Pọm cắp nọng pày trương

----------

Nọng Giàng Động Tủa, học sình lớp 9, Trương phổ thồng dần tộc bán trú Mương Lạn ma dú cắp pưng chiến sỹ đôn bộ đội đèn mương Mương Lạn đảy 2 pì lẹo. Khó ải khó êm,  Tủa dú toi po ào, puồng kìn đơi dú hươn dảo pọ lài dạk cha. Đôn bộ đội đèn mương Mương Lạn cọ tỏn làn Tủa ma dú nẳng đôn, khay nị nọng cọ quén khơi cắp bón dú mắư cuồng quần đội. Té lỏ học sình nưng pák quam kèo cọ báu mong, dản sắn chơ pák tó lài côn, hák va khay nị nọng cọ mi lài khù piến thái. Báu xuấn to đảy lăm đù ma tang vịa kìn, vịa dú, Tủa nhăng đảy bók xòn luông kìn dú khoà học, luông pák vạu khảu chà, tập tư thể dục, dệt vịa, ép học men luông. Đôn bộ đội đèn mương Mương Lạn khay nị khặc khọ lỏ làng hươn úm ình khòng nọng:

Pọm cắp Tủa, 2 nọng lỏ Giàng A Hợ cánh Thào Cha Pó cọ đảy cán bộ, chiến sỹ đôn bộ đội đèn mương Mương Lạn nhẳn ma liệng. Pưa dú té cư bản lắc ma, vạy pưng nọng mi nết kìn dú khoà học, cán bộ, chiến sỹ cuồng đôn cọ bók xòn pưng nọng họt bón họt ti, té pưng vịa dệt nọi nhất. Cư 5 chơ thóng tứn chạu hạng mự lỏ pưng nọng tứn tọn sứa tọn pha hẳư măn sáng bàng, piêng pặp pưng khù pưng nọng hê đảy dệt xắc tưa chơ dú hươn.

Pưa mi luông pồng chằư, choi dừa khòng pưng chiến sỹ bộ đôi đèn mương, vịa ép học khòng pưng nọng, xương Túa, Hợ cánh Pó pọm cắp lài nọng học sình chựa nọi côn ứn nẳng huyện đèn mương Sốp Cộp cọ chi dón xìa lài khù dạk cha. Luông hặc panh ín xường khòng pưng ai chi lỏ bón pâng vạy pưng nọng hựt khửn, tập tư ló liêng cựt pền cồng dần mi lợi hẳư bản mương./.

ꪝꪮꪣ ꪀꪚꪰ ꪙꪮꪉ ꪼꪜ ꪹꪋꪉ

------------

ꪎꪙꪮꪉ Giàng Động Tủa, ꪭꪮꪀ ꪎꪉꪲ ꪹꪨꪷꪚ 9, ꪹꪋꪉ ꪶꪠ ꪶꪖꪉ ꪹꪤꪷꪙ ꪶꪕꪀ ꪚꪱꪙ ꪊꪴ ꪹꪣꪉ ꪩꪱꪙ ꪣꪱ ꪤꪴ ꪀꪚꪰ ꪝꪉꪳ ꪊꪙꪸ ꪎꪲ ꪶꪓꪙ ꪶꪚ ꪶꪓꪥ ꪵꪒꪙ ꪹꪣꪉ ꪹꪣꪉ ꪩꪱꪙ ꪼꪒ 2 ꪜꪲ ꪵꪩꪫ. ꪄꪷ ꪮꪱꪥ ꪄꪷ ꪹꪯꪸꪣ Tủa ꪤꪴ ꪕꪮꪥ ꪝꪷ ꪮꪱꪫ , ꪜꪺꪉ ꪀꪲꪙ ꪹꪓꪷꪥ ꪤꪴ ꪝꪷ ꪨꪱꪥ ꪥꪱꪀ ꪋꪱ. ꪶꪓꪙ ꪶꪚ ꪶꪓꪥ ꪵꪒꪙ ꪹꪣꪉ ꪹꪣꪉ ꪩꪱꪙ ꪁꪷ ꪔꪮꪙ Tủa ꪣꪱ ꪤꪴ ꪘꪉꪰ ꪶꪓꪙ , ꪼꪅ ꪙꪲ ꪙꪮꪉ ꪁꪷ ꪵꪀꪫꪙ ꪹꪅꪥ ꪀꪚꪰ ꪚꪮꪙ ꪤꪴ ꪻꪢ ꪀꪺꪉ ꪀꪺꪙ ꪶꪓꪥ. ꪵꪔ ꪨꪷ ꪭꪮꪀ ꪎꪉꪲ ꫜ ꪜꪱꪀ ꪁꪫꪱꪣ ꪵꪀꪫ ꪹꪭꪸ ꪣꪮꪉ , ꪤꪱꪙ ꪎꪽ ꪹꪊꪷ ꪜꪱꪀ ꪔꪷ ꪘꪱ ꪨꪱꪥ ꫛ, ꪬꪱꪀ ꪫꪱ ꪼꪅ ꪙꪲ ꪙꪮꪉ ꪁꪷ ꪣꪲ ꪨꪱꪥ ꪄꪴ ꪜꪙꪸ ꪖꪱꪥ. ꪹꪚꪱ ꪎꪺꪙ ꪕꪷ ꪼꪒ ꪩꪣꪾ ꪒꪴ ꪣꪱ ꪕꪱꪉ ꪫꪀꪸ ꪀꪲꪙ ꪤꪴ, Tủa ꪐꪉꪰ ꪼꪒ ꪚꪮꪀ ꪎꪮꪙ ꪩꪺꪉ ꪎꪉꪲ ꪭꪫꪱꪒ ꪄꪫꪱ ꪭꪮꪀ , ꪩꪺꪉ ꪜꪱꪀ ꪹꪫꪱ ꪹꪄꪱ ꪊꪱ, ꪹꪕꪷꪚ ꪕꪳ, ꪵꪮꪚ ꪭꪮꪀ ꪵꪣꪙ ꪩꪺꪉ. ꪶꪓꪙ ꪶꪚ ꪶꪓꪥ ꪵꪒꪙ ꪹꪣꪉ ꪹꪣꪉ ꪩꪱꪙ ꪼꪅ ꪙꪲ ꪅꪀꪰ ꪅꪷ ꪨꪷ ꪨꪱꪉ ꪹꪭꪘ ꪮꪣꪴ ꪮꪉꪲ ꪄꪮꪉ ꪙꪮꪉ.

ꪝꪮꪣ ꪀꪚꪰ ꪙꪮꪉ Tủa, 2 ꪙꪮꪉ ꪨꪷ Giàng A Hợ ꪵꪀꪉ Thào Cha Pó ꪁꪷ ꪼꪒ ꪀꪱꪙ ꪶꪚ , ꪊꪙꪸ ꪎꪲ ꪶꪓꪙ ꪶꪚ ꪶꪓꪥ ꪵꪒꪙ ꪹꪣꪉ ꪹꪣꪉ ꪩꪱꪙ ꪐꪽ ꪣꪱ ꪩꪉꪸ. ꪹꪝ ꪤꪴ ꪁꪳ ꪚꪱꪙ ꪨꪀꪰ ꪣꪱ, ꪼꪫ ꪝꪉꪳ ꪙꪮꪉ ꪣꪲ ꪹꪘꪸꪒ ꪀꪲꪙ ꪩꪣꪸ ꪤꪴ ꪄꪫꪱ ꪭꪮꪀ, ꪀꪱꪙ ꪶꪚ , ꪊꪙꪸ ꪎꪲ ꪄꪮꪉ ꪶꪓꪙ ꪁꪷ ꪚꪮꪀ ꪎꪮꪙ ꪝꪉꪳ ꪙꪮꪉ ꪭꪮꪒ ꪚꪮꪙ ꪭꪮꪒ ꪕꪲ, ꪵꪔ ꪝꪉꪳ ꪫꪀꪸ ꪹꪥꪸꪒ ꪙꪮꪥ ꪹꪐꪷꪒ. ꪁꪳ 5 ꪹꪋꪷ ꪖꪮꪉ ꪔꪙꪳ ꪹꪋꪱ ꪭꪱꪉ ꪣꪳ ꪨꪷ ꪝꪉꪳ ꪙꪮꪉ ꪔꪙꪳ, ꪕꪮꪙ ꪹꪎ ꪕꪮꪙ ꪡꪱ ꪻꪬ ꪎꪱꪉ ꪚꪱꪉ , ꪝꪉꪸ ꪝꪚꪰ ꪝꪉꪳ ꪄꪴ ꪝꪉꪳ ꪙꪮꪉ ꪹꪭꪸ ꪼꪒ ꪹꪥꪸꪒ ꪎꪀꪰ ꪹꪕ ꪹꪋꪷ ꪤꪴ ꪹꪭꪙ.

ꪹꪝ ꪣꪲ ꪩꪺꪉ ꪶꪜꪉ ꪻꪊ ꪋꪮꪥ ꪹꪤ ꪄꪮꪉ ꪝꪉꪳ ꪊꪙꪸ ꪎꪲ ꪶꪓꪙ ꪶꪚ ꪶꪓꪥ ꪵꪒꪙ ꪹꪣꪉ ꪹꪣꪉ ꪩꪱꪙ, ꪫꪀꪸ ꪵꪮꪚ ꪭꪮꪀ ꪄꪮꪉ ꪝꪉꪳ ꪙꪮꪉ ꪹꪏꪉ Túa, Hợ ꪵꪀꪉ Pó ꪝꪮꪣ ꪀꪚꪰ ꪨꪱꪥ ꪙꪮꪉ ꪭꪮꪀ ꪎꪉꪲ ꪮꪙꪳ ꪘꪉꪰ ꪭꪫꪙꪸ ꪵꪒꪙ ꪹꪣꪉ ꪶꪎꪚ ꪶꪁꪚ ꪁꪷ ꪋꪷ ꪤꪮꪙ ꪎꪸ ꪄꪴ ꪤꪱꪀ ꪋꪱ. ꪩꪺꪉ ꪭꪀꪰ ꪵꪝꪉ ꪮꪙꪲ ꪹꪎꪉ ꪄꪮꪉ ꪝꪉꪳ ꪯꪱꪥ ꪋꪲ ꪨꪷ ꪚꪮꪙ ꪹꪝꪷꪉ ꪼꪫ ꪝꪉꪳ ꪙꪮꪉ ꪭꪒꪳ ꪄꪙꪳ ꪹꪕꪷꪚ ꪕꪳ ꪨꪷ ꪩꪉꪸ ꪁꪒꪳ ꪹꪜꪸꪙ ꫛ ꪣꪲ ꪹꪨꪷꪥ ꪻꪬ ꪚꪱꪙ ꪹꪣꪉ.ꪎ

Hồng Việt – Thành dịch