ꪀꪺꪉ ꪥꪱꪙ ꪒꪙꪲ ꪒꪮꪙ ꪹꪑꪉ ꪣꪳ ꪹꪑꪉ ꪁꪚꪾ ꪵꪁꪚ ꪭꪳ ꪤꪮꪣ ꫄ꪉꪙ ꪶꪀꪀ ꪻꪬ ꪫꪀꪸ ꪵꪔꪉ ꪩꪉꪸ ꪨꪷ ꪩꪺꪉ ꪢꪱ ꪼꪄ ꪀꪉꪲ ꫃ꪔ ꪶꪀꪀ ꪊꪉꪲ ꪘꪉꪰ ꪎꪱ ꪜꪲ ꪔꪮꪉ ꪭꪫꪙꪸ ꪹꪣꪉ ꪩꪱ, ꪔꪉꪲ ꫄ꪎꪙ ꪨꪱ. ꪯꪱꪥ ꪫꪲ ꪪꪽ ꪵꪖꪉ ꪘꪉꪰ ꪚꪱꪙ ꪙꪱ ꪊꪷ ꪁꪷ ꪐꪽ ꪵꪥꪉ ꪹꪏꪉ ꪙꪽ.

          ꪶꪔꪒ ꪉꪚꪸ ꪵꪈꪉ ꪖꪴ ꪮꪲ ꪹꪋꪉ ꪀꪱꪫ ꪒꪉꪰ ꪶꪘꪉ ꫄ꪨꪣ ꫄ꪎꪙ ꪨꪱ ꪜꪲ 2011, ꪣꪲ ꪩꪺꪉ ꪭꪴ ꪏꪉꪸ ꪣꪱ ꪕꪱꪉ ꪵꪔꪉ ꪩꪉꪸ, ꪯꪱꪥ ꪫꪲ ꪪꪽ ꪵꪖꪉ ꫄ꪩꪉ ꪈꪣꪾ ꪭꪮꪒ ꪫꪀꪸ ꪵꪔꪉ ꪩꪉꪸ ꪎꪒꪰ ꪎꪉꪲ ꪵꪀꪉ ꪶꪎ ꪫꪱꪙ ꪀꪚꪾ ꪮꪱꪤ ꫃ꪯꪣ ꪑꪱꪥ ꪣꪱ ꪔꪉꪰ ꪶꪀꪀ ꪵꪔꪉ ꪩꪉꪸ ꪵꪔ ꪜꪲ 2014. ꪨꪉꪰ  3 ꪜꪲ ꪵꪔꪉ ꪩꪉꪸ ꪭꪮꪒ ꪼꪅ ꪝꪉꪳ ꪢꪴ ꪄꪮꪉ ꪋꪺ ꪹꪭꪙ ꪯꪱꪥ ꪁꪷ ꪣꪲ 100 ꫜ ꪶꪔ ꪀꪺꪉ ꪙꪽ ꪣꪲ 10 ꪶꪔ ꪢꪴ ꪵꪣ ꪀꪱꪥ ꪑꪉꪰ ꪕꪷ ꪻꪒ ꪨꪷ ꪢꪴ ꪹꪐ. ꪜꪽ ꫄ꪝꪉ ꪼꪜ ꪢꪮꪥ ꪜꪲ ꪄꪱꪥ ꪮꪮꪀ ꫄ꪋ ꪩꪱꪒ ꪵꪔ 13-15 ꫄ꪔꪙ ꪢꪴ ꪵꪭꪉ ꪖꪴ ꫄ꪑꪚ ꪀꪱꪥ 400 ꪋꪫꪸ ꪢꪽ; ꪏꪲ ꪎꪸ ꫄ꪉꪙ ꪶꪀꪀ ꪯꪱꪥ ꪑꪉꪰ ꪼꪒ ꪢꪱ 100 ꫜ ꪋꪫꪸ ꪢꪽ. ꪯꪱꪥ ꪶꪕ ꪵꪫꪒ ꪻꪎ ꫃ꪥꪒ ꪼꪭ ꪭꪳ ꪵꪔꪉ ꪩꪉꪸ ꪁꪒꪳ ꪼꪒ ꪖꪴ ꫄ꪑꪚ ꪎꪉꪴ ꪹꪏ.

          ꪵꪔ ꪣꪳ ꪔꪉꪰ ꪶꪀꪀ ꪹꪄꪱ ꪵꪔꪉ ꪩꪉꪸ ꪯꪱꪥ ꪵꪖꪉ ꫄ꪩꪉ ꫄ꪋ ꪼꪜ ꫄ꪚꪉ ꪵꪩ ꪝꪉꪳ ꪚꪮꪙ ꪵꪔꪉ ꪩꪉꪸ ꪢꪴ ꪘꪉꪰ ꪨꪱꪥ ꪒꪸ ꪹꪠꪉ ꪼꪫ ꪵꪮꪚ ꪭꪮꪀ ꪀꪉꪲ ꪉꪣꪸ: ꪵꪔ ꪩꪺꪉ ꪩꪉꪸ ꪢꪴ ꪹꪐ ꪢꪴ ꪵꪣ ꪵꪀꪉ ꪩꪺꪉ ꪋꪳ ꪡꪯꪉ ꫃ꪛꪉ ꪻꪬ ꪝꪉꪳ ꪢꪴ ꪹꪋ. ꪕꪮꪥ ꪯꪱꪥ ꪼꪫ ꪢꪱ ꪵꪝ ꪝꪉꪳ ꪢꪴ ꪭꪳ ꪼꪒ ꪣꪲ ꪀꪉꪲ ꪉꪣꪸ ꪼꪒ ꪹꪤꪱ ꪤꪱ ꫃ꪛꪉ ꪵꪀꪉ ꪭꪴ ꪼꪒ ꪁꪱ ꪁꪮꪙ ꪄꪙꪳ ꪶꪩꪉ ꪘꪉꪰ ꫄ꪋ ꪩꪱꪒ.

          ꪼꪫ ꪢꪱ ꪵꪜ ꪶꪔ ꪵꪔꪉ ꪩꪉꪸ, ꫃ꪫꪙ ꪘꪀꪲ ꪼꪒ ꪏꪒꪸ ꪭꪱꪥ ꪶꪝ ꪢꪴ ꫃ꪜꪙ ꪭꪱ, ꪯꪱꪥ ꪵꪖꪉ ꪫꪱ ꪭꪀꪸ ꪄꪴ ꪶꪀꪀ ꪵꪅꪀ ꪨꪷ ꪼꪒ ꪔꪉꪰ ꪵꪔꪉ ꪁꪷ ꫄ꪛꪉ ꪎꪱꪉ ꪚꪱꪉ ꪬꪱꪀ ꪫꪱ ꪹꪚꪱ ꪼꪒ ꪶꪩꪣ ꪔꪮꪉ. ꪎꪮꪉ ꪣꪱ ꪼꪒ ꪻꪬ ꪢꪴ ꪀꪙꪲ ꪝꪷ ꫄ꪊꪒ ꪔꪮꪥ ꪕꪉꪳ ꪥꪱꪙ ꪢꪱ ꪻꪐ ꪄꪮꪉ ꪶꪔ ꪢꪴ. ꪵꪀꪉ ꪄꪴ ꫜ ꪻꪢ ꪹꪚꪱ ꪼꪒ ꪩꪣꪳ ꪯꪽ ꪨꪷ ꪔꪣꪸ ꪡꪯꪉ ꪕꪀꪴ ꪝꪷ ꪻꪬ ꪶꪔ ꪵꪔꪉ ꪩꪉꪸ, ꪩꪙꪳ ꪹꪏ ꪨꪷ ꪢꪴ ꪵꪣ ꪵꪀꪉ ꪢꪴ ꪹꪋ.

          ꪀꪺꪉ ꪥꪱꪙ ꪁꪱ ꪢꪴ ꪘꪉꪰ ꫄ꪋ ꪩꪱꪒ ꪄꪙꪳ ꪶꪩꪉ ꪹꪚꪱ ꪵꪕꪒ ꪕꪉꪸ ꪹꪏꪉ ꪼꪅ ꪙꪲ ꪯꪱꪥ ꪵꪖꪉ ꪻꪬ ꪭꪴ ꪵꪔꪉ ꪩꪉꪸ ꪹꪚꪱ ꪋꪳ ꪭꪀꪸ ꫄ꪋ ꪻꪒ ꪁꪷ ꪣꪲ ꪢꪱ ꪵꪀꪉ ꪯꪽ ꪙꪲ ꪨꪷ ꪄꪴ ꪥꪱꪀ ꪋꪱ ꪶꪒꪥ ꪀꪚꪾ ꫛ ꪵꪔꪉ ꪩꪉꪸ, ꪢꪮꪉ ꪁꪮꪉ ꫛ ꪵꪔꪉ ꪩꪉꪸ ꪼꪒ ꪋꪱꪉ ꪔꪒꪾ ꪔꪱꪫ ꪭꪴ ꪼꪒ ꫄ꪩꪚ ꪕꪽ ꪁꪱ ꪹꪋꪉ ꪀꪙꪲ ꪻꪬ ꪶꪔ ꪵꪔꪉ ꪩꪉꪸ ꪵꪀꪉ ꪁꪱ ꪄꪱꪥ ꪢꪴ ꪘꪉꪰ ꫄ꪋ ꪩꪱꪒ ꪄꪙꪳ ꪶꪩꪉ ꪹꪏꪉ ꪏꪳ ꪼꪫ ꪵꪀ ꪼꪄ ꫄ꪩꪚ ꪕꪽ.