Lao Cài: Po hay me na báu pói pháng ngua quai cuồng pá

--------------------

Chua hươn lung Châu A Sình, dú nẳng thôn Hoà Sử Pán 1, xã Sử Pán, huyện Sa Pa mi 4 tồ quai. Vạy pảy chự pưng quai khòng chua hươn chảu, ngày té hùa mua nào ma họt khay, toi luông chị bók khòng cờ quàn khuyến nồng, lung cọ báu pói pháng pưng quai khòng chảu cuồng pá, lẹo àu ma hươn tảnh liệng cuồng bâng. Tênh vên chơ phạ đét hượng khửn chắng àu pưng quai ók pói. Lung cọ hụ đảy pưng luông hụ xiêng cốc chính vạy lăm đù pưng quai khòng chảu cuồng pưng mự phạ nào cưm hại hức:

Toi lung Châu A Quả, Phó Chủ tịch Uỷ bàn dần mương xã Sử Pán, huyện Sa Pa, pưng ngua quai khòng pưng chua hươn tảnh liệng lệch nọi, cắp tênh mết dáo 400 tồ. Vịa uồn pa, chị bók hẳư po hay me na chự phong nào cưm, dák nhả hẳư tồ tảnh liệng cọ đảy xã pằn vịa hẳư pưng thanh viền chấp năm ngày té chạu; vịa kiểm trà, báo cáo vịa dệt nẳng cờ sở cọ đảy chấp năm lâng chơ toi tựng tuận vạy mi luông kẻ khày lợp tăn:

Khay nị, tênh cá huyện Sa Pa mi chi áo họt 5 păn chua hươn tảnh liệng ngua quai, cắp tênh mết số ngua quai dáo 13 păn tồ. Tênh mết pưng chua hươn pọm đảy chiên páo lợp tăn ma tang pưng luông pùn chự phong nào cưm, dák nhả hẳư ngua quai. Pưng chua hươn hê mi cọk bâng nhẳn pao, cọ đảy chị bók àu ngua quai lông pày phổng tắm vạy chự phong nào cưm. Số ngua quai thảu ké cọ đảy xã níêu chưa khả dệt nhứa khài xìa vạy vện ník pưng khù xiệt hại pộ phạ nào cưm hại hức.

Hák va, pưa nuống pan té phạ đìn piến thái, mua nào pì nị nẳng huyện Sa Pa đảy danh đù lỏ chi nào cưm xưa chu pì, pưa xương nặn, ặn nị chi pền khù chau lò báu nọi đối cắp cờ quàn quản lý cọ xương pưng chua hươn tảnh liệng nẳng cuồng phổng./.

ꪩꪱꪫ ꪀꪱꪥ: ꪝꪷ ꪼꪭ ꪵꪣ ꪙꪱ ꪹꪚꪱ ꪜꪮꪥ ꪠꪱꪉ ꪉꪺ ꪁꪫꪱꪥ ꪀꪺꪉ ꪜꪱ

ꪋꪺ ꪹꪭꪙ ꪩꪉꪴ ꪹꪋꪱ ꪮꪱ ꪎꪉꪲ , ꪤꪴ ꪘꪉꪰ ꪚꪱꪙ ꪬꪫꪱ ꪎꪳ ꪜꪱꪙ 1 , ꪎꪱ ꪎꪳ ꪜꪱꪙ , ꪭꪫꪙꪸ ꪏꪱ ꪝꪱ ꪣꪲ 4 ꪶꪔ ꪁꪫꪱꪥ. ꪼꪫ ꪼꪜ ꪋꪳ ꪬꪳ ꪝꪉꪳ ꪁꪫꪱꪥ ꪄꪮꪉ ꪋꪺ ꪹꪭꪙ ꪹꪊꪱ , ꪼꪈ ꪵꪔ ꪬꪺ ꪣꪺ ꪘꪱꪫ ꪣꪱ ꪭꪮꪒ ꪼꪅ , ꪕꪮꪥ ꪩꪺꪉ ꪋꪲ ꪚꪮꪀ ꪄꪮꪉ ꪹꪀꪷ ꪀꪫꪱꪙ ꪄꪫꪙꪸ ꪶꪘꪉ ꪩꪉꪴ ꪁꪷ ꪹꪚꪱ ꪜꪮꪥ ꪠꪱꪉ ꪝꪉꪳ ꪁꪫꪱꪥ ꪄꪮꪉ ꪋꪺ ꪹꪭꪙ ꪹꪊꪱ ꪀꪺꪉ ꪜꪱ , ꪵꪩꪫ ꪹꪮꪱ ꪣꪱ ꪹꪭꪙ ꪵꪔꪉ ꪩꪉꪸ ꪀꪺꪉ ꪹꪛꪷꪉ. ꪹꪕꪸꪉ ꪹꪫꪸꪙ ꪹꪋꪷ ꪡꪱ ꪵꪒꪒ ꪹꪭꪉ ꪊꪉꪰ ꪹꪮꪱ ꪁꪫꪱꪥ ꪮꪮꪀ ꪜꪮꪥ. ꪩꪉꪴ ꪁꪷ ꪭꪴ ꪼꪒ ꪝꪉꪳ ꪩꪺꪉ ꪭꪴ ꪏꪉꪸ ꪶꪀꪀ ꪊꪉꪲ ꪼꪫ ꪩꪾ ꪒꪴ ꪝꪉꪳ ꪁꪫꪱꪥ ꪄꪮꪉ ꪋꪺ ꪹꪭꪙ ꪹꪊꪱ ꪀꪺꪉ ꪝꪉꪳ ꪣꪳ ꪡꪱ ꪘꪱꪫ ꪁꪣꪳ ꪭꪱꪥ ꪬꪀꪳ.

ꪕꪮꪥ ꪩꪉꪴ ꪹꪋꪱ ꪮꪱ ꪀꪫꪱꪉ , ꪠꪷ ꪊꪴ ꪕꪀꪲ ꪮꪫꪲ ꪚꪱꪙ ꪹꪤꪷꪙ ꪹꪣꪉ ꪎꪱ ꪎꪳ ꪜꪱꪙ , ꪭꪫꪙꪸ ꪏꪱ ꪝꪱ, ꪝꪉꪳ ꪉꪺ ꪁꪫꪱꪥ ꪄꪮꪉ ꪝꪉꪳ ꪋꪺ ꪹꪭꪙ ꪵꪔꪉ ꪩꪉꪸ ꪹꪩꪸꪀ ꪙꪮꪥ , ꪀꪚꪰ ꪹꪕꪸꪉ ꪹꪢꪸꪒ ꪤꪱꪫ 400 ꪶꪔ . ꪫꪀꪸ ꪮꪺꪙ ꪝꪱ , ꪋꪀꪲ ꪚꪮꪀ ꪬꪳ ꪝꪷ ꪼꪭ ꪵꪣ ꪙꪱ ꪋꪳ ꪡꪮꪉ ꪘꪱꪫ ꪁꪣꪳ , ꪤꪱꪀ ꪐꪱ ꪻꪬ ꪶꪔ ꪵꪔꪉ ꪩꪉꪸ ꪁꪷ ꪼꪒ ꪎꪱ ꪜꪽ ꪫꪀꪸ ꪻꪬ ꪝꪉꪳ ꪵꪖꪉ ꪪꪙꪸ ꪹꪊꪷꪚ ꪙꪾ ꪼꪈ ꪵꪔ ꪹꪋꪱ; ꪫꪀꪸ ꪀꪣꪸ ꪊꪱ, ꪚꪱꪫ ꪀꪱꪫ ꪫꪀꪸ ꪹꪥꪸꪒ ꪘꪉꪰ ꪹꪀꪷ ꪹꪎꪷ ꪁꪷ ꪼꪒ ꪹꪊꪷꪚ ꪙꪾ ꪹꪩꪷꪉ ꪹꪋꪷ ꪕꪮꪥ ꪕꪉꪳ ꪕꪺꪙ ꪼꪫ ꪣꪲ ꪩꪺꪉ ꪵꪀ ꪼꪄ ꪹꪩꪷꪚ ꪕꪽ.

ꪼꪅ ꪙꪲ , ꪹꪕꪸꪉ ꪀꪱ ꪭꪫꪙꪸ ꪏꪱ ꪝꪱ ꪣꪲ ꪋꪲ ꪮꪱꪫ ꪭꪮꪒ 5 ꪝꪽ ꪋꪺ ꪹꪭꪙ ꪵꪔꪉ ꪩꪉꪸ ꪉꪺ ꪁꪫꪱꪥ , ꪀꪚꪰ ꪹꪕꪸꪉ ꪹꪢꪸꪒ ꪶꪎ ꪉꪺ ꪁꪫꪱꪥ ꪤꪱꪫ 13 ꪝꪽ ꪶꪔ. ꪹꪕꪸꪉ ꪹꪢꪸꪒ ꪝꪉꪳ ꪋꪺ ꪹꪭꪙ ꪝꪮꪣ ꪼꪒ ꪋꪙꪸ ꪜꪱꪫ ꪹꪩꪷꪚ ꪕꪽ ꪣꪱ ꪕꪱꪉ ꪝꪉꪳ ꪩꪺꪉ ꪜꪙꪴ ꪋꪳ ꪡꪮꪉ ꪘꪱꪫ ꪁꪣꪳ , ꪤꪱꪀ ꪐꪱ ꪻꪬ ꪉꪺ ꪁꪫꪱꪥ. ꪝꪉꪳ ꪋꪺ ꪹꪭꪙ ꪹꪭꪸ ꪣꪲ ꪁꪷ ꪹꪛꪷꪉ ꪐꪽ ꪝꪱꪫ ꪁꪷ ꪼꪒ ꪋꪲ ꪚꪮꪀ ꪹꪮꪱ ꪉꪺ ꪁꪫꪱꪥ ꪶꪩꪉ ꪼꪜ ꪶꪠꪉ ꪔꪾ ꪼꪫ ꪋꪳ ꪡꪮꪉ ꪘꪱꪫ ꪁꪣꪳ. ꪶꪎ ꪉꪺ ꪁꪫꪱꪥ ꪹꪖꪱ ꪵꪀ ꪁꪷ ꪼꪒ ꪎꪱ ꪘꪫꪸ ꪹꪋ ꪄꪱ ꪹꪥꪸꪒ ꪹꪐ ꪄꪱꪥ ꪎꪸ ꪼꪫ ꪹꪫꪸꪙ ꪘꪀꪲ ꪝꪉꪳ ꪄꪴ ꪏꪒꪸ ꪭꪱꪥ ꪶꪝ ꪡꪱ ꪘꪱꪫ ꪁꪣꪳ ꪭꪱꪥ ꪬꪀꪳ.

ꪬꪱꪀ ꪫꪱ , ꪹꪝ ꪘꪺꪉ ꪝꪱꪙ ꪵꪔ ꪡꪱ ꪒꪙꪲ ꪜꪙꪸ ꪖꪱꪥ ꪣꪺ ꪘꪱꪫ ꪜꪲ ꪙꪲ ꪘꪉꪰ ꪭꪫꪙꪸ ꪏꪱ ꪝꪱ ꪼꪒ ꪵꪥꪉ ꪒꪴ ꪋꪲ ꪘꪱꪫ ꪁꪳꪣ ꪻꪏ ꪋꪴ ꪜꪲ , ꪹꪝ ꪹꪏꪉ ꪙꪽ ꪯꪙꪰ ꪙꪲ ꪊꪲ ꪹꪜꪸꪙ ꪄꪴ ꪹꪋꪱ ꪨꪷ ꪹꪚꪱ ꪙꪮꪥ ꪶꪒꪥ ꪀꪚꪰ ꪝꪉꪳ ꪹꪀꪷ ꪁꪫꪱꪙ ꪀꪫꪱꪙ ꪨꪲ ꪁꪷ ꪹꪏꪉ ꪝꪉꪳ ꪋꪺ ꪹꪭꪙ ꪵꪔꪉ ꪩꪉꪸ ꪘꪉꪰ ꪀꪺꪉ ꪶꪠꪉ.

An Kiên – Thành dịch