪢꪮꪥ ꪜꪲ ꪖꪴ ꫄ꪑꪚ ꪵꪕꪒ ꪕꪉꪸ ꪀꪱꪥ 100 ꪋꪫꪸ ꪢꪽ.

          ꪎꪱ ꪋꪉꪸ ꪵꪒꪙ ꪣꪲ 14 ꪚꪱꪙ ꪜꪴꪀ ꪢꪱꪀ ꪣꪽ ꪹꪭꪱ ꪀꪚꪾ ꪔꪱ ꪒꪙꪲ ꪀꪱꪥ 500 ꪵꪬꪀ ꪕꪱ, ꪀꪺꪈ ꪙꪽ ꪣꪲ 300 ꪵꪬꪀ ꪕꪱ ꪒꪱꪉ ꪼꪒ ꪜꪒꪲ ꪢꪱꪀ ꪙꪉꪰ ꪎꪺꪒ ꪜꪽ ꫄ꪝꪉ ꪼꪜ ꪤꪱꪫ 10 ꫄ꪔꪙ ꪢꪮꪥ ꪵꪬꪀ ꪕꪱ. ꪢꪱꪀ ꪣꪽ ꪹꪭꪱ ꪋꪮꪚ ꪀꪚꪾ ꪙꪣꪾ ꪒꪙꪲ ꪘꪉꪰ ꪙꪲ, ꪢꪱꪀ ꪘꪺꪥ ꪼꪐ ꪀꪙꪲ ꪵꪋꪚ , ꪠꪮꪥ ꪼꪒ ꪨꪱꪥ ꫛ ꪣꪀꪰ ꪀꪙꪲ.

          ꪹꪝ ꪡꪱ ꪘꪱꪫ ꪁꪣꪳ ꪵꪔ ꪬꪺ ꪜꪲ ꫃ꪥꪒ ꪻꪬ ꪢꪱꪀ ꪣꪽ ꪹꪭꪱ ꪘꪉꪰ ꪎꪱ ꪜꪲ ꪙꪲ ꪹꪚꪱ ꪁꪒꪴ ꪼꪒ ꪙꪉꪰ ꪎꪺꪒ ꪎꪴꪉ ,ꪤꪮꪙ ꪵꪔ 2 ꪭꪮꪒ 3 ꪹꪕ ꪵꪫꪒ ꪻꪎ ꪋꪴ ꪜꪲ, ꪬꪱꪀ ꪫꪱ ꪄꪱꪥ ꪼꪒ ꪁꪱ. ꪝꪲ ꪙꪲ ꪢꪱꪀ ꪣꪽ ꪹꪭꪱ ꪄꪱꪥ ꪀꪚꪾ ꪎꪺꪙ ꪵꪔ 15 ꪭꪮꪒ 20 ꪝꪽ ꪢꪽ ꪢꪮꪥ ꫄ꪀꪙ ,ꪩꪙꪳ ꪵꪔ 8 ꪭꪮꪒ 10 ꪝꪽ ꪢꪽ ꪢꪮꪥ ꫄ꪀꪙ ꪵꪫꪒ ꪻꪎ ꪊꪴ ꪜꪲ, ꪋꪣꪾ ꪫꪱ ꪹꪚꪱ ꪼꪒ ꪣꪺ ꪬꪱꪀ ꪫꪱ ꪄꪱꪥ ꪼꪒ ꪁꪱ, ꪝꪲ ꪙꪮꪉ ꪀꪷ ꪣꪺꪙ ꪬꪮꪣ.

          ꪐꪽ ꪵꪥꪉ ꪀꪷ ꪢꪱꪀ ꪣꪽ ꪹꪭꪱ ꪨꪷ ꪔꪱꪉ ꪀꪷ ꫜ ꪀꪺꪉ ꪝꪉꪳ ꪔꪱꪉ ꪀꪷ ꪜꪴꪀ ꪶꪪꪉ ꪶꪀꪀ ꪊꪉꪲ ꪄꪮꪈ ꪎꪱ, ꪩꪴꪈ ꪁꪱ ꪪꪽ ꪵꪤꪉ ꪊꪴ ꪕꪀꪲ ꪮꪫꪲ ꪚꪱꪙ ꫄ꪤꪙ ꪹꪣꪉ ꪎꪱ ꪋꪉꪸ ꪵꪒꪙ ꪼꪬ ꪭꪴ ꪜꪲ ꪙꪲ ꪢꪱꪀ ꪣꪽ ꪹꪭꪱ ꪋꪣꪾ ꪫꪱ ꪹꪚꪱ ꪼꪒ ꪣꪺ, ꪬꪱꪀ ꪫꪱ ꪎꪱ ꪁꪷ ꪋꪙꪸ ꪜꪱꪫ ꪻꪬ ꪝꪲ ꪙꪮꪉ ꪎꪚꪳ ꪔꪱꪣ ꪜꪴꪀ ꪔꪣꪳ ꪢꪱꪀ ꪣꪽ ꪘꪉꪰ ꪔꪱ ꪒꪙꪲ ꪝꪴ.

          ꪁꪫꪱꪣ ꪫꪱ: ꪼꪒ ꪣꪺ ꪭꪳ ꪹꪚꪱ ꪼꪒ ꪹꪁꪱ-ꪹꪚꪱ ꪼꪒ ꪣꪺ ꪭꪳ ꪄꪱꪤ ꪼꪒ ꪁꪱ, ꫄ꪩꪉ ꪨꪷ ꪄꪴ ꪹꪋꪱ ꪨꪷ ꪄꪮꪉ ꪝꪷ ꪼꪭ ꪵꪣ ꪙꪱ. ꪣꪺ ꪢꪱꪀ ꪣꪽ ꪹꪭꪱ ꪜꪲ ꪙꪲ ꪋꪣꪾ ꪫꪱ ꪹꪚꪱ ꪼꪒ ꪣꪺ ꪹꪏꪉ ꪋꪴ ꪜꪲ, ꪬꪱꪀ ꪫꪱ ꪄꪱꪥ ꪼꪒ ꪁꪱ. ꪄꪴ ꪙꪽ ꪋꪮꪥ ꫛ ꫄ꪤꪙ ꪜꪴꪀ ꪢꪱꪀ ꪣꪽ ꪹꪭꪱ ꪘꪉꪰ ꪎꪱ ꪋꪉꪸ ꪵꪒꪙ ꪁꪷ ꪮꪙꪸ ꪻꪊ ꪢꪱ ꪼꪄ ꪀꪉꪲ ꫃ꪔ ,ꪵꪕꪒ ꪕꪉꪸ ꪜꪺꪉ ꪀꪙꪲ ꫄ꪒꪤ ꪤꪴ.

ꪹꪩꪉ ꪬꪫꪙꪸ ꪥꪀꪲ