Ngon tô: Khù po hay me na cận hụ” số 24

Chiêng pi nọng hặc xường! Ai Lò Văn Nghĩ dú bản Sẳng, xã Chiềng Xôm, thành phố Sơn La, tỉnh Sơn La cựt đảy thù nhập hạng họi triệu mằn mỏi pì té luông dệt kinh tế trang trại toi lài luông. Ngon tô: Khù po hay me na cận hụ tuận nị, xum khỏi xò chiên xú pi nọng luông dệt nị cánh kinh nghiệm liệng ngua me khòng po hay me na xắc mắn dệt dượn nị.

Cựt đảy thù nhập hạng họi triệu mằn mỏi pì té

luông dệt trang trại toi lài luông

          Pì 2005, nẳng tà đìn 4 héc ta khòng chua hươn nọk pưng tàng cò pền văn xương cò khảu li, ai cọ nhại chiên héc ta nưng ma púk nhả vạy liệng ngua.

          Ai cọ củ ngơn cốc dòm xắư dệt trang trại liệng ngua, liệng mù. Tênh tảnh liệng, tênh ép kinh nghiệm, họt khạy trang trại khòng chua hươn ai Nghĩ lâng mi té 15 tồ ngua me, té 40 họt 50 tồ mù nhứa, mi hạng họi tồ pết, tồ cáy. Nọk nặn ók nhăng mi cài păn nưng thứak môn nòng liệng pà. Trang trại ai Nghĩ lâng khài pết cáy, pà hẳư pưng côn cạ nẳng pưng bón chơ cánh pưng hươn hang nẳng thành phố Sơn La. Lằng chơ xịa xìa chu tàng ngơn phí, mỏi pì chua hươn ai Nghĩ cọ cựt đảy cài 400 triệu mằn. Ai cọ tạ mi vịa dệt hẳư lài côn dệt dượn nẳng địa phường.

          Ai Lò văn Nghĩ cọ bánh pằn kinh nghiệm liệng ngua me xương lằng: Cốc khoẹ lỏ đảy lựa chọn chựa đì, ngua me đảy văn dọc, nằng bàng, khồn kiểng, báu hè. Hùa xuổi, xốp quảng, lằng luồng, khẻo đảy pâng cằn, đón lưởn, co hy chọp, nằng cọ hốt héo. Ấc quảng, pùm luồng hák va báu dột, 4 tìn xư, kíp tìn báu chák, xlằng báu cóng lài. Tảu nôm pâng cằn, 4 kín nôm cọ pâng cằn, hy chọp, nằng tảu nôm vang, hền mạch lượt ók.

          Chơ ngua man, cận hẳư tồ ngua kìn tục po, mỏi mự hẳư kìn té 30 họt 35 cần nhả đíp, 2 cần phương ố, cần hăm khảu nưng báu cọ cần hăm khảu li nưng cánh hẳư kìn té 25 họt 30 bắc bột đút. Báu hẳư tồ ngua dệt vịa nắc xương thày, bàn, tăng xè.

          Chơ ngua ók lụk, té 15 họt 20 mự lằng chơ ngua ók lụk, cận hẳư tồ ngua kìn khảu cành lèo, hẳư kìn té cần nưng họt cần thóng bột khảu, bột khảu li mỏi tồ mỏi mự cánh té 25 họt 30 bắc cừa, té 30 họt 40 bột đúk cánh hẳư kìn tục po nhả ón.

          Cuồng pưng mự xứp pày, cuồng dan liệng lụk, mỏi mự cận hẳư ngua me kìn 30 cần nhả đíp, té 2 họt 3 cần phương ố, té cần nưng họt 2 cần hăm báu cọ mi xương xủ hăm công nghiệp vạy tồ me hảo hanh văn, vạy àu thấc.

          Ai Nghĩ hẳư hụ: Tảnh liệng ngua me cọ xương tảnh liệng mù nhứa, tảnh liệng pết cáy, khù cận hà nhất lỏ tọn tăm cọk bâng tảnh liệng, chự phong dịch bệnh. Va hền tồ tảnh liệng hướng ngơ pền bệnh cận dàu dà ngày toi luông chík bók khòng ngành thú y.

VOV4

ꪉꪮꪙ ꪶꪕ: ꪄꪴ ꪝꪷ ꪼꪭ ꪵꪣ ꪙꪱ ꫄ꪁꪙ ꪭꪴ

          ꪋꪉꪸ ꪝꪲ ꪙꪮꪉ ꪭꪀꪰ ꪹꪎꪉ! ꪯꪱꪥ ꪩꪷ ꪪꪽ ꪈꪲ ꪤꪴ ꪚꪱꪙ ꪎꪉꪰ, ꪎꪱ ꪋꪉꪸ ꪶꪎꪣ ,ꪵꪗꪉ ꪶꪠ ꫄ꪎꪙ ꪨꪱ ,ꪔꪉꪲ ꫄ꪎꪙ ꪨꪱ ꪁꪒꪳ ꪼꪒ ꪖꪴ ꫄ꪑꪚ ꪭꪱꪉ ꪭꪮꪥ ꪋꪫꪸ ꪢꪽ ꪢꪮꪥ ꪜꪲ ꪵꪔ ꪩꪺꪉ ꫃ꪥꪒ ꪀꪉꪲ ꫃ꪔ ꪊꪱꪉ ꪊꪱꪥ ꪕꪮꪥ ꪨꪱꪥ ꪩꪺꪉ. ꪉꪮꪙ ꪶꪕ ꪣꪳ ꪙꪲ ꪎꪷ ꪋꪙꪸ ꪎꪴ ꪝꪲ ꪙꪮꪉ ꪵꪫꪙ ꪵꪏꪉ ꪝꪷ ꪼꪭ ꪵꪣ ꪙꪱ ꪎꪀꪰ ꪢꪽ ꫃ꪥꪒ ꪹꪥꪙ ꪙꪲ.

        ꪁꪒꪳ ꪼꪒ ꪖꪴ ꫄ꪑꪚ ꪭꪱꪉ ꪭꪮꪥ ꪋꪫꪸ ꪢꪽ ꪢꪮꪥ ꪜꪲ ꪵꪔ ꪩꪺꪉ ꫃ꪤꪒ ꪊꪱꪉ ꪊꪱꪥ ꪕꪮꪥ ꪨꪱꪥ ꪩꪺꪉ

          ꪜꪲ 2005, ꪘꪉꪰ ꪔꪱ ꪒꪙꪲ 4 ꪵꪬꪀ ꪕꪱ ꪄꪮꪉ ꪋꪺ ꪹꪭꪙ ꪙꪮꪀ ꪝꪉꪳ ꪔꪱꪉ ꪀꪷ ꫃ꪜꪙ ꪫꪽ ꪹꪏꪉ ꪀꪷ ꪹꪄꪱ ꪩꪲ, ꪯꪱꪥ ꪁꪷ ꪑꪱꪥ ꪋꪙꪸ ꪵꪬꪀ ꪕꪱ ꫜ ꪣꪱ ꪜꪴꪀ ꪐꪱ ꪼꪫ ꪩꪉꪸ ꪉꪺ.

          ꪯꪱꪥ ꪁꪷ ꪀꪴ ꫄ꪉꪙ ꪶꪀꪀ ꪤꪮꪣ ꪻꪎ ꫃ꪥꪒ ꪊꪱꪉ ꪊꪱꪥ ꪩꪉꪸ ꪉꪺ, ꪩꪉꪸ ꪢꪴ. ꫃ꪕꪉ ꪵꪔꪉ ꪩꪉꪸ ꫃ꪕꪉ ꪵꪮꪚ ꪀꪉꪲ ꪉꪣꪸ ꪭꪮꪒ ꪼꪅ ꪊꪱꪉ ꪊꪱꪥ ꪄꪮꪉ ꪋꪺ ꪹꪭꪙ ꪯꪱꪥ ꪈꪲ ꫄ꪩꪉ ꪣꪲ ꪵꪔ 15 ꪶꪔ ꪉꪺ ꪵꪣ , ꪵꪔ 40 ꪭꪮꪒ 50 ꪶꪔ ꪢꪴ ꪹꪐ ,ꪣꪲ ꪭꪱꪉ ꪭꪮꪥ ꪶꪔ ꫃ꪜꪒ ꪶꪔ ꪼꪀ. ꪙꪮꪀ ꪙꪽ ꪮꪮꪀ ꪑꪉꪰ ꪣꪲ ꪀꪱꪥ ꪝꪽ ꫜ ꪵꪖꪀ ꪶꪣꪙ ꪘꪮꪉ ꪩꪉꪸ ꪜꪱ. ꪊꪱꪉ ꪊꪱꪥ ꪄꪮꪉ ꪯꪱ ꪈꪲ ꫄ꪩꪉ ꪀꪱꪥ ꫃ꪜꪒ ꪼꪀ ꪻꪬ ꪝꪉꪳ ꫛ ꪁꪱ ꪘꪉꪰ ꪝꪉꪳ ꪚꪮꪙ ꫄ꪋ ꪵꪀꪉ ꪝꪉꪳ ꪹꪭꪙ ꪭꪱꪉ ꪘꪉꪰ ꪵꪗꪉ ꪶꪠ ꫄ꪎꪙ ꪨꪱ. ꪨꪉꪰ ꫄ꪋ ꪎꪀꪲ ꪎꪸ ꪋꪴ ꪔꪱꪉ ꫃ꪉꪙ ꪢꪮꪥ ꪜꪲ ꪋꪺ ꪹꪭꪙ ꪯꪱ ꪈꪲ ꪁꪷ ꪁꪒꪳ ꪼꪒ ꪀꪱꪥ 400 ꪋꪫꪸ ꪢꪽ. ꪯꪱꪥ ꪁꪷ ꪕꪱ ꪣꪲ ꪫꪀꪸ ꫃ꪤꪒ ꪻꪬ ꪨꪱꪤ ꫛ ꫃ꪤꪒ ꪹꪥꪙ ꪘꪉꪰ ꪒꪸ ꪹꪠꪉ.

          ꪯꪱꪥ ꪨꪷ ꪪꪽ ꪈꪲ ꪁꪷ ꪵꪚꪉ ꪜꪽ ꪀꪉꪲ ꪉꪣꪸ ꪩꪉꪸ ꪉꪺ ꪵꪣ ꪹꪏꪉ ꪨꪉꪰ: ꪶꪀꪀ ꪵꪅꪫ ꪨꪷ ꪼꪒ ꪹꪩꪀ ꪋꪮꪙ ꪹꪋ ꪒꪲ, ꪉꪺ ꪵꪣ ꪼꪒ ꪫꪽ ꪥꪮꪀ ,ꪘꪉꪰ ꪚꪱꪉ ,ꪶꪄꪙ ꪀꪉꪸ ,ꪹꪚꪱ ꪵꪬ. ꪬꪺ ꪎꪺꪥ ,ꪶꪎꪚ ꪀꪫꪱꪉ ,ꪨꪉꪰ ꪨꪺꪉ ,ꪵꪄꪫ ꫄ꪝꪉ ꪀꪽ ꪒꪮꪙ ꪹꪨꪙ ,ꪁꪷ ꪭꪲ ꪋꪮꪚ ,ꪘꪉꪰ ꪁꪷ ꪶꪬꪒ. ꫄ꪮꪀ ꪀꪫꪱꪉ ,ꪜꪣꪴ ꪨꪺꪉ ꪬꪱꪀ ꪫꪱ ꪹꪚꪱ ꪶꪥꪒ ,4 ꪔꪙꪲ ꪏꪳ, ꪁꪚꪲ ꪔꪙꪲ ꪹꪚꪱ ꪊꪱꪀ ,ꪎꪱ ꪨꪉꪰ ꪹꪚꪱ ꪀꪮꪉ ꪨꪱꪥ .ꪹꪔꪱ ꪶꪙꪣ ꫄ꪝꪉ ꪀꪽ, 4 ꪀꪙꪲ ꪶꪙꪣ ꪁꪷ ꫄ꪝꪉ ꪀꪽ ,ꪭꪲ ꪋꪮꪚ ,ꪘꪉꪰ ꪹꪔꪱ ꪶꪙꪣ ꪚꪱꪉ ꫃ꪬꪙ ꪵꪣꪉ ꪹꪩꪒ ꪮꪮꪀ.

          ꫄ꪋ ꪉꪺ ꪣꪱꪙ, ꫄ꪁꪙ ꪻꪬ ꪶꪔ ꪉꪺ ꪀꪙꪲ ꪝꪷ ꫄ꪊꪒ ,ꪢꪮꪥ ꪣꪳ ꪻꪬ ꪀꪙꪲ ꪵꪔ 30 ꪭꪮꪒ 35 ꫄ꪀꪙ ꪐꪱ ꪒꪚꪲ, 2 ꫄ꪀꪙ ꪹꪡꪉ ꪶꪮ , ꫄ꪀꪙ ꪭꪣꪰ ꪹꪄꪱ ꫜ ꪹꪚꪱ ꪁꪷ ꫄ꪀꪙ ꪶꪚꪒ ꪹꪄꪱ ꪩꪲ ꫜ ꪵꪀꪉ ꪻꪬ ꪀꪙꪲ ꪵꪔ 25 ꪭꪮꪒ 30 ꪚꪀꪰ ꪶꪛꪒ ꪒꪴꪀ. ꪹꪚꪱ ꪻꪬ ꪶꪔ ꪉꪺ ꫃ꪥꪒ ꪫꪀꪸ ꪘꪀꪰ ꪹꪏꪉ ꪼꪖ ꪚꪱꪘ ,ꪕꪉꪰ ꪵꪎ.

          ꫄ꪋ ꪉꪺ ꪮꪮꪀ ꪩꪴꪀ ,ꪵꪔ 15 ꪭꪮꪒ 20 ꪣꪳ ꪨꪉꪰ ꫄ꪋ ꪉꪺ ꪮꪮꪀ ꪩꪀꪴ ,꫄ꪁꪙ ꪻꪬ ꪶꪔ ꪉꪺ ꪀꪙꪲ ꪹꪄꪱ ꪵꪀꪉ ꪵꪨꪫ ,ꪻꪬ ꪀꪲꪙ ꪵꪔ ꫄ꪀꪙ ꫜ ꪭꪮꪒ ꫄ꪀꪙ ꪖꪮꪉ ꪭꪣꪰ ꪹꪄꪱ ꪹꪚꪱ ꪁꪷ ꪶꪚꪒ ꪹꪄꪱ ꪩꪲ ꪢꪮꪥ ꪶꪔ ꪢꪮꪥ ꪣꪳ ꪵꪀꪉ ꪵꪔ 25 ꪭꪮꪒ 30 ꪚꪀꪰ ꪵꪀ ,ꪵꪔ 30 ꪭꪮꪒ 40 ꪚꪀꪰ ꪶꪛꪒ ꪒꪴꪀ ꪵꪀꪉ ꪻꪬ ꪀꪙꪲ ꪝꪷ ꪐꪱ ꪮꪮꪙ.

          ꪀꪺꪉ ꪝꪉꪳ ꪣꪳ ꪎꪚꪳ ꪼꪜ ,ꪀꪺꪉ ꪥꪱꪙ ꪩꪉꪸ ꪩꪴꪀ ꪢꪮꪥ ꪣꪳ ꫄ꪁꪙ ꪻꪬ ꪉꪺ ꪵꪣ ꪀꪙꪲ 30 ꫄ꪀꪙ ꪐꪱ ꪒꪚꪲ ,ꪵꪔ 2 ꪭꪮꪒ 3 ꫄ꪀꪙ ꪹꪡꪉ ꪶꪮ ,ꪵꪔ ꫄ꪀꪙ ꫜ ꪬꪮꪒ 2 ꫄ꪀꪙ ꪭꪣꪰ ꪻꪬ ꪉꪺ ꪵꪣ ꪬꪱꪫ ꪵꪭꪉ ꪫꪽ ꪼꪫ ꪹꪮꪱ ꫄ꪖꪀ.

          ꪯꪱꪥ ꪈꪲ ꪻꪬ ꪭꪴ: ꪵꪔꪉ ꪩꪉꪸ ꪉꪺ ꪵꪣ ꪁꪷ ꪹꪏꪉ ꪵꪔꪉ ꪩꪉꪸ ꪢꪴ ꪹꪐ ,ꪵꪔꪉ ꪩꪉꪸ ꫃ꪜꪒ ꪼꪀ ,ꪄꪴ ꫄ꪁꪙ ꪬꪱ ꫄ꪐꪒ ꪨꪷ ꪕꪮꪙ ꪕꪣꪾ ꪀꪮꪀ ꫄ꪚꪉ ꪵꪔꪉ ꪩꪉꪸ ꪵꪜꪀ ꪻꪎ ,ꪋꪳ ꪡꪮꪉ ꪥꪲꪀ ꫃ꪛꪉ. ꪫꪱ ꫃ꪬꪙ ꪶꪔ ꪵꪔꪉ ꪩꪉꪸ ꪹꪬꪉ ꫄ꪉ ꫃ꪜꪙ ꫃ꪛꪉ ꫄ꪁꪙ ꪹꪤꪱ ꪤꪱ ꪼꪈ ꪕꪮꪥ ꪩꪺꪉ ꪊꪲ ꪚꪮꪀ ꪄꪮꪉ ꪵꪈꪉ ꪖꪴ ꪮꪲ.

ꪹꪩꪉ ꪬꪫꪙꪸ ꪥꪀꪲ