Ngon tô thứ 3 mự 06.6.2017

Po hay me na cận hụ (số 12)

          Chiêng pi nọng hặc xường! Pưa tảnh liệng mù cựt đảy lang đì, ai Vì Văn Thành, nẳng xã Pì Tòng, huyện Mương La cựt pền côn hăng mi. Cuồng chơ đìn đòn cặp kẹp hư dòm ngơn cốc xắư vịa tảnh liệng đàng lỏ luông dệt luông pày chọp men khòng thành niền phổng bản na.

                                      Pền côn hăng mi té liệng mù

          ( Piến xiềng)

          Cón nị, Vì Văn Thành pọm cắp ải êm dệt hay dệt na, thù nhập báu xùng. Pì 2011 lằng chơ tốt nghiệp ngành thú ỳ trương Cao đẳng Nông lâm Sờn Là, hụ xiêng ma tang thú ỳ, Thành xồ van cắp ải êm nhại ma liệng mù nhứa.

          Hák va tẳng có tảnh liệng mưa khoẹ cọ báu ngai xương Thành ngắn, pưa tảnh liệng mù lài tồ mi pưng khù dạk cha riềng, lưn xưa lỏ nả vịa chự phong dịch bệnh. Ai bánh pằn kình nghiệm: Đảy mi kình nghiệm, đảy dàu dà phong bệnh hẳư mù. Thứ 3 lỏ chảu đảy hụ ca con nẳng chợ lạt. Chảu tảnh liệng hư đảy xáo hà pưng côn tảnh liệng lài pì lẹo vạy pi nọng chị bók luông tảnh liệng hẳư chảu.

          Nhạc ngắn

          Té mự tẳng cốc tảnh liệng, Vì Văn Thành cọ lài tưa pày bấng le pưng luông tảnh liệng vạy ép học kình nghiệm, té luông lăm đù mù nhứa họt mù me cánh luông phong bệnh hẳư pưng mù chựa. Toi Vì Văn Thành, vạy cựt đảy lang đì cuồng vịa tảnh liệng hư đảy dệt cọk bâng xáng bàng, hák va báu hẳư lôm tỏng. Mù chựa đảy hảo hanh cánh tảy tứk tảy sán toi nham, bao dà khả tồ hếp tồ mên hẳư mù.

          Xủ chương kìn mi lài chất chọp cắp tựng gian mả nhắư khòng tồ mù. Chương kìn hẳư mù cận đảy piến hạng mự, chương kìn xưa, bút mìn đảy àu ók xìa, nhẳn pao báu hẳư chương kìn xổm bút mìn. Nặm kìn đảy chuông hong tục po, pẹk xằư, báu chuốp uối. Chu mự đảy phẻo tọn cọk bâng, hẳư cọ bâng lâng khắư khồ pẹk xằư. Phổng ỏm cọk bâng đảy lâng chơ phát thàng pẹk xằư. Lưn xưa lỏ đảy tiềm phong tục po pưng tàng bệnh hẳư pưng mù xương bệnh chếp pùm tháo tọng, tụ huyết trùng, xốp pưới kíp tìn con. Chơ xủ kháng sinh đảy chấp năm men toi luông chị bók khòng cán bộ thú ỳ. Đảy chấp năm dặng tiềm dà kháng sinh cón chơ khả chua mù khài.

Lằng dáo 3 pì tảnh liệng, Vì Văn Thành hền đảy vịa dệt khòng chảu lỏ chọp men, lưn xưa lỏ cuồng gian đìn đòn dệt dượn cặp kẹp xương khay nị. Ai lâng chơ chự mẳn pưng mù té 70-100 nưng tồ. Pằn pâng pày mỏi pì khài ók chợ lạt té 13-15 tấn mùa nhứa, mả cài 100 nưng triệu mằn.

- Ngon tô Po hay me na cận hụ tuận nị họt nỉ lỏ mết. Ngon tô đảy đải quam pák VN cạt kiên cắp Trùng tầm khuyến nồng phén mương chấp năm./.

Tòng Anh dịch

                                                ( Lưu văn bản, in đĩa)

ꪉꪮꪙ ꪶꪕ ꪖꪳ 3 ꪣꪳ 06-6-2017

ꪝꪷ ꪼꪭ ꪵꪣ ꪙꪱ ꫄ꪁꪙ ꪭꪴ ꪶꪎ 12

꫃ꪜꪙ ꫛ ꪭꪉꪰ ꪣꪲ ꪵꪔ ꪩꪉꪸ ꪢꪴ

ꪀꪮꪙ ꪙꪲ ꪫꪲ ꪪꪽ ꪵꪖꪉ ꪝꪮꪣ ꪀꪚꪾ ꪮꪱꪥ ꫃ꪯꪣ ꫃ꪥꪒ ꪼꪭ ꫃ꪥꪒ ꪙꪱ ꪖꪴ ꫄ꪑꪚ ꪹꪚꪱ ꪎꪉꪴ. ꪜꪲ 2011 ꪨꪉꪰ ꫄ꪋ ꪶꪔꪒ ꪉꪚꪸ ꪵꪈꪉ ꪖꪴ ꪮꪲ ꪹꪋꪉ ꪀꪱꪫ ꪒꪉꪰ ꪶꪈꪉ ꫄ꪨꪣ ꫄ꪎꪙ ꪨꪱ ꪵꪖꪉ ꪶꪎ ꪫꪱꪙ ꪀꪚꪾ ꪮꪱꪥ ꫃ꪯꪣ ꪑꪱꪥ ꪣꪱ ꪩꪉꪸ ꪢꪴ.

ꪬꪱꪀ ꪫꪱ ꪹꪣ ꪵꪅꪀ ꪹꪚꪱ ꫃ꪭ ꪣꪲ ꪀꪉꪲ ꪉꪣꪸ ꪹꪏꪉ ꪙꪽ ꪁꪷ ꪹꪚꪱ ꪼꪒ ꪹꪏꪉ ꪩꪱꪉ ꪈꪣꪾ, ꪝꪷ ꪝꪉꪳ ꪄꪴ ꪤꪱꪀ ꪋꪱ ꪤꪉꪸ ꪩꪙꪳ ꪹꪏ ꪨꪷ ꪘꪱ ꪫꪀꪸ ꪋꪳ ꪡꪮꪉ ꪥꪀꪲ ꫃ꪛꪉ ꪻꪬ ꪢꪴ. ꪯꪱꪥ ꪵꪚꪉ ꪜꪽ ꪀꪉꪲ ꪉꪣꪸ: ꪼꪒ ꪣꪲ ꪀꪉꪲ ꪉꪣꪸ ꪼꪒ ꪹꪤꪱ ꪤꪱ ꪡꪮꪉ ꫃ꪛꪉ ꪻꪬ ꪢꪴ. ꪖꪳ 3 ꪨꪷ ꪭꪴ ꪼꪒ ꪁꪱ ꪁꪮꪙ ꪘꪉꪰ ꫄ꪋ ꪩꪱꪒ. ꪹꪊꪱ ꪵꪔꪉ ꪩꪉꪸ ꪭꪳ ꪼꪒ ꪎꪱꪫ ꪬꪱ ꪝꪉꪳ ꫛ ꪵꪔꪉ ꪩꪉꪸ ꪨꪱꪥ ꪜꪲ ꪼꪫ ꪝꪲ ꪙꪮꪉ ꪋꪲ ꪚꪮꪀ ꪩꪺꪉ ꪵꪔꪉ ꪩꪉꪸ ꪻꪬ.

ꪵꪔ ꪣꪳ ꪔꪉꪰ ꪶꪀꪀ ꪵꪔꪉ ꪩꪉꪸ, ꪫꪲ ꪪꪽ ꪵꪖꪉ ꪁꪷ ꪨꪱꪥ ꪹꪕ ꪼꪜ ꫄ꪚꪉ ꪵꪩ ꪝꪉꪳ ꪩꪺꪉ ꪵꪔꪉ ꪩꪉꪸ ꪼꪫ ꪵꪮꪚ ꪭꪮꪀ ꪀꪉꪲ ꪉꪣꪸ ꪵꪔ ꪩꪺꪉ ꪩꪣꪾ ꪒꪴ ꪢꪴ ꪹꪐ ꪭꪮꪒ ꪢꪴ ꪵꪣ ꪵꪀꪉ ꪩꪺꪉ ꪡꪮꪉ ꫃ꪛꪉ ꪻꪬ ꪝꪉꪳ ꪢꪴ ꪹꪋ. ꪕꪮꪥ ꪫꪲ ꪪꪽ ꪵꪖꪉ ꪼꪫ ꪁꪒꪳ ꪼꪒ ꪩꪱꪉ ꪒꪲ ꪀꪺꪉ ꪫꪀꪸ ꪵꪔꪉ ꪩꪉꪸ ꪭꪳ ꪼꪒ ꫃ꪥꪒ ꪁꪮꪀ ꫄ꪛꪉ ꪎꪱꪉ ꪚꪱꪉ ꪬꪱꪀ ꪫꪱ ꪹꪚꪱ ꪻꪬ ꪶꪩꪣ ꪔꪮꪉ. ꪢꪴ ꪹꪋ ꪼ ꪒꪬꪱꪫ ꪵꪭꪉ ꪵꪀꪉ ꪼꪔ ꪔꪀꪳ ꪼꪔ ꪎꪱꪙ ꪕꪮꪥ ꪑꪱꪣ, ꪛꪱꪫ ꪤꪱ ꪄꪱ ꪵꪣꪉ ꫃ꪛꪉ, ꪄꪱ ꪶꪔ ꫃ꪬꪚ ꪶꪔ ꫃ꪣꪙ ꪻꪬ ꪢꪴ.

ꪎꪴ ꪹꪋꪉ ꪀꪙꪲ ꪣꪲ ꪨꪱꪤ ꫄ꪊꪒ ꪋꪮꪚ ꪀꪚꪾ ꪕꪉꪳ ꪥꪱꪙ ꪢꪱ ꪻꪐ ꪄꪮꪉ ꪶꪔ ꪢꪴ. ꪹꪋꪉ ꪀꪙꪲ ꪻꪬ ꪢꪴ ꫄ꪁꪙ ꪼꪒ ꪜꪙꪸ ꪻꪢ ꪭꪱꪉ ꪣꪳ , ꪹꪋꪉ ꪀꪙꪲ ꪹꪏ ꪚꪒꪴ ꪢꪙꪲ ꪼꪒ ꪹꪮꪱ ꪮꪮꪀ ꪎꪸ, ꪐꪽ ꪝꪱꪫ ꪹꪚꪱ ꪻꪬ ꪹꪋꪉ ꪀꪙꪲ ꪚꪒꪴ ꪢꪙꪲ ꪶꪎꪣ. ꪙꪣꪾ ꪀꪙꪲ ꪼꪒ ꪋꪺꪉ ꪭꪮꪉ ꪕꪀꪴ ꪝꪷ ꪵꪝꪀ ꪻꪎ ꪹꪚꪱ ꪊꪺꪚ ꪮꪺꪥ. ꪋꪴ ꪣꪳ ꪼꪒ ꪵꪠꪫ ꪕꪮꪙ ꪁꪮꪀ ꫄ꪛꪉ ꪻꪬ ꪁꪷ ꫄ꪛꪉ ꫄ꪩꪉ ꪻꪄ ꪶꪄ ꪵꪜꪀ ꪻꪎ. ꪶꪠꪉ ꪮꪮꪣ ꪁꪮꪀ ꫄ꪛꪉ ꪼꪒ ꪠꪱꪒ ꪖꪱꪉ ꪵꪝꪀ ꪻꪎ. ꪩꪙꪳ ꪹꪏ ꪨꪷ ꪼꪒ ꪔꪣꪸ ꪡꪯꪉ ꪕꪀꪴ ꪝꪷ ꪝꪉꪳ ꪔꪱꪉ ꫃ꪛꪉ ꪻꪬ ꪢꪴ ꪹꪏꪉ ꫃ꪛꪉ ꫃ꪊꪚ ꪜꪣꪴ ꪖꪱꪫ ꪕꪯꪉ ꫃ꪛꪉ ꪕꪴ ꪬꪫꪒꪸ ꪊꪉꪴ ꫃ꪛꪉ ꪶꪎꪚ ꪹꪜꪥ ꪀꪚꪲ ꪔꪙꪲ ꪁꪮꪙ. ꫄ꪋ ꪎꪴ ꪄꪱꪉ ꪎꪉꪲ ꪼꪒ ꫄ꪊꪚ ꪙꪣꪾ ꪕꪀꪴ ꪝꪷ ꪹꪣꪙ ꪕꪮꪥ ꪋꪲ ꪚꪮꪀ ꪄꪮꪉ ꪀꪱꪙ ꪶꪚ ꪖꪴ ꪮꪲ. ꪼꪒ ꫄ꪊꪚ ꪙꪣꪾ ꪥꪉꪰ ꪔꪣꪸ ꪤꪱ ꪄꪱꪉ ꪎꪉꪲ ꪀꪮꪙ ꫄ꪋ ꪄꪱ ꪋꪺ ꪢꪴ ꪄꪱꪶ.

ꪨꪉꪰ ꪤꪱꪫ  3 ꪜꪲ ꪵꪔꪉ ꪩꪉꪸ ꪫꪲ ꪪꪽ ꪵꪖꪉ ꫃ꪬꪙ ꪼꪒ ꪫꪀꪸ ꫃ꪥꪒ ꪄꪮꪉ ꪹꪊꪱ ꪨꪷ ꪋꪮꪚ ꪵꪣꪙ ꪩꪙꪳ ꪹꪏ ꪨꪷ ꪀꪺꪉ ꪥꪱꪙ ꪒꪙꪲ ꪒꪮꪙ ꫃ꪥꪒ ꪹꪥꪙ ꪁꪚꪾ ꪵꪁꪚ ꪹꪏꪉ ꪼꪅ ꪙꪲ. ꪯꪱꪥ ꫄ꪩꪉ ꫄ꪋ ꪊꪳ ꪢꪽ ꪝꪉꪳ ꪢꪴ ꪵꪔ 70-100 ꪶꪔ. ꪜꪽ ꫄ꪝꪉ ꪼꪜ ꪢꪮꪥ ꪜꪲ ꪄꪱꪥ ꪮꪮꪀ ꫄ꪋ ꪩꪱꪒ ꪵꪔ 13-15 ꫄ꪔꪙ ꪢꪴ ꪹꪐ ꪣꪲ ꪢꪱ ꪀꪱꪥ 100 ꪋꪫꪸ ꪢꪽ.

ꪵꪯꪉ ꪥꪀꪲ