ꪜꪀꪴ ꪣꪉꪷ ꪼꪕ ꪵꪄꪫ ꪄꪱꪥ ꪼꪒ ꪀꪱ ꪁꪮꪙ ꪶꪁꪚ 20 ꪹꪕ ꪵꪫꪒ ꪼꪎ ꪜꪀꪴ ꪹꪄꪱ

          ꪀꪱ ꪎꪱ ꪙꪱꪣ ꪹꪗꪉ , ꪭꪫꪙꪸ ꪁꪣꪲ ꪶꪚꪥ , ꪔꪉꪲ ꪬꪫꪱ ꪚꪉꪲ ꪼꪅ ꪣꪲ 5 ꪵꪬꪀ ꪕꪱ ꪔꪱ ꪒꪙꪲ ꪜꪀꪴ ꪀꪷ ꪣꪉꪷ ꪼꪕ ꪵꪅꪫ ꪕꪮꪚ ꪬꪮꪣ ꪘꪉꪷ 2 ꪶꪖꪙ ꪶꪛꪥ ꪀꪱ ꪵꪀꪉ ꪚꪱꪥ ꪵꪏ ꪀꪚꪾ 4 ꪋꫀ ꪹꪭꪙ ꪜꪀꪴ. ꪹꪝ ꪜꪀꪴ ꪣꪉꪷ ꪼꪕ ꪢꪮꪥ ꪜꪲ ꪝꪉꪳ ꪋꪺ ꪹꪭꪙ ꪁꪷ ꪖꪴ ꪼꪒ 100 ꪋꪫꪥꪸ ꫄ꪉꪙ. ꪶꪝꪙ ꪤꪮꪙ ꪹꪏꪉ ꪋꪺ ꪹꪭꪙ ꪯꪱꪥ ꪚꪥꪴ ꪪꪽ ꪈꪸ ꪵꪀꪉ ꪹꪮꪥ ꪚꪤꪴ ꪖꪲ ꪹꪡꪉ ꪘꪉꪷ ꪶꪖꪙ ꪶꪛꪥ ꪀꪱꪁꪷ ꪮꪺꪙ ꪀꪮꪙ ꪀꪺꪉ ꪫꪀꪸ ꪜꪀꪴ ꪀꪷ ꪣꪉꪷ ꪼꪕ ꪘꪉꪷ ꪶꪠꪉ ꪎꪉꪴ ꪒꪙꪲ ꪝꪴ. ꪹꪚꪙ 7 ꪜꪲ 2015 ꪹꪯꪙ ꪯꪱꪥ ꪁꪷ ꪤꪮꪣ ꫄ꪉꪙ ꪮꪮꪀ ꪤꪱꪫ 250 ꪋꪫꪥꪸ ꪢꪽ ꪼꪫ ꪏꪳ ꪹꪋ ꪀꪷ ꪣꪉꪷ ꪼꪕ ꪵꪀꪉ ꪤꪮꪣ ꫄ꪉꪙ ꪻꪎ ꫃ꪥꪒ ꪔꪱꪉ ꪹꪩꪱ ꪙꪣꪾ. ꪀꪮꪙ ꫄ꪋ ꪔꪉꪷ ꪶꪀꪀ ꫄ꪊꪘ ꪙꪣꪾ, ꪹꪮꪥ ꪯꪱꪥ ꪎꪪꪱ ꪭꪴꪤ ꪵꪮꪚ ꪭꪮꪀ ꪀꪱꪥ ꪊꪸ ꪩꪱꪥ , ꪀꪲ ꪗꪺꪒ ꪘꪉꪾ ꪕꪲ ꪫꪲ ꪵꪀꪉ ꪼꪜ ꪤꪱꪣ ꫄ꪚꪉ ꪵꪩ ꪝꪉꪳ ꪚꪮꪙ ꪜꪀꪴ ꪀꪮꪙ. ꪀꪱꪥ ꪎꪱꪫ ꪭꪴ, ꪹꪮꪥ ꪯꪱꪥ ꪭꪴ ꪜꪴꪀ  ꪔꪱꪉ ꪀꪷ ꪙꪲ ꪼꪒ ꪣꪲ ꪀꪲ ꪖꪺꪒ ꪎꪉꪴ ꪩꪣꪾ ꪒꪴ ꪖꪲ ꪼꪣ ,  ꪼꪒ ꪐꪽ ꪝꪱꪫ ꪣꪲ ꪝꪷ ꪙꪣꪾ ꪛꪱꪫ ꫄ꪋ ꪣꪺ ꪶꪄ ꪹꪚ ꪱ ꪑꪉꪳ ꫃ꪜꪙ ꪚꪺꪀ ꫄ꪋ ꪣꪺ ꪶꪠꪙ. ꪔꪱ ꪒꪙꪲ ꪙꪱ ꪋꪲ ꪮꪱꪫ ꪭꪮꪒ ꪝꪽ ꫜ ꪋꪉꪳ ꪜꪀꪴ ꪹꪄꪱ, ꪜꪀꪴ ꪣꪽ ꪶꪈ ꪹꪚꪱ ꫃ꪜꪙ ꪁꪷ ꪼꪒ ꪋꪺ ꪹꪭꪙ ꪯꪱꪥ ꪈꪸ ꪑꪱꪥ ꪣꪱ ꪜꪀꪴ ꪣꪉꪷ ꪼꪕ ꪵꪄꪫ ꪵꪀꪉ ꪓꪱꪉ ꪁꪒꪳ ꪼꪒ ꪩꪱꪉ ꪒꪲ ꪎꪉꪴ.

          ꪜꪀꪴ ꪀꪷ ꪨꪉꪷ ꫄ꪋ ꪜꪴꪀ ꪼꪒ 5, 6 ꪹꪚꪙ ꪨꪷ ꪔꪉꪷ ꪶꪀꪀ ꪼꪒ ꪜꪒꪲ ꪐꪮꪒ ꪮꪮꪙ ꪵꪀꪉ ꪩꪙꪳ ꪹꪏ ꪝꪉꪳ ꪀꪷ ꪣꪉꪷ ꪼꪕ ꪵꪄꪫ ꪙꪲ ꪜꪀꪴ ꪹꪕ ꫜ ꪫꪱ ꪹꪤꪱ ꪤꪱ ꪩꪣꪾ ꪒꪴ ꪒꪲ ꪣꪲ ꪹꪏꪉ ꪼꪒ ꪖꪴ ꪜꪒꪲ ꪀꪺꪉ ꪥꪱꪙ 5 ꪜꪲ. ꪭꪮꪒ ꪤꪱꪙ ꪙꪲ, ꪣꪳ ꪻꪒ ꪋꪺ ꪹꪭꪙ ꪯꪱꪥ ꪚꪥꪴ ꪪꪽ ꪈꪸ ꪁꪷ ꪣꪲ ꪭꪱꪉ ꪼꪫ ꪄꪱꪥ. ꪜꪽ ꫄ꪝꪉ ꪼꪜ ꪣꪳ ꫜ ꪀꪚꪾ ꪔꪱ ꪒꪙꪲ ꪋꪲ ꪮꪱꪫ ꪭꪮꪒ ꪵꪬꪀ ꪔꪱ ꫜ ꪖꪴ ꪤꪱꪫ 30 ꪭꪮꪒ 40 ꫄ꪀꪙ ꪣꪉꪷ ꪼꪕ ꪵꪄꪫ. ꪏꪲ ꪎꪸ ꫄ꪉꪙ ꪤꪮꪣ ꪻꪎ ꪢꪮꪥ ꪜꪲ ꪋꪍ ꪹꪭꪙ ꪯꪱꪤ ꪈꪸ ꪹꪡꪉ ꪖꪴ ꪼꪒ ꪤꪱꪫ 200 ꪋꪫꪸ ꫄ꪉꪙ.

          ꪑꪱꪀ ꪀꪒꪷ...

          ꪘꪉꪷ ꪶꪖꪙ ꪚꪱꪥ ꪵꪏ ꪣꪸ ꪋꪺ ꪹꪭꪙ ꪩꪉꪴ ꪚꪥꪴ ꪪꪽ ꪀꪫꪲꪥ ꫃ꪥꪒ ꪭꪉꪷ ꪵꪔ ꪀꪷ ꪣꪉꪷ ꪼꪕ ꪵꪄꪫ. ꪀꪚꪾ ꪔꪱ ꪒꪙꪲ 0,5 ꪵꪬꪀ ꪕꪱ ꪩꪉꪴ ꪁꪷ ꪤꪮꪣ ꫄ꪉꪙ ꪻꪎ 160 ꪋꪫꪥꪸ ꪢꪽ. ꫄ꪋ ꪔꪉ ꪶꪀꪀ ꪶꪩꪉ ꪜꪴꪀ ꪩꪉꪴ ꫃ꪭ ꪣꪲ ꪀꪉꪲ ꪉꪣꪸ ꪹꪏꪉ ꪙꪽ ꪩꪉꪴ ꪁꪷ ꪊꪱꪉ ꪀꪱꪙ ꪶꪛ, ꪀꪲ ꪗꪺꪒ ꪣꪱ ꪼꪫ ꪋꪮꪥ ꪩꪉꪴ ꪔꪉ ꪶꪀꪀ ꪜꪀꪴ ꪢꪚꪉ. ꪨꪉꪷ ꫄ꪋ ꪶꪩꪉ ꪜꪀꪴ, ꪹꪝ ꪣꪲ ꪀꪱꪙ ꪶꪛ ꪀꪲ ꪗꪺꪒ ꪊꪲ ꪚꪮꪀ ꪩꪉꪴ ꪁꪷ ꪭꪴꪤ ꪼꪒ ꪀꪲ ꪗꪺꪒ, ꪭꪴꪤ ꪼꪒ ꪔꪱꪉ ꪀꪷ ꪹꪊꪱ ꪜꪀꪴ, ꪩꪣꪾ ꪒꪴ, ꪤꪱ ꪄꪙꪴ ꪵꪣꪙ ꪵꪣꪙ ꪋꪮꪚ ꪵꪣꪙ ꫄ꪋ. ꪨꪉꪷ 5 ꪹꪚꪙ ꪊꪱꪉ ꪀꪱꪙ ꪶꪛ ꪀꪲ ꪗꪺꪒ ꪊꪲ ꪚꪮꪀ ꪩꪉꪴ ꪁꪷ ꪭꪴꪤ ꪼꪒ ꪀꪲ ꪗꪺꪒ, ꪭꪮꪒ ꪼꪅ ꪩꪉꪴ ꪜꪀꪴ ꪁꪷ ꪼꪒ ꪩꪱꪈ ꪒꪲ ꪵꪀꪉ ꪒꪱꪉ ꪼꪒ ꪖꪴ ꪜꪒꪲ ꪐꪮꪒ ꪣꪉꪷ ꪼꪕ ꪵꪄꪫ ꪋꪽ ꪕꪣꪾ. ꪩꪉꪳ ꪚꪥꪴ ꪪꪽ ꪀꪫꪥꪲ ꪶꪕ ꪿ ꪣꪳ ꫜ ꪋꪺ ꪹꪭꪙ ꪄꪮꪥ ꪖꪴ ꪼꪒ ꪤꪱꪫ 20 ꫄ꪀꪙ ꪣꪉꪷ ꪼꪕ ꪵꪄꪫ. ꪨꪉꪾ ꫄ꪋ ꪖꪴ ꪢꪱ ꪜꪽ ꪔꪱꪉ ( ꪔꪱꪉ 1, ꪔꪱꪉ 2, ꪔꪱꪉ 3 ) ꪀꪚꪾ ꪁꪱ ꪁꪮꪙ ꪵꪔ 40 ꪭꪮꪒ 80 ꪝꪽ ꪢꪽ ꪢꪮꪥ ꫄ꪀꪙ ꪔꪱꪣ ꪕꪮꪥ ꪕꪉꪳ ꪔꪱꪉ. ꪹꪋꪉ ꪄꪮꪉ ꪼꪒ ꪻꪎ ꪬꪮ , ꪢꪮꪥ ꪬꪮ ꫄ꪀꪙ ꫜ ꪄꪱꪥ ꪮꪮꪀ ꫄ꪋ ꪩꪱꪒ ꪵꪀꪉ ꪄꪱꪥ ꪻꪬ ꪶꪀꪉ ꪕꪲ  ꪚꪮꪣ ꪤꪉꪲ ꪶꪘꪉ ꪎꪱꪙ ꪤꪉꪴ ꪬꪱ ( ꪹꪀꪱ ꪼꪤ - ꪭꪱ ꪶꪙꪥ ). ꪙꪚꪾ ꪭꪮꪒ ꪼꪅ , ꪪꪱ ꪏꪸ ꪎꪸ ꫄ꪉꪙ ꪶꪀꪀ ꪤꪮꪣ ꪻꪎ ꪢꪮꪥ ꪹꪚꪙ ꪋꪺ ꪹꪭꪙ ꪩꪉꪴ ꪖꪖꪴ ꪼꪒ ꪵꪔ 25 ꪭꪮꪒ 30 ꪋꪫꪥꪸ ꪢꪽ. ꪩꪉꪴ ꪚꪥꪴ ꪪꪽ ꪋꪴ, ꪠꪷ ꪊꪴ ꪕꪀꪲ ꪮꪫꪥꪲ ꪚꪱꪙ ꫄ꪤꪙ ꪹꪣꪉ ꪎꪱ ꪘꪱꪣ ꪹꪗꪉ ꪐꪽ ꪵꪥꪉ; ꪜꪀꪴ ꪔꪱꪉ ꪀꪷ ꪙꪲ ꪵꪫꪒ ꪼꪎ ꪜꪀꪴ ꪝꪻꪉ ꪔꪱꪈ ꪀꪷ ꪮꪙꪳ ꪹꪏꪉ ꪹꪄꪱ ꪩꪲ, ꪣꪽ ꪶꪈ...ꪄꪱꪥ ꪼꪒ ꪁꪱ ꪶꪁꪚ 10 ꪭꪮꪒ 20 ꪹꪕ...ꪹꪝ ꪹꪏꪉ ꪙꪽ ꪢꪮꪥ ꪜꪲ ꪝꪉꪳ ꪋꪺ ꪹꪭꪙ ꪜꪀꪴ ꪣꪉꪷ ꪼꪕ ꪵꪄꪫ ꪁꪷ ꪄꪱꪥ ꪼꪒ ꪬꪱꪉ ꪭꪮꪥ ꪋꪫꪥꪸ ꪭꪮꪒ ꪀꪲ ꪭꪮꪥ ꪋꪫꪥꪸ ꫄ꪉꪙ , ꪐꪷ ꪎꪉꪴ ꪜꪺꪉ ꪀꪙꪲ ꪩꪺꪉ ꪤꪴ  ꪻꪬ ꪝꪉꪳ ꪋꪺ ꪹꪭꪙ ꪻꪬ ꪝꪉꪳ ꪋꪺ ꪹꪭꪙ ꪝꪀꪴ ꪣꪉꪷ ꪼꪕ ꪵꪄꪫ ꪎꪮꪉ ꪣꪱ ꪹꪮꪱ ꪀꪉꪲ ꫃ꪔ ꪓꪸ ꪹꪠꪉ ꪢꪱ ꪼꪄ ꪹꪑꪉ ꪣꪳ ꪹꪑꪉ ꪢꪱ ꪼꪄ.

          ꪮꪺꪙ: ꪉꪮꪙ ꪶꪕ ꪝꪷ ꪼꪭ ꪵꪣ ꪙꪱ ꫄ꪁꪙ ꪭꪴ ꪭꪮꪒ ꪘꪲ ꪎꪷ ꪥꪉꪷ ꪀꪮꪙ. ꪉꪯꪙ ꪶꪕ ꪼꪒ ꪒꪱꪥ ꪁꪪꪱꪣ ꪜꪱꪀ ꪫꪒꪸ ꪘꪱꪣ ꪁꪱꪒ ꪁꪙꪸ ꪀꪚꪾ ꪊꪉꪴ ꫄ꪔꪣ ꪄꪫꪙꪸ ꪶꪘꪉ ꪵꪠꪙ ꪹꪣꪉ ꫄ꪊꪚ ꪙꪣꪾ.

                                                                   VOV 4 - ꪵꪭꪉ ꪥꪀꪲ

Púk măng tây kheo khài đảy ca cộp 20 tưa vẹt sáư púk khảu

          Cá xã Nam Thượng, huyện Kim Bôi, tỉnh Hoà Bình khạy mi 5 héc ta ta đin púk co măng tây kheo tọp hòm nẳng 2 thôn Bội Cả cánh Bãi Xe cắp 4 chua hươn púk. Pưa púk măng tây kheo mỏi pi pưng chua hươn cọ thu đảy 100 triệu ngơn. Pộn dỏn xương chua hươn ai Bùi Văn Nghĩa cánh ưởi Bùi Thị Phượng nẳng thôn Bội Cả cọ uôn cón cuông vịa púk co măng tây nẳng phổng xùng đin pu. Bươn 7/2015 ưởi, ai cọ dom ngơn cốc ók dáo 250 triệu mằn vạy sự chựa co măng tây cánh dom ngơn sáư dệt tang lau nặm vạy bao. Cón chơ tẳng cốc chấp năm, ưởi ai sáo hụ ép học cài chỉa lai, kỹ thuật nẳng ti vi cánh pày dam bấng le pưng bón púk co măng tây khèo. Cai sáo hụ ưởi, ai hu púk tàng co nị đảy mi kỹ thuật xùng, lăm đu thí may, đảy nhẳn pao po nặm bao cuông mua khô cánh báu nhưng pên búk chơ mua phôn. Ta đin chi áo họt héc ta nưng na púk khảu, púk măn ngô báu pên cọ đảy chua hươn ai Nghĩa cọ nhại ma púk co măng tây khèo cánh đang cựt đảy lang đi xùng. Púk co nị lăng chơ cả đảy 5, 6 bươn  lỏ tẳng cốc đảy pít nhọt ón cánh lưn cưa lỏ co măng tây khèo nị púk tưa nưng va dàu dà laă đù đì mi xương đảy thi pít cuông dan 5 pi. Họt dan nị, mự đàư chua hươn ai Bùi Văn Nghĩa cọ mi hang vạy khài. Păn pâng pày mự nưng cắp ta đin chi áo họt héc ta nưng thu dáo 30 họt 40 cân măng tây khèo. Xị xia ngơn dom sáư mỏi pi chua hươn ai Nghĩa Phượng thu đảy dáo 200 triệu ngơn.

          Nhạc cắt...

          Nẳng thôn Bãi Xe mi chua hươn lung Bùi Văn Quý dệt hăng té co măng tây khèo. Cắp ta đin 0,5 héc ta lung cọ dom ngơn sáư 160 triệu mằn. Chơ tẳng cốc púk lung hê mi kinh nghiệm xương nặn lung cọ chảng cán bộ, kỹ thuật ma vạy choi lung tẳng cốc púk bồng. Lăng chơ lông púk, pưa mi cán bộ kỹ thuật chík bọ lụng cọ hụ đảy kỹ thuật, hụ đảy pưng tàng co chảu púk, lăm đù, dà khún men chọp, men chơ. Lăng 5 bươn chảng cán bộ kỹ thuật chík bók lung cọ hụ đảy kỹ thuật, hụ đảy tàng cò nị, họt khạy lung púk cọ đảy lang đi cánh đang đảy thu pít nhọt măng tây khèo tăm, chăn le kin chẹp.

          Lung Bùi Văn Quý tô “ Mự nưng chua hươn khỏi thu đảy dáo 20 cân măng tây khèo. Lăng chơ thu ma păn tàng ( tang 1, tàng 2, tàng 3) cánh cắp ca con té 40 họt 80 păn mằn mỏi cân tam toi tựng tàng. Chương hang đảy hó, mỏi hớ cân nưng khài ók chợ lạt cánh khài hảu Công ty bóm riêng Nông sản Dũng hà ( Cầu Giấy - Ha Nội ). Nặp họt khạy, va xi xia ngơn dom sáư mỏi bươn chua hươn lung thu đảy té 25 họt 30 triệu mằn. Lung Bùi Văn Chu, Phó chủ tịch UỶ ban dân mương xã Nam Thượng nhẳn danh; “ Púk co măng tây khèo vẹt sáư pưng tàng co púk bồng ứn xương: khảu, khảu li, maă ngồ...thu đảy cộp 10 họt 20 tưa ...Pưa xương nặn mỏi pi pưng chua hươn púk bồng măng tây khèo cọ khài đảy hạng họi triệu ngơn họt kỷ họi triệu ngơn., choi nho xung puông kin luông dú hảu pưng chua hươn dân púk xong ma àu kinh tế địa phương nhương mự nhương mả khày.”

          Uôn: Ngon tô “ Po hay me na cận hụ” tuận nị họt nỉ lỏ mết. Ngon tô đảy Đài quam pák Việt Nam cạt kiên cắp Trung tâm Khuyến nông phén mương chấp năm.

                                                                   VOV 4 - Hạnh dịch