ꪁꪮꪙ ꪕꪣꪴ: ꪣꪺ ꪣꪽ ꪀꪷ ꪻꪢ ꪄꪴ ꪹꪋꪱ ꪨꪷ ꪹꪀꪱ

        ꪋꪮꪣ ꪄꪱꪥ ꪵꪩꪫ 70 ꫄ꪔꪙ ꪣꪽ ꪀꪷ ꪻꪬ ꪹꪭꪙ ꪼꪢ ꫃ꪊ ꪚꪙꪸ ꪄꪮꪉ ꪶꪀꪉ ꪕꪲ ꪚꪮꪣ ꪤꪉꪸ ꪕꪉꪲ ꪶꪛꪒ ꪣꪽ ꪀꪷ ꪁꪮꪙ ꪕꪣꪴ, ꪯꪱꪥ ꪡꪱꪣ ꪣꪉꪲ ꪩꪮꪉ, ꪘꪉꪷ ꪶꪖꪙ ꪶꪖꪙ ꪚꪉꪲ ꪋꪉꪴ ꪎꪱ ꪎꪱ ꪚꪉꪲ, ꪭꪫꪙꪸ ꪎꪱ ꫄ꪖꪥ ꪻꪬ ꪭꪴ, ꪼꪫ ꪜꪀꪴ ꪼꪒ 2 ꪵꪬꪀ ꪕꪱ ꪣꪽ ꪀꪷ, ꪋꪺ ꪹꪭꪙ ꪯꪱꪥ ꪥꪮꪣ ꪮꪮꪀ ꪤꪱꪫ 10 ꪋꪫꪥꪸ ꪢꪽ ꪻꪬ ꪫꪀꪸ ꪼꪖ ꪚꪱꪙ ꪵꪀꪉ ꪄꪙꪴ ꪤꪱ. ꪵꪩꪫ ꪭꪮꪒ ꫄ꪋ ꪀꪴ, ꫄ꪉꪙ ꪊꪱꪉ ꪶꪀꪉ ꪶꪨꪀ, ꪶꪀꪉ ꪶꪄꪙ ꪋꪙꪸ ꪬꪺ ꪣꪺ ꪼꪒ ꪕꪷ 1.550 ꪢꪽ ꪢꪮꪥ ꫄ꪀꪙ. ꪏꪸ ꪎꪸ ꪝꪉꪳ ꪉꪮꪙ ꫄ꪉꪙ ꪮꪙꪳ ꪹꪚꪱ ꪼꪒ ꪕꪷ ꪻꪒ.

          ꪝꪮꪣ ꪀꪚꪾ ꪩꪺꪉ ꪹꪋꪱ ꪨꪷ ꪄꪱꪥ ꪣꪽ ꪀꪷ ꪜꪲ ꪖꪳ 2 ꪥꪙꪸ, ꪭꪱꪉ ꪎꪚꪲ ꪝꪽ ꪋꪺ ꪹꪭꪙ ꫄ꪤꪙ ꪜꪀꪴ ꪣꪽ ꪘꪉꪰ ꪁꪮꪙ ꪕꪣꪴ ꪑꪉꪷ ꪣꪲ ꪨꪱꪥ ꪄꪴ ꪹꪋꪱ ꪨꪷ ꪮꪙꪳ. ꪯꪽ ꪨꪷ ꪘꪉꪷ ꪝꪉꪳ ꪭꪫꪙꪸ ꪨꪀꪰ ꪹꪏꪉ ꪁꪮꪣ ꫄ꪝ ꪶꪩꪉ ꪕꪴ ꫄ꪣ ꪶꪤꪉ, ꪒꪀꪰ ꪼꪉꪨ... ꫜ ꪁꪱ ꪣꪱ ꪶꪄꪣ ꪁꪱꪏꪳ ꪢꪮꪥ ꪣꪲ ꪕꪷ ꪀꪲ ꪭꪮꪥ ꪢꪽ. ꪝꪮꪣ ꪀꪚꪾ ꪫꪀꪸ ꪹꪭ ꪼꪢ ꪐꪽ ꪵꪥꪉ ꪣꪽ ꪣꪲ ꪶꪛꪒ ꪕꪷ ꪻꪒ ꪨꪷ ꫛ ꫄ꪤꪙ ꪭꪳ ꪹꪚ ꪱ꫄ꪋꪉ ꪝꪉꪸ, ꫄ꪤꪙ ꫄ꪋ ꪻꪒ ꪁꪷ ꪏꪒꪸ.

          ꪎꪱꪫ ꪭꪴ ꪘꪉꪰ ꪎꪱꪙ ꪹꪭꪙ ꪼꪢ ꪒꪱꪉ ꪖꪴ ꪏꪳ, ꫃ꪊ ꪚꪙꪸ ꪣꪽ ꪘꪉꪰ ꪔꪉꪲ ꪁꪮꪙ ꪕꪣꪴ, ꪫꪀꪸ ꪐꪽ ꪵꪥꪉ ꪶꪛꪓ ꪣꪽ ꪵꪀꪉ ꪒꪙꪲ ꪙꪱꪣ ꪊꪚꪾ ꪝꪮꪣ ꪼꪒ ꫄ꪐꪙ ꪪꪙꪸ ꪣꪱ ꫄ꪚꪉ ꪵꪩ ꫛ ꪄꪱꪥ ꪣꪽ ꪭꪴ ꪕꪷ ꪪꪱ ꪏꪳ ꪻꪒ ꪨꪷ ꪭꪴ ꪹꪏꪉ ꪙꪽ. ꪊꪉꪲ ꪁꪫꪙꪸ ꪵꪀꪉ ꪝꪉꪳ ꫄ꪀ ꪀꪱꪫꪙ ꪣꪲ ꪊꪀꪳ ꪁꪫꪙꪸ ꪓꪸ ꪹꪠꪉ ꪁꪷ ꫃ꪭ ꪣꪲ ꪩꪺꪉ ꪩꪣꪾ ꪵꪩ ꪼꪫ ꪼꪜ ꪋꪳ ꪁꪫꪙꪸ ꪵꪀꪉ ꪄꪴ ꫄ꪩꪥ ꪒꪲ ꪄꪮꪉ ꪝꪷ ꪼꪭ ꪵꪣ ꪙꪱ. ꪀꪺꪉ ꫄ꪋ ꪙꪽ, ꪠꪴ ꪮꪺꪙ ꪝꪱ ꪹꪭꪙ ꪼꪢ ꫃ꪊ ꪚꪙꪸ ꪣꪽ ꪀꪷ ꪁꪷ ꪐꪽ, ꪫꪀꪸ ꪏꪲ ꪎꪸ ꪙꪱꪣ ꪒꪙꪲ ꪊꪚꪾ ꪭꪱꪫ ꪭꪀꪸ ꫄ꪊꪚ ꪙꪣꪾ.

          ꪕꪮꪥ ꪩꪉꪴ ꪈꪫꪙ ꪪꪒꪸ ꪩꪫꪥꪸ, ꪤꪱꪢ ꪶꪒꪀ ꪋꪲ ꪁꪴꪀ ꪜꪀꪴ ꪢꪚꪉ ꪵꪀꪉ ꪼꪜ ꪋꪳ ꪀꪷ ꪜꪀꪴ ꪢꪚꪉ ꪔꪉꪲ ꪁꪮꪙ ꪕꪣꪴꪵꪮ ꪻꪬ ꫄ꪋꪉ ꪝꪉꪸ ꪀꪺꪉ ꪖꪴ ꪏꪳ ꪵꪀꪉ ꪤꪮꪙ ꪎꪸ ꪄꪴ ꪹꪊꪱ ꪨꪷ ꪻꪬ ꪀꪷ ꪜꪀꪴ ꪣꪽ, ꪝꪮꪣ ꪀꪚꪾ ꪫꪀꪸ ꪔꪣꪴ ꪝꪺ ꪹꪩꪱ ꪫꪀꪸ ꪀꪫꪱꪙ ꪨꪲ ꪹꪭꪙ ꪹꪘꪀ ꪄꪮꪉ ꪖꪈꪉ ꪣꪲ ꪊꪀꪳ ꪁꪫꪙꪸ, ꫄ꪁꪙ ꪼꪒ ꪁꪱꪒ ꪁꪙꪸ ꪵꪊꪀ ꪑꪣꪸ ꪄꪮꪉ ꪵꪥꪫꪉ ꪉꪚꪸ ꪀꪚꪾ ꪝꪷ ꪼꪭ ꪵꪣ ꪙꪱ ꪵꪀꪉ ꪝꪷ ꪼꪭ ꪵꪣ ꪙꪱ ꪀꪚꪾ ꪵꪥꪫꪉ ꪉꪚꪸ:

          ꪀꪚꪾ 40 ꪝꪽ ꪵꪬꪀ ꪕꪱ, ꪘꪉꪷ ꪔꪉꪲ ꪁꪮꪙ ꪕꪣꪴ ꪨꪷ ꪶꪠꪉ ꪣꪲ ꪨꪱꪥ ꪔꪱ ꪒꪙꪲ ꪜꪀꪴ ꪀꪷ ꪣꪽ ꪀꪷ, ꪨꪉꪷ ꪀꪷ ꪤꪱꪉ ꪥꪒꪳ. ꪼꪅ ꪙꪲ ꪘꪉꪷ ꪔꪉꪲ ꪣꪲ 6 ꪹꪭꪙ ꪼꪢ ꫃ꪊ ꪚꪙꪸ ꪒꪱꪉ ꫃ꪥꪒ ꪫꪀꪸ ꪵꪀꪉ 2 ꪹꪭꪙ ꪼꪢ ꪀꪺꪉ ꪥꪱꪙ ꪔꪉꪷ ꪵꪔꪉ. ꪬꪱꪀ ꪫꪱ ꪭꪮꪒ ꪼꪅ ꫄ꪡꪙ ꪨꪱꪥ ꪔꪱ ꪒꪙꪲ ꫛ ꫄ꪤꪙ ꪬꪱꪀ ꪜꪀꪴ. ꪬꪱꪀ ꪫꪱ ꪁꪱ ꪁꪮꪙ ꪀꪙꪳ ꪶꪩꪉ ꪕꪮꪥ ꪘꪉꪷ ꫄ꪋ ꪩꪱꪒ.

          ꪪꪱ ꪝꪉꪳ ꪄꪴ ꪹꪋꪱ ꪨꪷ ꪹꪀꪱ ꪀꪚꪾ ꪀꪷ ꪣꪽ ꪘꪉꪷ ꪓꪸ ꪹꪠꪉ ꪙꪲ ꪹꪚ ꪱꪼꪒ ꪵꪀ ꪼꪄ ꫄ꪩꪚ ꪕꪽ ꪭꪴ ꪫꪀꪸ ꪜꪀꪴ ꪶꪚꪉ ꪹꪚꪱ ꪕꪮꪥ ꪕꪒꪰ ꪜꪙꪴ, ꪋꪉꪲ ꪏꪳ ꪋꪉꪲ ꪄꪱꪥ ꪵꪩꪫ ꪊꪺꪚ ꪶꪄꪣ ꪁꪱ ꪝꪰ ꪼꪭ ꪵꪣ ꪘꪱ ꪨꪷ ꪄꪴ ꪣꪸ ꪹꪏꪉ ꪋꪲ ꪵꪀꪒ ꪎꪉꪲ ꪮꪮꪀ.

                                                                                                                                                                    TTTN - ꪵꪭꪉ ꪥꪀꪲ

Kon Tum: Mua măn co máư, khu chau lo cáu

Chọm khài lẹo 70 tấn măn co hảu hươn máy chế biến khong Công ty bóm riêng tinh bột măn con Kon Tum, ai Phạm Minh Long, nẳng thôn Bình Trung, xã Sa Bình, huyện Sa Thầy hảu hụ, vạy púk đảy 2 héc ta măn co, chua hươn ai dom ók dáo 10 triệu mằn hảu vịa thày bàn cánh khún dà. Lẹo họt chơ củ, ngơn chảng công lốc cốn, công  khôn chiên hùa mua đảy to 1.550 măn mỏi cân, xị xìa pưng ngon ngơn ứn báu đảy to đàư:

Pọm cắp luông chau lo khài măn báu đảy ca pi thứ 2 diên, hạng xíp păn chua hươn dân púk măn nẳng Kon Tum nhăng mi lai khu chau lo ứn. Ặn lỏ nẳng pưng huyện lắc, xương Kon Plông, Tu Mơ Rông, Đắc Glei...côn ca ma khốm ca sự mỏi cân đảy to kỷ họi mằn. Pọm cắp vịa hươn máy nhẳn danh măn mi bột to đàư lỏ côn dân hư báu châng piêng, dân chơ đàư cọ xiệt.

Sáo hụ nẳng san hươn máy đang thu sự, chế biến măn nẳng tỉnh Kon Tum hảu hên, vịa nhẳn danh bột măn cánh đin nam chắp pọm đảy nhân viên hươn máy ma bấng dệt, côn khài măn hụ to va sư lỏ hụ xương nặn. Chính quyên cánh pưng cơ quan mi chức quyên địa phương cọ hê mi luông lăm le vạy pảy chự quyên cánh khu lợi đi hảu po hay me na. Cuông chơ nặn, phủ uôn pa hươn máy chế biến măn cò  cọ nhẳn, vịa xị xia nam đin chắp đảy hao chấp năm.

Toi lung Nguyễn Viết Liệu, giám đốc Chi cục púk bồng cánh pảy chự cò púk bồng tỉnh Kon Tum é hảu châng piêng cuông thu sự cánh dón xia khu chau lo hảu côn púk măn, pọm cắp tủm pau vịa quản lý Hươn nước khong ngành mi chức quyên, cận đảy cạt kiên trách nhiệm khong doanh nghiệp cắp po hay me na cánh po hay me na cắp doanh nghiệp:

Cắp 40 păn héc ta, nẳng tỉnh Kon Tum lỏ phổng mi lai ta đin púk con măn co, lăng co dang dứt. Khay nị nẳng tỉnh mi 6 hươn máy chế biến đang dệt vịa cánh 2 hươn máy cuông dan tẳng tánh. Hák va họt khạy phân lài ta đin côn dân hák púk, hák khài, ca con khửn lông toi nẳng chợ lạt.

Va pưng khu chau lo cáu cắp co măn nẳng địa phương nị báu đảy kẻ khày lợp tăn hư vịa púk bông báu toi tặt pun, chinh sự chinh khai, lẹo chuốp khốm ca po hay me na lỏ khu mi xương chi cướt sinh ók./.

                                                TTTN - Hạnh dịch