ꪓꪙꪸ ꪚꪙꪸ: ꪋꪳ ꪡꪮꪉ ꪙꪱꪙ ꪁꪱ ꪄꪱꪥ ꫛ ꪘꪉꪷ ꪭꪫꪙꪸ ꪵꪒꪙ ꪹꪣꪉ ꪙꪣꪾ ꪶꪝ

          ꪚꪱꪙ ꪙꪣꪾ ꪋꪺ 1, ꪎꪱ ꪙꪣꪾ ꪐꪳ, ꪭꪫꪙꪸ ꪙꪣꪾ ꪶꪝ ꪭꪮꪒ ꪼꪅꪁꪷ ꪑꪉꪷ ꪣꪲ ꪀꪱꪥ 10 ꪹꪮꪥ ꪙꪮꪉ ꪠꪴ ꪑꪉꪲ ꪹꪚ ꪱꪤꪴ ꪹꪙ ꫄ꪬꪉ ꪣꪳ, ꪹꪚꪱ ꪭꪴ ꪀꪙꪲ ꪤꪴ ꪚꪮꪙ ꪻꪒ. ꫛ ꫄ꪤꪙ ꪀꪺꪉ ꪚꪱꪙ ꪫꪱ ꪭꪀꪸ ꫄ꪡꪙ ꪨꪱꪥ ꫄ꪡꪙ ꪨꪱꪥ ꪁꪷ ꪩꪀꪷ ꪵꪕꪫ ꪼꪜ ꪹꪙꪉ ꪙꪮꪀ ꪠꪒꪲ ꪵꪠꪚ ꪹꪚꪱ ꪁꪷ ꪊꪺꪚ ꪄꪱꪥ ꪼꪜ ꪹꪣꪭ ꪋꪉꪴ ꪀꪺꪀ. ꪀꪺꪉ ꪶꪎ ꪝꪉꪳ ꫛ ꪗꪚ ꪱꪣꪲ ꪘꪱ ꫄ꪬꪉ ꪣꪳ, ꪬꪉꪲ ꪣꪲ ꪕꪷ ꫛ ꫜ ꪔꪱꪫ ꪣꪱ ꪹꪭꪙ ꪯꪽ ꪨꪷ ꪫꪱꪉ ꪖꪲ ꪋꪴ 17 ꪜꪲ:

          ꪕꪮꪥ ꪋꪴ ꪫꪱ, ꪹꪣ ꪜꪲ 2015, ꫄ꪋ ꪙꪮꪉ ꪼꪜ ꪶꪔꪀ ꪎꪱ ꪙꪱ ꪭꪲ ꪭꪫꪙꪸ ꪙꪣꪾ ꪶꪝ ꪼꪫ ꪏꪳ ꪹꪋꪉ ꪭꪳ ꪊꪺꪚ ꪵꪣ ꪝꪱ ꫜ ꪮꪙ ꪹꪩ ꪹꪮꪱ ꪼꪜ ꪄꪱꪥ ꪀꪱ ꪊꪉꪴ ꪀꪺꪀ ꪼꪫ ꪄꪱꪥ. ꪬꪱꪀ ꪫꪱ ꪹꪝ ꪑꪉꪷ ꪙꪮꪥ ꫄ꪭꪉ, ꫃ꪭ ꫃ꪥꪒ ꪣꪸ ꪼꪒ ꪹꪏꪉ ꪙꪽ ꪙꪮꪉ ꪼꪒ ꪄꪱꪥ ꪻꪬ ꪋꪺ ꪹꪭꪙ ꫜꫛ ꪶꪣꪉ ꪘꪉꪷ ꪊꪉꪴ ꪀꪺꪀ ꪼꪫ ꫃ꪥꪒ ꪼꪭ ꪼꪬ ꪙꪱ ꪵꪀꪉ ꫃ꪥꪒ ꪫꪀꪸ ꪹꪭꪙ. ꪹꪕꪱ ꪭꪮꪒ ꪥꪱꪙ ꪊꪣꪾ ꪙꪲ ꪋꪴ ꪊꪉꪷ ꪼꪒ ꪊꪣꪴ ꪢꪴ ꪶꪛ ꪶꪓꪥ ꪵꪒꪙ ꪹꪣꪉ ꪊꪉꪴ ꪀꪺꪀ ꪭꪴ ꫃ꪬꪙ ꪊꪉꪷ ꪄꪙꪳ ꪣꪱ ꪻꪬ ꪓꪸ ꪹꪠꪉ.

          ꪄꪴ ꪒꪱꪉ ꪝꪺꪙ ꪻꪊ ꫃ꪐꪒ ꪨꪷ ꫃ꪯꪣ ꪵꪀꪉ 5 ꪝꪲ ꪑꪉꪲ ꪄꪮꪉ ꪋꪴ ꪁꪷ ꪹꪚꪱ ꪣꪲ ꪘꪱ ꪘꪉꪷ ꪚꪮꪙ ꪀꪙꪲ ꪤꪴ, ꪵꪩꪫ ꪁꪷ ꪹꪚꪱ ꪭꪴ ꪊꪀꪷ ꪤꪴ ꪚꪮꪙ ꪻꪒ. ꪼꪅ ꪙꪮꪉ ꪒꪱꪉ ꪀꪙꪲ ꪤꪴ ꪕꪮꪥ ꪝꪷ ꪮꪱꪫ ꪮꪮꪀ ꪵꪀꪉ ꪮꪱꪥ ꪹꪚꪱ ꪜꪱꪀ.

          ꪠꪴ ꪮꪺꪙ ꪝꪱ ꪹꪤꪙ ꪹꪣꪉ ꪎꪱ ꪙꪣꪾ ꪐꪳ ꪻꪬ ꪭꪴ, ꪼꪅ ꪙꪲ ꪘꪉꪷ ꪎꪱ ꪁꪷ ꪣꪲ ꪨꪱꪥ ꪠꪴ ꪑꪉꪲ ꪹꪚꪱ ꪤꪴ ꪹꪭꪙ , ꪵꪩꪫ ꪹꪚꪱ ꪭꪴ ꪊꪀꪷ ꪤꪴ ꪚꪮꪙ ꪻꪒ , ꪣꪲ ꫄ꪋ ꪁꪷ ꪋꪲ ꪊꪺꪚ ꪄꪱꪥ ꪼꪜ ꪊꪉꪴ ꪀꪺꪀ. ꪯꪽ ꪨꪷ ꪶꪝ ꪹꪮꪥ ꪙꪮꪉ ꪩꪺꪉ ꪭꪴ ꪏꪉꪸ ꫃ꪭ ꪼꪒ ꪕꪷ ꪻꪒ ꪹꪭꪘ ꪀꪱꪫ ꪝꪷ ꪨꪱꪥ ꪥꪱꪀ ꪊꪱ ꪹꪏꪉ ꪙꪽ ꪏꪱꪙ ꫛ ꪤꪴ ꪚꪮꪙ ꪮꪙꪴ ꪢꪱ ꪮꪙ ꪹꪩ ꪊꪱꪫ ꪵꪭꪙ ꪼꪜ ꪕꪮꪥ ꪹꪎꪱ ꪋꪲ ꪣꪸ ꪫꪀꪸ ꫃ꪥꪒ ꪵꪕꪒ ꪕꪉꪸ ꪵꪩꪫ ꪵꪚꪱ ꪹꪮ ꪱꪼꪜ ꪄꪱꪥ. ꪊꪉꪲ ꪁꪫꪙꪸ ꪎꪱ ꪁꪷ ꪋꪙꪸ ꪜꪱꪫ, ꪹꪊꪉ ꪹꪋ ꪔꪒꪲ ꫄ꪔꪙ ꪭꪮꪒ ꪕꪉꪳ ꪚꪱꪙ , ꪬꪱꪀ ꪫꪱꪫꪀꪸ ꫃ꪥꪒ ꪄꪮꪉ ꪵꪠꪙ ꪙꪲ ꪹꪑꪉ ꪣꪳ ꪹꪑꪉ ꪒꪀ ꪵꪨꪣ ꪹꪏ ꪹꪏꪉ ꪙꪽ ꪀꪽ ꫄ꪕꪙ ꪫꪀꪸ ꪙꪲ ꪁꪷ ꪥꪱꪀ ꪨꪱꪥ.

          ꪕꪮꪥ ꪶꪔ ꪶꪎ ꪚꪙꪸ ꪢꪱꪥ ꪄꪮꪉ ꪶꪀꪉ ꪮꪱꪙ ꪭꪫꪸꪙ ꪙꪣꪾ ꪶꪝ ꪀꪺꪉ 6 ꪹꪚꪙ ꪬꪺ ꪲꪜ 2017, ꪀꪱ ꪭꪫꪸꪙ ꪣꪲ 12 ꪠꪴ ꪑꪉꪲ, ꪎꪱꪫ ꪙꪮꪥ ꪹꪚ ꪱ꫃ꪬꪙ ꪤꪴ ꪘꪉꪷ ꪹꪭꪣ ꪨꪱꪥ ꪣꪴ ꪹꪚꪱ ꪭꪴ ꪼꪜ ꫃ꪥꪒ ꪎꪉ, 4 ꫛ ꪷꪹꪚꪱ ꫃ꪬꪙ ꫄ꪭꪉ ꪵꪩꪫ ꪹꪬꪉ ꫄ꪉ ꪊꪺꪚ ꪄꪱꪥ ꪼꪜ ꪹꪣꪉ ꪙꪮꪀ 5 ꫛ ꪮꪙꪳ ꪊꪺꪚ ꪄꪱꪥ ꪼꪜ ꪀꪺꪉ ꪝꪉꪳ ꪋꪴ ꪮꪱꪙ , ꪀꪺꪉ ꪙꪽ ꪣꪲ 2 ꫛ ꪔꪱꪫ ꪣꪱ ꪓꪸ ꪹꪠꪉ. ꪶꪀꪉ ꪮꪱꪙ ꪭꪫꪙꪸ ꪙꪣꪾ ꪶꪝ ꪁꪽ ꪠꪱ ꪼꪒ ꪩꪱꪉ ꪒꪲ 3 ꪋꪫꪙꪸ ꪮꪱꪙ ꪜꪒꪷ 5 ꫛ ꪏꪳ ꪄꪱꪥ ꫛꪶ ꪀꪫꪲ ꪼꪒ 2 ꫛ.

          ꪝꪮꪣ ꪀꪚꪾ ꪫꪀꪸ ꪵꪚꪫ ꪹꪩ ꪭꪳ ꪣꪲ ꫛ ꪬꪱꪀ ꪼꪜ ꪕꪮꪥ ꪹꪎꪱ, ꪐꪽ ꪻꪬ ꪹꪎꪱ ꪵꪚꪱ ꪹꪩ ꪼꪜ ꪄꪱꪥ ꪀꪱ ꪊꪈꪴ ꪀꪺꪀ ꫃ꪥꪒ ꪫꪀꪸ. ꪫꪀꪸ ꪮꪮꪀ ꪼꪜ ꪹꪣꪉ ꪙꪮꪀ ꪠꪒꪲ ꪵꪠꪚ ꪶꪭꪙ ꪭꪱꪫ ꪁꪷ ꪵꪣꪙ ꪄꪴ ꫜ ꫃ꪤꪒ ꪥꪱꪀ ꪻꪬ ꪫꪀꪸ ꪀꪫꪱꪙ ꪨꪲ ꪙꪱꪙ ꪀꪱ ꪄꪱꪥ ꫛ , ꪘꪉꪷ ꪭꪫꪙꪸ ꪙꪣꪾ ꪶꪝ ꪁꪷ ꪣꪲ ꪋꪲ ꪮꪱꪫ ꪭꪮꪒ 1.200 ꪫꪒꪷ ꫛ ꪮꪀꪀ ꪼꪜ ꪹꪣꪉ ꪙꪮꪀ ꪠꪒꪲ ꪵꪠꪚ , ꪀꪺꪈ ꪙꪽ ꪣꪲ 844 ꪫꪒꪷ ꪼꪜ ꪵꪀꪉ 313 ꪫꪒꪷ ꪣꪱ. ꪶꪔ ꪶꪎ ꪙꪲ ꪁꪷ ꪶꪝꪙ ꫃ꪕꪉ ꫃ꪢꪒ ꪶꪎ ꪫꪒꪷ ꫛ ꪮꪮꪀ ꪼꪜ ꪹꪣꪉ ꪙꪮꪀ ꪠꪒ ꪵꪠꪚ ꪀꪺꪉ ꪀ ꪱꪜꪲ 2016 ꪨꪷ 857 ꪋꪴ.

          ꪠꪴ ꪮꪺꪙ ꪝꪱ ꪶꪀꪉ ꪮꪱꪙ ꪭꪫꪸꪙ ꪙꪣꪾ ꪶꪝ ꪁꪾ ꪻꪬ ꪭꪴ, ꪀꪺꪉ ꪥꪱꪙ ꪋꪲ ꪭꪮꪒ ꪋꪲ ꪋꪙꪸ ꪀꪱꪥ ꪻꪬ ꪊꪣꪴ ꪢꪴ ꪶꪀꪉ ꪮꪱꪙ ꪎꪱ, ꪶꪀꪉ ꪮꪱꪙ ꪪꪙꪸꪩꪺꪉ ꪋꪳ ꪡꪮꪶꪶꪉ ꪀꪽ ꫄ꪕꪙ ꫛ ꪠꪒꪲ ꪶꪕꪥ ꪏꪳ ꪄꪱꪥ ꫛ. ꪎꪮꪉ ꪣꪱ, ꪶꪀꪉ ꪮꪱꪙ ꪭꪫꪙꪸ ꪋꪲ ꪻꪬ ꪊꪙꪸ ꪎꪲ ꪶꪩꪉ ꪼꪜ ꫄ꪀ ꫄ꪎ ꪼꪫ ꫄ꪩꪚ ꪕꪽ ꪭꪴ ꫃ꪬꪙ, ꪀꪽ ꫄ꪕꪙ ꪫꪀꪸ ꪭꪮꪙ ꪭꪙꪳ ꪹꪫꪱ ꪹꪘ.

                                                                   ꪫꪴ ꫄ꪩꪥ - ꪵꪭꪉ ꪥꪀꪲ

Điện Biên: Chự phong nạn cạ khài côn nẳng huyện

 đen mương Nặm Pô

          Bản Nặm Chua 1, xã Nặm Nhừ, huyện Nặm Pô họt khạy cọ nhăng mi cài 10 ưởi nọng phủ nhinh báu dú hươn hang mự, báu hụ kin dú bón đàư. Côn dân cuông bản va hịa phân lài cọ hák lặc teo pày mương nọk phít phép báu cọ chuốp khài pày mương Trung Quốc. Cuông số pưng côn báu mi nả hâng mự, họt khạy hính mi to côn nưng táo ma hươn lỏ nọng Vàng Thị 17 pì.

          Toi Chu va, mưa pi 2015, chơ nọng pày tốc chợ xã Na Hy, huỵên Nặm Pô vạy sự chương hư chuốp me pa nưng ỏn lưa lẹo àu pày khài cá Trung Quốc vạy khài. Hák va pưa nhăng nọi hênh, hê dệt mia đảy xương nặn nọng đảy khài hảu chua hươn nưng côn Mông nẳng Trung Quốc vạy dệt hay háy na cánh dệt vịa hươn. Tạu họt dan chăm nị, Chu chắng đảy chủm mú bộ đội đen mương nẳng Trung Quốc hụ hên cánh khửn ma địa phương. Khu đang puôn chàư nhất lỏ êm cánh 5 pi nhinh khong Chu cọ báu mi nả nẳng bón kin dú, lẹo cọ báu hụ chắc dú bón đàư. Khạy nọng đang kin dú toi po ào ók cánh ải báu hụ pák.

          Phủ uôn pa dân mương xã Nặm Nhừ hảu hụ, khạy nị nẳng xã cọ mi lai phủ nhinh báu dú hươn, lẹo báu hụ chắc dú bón đàư , mi chơ cọ chi chuốp khài pày Trung Quốc. Ặn lỏ pộ ưởi nọng luông hụ xiêng hê đảy to đàư, hươn dảo pọ lài dạk cha xương nặn san côn dú bón ứn ma ỏn lưa, chao hẹn pày toi sàu chi mi vịa dệt tẹt tiêng lẹo bẻo àu pày khài. Chính quyên xã cọ chiên páo, chướng chưa tít tơn họt tựng bản, hák va vịa dệt khong nị nhương mự nhương đắc lem pưa xương nặn cẳn tơn vịa nị cọ dạk lài.

          Toi tô số biên mài khong Công an huyện Nặm Pô, cuông 6 bươn hùa pi 2017, cá huyện mi 12 phủ nhinh, xao nọi báu hên dú nẳng hươn lài mự báu hụ pày dệt sằng, 4 côn báu hên dú hươn hâng mự hướng ngơ chuốp khài pày mương nọk, 5 côn ứn chuốp sự khài cuông pưng chu án, cuông nặn hính mi 2 côn táo ma địa phương. Công an huyện Nặm Pô cọ phá đảy lang đi 3 chuyên án, pắt 5 côn sự khài côn, cứu đảy 2 côn.

          Pọm cắp vịa chuốp bẻo lưa, lai côn hák pày toi sáu, nhẳn hảu sáu bẻo lưa khài pày Trung Quốc dệt vịa. Vịa ók pày mương nọk phít phép cọ men khu nưng dệt dạk hảu vịa quản lý nạn cạ khài côn nẳng địa phương nị. Họt càng bươn 6/2017, nẳng huyện Nặm Pô cọ mi chi áo họt 1.200 vặt côn ók pày mương phít phép, cuông nặn mi 844 vặt pày cánh 313 vặt ma. Tố số nị cọ pộn tênh mết số vặt côn ók pày mương phít phép cuông cá pi 2016 lỏ 857 chu.

          Phủ uôn pa Công an huyện Nặm Pồ cọ hảu hụ, cuông dan chi họt chi chiên cái hảu chủm mú công an xã, công an viên luông chự phong, cẳn tơn côn phít tội sự khài côn. Xong ma, Công an huyện chi hảu chiến sĩ lông pày cơ sở vạy lợp tăn hụ hên, cẳn tơn vịa họn hưn vạu nừa.