ꪒꪱꪥ ꪶꪚꪙ ꪹꪎꪉ ꪁꪱꪒ ꪁꪙꪸ ꪔꪷ  ꪶꪏꪙ ꪩꪱꪫ - ꪫꪒꪸ ꪊꪳ ꫄ꪮꪙ ꪶꪀꪉ ꪅꪙꪴ ꪠꪲ ꫄ꪜꪙ ꪨꪉꪲ

          ꪀꪺꪉ ꪝꪉꪳ ꪹꪚꪙ ꫃ꪥꪒ ꪘꪱ ꪫꪀꪸ ꪀꪺꪀ ꫃ꪔ ꪋꪮꪥ ꪹꪣꪉ ꪛꪱꪙ ꪩꪱꪫ, ꪀꪱꪥ ꪖꪮꪉ ꪋꪫꪥꪸ ꪫꪒꪷ ꪀꪺꪙ ꫄ꪐꪙ ꪫꪒꪸ ꪘꪱꪣ ꪁꪷ ꪶꪋꪣ ꪭꪚꪾ ꪔꪷ ꪶꪏꪙ ꪁꪣꪾ ꪔꪷ ꪵꪠꪙ ꫄ꪎꪀ ꪹꪀꪚ ꪹꪣꪉ ꪝꪮꪣ ꪀꪚꪾ ꪀꪺꪙ ꫄ꪤꪙ ꪩꪱꪫ ꪵꪀꪉ ꪀꪱꪥ 5ꪜ ꪝꪽ ꫛ ꪊꪍꪚ ꫄ꪊꪚ ꪚꪱꪒ ꪵꪀꪉ 40 ꪝꪽ ꪩꪒꪸ ꪎꪲ ꪼꪩ ꪀꪉꪲ ꪒꪀꪴ ꪹꪩꪒ. ꪼꪫ ꪚꪙꪸ ꪢꪱꪥ ꪶꪀꪉ ꪅꪙꪴ ꪻꪐ ꪨꪺꪉ ꪙꪽꪶ ꪘꪉꪷ ꪨꪱꪉ ꪔꪉꪲ, ꪵꪖꪉ ꪶꪠ ꪄꪮꪉ ꪩꪱꪫ ꪁꪷ ꪔꪉꪷ ꪒꪱꪥ  ꪶꪬꪙ ꪬꪱ ꪀꪺꪙ ꪔꪉ ꪉꪫꪙꪸ ꪫꪒꪸ ꪘꪱꪣ ꪵꪀꪉ ꪝꪉꪳ ꪶꪀꪉ ꪊꪉꪲ ꪚꪙꪸ ꪢꪱꪥ ꪉꪸ ꪁꪱꪒ ꪩꪺꪉ ꪎꪱꪙ ꪝꪮꪣ ꪶꪭꪣ ꪵꪭꪉ ꪶꪏꪙ ꫄ꪎꪀ ꪄꪮꪉ ꪫꪒꪸ ꪘꪱꪣ - ꪩꪱꪫ. ꪀꪺꪉ ꪙꪽ ꪣꪲ ꪝꪉꪳ ꪹꪕꪉ ꪒꪱꪥ ꪘꪉꪷ ꪝꪉꪳ ꪔꪉꪲ  U - đôm - xay - Xiêng khoảng, Sa - vẳn - na - khệt, Át – ta – pư, ꪅꪣꪾ ꪣꪺꪙ ꪬꪺ ꪡꪽ, ꪫꪉꪸ ꪊꪽ ꪵꪀꪉ ꪋꪣꪾ ꪝꪱ ꪎꪀꪷ ...ꪯꪽ ꪨꪷ ꪊꪉꪳ ꪢꪱꪥ ꪚꪙꪸ ꪢꪱꪥ ꪹꪉꪙ ꪨꪱꪉ ꪭꪉꪳ ꪹꪭꪉ ꪻꪎ ꪤꪮꪙ ꪢꪱ ꪕꪱꪉ ꪉꪸ ꪁꪱꪒ ꪩꪺꪉ ꪎꪱꪙ ꪊꪉꪴ ꪔꪷ ꪄꪮꪉ ꪀꪺꪙ ꪶꪓꪥ ꪵꪀꪉ ꫄ꪥꪙ ꪹꪣꪉ 2 ꪹꪣꪉ.

          ꪀꪺꪉ ꪋꪴ ꪼꪜ ꪤꪱꪣ ꪹꪣꪉ ꪚꪱꪙ ꪩꪱꪫ ꪼꪜ ꪤꪱꪣ ꪚꪮꪙ ꪶꪏꪙ ꫄ꪂꪀ ꪐꪱꪣ ꪹꪋꪱ, ꪨꪱꪥ ꪀꪫꪲ ꪊꪙꪸ ꪚꪉꪲ ꪀꪺꪙ ꪔꪉꪸ ꪉꪫꪙꪸ ꪫꪒꪸ ꪘꪱꪣ ꪁꪷ ꪶꪁꪙ ꪹꪩꪱꪝꪉꪳ ꪜꪲ ꪹꪚꪙ ꪶꪄ ꪚꪱꪚ ꪝꪮꪣ ꪀꪚꪾ ꪨꪉꪲ ꪝꪱ ꫃ꪖꪒ ꪩꪱꪫ ꪔꪷ ꪶꪏꪙ ꪀꪚꪾ ꪵꪠꪙ ꫄ꪎꪀ. ꪵꪔ ꪚꪮꪙ ꪙꪲ, ꪹꪬ ꪵꪭꪉ ꪹꪩꪒ ꪤꪱꪉ ꪄꪮꪉ ꪝꪉꪳ ꪊꪙꪲ ꪎꪲ ꪵꪀꪉ ꫄ꪤꪙ ꪹꪣꪉ ꪝꪉꪳ ꪶꪛ ꪶꪕꪀ ꪩꪱꪫ ꪹꪝ ꪵꪙꪙ ꪎꪺꪙ ꪵꪔꪉ ꪕꪾ ꪕꪱꪉ. ꪥꪉꪷ ꪘꪉꪷ ꪒꪱꪥ ꪶꪚꪙ ꪵꪎꪉ ꪁꪱꪒ ꪁꪙꪸ ꪔꪷ ꪶꪏꪙ ꪫꪒꪸ - ꪩꪱꪫ , ꪚꪱꪙ ꫄ꪁꪙ ꪔꪉꪲ ꪫꪉꪸ ꪊꪽ, ꪩꪉꪳ ꪡꪱꪣ ꪵꪯꪉ ꪖꪺꪙꪶ 83 ꪜꪲ, ꪀꪫꪲ ꪊꪙꪲ ꪚꪉꪲ ꫜ ꪵꪖꪉ ꪶꪠ ꪶꪭ ꪊꪲ ꪢꪉꪲ, ꪀꪮꪙ ꪙꪲ ꪨꪷ ꪊꪙꪸ ꪎꪲ ꪒꪫꪱꪙ 83 ꪫꪉꪸ ꪊꪽ, ꪶꪔꪀ ꪄꪺꪙ ꫄ꪋ ꫃ꪬꪙ ꪝꪲ ꪙꪮꪉ ꪶꪒꪉ ꪶꪓꪥ ꪹꪊꪱ ꪼꪩ ꪁꪉꪸ ꪘꪉꪷ ꪘꪲ ꪼꪒ ꫄ꪤꪙ ꪹꪣꪉ ꪩꪱꪫ ꪊꪣꪾ ꪊꪳ ꪶꪚꪙ ꪬꪱ.

          ꪀꪫꪲ ꪊꪙꪸ ꪚꪉꪲ ꪈꪫꪙ ꪡꪲ ꪹꪖꪉ, ꪀꪮꪙ ꪙꪲ ꪨꪷ ꪨꪉꪲ ꪓꪱꪫꪙ 410 ꪄꪮꪉ ꪒꪪꪱꪙ 959, ꪊꪫꪙꪸ ꪥꪱ ꪀꪺꪙ ꪏꪳ ꪫꪒꪸ ꪘꪱꪣ ꪋꪮꪥ ꪩꪱꪫ, ꪼꪅ ꪀꪙꪲ ꪤꪴ ꪘꪉꪷ ꪵꪖꪉ ꪶꪠ ꪬꪱꪥ ꪠꪮꪉ, ꪻꪬ ꪭꪴ, ꪋꪴ ꪼꪜ  ꪤꪱꪣ ꪤꪱꪣ ꪘꪱ ꫄ꪋꪙ ꪑꪱꪣ ꪹꪋꪱ, ꪼꪒ ꪝꪲ ꪙꪮꪉ ꪶꪋꪣ ꪔꪮꪙ ꪹꪏꪉ ꪝꪲ ꪮꪀꪀ ꪙꪮꪉ ꪋꪽ ꫄ꪬꪉ ꪊꪉꪷ ꪣꪱ ꫄ꪖꪉ. ꪹꪝ ꪝꪉꪳ ꪜꪲ  ꪹꪚꪙ ꪶꪄ ꪚꪱꪚ ꪙꪽ, ꪝꪉꪳ ꪊꪙꪸ ꪎꪲ ꪀꪺꪙ ꪔꪉꪲ ꪉꪫꪙꪸ ꪫꪒꪸ ꪘꪱꪣ ꪁꪷ ꪒꪴ ꪚꪱꪙ ꪹꪣꪉ ꪩꪱꪫ ꪹꪏꪉ ꪹꪭꪙ ꫃ꪀꪫꪥ ꪖꪳ 2 ꪄꪮꪉ ꪹꪊꪱ. ꪹꪚꪱ ꪹꪋꪱ ꪎꪉꪷ ꪶꪄ ꪚꪱꪚ ꪼꪩ ꪁꪉꪲ ꪒꪒꪴ ꪹꪩꪒ, ꫃ꪕꪉ ꪔꪷ ꪶꪏꪙ ꪁꪣꪾ ꪔꪷ ꪵꪠꪙ ꫄ꪎꪀ ꪊꪱꪙ ꪮꪱꪀ , ꫃ꪕꪉ ꪼꪜ ꪋꪳ ꪶꪠꪉ ꪙꪣꪾ ꪒꪙꪲ ꪼꪒ ꪤꪱꪥ ꪠꪮꪉ, ꪔꪣꪴ ꪝꪺ ꪊꪢꪳ ꪢꪴ ꪫꪴ ꪋꪱꪶꪶꪉ ꪼꪄ ꪀꪪꪱꪉ ꪔꪷ ꪶꪏꪙ ꪤꪴ ꪀꪀꪲ ꪘꪉꪷ ꪋꪴ ꪚꪮꪙ ꪹꪣꪉ ꪩꪱꪫ.

          ꪝꪉꪳ ꪒꪱꪥ ꪶꪚꪙ ꪹꪎꪉ ꪁꪱꪒ ꪁꪙꪸ ꪔꪷ ꪶꪏꪙ ꪩꪱꪫ - ꪫꪒꪸ ꪝꪮꪣ ꪼꪒ ꪔꪉꪷ ꪬꪙꪴ 2 ꫛ ꪨꪉꪲ ꪩꪱꪫ - ꪫꪒꪸ ꪝꪮꪢ ꪚ ꪱꪭꪉꪸ ꪵꪠꪉ ꪔꪷ ꪶꪏꪙ ꪀꪚꪾ ꪵꪠꪙ ꫄ꪎꪀꪶ ꫃ꪜꪘ ꪚꪮꪙ ꪚꪮꪀ ꪎꪮꪙ ꪹꪉꪙ ꪩꪱꪉ ꪻꪬ ꪨꪙꪴ ꪜꪱꪙ ꪩꪱꪙ ꪘꪮꪣ ꪹꪣꪉ ꪛꪱꪙ ꪩꪱꪫ ꪭꪴ ꪵꪊꪉ ꪹꪏ ꪢꪱ ꪕꪱꪉ ꪹꪉꪙ ꪩꪱꪉ ꪁꪱꪒ ꪎꪱꪙ ꪩꪱꪫ - ꪫꪒꪸ ꪀꪺꪉ ꪥꪱꪙ ꪶꪚꪙ ꪹꪎꪉ 55 ꪜꪲ ꪻꪣ ꪔꪉꪷ ꪀꪷ ꪼꪜ ꪢꪱ ꫃ꪥꪒ ꪝꪲ ꫃ꪥꪒ ꪙꪮꪉ ꪄꪮꪉ 2 ꪹꪣꪉ ꪫꪒꪸ ꪘꪱꪣ - ꪩꪱꪫ. ꪘꪉꪷ ꪝꪉꪳ ꪒꪱꪥ ꪶꪚꪙ ꪬꪱ ꪩꪒꪸ ꪎꪲ ꪀꪺꪙ ꪔꪉꪸ ꪉꪫꪙꪸ ꪫꪒꪸ ꪘꪱꪣ ꪵꪀꪉ ꪋꪫꪙꪸ ꪥꪱ ꪫꪒꪸ ꪘꪱꪣ ꪔꪮꪙ ꪨꪱꪥ ꪒꪫꪱꪙ ꪓꪱꪥ ꪚꪫꪸ ꪹꪣꪉ, ꪝꪮꪣ ꫛ ꫄ꪤꪙ ꪓꪸ ꪹꪠꪉ ꪼꪜ ꪼꪔ ꪹꪬꪉ ꪶꪬꪙ ꪬꪱ ꪝꪉꪳ ꪊꪙꪸ ꪎꪲ ꪫꪒꪸ ꪘꪱꪣ ꪬꪱꪙ ꪉꪱꪙ ꪼꪩ ꪁꪉꪲ ꪒꪒꪴ ꪹꪩꪒ ꪻꪬ ꪜꪱꪉ ꪤꪱꪥ ꪠꪮꪉ 2 ꪹꪣꪉ.

                                                           TTT - ꪵꪭꪉ ꪥꪀꪲ

Đài bốn xương cạt kiên tó xôn Lao - Việt chứ

ơn công khun phủ pên lính

          Cuông pưng pi bươn dệt nả vịa quốc tế choi mương bạn Lao, cài thóng triệu vặt quân nhân Việt Nam cọ chôm hặp tó xôn cặm tó phen xấc cướp mương pọm cắp quân dân Lao cánh mi cài 50 păn côn chuốp chếp bát cánh 40 păn liệt sĩ lay kinh đút lượt. Vạy biên mai công khun nháư luông nặn, nẳng lai tỉnh, thanh phố khong Lao cọ tẳng đài bốn hà quân tình nguyện Việt Nam cánh pưng công trình biên mai nghịa cạt luông san pọm hôm hanh xôn xấc khong Việt Nam - Lao. Cuông nặn mi pưng tượng đài nẳng pưng tỉnh U - đôm - xay - Xiêng khoảng, Sa - vẳn - na - khệt, Át – ta – pư, Khăm muộn, Hủa phăn, Viêng Chăn cánh Chăn - pa - sắc..Ặn lỏ chứng mài biên sáư ngươn lang hung hương sàư dỏn ma tang nghịa cạt luông san chung tó khong quân đội cánh dân mương 2 mương.

          Cuông chu pày dam mương ban Lao vạy dam bón xôn xấc té chạu, lai cựu chiến binh quân tình nguyện Việt Nam cọ cộn lau pưng pi bươn khổ báp pọm cắp lính Pa – thét Lao tó xôn cắp phen xấc. Té bón nị, hứa hanh cánh lượt dang khong pưng chiến sĩ quân tình nguyện Việt Nam qua cắp đút lượt khong pưng chiến sĩ cánh dân mương pưng bộ tộc Lao pưa nen xuấn tánh tư tang. Dặng nẳng Đài bốn xương cạt kiên tó xôn Việt – Lao, Bản Cơn, tỉnh Viêng Chăn, lung Phan Anh Thuần, 83 pi, cựu chiến binh nưng thanh phố Hô Chí Minh, cón nị lỏ chiến sĩ Đoàn 83 Viêng – chăn, tộc khuân chơ hên pi nọng đồng đội khong chảu lay kinh nẳng nỉ đảy dân mương Lao chăm chứ bốn hà.

          Cựu chiến binh Nguyễn Phi Thường, cón nị lỏ lính Đoàn 410 khong Đoàn 959, chuyên gia quân sự Việt Nam choi Lao, khay kin dú nẳng thanh phố Hải Phòng, hảu hụ, chu pày dam nả trận nham chạu, đảy côn dân Lao chôm tỏn xương pi ók nọng chặn hâng pi chắng đảy ma thâng. Pưa pưng pi bươn khổ báp nặn, pưng chiến sĩ quân tình nguyện Việt Nam cọ le bản mương Lao xương hươn quê thứ 2 khong chảu. Báu chau săng khổ báp lay kinh đúk lượt, tênh tó xôn cặm tó phen xấc chan ác, tênh pảy chự phổng nặm đin đảy giải phóng, tủm pua chủm mú vũ trang, khày quang tó xôn du kích nẳng chu bón mương Lao.

          Pưng Đài bốn xương cạt kiên tó xôn Lao - Việt pọm đảy tẳng hún 2 côn lính Lao - Việt pọm bá hiêng phanh căn tó xôn cắp phen xấc, cọ cựt pên bón bók xon hảu lai pun lan nóm mương bạn Lao hụ chảnh xưa ma tang ngươn lang cạt san Lao - Việt cuông dan bốn xương 55 pi mự tẳng có pày ma dệt pi dệt nọng khong 2 mương Việt Nam – Lao. Nẳng pưng Đài bốn hà liệt sỹ Quân tình nguyện cánh chuyên gia Việt Nam tỏn lai đoàn đại biểu 2 mương, pọm côn dân địa phương pày tảy hương bốn hà pưng chiến sĩ Việt Nam han ngan lay kinh đuk lượt hảu pang giải phóng 2 mương.                                                                                             TTT - Hạnh dịch