Ngon tô: “Khù po hay me na cận hụ” số 18

Púk cò kìn mák cựt đảy lang đì kinh tế xùng xưa púk khảu

Piến xiềng…

          Cuồng pưng pì chằm nị, cò mák phong nạt báu chư hịa choi côn dần lan lay xìa cặt cung lạ hư lài chua hươn dần nẳng 2 xã Sa Lông cánh Na Sang, huyện Mương Cha, tỉnh Điện Biên nhăng dệt hăng té púk mák phong nạt. Ưởi Sùng Thị Chớ dú bản na Sang 1, xã Na Sang hẳư hu: Pưng thồng mák phong nạt pók vạy xương nị lỏ ặn hươn hang bók pók vạy hẳư, hươn hang cọ xự lài vạy hẳư khék kìn mỏi chơ kìn khảu lẹo. Mỏi chu mák phong nạt tay hươn cọ cựt đảy thù nhập té 50 họt 60 triệu mằn. Khạy cọ họt lả mua lẹo, chăm va mák báu nuối nhắư hák va kìn bàn, ài hòm xương nặn ưởi Chớ phân lài khài hẳư pưng hươn hang.

Lài pì cón, lung Vũ Văn Biền, dú đội 4, xã Thanh Hưng, huyện Điện Biên, tỉnh Điện Biên cọ xương lài chua hươn ứn cuồng xã chưng púk bók, púk khảu. Hák va bók lài pì ma khài cọ báu đảy ca, lung Biền quyết định nhại ma púk mák thành long đành, mák uổi, mák hống đài Loan.

          Cắp tà đìn cài 2 héc ta, lung Biền púk 200 cốc mák thanh long đành, 300 cò mák uổi, 200 cò mák hống. Toi kinh nghiệm khòng lung Biền, ék cựt đảy thù nhập xùng té cò kìn mak hư đảy dệt hẳư mák pền báu men mua. Xương mák uổi Đài Loan, chơ báu hê họt mua lung khài hẳư pưng côn cạ nẳng thành phố Điện Biên Phủ lỏ té 25 păn họt 30 păn mỏi cần; mák hống lỏ 20 păn mằn mỏi cần; mák thanh Long đành lỏ té 40 păn họt 50 păn mằn mỏi cần. Khạy lỏ mua chính khòng mák uổi, mák hống, xịa xìa chu tàng ngơn mỏi pì lung Biền cọ cựt đảy cài 100 triệu mằn.

          Pưa mi luông hanh ma tang đìn đòn, pưng pì chằm nị, lài chua hươn dần pưng xã: Thanh Hưng, Nòng Luông, Thanh Luông khòng huyện Điện Biên xỏn hom púk pưng tàng cò kìn mak cựt đảy ca con kinh tế xương mák vũ sữa , mák nhạn pền tốc lả cánh mák cại Lục Ngạn, Bắc Giang cắp sản lượng hạng họi tấn mỏi mua; thanh long đành cọ đảy lài con mặc kìn, cựt đảy thù nhập té 150 họt 200 triệu mỏi chu, xùng cộp lài tưa vẹt xắư púk khảu.

          Lung Nguyễn Ngọc Ngấn, Chủ tịch Uỷ bàn dần mương xã Thanh Hưng hẳư hụ: Tà đìn púk pưng tàng cò kìn mák khòng xã lưn khửn toi tựng pì. Khạy nị, tênh cá xã mi cài 30 héc ta chưng púk cò kìn mák xương mák thanh long, mák vũ sữa, mák uổi, mák hóng Đài Loan… Pưng tàng cò kìn mák nị cọ cựt đảy thù nhập xùng xưa púk bók cánh púk khảu.

          Vạy choi dừa côn púk cò kìn mák nhẳn pao chất lượng, năng suất cựt tóp đảy lang áo côn xủ dống, hạng pì chính quyên xã pọm cạt kiên cắp pưng cơ quàn mi chức quyên khòng huyện, tỉnh khày pưng lớp chiên cái kỹ thuật lăm đù cò kìn mák, tom nga pưng chựa cò kìn maks báu men mua vạy mi tứm thù nhập hẳư côn dần.

          Ngon tô: “ Khù po hay ma na cận hụ” tuân nị họt nị xò dặng cón. Ngon tô nị đảy đài quam pák Việt nàm cạt kiên cắp Trung tâm phén mương chấp năm./.

VOV4-Huyền dịch

ꪜꪀꪴ ꪀꪷ ꪀꪙꪲ ꪢꪱꪀ ꪁꪒꪳ ꪼꪒ ꪩꪱꪉ ꪒꪲ ꪀꪉꪲ 6ꪔ ꪎꪉꪴ ꪹꪏ ꪜꪴꪀ ꪹꪄꪱ

ꪀꪺꪉ ꪝꪉꪴ ꪜꪲ ꪊꪣꪾ ꪙꪲ ꪀꪷ ꪢꪱꪀ ꪡꪮꪉ ꪙꪱꪒ ꪹꪚꪱ ꪋꪳ ꪭꪀꪸ ꪋꪮꪥ ꫛ ꫄ꪤꪙ ꪩꪱꪙ ꪼꪩ ꪎꪸ ꪁꪒꪰ ꪀꪉꪴ ꪩꪱ   ꪭꪳ ꪨꪱꪥ ꪋꪺ ꪹꪭꪙ ꫄ꪤꪙ ꪘꪉꪰ 2 ꪎꪱ ꪏꪱ ꪶꪩꪉ ꪵꪀꪉ ꪙꪱ ꪏꪱꪉ ,ꪭꪫꪙꪸ ꪹꪣꪉ ꪋꪱ, ꪔꪉꪲ ꪓꪙꪸ ꪚꪙꪸ ꪑꪉꪰ ꫃ꪥꪒ ꪭꪉꪰ ꪵꪔ ꪜꪴꪀ ꪢꪱꪀ ꪡꪮꪉ ꪙꪱꪒ. ꪹꪮꪥ ꪎꪉꪲ ꪖꪲ ꫄ꪊ ꪤꪴ ꪚꪱꪙ ꪙꪱ ꪏꪱꪉ ꫜ, ꪎꪱ ꪘꪱ ꪏꪱꪉ ꪻꪬ ꪭꪴ: ꪝꪉꪳ ꪶꪖꪉ ꪢꪱꪀ ꪡꪮꪉ ꪙꪱꪒ ꪜꪮꪀ ꪼꪫ ꪙꪲ ꪨꪷ ꪜꪮꪀ ꪼꪫ ꪻꪬ ꪹꪭꪙ ꪭꪱꪉ ,ꪹꪭꪙ ꪭꪱꪉ ꪀꪷ ꪏꪳ ꪨꪱꪥ ꪼꪫ ꪻꪬ ꪵꪄꪀ ꪀꪙꪲ ꪢꪮꪥ ꪹꪕ ꪀꪙꪲ ꪹꪄꪱ ꪵꪩꪫ. ꪢꪮꪥ ꪋꪴ ꪢꪱꪀ ꪡꪮꪉ ꪙꪱꪒ ꪼꪕ ꪹꪭꪙ ꪁꪷ ꪁꪒꪳ ꪼꪒ ꪖꪴ ꫄ꪑꪚ ꪵꪔ 50 ꪭꪮꪒ 60 ꪋꪫꪸ ꪢꪽ. ꪼꪅ ꪁꪷ ꪨꪱ ꪣꪺ ꪵꪩꪫ ,ꪋꪣꪾ ꪫꪱ ꪢꪱꪀ ꪹꪚꪱ ꪘꪺꪥ ꪻꪐ ꪭꪱꪀ ꪫꪱ ꪀꪙꪲ ꪚꪱꪙ ,ꪮꪱꪥ ꪬꪮꪣ.

ꪨꪱꪥ ꪜꪲ ꪀꪱꪥ ꪣꪱ ꪩꪉꪴ ꪪꪴ ꪪꪽ ꪚꪙꪸ ꪤꪴ ꪶꪓꪥ 4, ꪎꪱ ꪵꪖꪉ ꪬꪉꪳ, ꪭꪫꪙꪸ ꪓꪙꪸ ꪚꪙꪸ ,ꪔꪉꪲ ꪓꪙꪸ ꪚꪙꪸ ꪁꪷ ꪹꪏꪉ ꪨꪱꪥ ꪋꪺ ꪹꪭꪙ ꪮꪙꪳ ꪀꪺꪉ ꪎꪱ ꪋꪉꪳ ꪜꪀꪴ ꪚꪮꪀ ,ꪜꪀꪴ ꪹꪄꪱ. ꪭꪱꪀ ꪫꪱ ꪚꪮꪀ ꪨꪱꪤ ꪜꪲ ꪀꪱꪥ ꪢꪱ ꪁꪷ ꪹꪚꪱ ꪁꪒꪳ ꪼꪒ ꪩꪱꪉ ꪒꪲ, ꪩꪉꪴ ꪚꪙꪸ ꪑꪱꪥ ꪣꪱ ꪜꪴꪀ ꪢꪱꪀ ꪵꪗꪉ ꪨꪮꪉ ꪵꪒꪉ ,ꪢꪱꪀ ꪮꪺꪥ ,ꪢꪱꪀ ꪶꪬꪉ ꪒꪱꪥ ꪩꪫꪱꪙ.

          ꪀꪚꪾ ꪔꪱ ꪒꪙꪲ ꪀꪱꪥ 2 ꪵꪬꪀ ꪕꪱ, ꪩꪉꪴ ꪚꪙꪸ ꪜꪀꪴ 200 ꪶꪀꪀ ꪢꪱꪀ ꪵꪗꪉ ꪩꪮꪉ ,300 ꪀꪷ ꪢꪱꪀ ꪮꪺꪥ ,200 ꪀꪷ ꪢꪱꪀ ꪶꪬꪉ. ꪕꪮꪥ ꪀꪉꪲ ꪉꪣꪸ ꪄꪮꪉ ꪩꪉꪴ ꪚꪙꪸ ꪵꪮ ꪁꪒꪳ ꪼꪒ ꪖꪴ ꫄ꪑꪚ ꪎꪉꪴ ꪵꪔ ꪀꪷ ꪀꪙꪲ ꪢꪱꪀ ꪭꪳ ꪼꪒ ꫃ꪥꪒ ꪻꪬ ꪀꪷ ꪀꪙꪲ ꪢꪱꪀ 6ꪜꪙ ꪹꪚꪱ ꪵꪣꪙ ꪣꪺ. ꪹꪏꪉ ꪢꪱꪀ ꪮꪺꪥ ꫄ꪋ ꪹꪚꪱ ꫃ꪭ ꪭꪮꪒ ꪣꪺ ꪩꪉꪴ ꪄꪱꪥ ꪻꪬ ꫛ ꪁꪱ ꪵꪔ 25 ꪭꪮꪒ 30 ꪝꪽ ꪢꪽ ꪢꪮꪥ ꫄ꪀꪙ; ꪢꪱꪀ ꪶꪬꪉ ꪨꪷ 20 ꪝꪽ ꪢꪽ ꪢꪮꪥ ꫄ꪀꪙ; ꪢꪱꪀ ꪖꪗꪉ ꪩꪮꪉ ꪵꪒꪉ ꪨꪷ ꪵꪔ 40 ꪭꪮꪒ 50 ꪝꪽ ꪢꪽ ꪢꪮꪥ ꫄ꪀꪙ. ꪼꪅ ꪒꪱꪉ ꪨꪷ ꪣꪺ ꪊꪉꪲ ꪄꪮꪉ ꪢꪱꪀ ꪮꪺꪥ ,ꪢꪱꪀ ꪶꪬꪉ ꪏꪲꪀ ꪎꪸ ꪋꪴ ꪔꪱꪉ ꫄ꪉꪙ ꪢꪮꪥ ꪜꪲ ꪩꪉꪴ ꪚꪙꪸ ꪁꪷ ꪁꪒꪳ ꪼꪒ 100 ꪋꪫꪸ ꪢꪽ.

ꪹꪝ ꪣꪲ ꪩꪺꪉ ꪵꪭꪉ ꪣꪱ ꪕꪱꪉ ꪒꪙꪲ ꪒꪮꪙ ꪝꪉꪴ ꪜꪲ ꪊꪣꪾ ꪙꪲ ꪨꪱꪥ ꪋꪺ ꪹꪭꪙ ꫄ꪤꪙ ꪝꪉꪳ ꪎꪱ: ꪵꪖꪉ ꪬꪉꪳ ,ꪘꪮꪉ ꪩꪺꪉ , ꪵꪖꪉ ꪨꪺꪉ ꪄꪮꪉ ꪭꪫꪙꪸ ꪓꪙꪸ ꪚꪙꪸ ꪎꪮꪙ ꪶꪭꪣ ꪜꪀꪴ ꪝꪉꪳ ꪔꪱꪉ ꪀꪷ ꪀꪙꪲ ꪢꪱꪀ ꪁꪒꪳ ꪼꪒ ꪁꪱ ꪁꪮꪙ ꪀꪉꪲ 6ꪔ ꪎꪉꪴ ꪹꪏꪉ ꪢꪱꪀ ꪪꪴ ꪵꪎ ,ꪢꪱꪀ ꪑꪱꪙ ꫃ꪜꪙ ꪶꪔꪀ ꪨꪱ ꪵꪀꪉ ꪢꪱꪀ ꪁꪱꪥ ꪩꪀꪴ ꪈꪱꪙ ꪀꪚꪾ ꪎꪱꪘ ꪹꪩꪉ ꪭꪱꪉ ꪭꪮꪤ ꫄ꪔꪙ ꪢꪮꪥ ꪣꪺ, ꪜꪴꪀ ꪀꪷ ꪀꪙꪲ ꪢꪱꪀ ꪁꪒꪳ ꪼꪒ ꪖꪴ ꫄ꪑꪚ ꪎꪉꪴ ꪹꪏ ꪵꪫꪒ ꪼꪎ ꪜꪀꪴ ꪹꪄꪱ.

          ꪩꪉꪴ ꪈꪙꪸ ꪉꪮꪀ ꫄ꪈꪙ ꪊꪴ ꪕꪀꪲ ꪮꪫꪲ ꪚꪱꪙ ꫄ꪤꪙ ꪹꪣꪉ ꪎꪱ ꪵꪖꪉ ꪬꪉꪳ ꪻꪬ ꪭꪴ: ꪔꪱ ꪒꪙꪲ ꪜꪀꪴ ꪝꪉꪴ ꪔꪱꪉ ꪀꪷ ꪀꪙꪲ ꪢꪱꪀ ꪄꪮꪉ ꪎꪱ ꪩꪙꪳ ꪄꪙꪳ ꪕꪮꪥ ꪕꪉꪳ ꪜꪲ. ꪼꪅ ꪙꪲ ꫃ꪕꪉ ꪀꪱ ꪎꪱ ꪣꪲ ꪀꪱꪥ 30 ꪵꪬꪀ ꪕꪱ ꪋꪉꪳ ꪜꪀꪴ ꪀꪷ ꪀꪙꪲ ꪢꪱꪀ ꪹꪏꪉ ꪢꪱꪀ ꪵꪗꪉ ꪩꪮꪉ ,ꪢꪱꪀ ꪪꪴ ꪹꪎ ,ꪢꪱꪀ ꪮꪺꪥ , ꪢꪱꪀ ꪶꪬꪉ ꪒꪱꪥ ꪩꪫꪱꪙ.

          ꪼꪫ ꪋꪮꪥ ꫛ ꪜꪴꪀ ꪀꪷ ꪀꪙꪲ ꪢꪱꪀ ꪐꪽ ꪝꪱꪫ ꫄ꪊꪒ ꪹꪩꪉ ꪙꪉꪰ ꪎꪺꪒ ꪁꪒꪳ ꪕꪮꪚ ꪼꪒ ꪩꪱꪉ ꪮꪱꪫ ꪄꪮꪉ ꫛ ꪎꪴ ꪶꪤꪉ ,ꪭꪱꪉ ꪜꪲ ꪊꪉꪲ ꪁꪫꪙꪸ ꪎꪱ ꪝꪮꪣ ꪀꪚꪾ ꪝꪉꪳ ꫄ꪀ ꪀꪫꪱꪙ ꪣꪲ ꪊꪀꪳ ꪁꪫꪙꪸ ꪭꪫꪙꪸ ,ꪔꪉꪲ ꪼꪄ ꪝꪉꪴ ꫄ꪨꪚ ꪋꪙꪸ ꪀꪱꪥ ꪀꪲ ꪖꪺꪒ ꪩꪣꪾ ꪒꪴ ꪀꪷ ꪀꪙꪲ ꪢꪱꪀ, ꪕꪮꪣ ꪉꪱ ꪝꪉꪳ ꪹꪋ ꪀꪷ ꪀꪙꪲ ꪢꪱꪀ ꫃ꪜꪙ ꪹꪚꪱ ꪵꪣꪙ ꪣꪺ ꪼꪫ ꪣꪲ ꪔꪣꪳ ꪖꪴ ꫄ꪑꪚ ꪻꪬ ꫛ ꫄ꪤꪙ.

ꪹꪩꪉ ꪬꪫꪙꪸ ꪥꪲꪀ