Ún chằư côn chếp cặt cung

Nẳng hươn dà đa khoa huyện Yền Chầu, tỉnh Sơn La cứ hung chạu mỏi mự dệt vịa, pưng tháo xuổng xửa chăm va cáu hák đảy xặc pẹk, pằn tàng toi pùn lan đảy xiếp lặt xắư tựng hỏng tủ xắư chương tẳng ngày nẳng phơi hươn khòng hươn dà. Ặn nị lỏ chương hẳư lạ dòm hẳư côn chếp hươn giảo pọ dạk cha. Cọ cài 2 pì nị, côn chếp cặt cung nẳng nỉ cọ quén khơi cắp tủ xuổng xửa nị, pi nọng cong thả cánh chôm tỏn àu xuổng xửa té hùa chằư hặc panh ín xường.

Yền Chầu lỏ huyện mi lài chựa nọi côn kìn dú, kình tế pọ lài dạk cha. Mi pưng côn chếp ma hươn dà chăm va đảy Bảo hiểm ỳ tế khừn tênh mết ngơn khảu non hươn dà, hák va ngơn kìn cọ báu mi. Lài côn chếp, lài nọng xuổng xửa báu po nung, báu hê tô họt kìn đì nung ún cuồng mua nào cưm. Pưa xương nặn pưng nhần viền ỳ tế cuồng hươn dà cọ lâng chơ hák muôn chằư cóp hôm xuổng xửa khòng dần mương cuồng phổng ma hẳư côn chếp. Lằng nặn Bàn Giám đốc hươn dà cọ giào hẳư Công đoàn hươn dà púc chuân há phong chôm choi côn chếp cặt cung cánh tẳng tủ xuổng xửa nẳng hươn dà. Tủ xuổng xửa chôm choi côn chếp cặt cung khòng hươn dà cọ nhẳn  đảy luông pồng chằư choi dừa khòng lài côn hùa chằư quảng.

Pưng tháo xuổng xửa chăm va báu nhăng mắư, hák va ặn lỏ pưng hùa chằư đì bánh pằn đối cắp pưng côn chếp hươn giảo pọ lài dạk cha. Quam bók xòn khòng Pú Hô “ xay dà pàn me êm chằm chặn” lâng đảy pưng ỳ bác sĩ nẳng hươn dà huyện Yền Chầu chằm chứ báu lưm./.

                                                Hồng Việt-Tòng Anh dịch

ꪮꪙꪳ ꪻꪊ ꫛ ꫃ꪊꪚ ꪁꪒꪰ ꪁꪉꪴ

ꪘꪉꪰ ꪹꪭꪙ ꪤ ꪱꪒ ꪄꪫꪱ ꪭꪫꪙꪸ ꪮꪙꪸ ꪹꪊꪱ ꪔꪉꪲ ꫄ꪎꪙ ꪨꪱ ꪁꪳ ꪢꪮꪥ ꪭꪉꪴ ꪹꪋꪱ ꫃ꪥꪒ ꪫꪀꪸ, ꪝꪉꪳ ꪖꪱꪫ ꪎꪺꪉ ꪹꪎ ꪋꪣꪾ ꪫꪱ ꪹꪀꪱ ꪬꪱꪀ ꪫꪱ ꪼꪒ ꪏꪀꪰ ꪵꪝꪀ ꪜꪽ ꪔꪱꪉ ꪕꪮꪥ ꪜꪙꪴ ꪩꪱꪙ ꪼꪒ ꪎꪚꪸ ꪻꪎ ꪕꪉꪳ ꪬꪮꪉ ꪹꪋꪉ ꪔꪉꪰ ꪼꪈ ꪘꪉꪰ ꫄ꪡꪥ ꪹꪭꪙ ꪄꪮꪉ ꪹꪭꪙ ꪤꪱ. ꪯꪽ ꪙꪲ ꪨꪷ ꪹꪋꪉ ꪻꪬ ꪩꪱ ꪤꪮꪣ ꪻꪬ ꫛ ꫃ꪊꪚ ꪁꪒꪰ ꪁꪉꪴ. ꪁꪷ ꪀꪱꪥ  2 ꪜꪲ ꪙꪲ, ꫛ ꫃ꪊꪚ ꪁꪒꪰ ꪁꪉꪴ ꪘꪉꪰ ꪘꪲ ꪁꪷ ꪵꪀꪫꪙ ꫄ꪅꪥ ꪀꪚꪾ ꪔꪴ ꪎꪺꪉ ꪹꪎ ꪙꪲ, ꪝꪲ ꪙꪮꪉ ꪁꪮꪉ ꪖꪱ ꪵꪀꪉ ꪶꪋꪣ ꪔꪮꪙ ꪹꪮꪱ ꪎꪺꪉ ꪹꪎ ꪵꪔ ꪬꪺ ꪻꪊ ꪭꪀꪰ ꪵꪝꪉ ꪮꪙꪲ ꪹꪎꪉ.

ꪮꪙꪸ ꪹꪊꪱ ꪨꪷ ꪭꪫꪙꪸ ꪣꪲ ꪨꪱꪥ ꪹꪋ ꪙꪮꪥ ꫛ ꪀꪙꪲ ꪤꪴ ꪀꪉꪲ ꫃ꪔ ꪝꪷ ꪨꪱꪥ ꪥꪱꪀ ꪋꪱ. ꪣꪲ ꪝꪉꪳ ꫛ ꫃ꪊꪚ ꪣꪱ ꪹꪭꪙ ꪤꪱ ꪋꪣꪾ ꪫꪱ ꪼꪒ ꪚꪱꪫ ꪬꪣꪸ ꪮꪲ ꫃ꪔ ꪄꪙꪳ ꫃ꪕꪉ ꫃ꪢꪒ ꫄ꪉꪙ ꪹꪄꪱ ꪙꪮꪙ ꪹꪭꪙ ꪤꪱ ꪬꪱꪀ ꪫꪱ ꫄ꪉꪙ ꪀꪙꪲ ꪁꪷ ꪹꪚꪱ ꪣꪲ. ꪨꪱꪥ ꫛ ꫃ꪊꪚ ꪨꪱꪥ ꪙꪮꪉ ꪎꪺꪉ ꪹꪎ ꪙꪉꪴ ꪁꪷ ꪹꪚꪱ  ꪝꪷ ꪹꪚꪱ ꫃ꪭ ꪶꪕ ꪭꪮꪒ ꪀꪙꪲ ꪒꪲ ꪙꪉꪴ ꪮꪙꪴ ꪀꪺꪉ ꪣꪺ ꪘꪱꪫ ꪁꪣꪳ. ꪹꪝ ꪹꪏꪉ ꪙꪽ ꪝꪉꪳ ꫄ꪐꪙ ꪪꪙꪸ ꪮꪲ ꫃ꪔ ꪀꪺꪉ ꪹꪭꪙ ꪤꪱ ꪁꪷ ꫄ꪩꪉ ꫄ꪋ ꪬꪱꪀ ꪣꪺꪙ ꪻꪊ ꪀꪮꪚ ꪶꪭꪣ ꪎꪺꪉ ꪹꪎ ꪄꪮꪉ ꫄ꪤꪙ ꪹꪣꪉ ꪀꪺꪉ ꪶꪠꪉ ꪣꪱ ꪻꪬ ꫛ ꫃ꪊꪚ. ꪨꪉꪰ ꪙꪽ ꪚꪱꪙ ꪤꪱꪣ ꪶꪒꪀ ꪹꪭꪙ ꪤꪱ ꪁꪷ ꪤꪱꪫ ꪻꪬ ꪶꪀꪉ ꪒꪫꪱꪙ ꪹꪭꪙ ꪤꪱ ꪜꪀꪴ ꪋꪺꪙ ꪬꪱ ꪡꪮꪉ ꪶꪋꪣ ꪋꪮꪥ ꫛ ꫃ꪊꪚ ꪁꪒꪰ ꪁꪉꪴ ꪹꪭꪙ ꪤꪱ ꪁꪷ ꪐꪽ ꪼꪒ ꪩꪺꪉ ꪶꪋꪣ ꪋꪮꪥ ꪄꪮꪉ ꪨꪱꪥ ꫛ ꪬꪺ ꪻꪊ ꪀꪫꪱꪉ.

ꪝꪉꪳ ꪖꪱꪫ ꪎꪺꪉ ꪹꪎ ꪋꪣꪾ ꪫꪱ ꪹꪚꪱ ꪑꪉꪰ ꪻꪢ ꪬꪱꪀ ꪫꪱ ꪯꪽ ꪨꪷ ꪝꪉꪳ ꪬꪺ ꪻꪊ ꪒꪲ ꪵꪚꪉ ꪜꪽ ꪶꪒꪥ ꪀꪚꪾ ꫛ ꫃ꪊꪚ ꪹꪭꪙ ꪤꪱꪫ ꪝꪷ ꪨꪱꪥ ꪤꪱꪀ ꪋꪱ. ꪁꪫꪱꪣ ꪚꪮꪀ ꪎꪮꪙ ꪄꪮꪉ ꪜꪴ ꪶꪭ ꪼꪏ ꪤꪱ ꪜꪱꪙ ꪹꪥꪉ ꫃ꪯꪣ ꪊꪣꪾ ꪋꪽ ꫄ꪩꪉ ꪼꪒ ꪝꪉꪳ ꪮꪲ ꪚꪱꪀ ꪎꪲ ꪘꪉꪰ ꪹꪭꪙ ꪤꪱ ꪭꪫꪙꪸ ꪮꪙꪸ ꪹꪊꪱ ꪊꪣꪾ ꪊꪳ ꪹꪚꪱ ꪩꪣꪳ.

                                      ꪶꪬꪭ ꪫꪒꪸ-ꪕꪮꪉ ꪵꪯꪉ ꪥꪀꪲ