Làng hươn chùng khòng pưng làn nọi bùn báu mày nẳng Kon Tum

Le phóc côn giỏi dọc, chang pák vạu khảu chà, báu mi phằư ngắm nọng Y Tân, chựa côn Sê đăng, học sình lớp 7, Trương trung học cơ sở Nguyễn Huệ, nẳng Kon Tum lỏ làn nọi khó hạy khạy đàng kìn dú nẳng Trung tâm pảy chự làn nọi khòng tỉnh Kon Tum. Cón nị 10 pì tay hươn cướt sình ók lài vịa báu đì, té phổng cuồng lắc cày Đăk Ring, huyện Kon Plông, Y Tân  cọ ma cá làng hươn chùng mi lài bạn bùn báu đì pék xương chảu. Nọng ngắm lau, pưng mự mưa khoẹ cọ hụ to hảy thồi. Hák va, cuòng làng hươn mi chư Ban Mai, Y tân cọ hền ún chằư, nhẳn đảy luông hặc panh, ín xường té pưng ào, à báu chư tay hươn ók khòng chảu.

          Vạy pưng làn bùn báu mày hụ hền đảy pưng khù muôn luông hòm khòng hươn dảo chơ ma họt làng hươn chùng, Trung tâm pảy chự làn nọi tỉnh Kon Tum cọ pằn pưng làn pền ók lài mú, tổ chức hẳư pưng làn ép học, ỉn muôn, kìn dú xương chua hươn nưng.

          25 pì cạt kiên cắp vịa lăm đù, bók xòn làn nọi khó hạy, ưởi Vũ Thị Tâm cọ nặm tà tốc chơ tô họt pưng tồ lụk khòng chảu. Ưởi tô: mi pưng làn lỏ lụk nọng chựa nọi côn chơ hính ma hê quén khươi cắp vịa non giương. Choi pưng làn báu dản xắn, ưởi cọ mết lài cưn năng chằm coi tiện tô cắp pưng làn. Lẹo mi lài làn vang hươn pày puống hoàng cọ dệt hẳư lài côn pày xáo àu pưng làn táo cưn ma hươn. Vạu ma hùa chằư hặc panh ín xường khòng chảu đối cắp pưng tồ lụk cuồng làng hươn nhắư.

          Cuồng 139  làn khạy đàng đảy liệng đù nẳng Trung tâm pảy chự làn nọi tỉnh Kon Tum, mi 71 làn đàng ép té lớp 1 họt lớp 12, mi 43 làn toi ép nẳng lớp dòm hẳư pưng làn ngoi que, bót phang. Nọk vịa ép học, Trung tâm nhăng tổ chức, chík bók hẳư pưng làn luông hụ xiêng ma tang dệt dượn, tảnh liệng, cánh ngành nghê thủ công. Cằm quyết choi pưng làn chơ nhắư khửn hák hụ dệt  dượn, kìn dú toi pi nọng bản khuống, Trung tâm pảy chự làn nọi tỉnh Kon Tum cọ  pồng chằư họt vịa bók xòn pưng làn pền phủ hụ côn đì.

Làng hươn chùng úm ình khòng làn nọi bùn báu mày, chủm mú cán bộ, nhần viền khòng Trung tâm choi dừa làn nọi tỉnh Kon Tum lâng pồng chằư đù đì họt pưng làn. Cuồng dan 25 pì cài ma, cắp cài 27 păn pựa kìn đảy chuông hong nảng nị, pưng côn tánh tổm khảu lanh cành ngai cọ báu vạy cướt sình ók chu bứa mau chương kìn đằư. Hạng họi làn nọi khó hạy, ngoi que chơ nhắư khửn cọ hák khâng dệt dượn, tánh tăm bón kìn dú riềng. Lẹo đối cắp pưng côn dệt vịa nẳng nị, pọm cắp pưng băng khèn, chỉa khèn nhăng mi lài ngon thưởng ặn lỏ pưng xiềng khék ải, êm té pưng làn nọi khó hạy, làn nọi ngoi que xáo hền khù muôn luông hòm vạy đảy hặc panh ín xường cón mi báo táo ma chơ nhắư khửn tánh hươn là dảo./.

TTTN-Huyền dịch

ꪨꪱꪉ ꪹꪭꪙ ꪊꪴꪉ ꪄꪮꪉ ꪝꪉꪳ ꪨꪱꪙ ꪙꪮꪥ ꪚꪴꪙ ꪹꪚꪱ ꪼꪢ ꪘꪉꪰ ꪁꪮꪙ ꪕꪴꪣ

ꪵꪩ ꪡꪮꪀ ꫛ ꪤꪮꪥ ꪥꪮꪀ ,ꪋꪱꪉ ꪜꪱꪀ ꪹꪫꪱ ꪹꪄꪱ ꪊꪱ ꪹꪚꪱ ꪣꪲ ꪻꪠ ꪋꪲ ꪈꪣꪾ ꪙꪮꪉ ꪯꪲ ꫄ꪕꪙ ꪹꪋ ꫛ ꫃ꪏ ꪒꪉꪰ ꪭꪮꪀ ꪎꪉꪲ ꫄ꪨꪚ 7, ꪹꪋꪉ ꪊꪴꪉ ꪭꪮꪀ ꫄ꪀ ꫄ꪎ ꪈꪫꪙꪸ ꫃ꪬꪫ ꪘꪉꪰ ꪔꪉꪲ ꪁꪮꪙ ꪕꪴꪣ ꪨꪷ ꪨꪱꪙ ꪘꪮꪥ ꪄꪷ ꪼꪭ ꪒꪱꪉ ꪀꪙꪲ ꪤꪴ ꪘꪉꪰ ꪊꪉꪴ ꫄ꪔꪣ ꪼꪜ ꪋꪳ ꪨꪱꪙ ꪙꪮꪥ ꪄꪮꪉ ꪔꪉꪲ ꪁꪮꪙ ꪕꪴꪣ. ꪀꪮꪙ ꪙꪲ 10 ꪜꪲ ꪼꪕ ꪹꪭꪙ ꪹꪀꪒ ꪎꪉꪲ ꪮꪮꪀ ꪨꪱꪥ ꪫꪀꪸ ꪹꪚꪱ ꪒꪲ, ꪵꪔ ꪶꪠꪉ ꪨꪀꪰ ꪼꪀ Đăk Ring, ꪭꪫꪙꪸ kon Plông, ꪯꪲ ꫄ꪕꪙ ꪁꪷ ꪣꪱ ꪁꪱ ꪨꪱꪉ ꪹꪭꪙ ꪊꪴꪉ ꪣꪲ ꪨꪱꪥ ꪛꪱꪙ ꪚꪴꪙ ꪹꪚꪱ ꪼꪢ ꪵꪜꪀ ꪹꪏꪉ ꪹꪊꪱ. ꪙꪮꪉ ꪈꪣꪾ ꪹꪩꪱ ꪝꪉꪳ ꪣꪳ ꪹꪣ ꪵꪅꪫ ꪭꪴ ꪕꪷ ꪼꪬ ꪤꪴ ꪶꪖꪥ. ꪬꪱꪀ ꪫꪱ ꪀꪺꪉ ꪨꪱꪉ ꪹꪭꪙ ꪣꪲ ꪋꪳ ꪛꪱꪙ ꪣꪱꪥ ꪯꪲ ꫄ꪕꪙ ꪁꪷ ꫃ꪬꪙ ꪮꪙꪴ ꪻꪊ ,ꪐꪽ ꪼꪒ ꪩꪺꪉ ꪭꪀꪰ ꪵꪝꪉ ꪮꪙꪲ ꪹꪎꪉ ꪵꪔ ꪝꪉꪳ ꪮꪱꪫ ꪮꪱ ꪹꪚꪱ ꪋꪳ ꪼꪕ ꪹꪭꪙ ꪮꪮꪀ ꪄꪮꪉ ꪹꪊꪱ.

ꪼꪫ ꪝꪉꪳ ꪨꪱꪙ ꪚꪴꪙ ꪹꪚꪱ ꪼꪢ ꫃ꪬꪙ ꪼꪒ ꪝꪉꪳ ꪄꪴ ꪣꪺꪙ ꪩꪺꪉ ꪬꪮꪣ ꪄꪮꪉ ꪹꪭꪙ ꪤꪱꪫ ꫄ꪋ ꪣꪱ ꪭꪮꪒ ꪨꪱꪉ ꪹꪭꪙ ꪊꪴꪉ, ꪊꪴꪉ ꫄ꪔꪣ ꪼꪜ ꪋꪳ ꪨꪱꪙ ꪙꪮꪥ ꪔꪉꪲ ꪁꪮꪙ ꪕꪴꪣ  ꪁꪷ ꪜꪽ ꪝꪉꪳ ꪨꪱꪙ ꪮꪮꪀ ꫃ꪜꪙ ꪨꪱꪥ ꪢꪴ, ꪶꪔ ꪊꪀꪴ ꪼꪬ ꪝꪉꪳ ꪨꪱꪙ ꪮꪙꪲ ꪣꪺꪙ ,ꪀꪙꪲ ꪤꪴ ꪹꪏꪉ ꪋꪺ ꪹꪭꪙ ꫜ.

          25 ꪜꪲ ꪁꪱꪒ ꪁꪙꪸ ꪀꪚꪾ ꪫꪀꪸ ꪩꪣꪾ ꪒꪴ ꪚꪷ ꪎꪮꪙ ꪨꪱꪙ ꪙꪮꪥ ꪄꪷ ꪼꪭ ꪹꪮꪥ ꪪꪴ ꪖꪲ ꫄ꪕꪣ ꪁꪷ ꪠꪮꪉ ꪊꪱꪫ ꪙꪣꪾ ꪔꪱ ꪶꪔꪀ ꫄ꪋ ꪶꪕ ꪭꪮꪒ ꪝꪉꪳ ꪶꪔ ꪩꪴꪀ ꪄꪮꪉ ꪹꪊꪱ. ꪹꪮꪥ ꪶꪕ: ꪣꪲ ꪝꪉꪳ ꪨꪱꪙ ꪨꪷ ꪩꪴꪀ ꪙꪮꪉ ꪹꪋ ꪙꪮꪥ ꫛ ꫄ꪋ ꪬꪉꪲ ꪣꪱ ꫃ꪭ ꪵꪀꪫꪙ ꪹꪅꪥ ꪀꪚꪾ ꪫꪀꪸ ꪙꪮꪙ ꪹꪥꪉ. ꪼꪫ ꪋꪮꪥ ꪝꪉꪳ ꪙꪮꪉ ꪹꪚꪱ ꪤꪱꪙ ꪎꪽ, ꪹꪮꪤ ꪁꪷ ꫃ꪢꪒ ꪨꪱꪥ ꪁꪙꪳ ꪙꪉꪰ ꪊꪣꪾ ꪁꪮꪥ ꪕꪙꪸ ꪶꪕ ꪀꪚꪾ ꪝꪉꪳ ꪨꪱꪙ. ꪵꪩꪫ ꪨꪱꪥ ꪨꪱꪙ ꪁꪷ ꪫꪱꪉ ꪹꪭꪙ ꪼꪜ ꪜꪺꪉ ꪭꪫꪱꪉ ꪁꪷ ꫃ꪥꪒ ꪻꪬ ꪨꪱꪥ ꫛ ꪼꪜ ꪎꪱꪫ ꪬꪱ ꪝꪉꪳ ꪨꪱꪙ ꪔꪱꪫ ꪁꪙꪳ ꪣꪱ ꪹꪭꪙ.

ꪀꪺꪉ 139 ꪨꪱꪙ ꪼꪅ ꪒꪱꪉ ꪼꪒ ꪩꪉꪸ ꪒꪴ ꪘꪉꪰ ꪊꪴꪉ ꫄ꪔꪣ ꪼꪜ ꪋꪳ ꪨꪱꪙ ꪙꪮꪥ ꪔꪉꪲ ꪁꪮꪙ ꪕꪴꪢ , ꪣꪲ 71 ꪨꪱꪙ ꪙꪮꪥ ꪵꪮꪚ ꪵꪔ ꫄ꪨꪚ ꫜ ꪭꪮꪒ ꫄ꪨꪚ 12, ꪣꪲ 43 ꪨꪱꪙ ꪕꪮꪥ ꪵꪮꪚ ꪘꪉꪰ ꫄ꪨꪚ ꪤꪮꪣ ꪻꪬ ꪝꪉꪳ ꪨꪱꪙ ꪉꪮꪥ ꪵꪁꪫ , ꪚꪮꪒ ꪡꪱꪉ. ꪙꪮꪀ ꪫꪀꪸ ꪵꪮꪚ ꪭꪮꪀ ꪊꪴꪉ ꫄ꪔꪣ ꪑꪉꪰ ꪶꪔ ꪊꪀꪳ ,ꪊꪲ ꪚꪮꪀ ꪻꪬ ꪝꪉꪳ ꪨꪱꪙ ꪩꪺꪉ ꫃ꪥꪒ ꪹꪥꪙ ,ꪵꪔꪉ ꪩꪉꪸ ꪵꪀꪉ ꪵꪈꪉ ꫃ꪉ ꪖꪴ ꪶꪁꪉ. ꪀꪣꪾ ꪀꪫꪒꪸ ꪋꪮꪥ ꪝꪉꪳ ꪨꪱꪙ ꫄ꪋ ꪻꪐ ꪄꪙꪳ ꪬꪱꪀ ꪭꪴ ꫃ꪥꪒ ꪹꪥꪘ , ꪀꪙꪲ ꪤꪴ ꪕꪮꪥ ꪝꪲ ꪙꪮꪉ ꪚꪱꪙ ꪄꪺꪉ .ꪊꪴꪉ ꫄ꪔꪣ ꪼꪜ ꪋꪳ ꪨꪱꪙ ꪙꪮꪥ ꪔꪉꪲ ꪁꪮꪙ ꪕꪴꪣ ꪁꪷ ꪶꪜꪉ ꪻꪊ ꪭꪮꪒ ꪫꪀꪸ ꪚꪮꪀ ꪎꪮꪙ ꪝꪉꪳ ꪨꪱꪙ ꫃ꪜꪘ ꪠꪴ ꪭꪴ ꫛ ꪒꪲ.

ꪨꪱꪉ ꪹꪭꪙ ꪊꪴꪉ ꪄꪮꪉ ꪝꪉꪳ ꪨꪱꪙ ꪚꪴꪙ ꪹꪚꪱ ꪼꪢ ,ꪊꪴꪣ ꪢꪴ ꪀꪱꪙ ꪶꪛ ,꫄ꪐꪙ ꪪꪙꪸ ꪄꪮꪉ ꪊꪴꪉ ꫄ꪔꪣ ꪋꪮꪥ ꪹꪤ ꪨꪱꪙ ꪙꪮꪥ ꪔꪉꪲ ꪁꪮꪙ ꪕꪴꪣ ꫄ꪩꪉ ꪶꪜꪉ ꪼꪊ ꪒꪴ ꪒꪲ ꪭꪮꪒ ꪝꪉꪳ ꪨꪱꪙ. ꪀꪺꪉ ꪥꪱꪙ 25 ꪜꪲ ꪀꪱꪥ ꪣꪱ, ꪀꪚꪾ ꪀꪱꪥ 21 ꪝꪽ ꪹꪝ ꪀꪙꪲ ꪼꪒ ꪋꪺꪉ ꪭꪮꪉ ꪘꪉꪰ ꪘꪲ, ꪝꪉꪳ ꫛ ꪵꪔꪉ ꪶꪔꪢ ꪹꪄꪱ ꪵꪩꪉ ꪵꪀꪉ ꪉꪱꪥ ꪁꪷ ꪹꪚꪱ ꪼꪫ ꪹꪀꪒ ꪎꪉꪲ ꪮꪮꪀ ꪋꪴ ꪹꪚ ꪹꪣꪱ ꪹꪋꪉ ꪀꪙꪲ ꪻꪒ. ꪭꪱꪉ ꪭꪮꪥ ꪨꪱꪙ ꪙꪮꪥ ꪄꪷ ꪼꪭ ꫄ꪋ ꪻꪐ ꪄꪙꪳ ꪁꪷ ꪬꪱꪀ ꪭꪴ ꫄ꪅꪉ ꫃ꪥꪒ ꪹꪥꪙ ,ꪵꪔꪉ ꪕꪣꪾ ꪚꪮꪙ ꪀꪙꪲ ꪤꪴ ꪤꪉꪸ. ꪵꪩꪫ ꪶꪒꪥ ꪀꪚꪾ ꪝꪉꪳ ꫛ ꫃ꪥꪒ ꪫꪀꪸ ꪘꪉꪰ ꪘꪲ ꪝꪮꪣ ꪀꪚꪾ ꪝꪉꪳ ꪚꪱꪉ ꪵꪄꪙ , ꪊꪸ ꪵꪄꪙ ꪑꪉꪰ ꪣꪲ ꪨꪱꪥ ꪉꪮꪙ ꪹꪖꪉ ꪯꪽ ꪨꪷ ꪎꪉꪸ ꪵꪄꪀ ꪮꪱꪥ ꫃ꪯꪣ ꪵꪔ ꪝꪉꪳ ꪨꪱꪙ ꪙꪮꪥ ꪄꪷ ꪼꪭ , ꪨꪱꪙ ꪙꪮꪥ ꪉꪮꪥ ꪵꪁꪫ ꪎꪱꪫ ꫃ꪬꪙ ꪄꪴ ꪣꪺꪙ ꪩꪺꪉ ꪬꪮꪣ ꪼꪫ ꪼꪒ ꪭꪀꪰ ꪵꪝꪉ ꪮꪙꪲ ꪹꪏꪉ ꪵꪀꪉ ꪣꪲ ꪚꪮꪙ ꪔꪱꪫ ꪣꪱ ꫄ꪋ ꪻꪐ ꪄꪙꪳ ꪵꪔꪉ ꪹꪭꪙ ꪨꪱ ꪤꪱꪫ.

ꪹꪩꪉ ꪬꪫꪙꪸ ꪤꪲꪀ