Yền Bái khâng chằư kẻ cặm xiệt hại pộ phồn nong

Chu phồn nong té hùa bườn 7 ma họt khạy cọ dệt hại nắc nà họt puồng kìn luông dú khòng dần mương tỉnh Yền Bái cắp cài 40 làng hươn chuốp xiệt hại, cuồng nặn mi chua hươn đảy nhại họn xẳn pày dú bón ứn; cài 80 héc ta khảu na, dáo 5 héc ta na tà cả, 16 héc ta nòng pà chuốp lày nong, đìn đán thồm xìa. Nẳng bản Sáng Nhù, xã Mồ Dề, huyện Mù Cang Chải cọ cướt sình ók đìn đán cạn chột, thồm xìa làn Thào Thị Dà, 6 pì chuốp xiệt mo, cánh làn nọi ứn nưng 8 pì cọ chuốp chếp bát.

Khay nị pưng địa phường cuồng tỉnh Yền Bái nhăng đàng xứp tàm kẻ cặm xiệt hại pộ phồn nong dệt ók, pày dử dàm thàm kháo choi dừa pưng chua hươn chuốp xiệt hại; xòng ma tẳng cốc lăm le tọp hòm, mi kế hoạch nhại pưng chua hươn dần ók khói phổng hiểm hại. Cuồng gian phạ phồn luồng nhăng đàng cướt sình ók chính quyên chu địa phường cọ tủm pua chiên páo họt côn dần vạy khâng chằư chự phong vện ník. Phồn nong pưng mự nị nẳng tỉnh Yền Bái cọ dệt cạn chột tà phắng cánh nong lạt thuổm nẳng san bón nẳng xểm tang luồng 32 gian pày cài huyện Mù Cang Chải; nặm nhưng thuổm nẳng xểm tang luồng 70, gian pày cài xã Đại Đồng, huyện Yền Bình; cạn chột thồm xìa gian tang Bình Thuận- Đại LỊch, huyện Vằn Chấn, gian tang Đại Minh- Bạch Hà, huyện Yền Bình. Lài xểm tang đòm bản, đòm xã cọ chuốp nặm nhưng thuổm đòm bón, dệt hại họt puồng kìn luông dú khòng dần mương. Xiệt hại pộ phồn nong nẳng tỉnh Yền Bái danh tính dáo 3 tỷ mằn. Khay nị, nẳng tỉnh Yền Bái phạ phồn nong báu ngau, mi xương nhăng chi cướt sình ók đìn đán cạn chột, nong lạt lài bón. Bàn uồn pa chự phong pưng liêm báu đì pộ phạ đìn dệt ók cánh xáo hà cứu choi côn chuốp chọ nạn tỉnh Yền Bái cánh chính quyên chu địa phường đàng púc pua nả vịa chiên páo, chị bók dần mương chự phong, xòng ma tủm pua chủm mú các cành cá vên cá cưn vạy kẻ khày lợp tăn chơ mi phồn nong cướt sình ók.                                                 Tuấn, Xuân- Anh dịch

ꪮꪙꪸ ꪚꪱꪤ ꫄ꪅꪉ ꪻꪊ ꪵꪀ ꪁꪣꪾ ꪏꪒꪸ ꪭꪱꪥ ꪶꪝ ꪶꪠꪙ ꪙꪮꪉ

ꪋꪴ ꪶꪠꪙ ꪙꪮꪉ ꪵꪔ ꪬꪺ ꪹꪚꪙ 7 ꪣꪱ ꪭꪮꪒ ꪼꪅ ꪁꪷ ꫃ꪥꪒ ꪏꪒꪸ ꪭꪱꪥ ꪘꪀꪰ ꪘꪱ ꪭꪮꪒ ꪜꪺꪉ ꪀꪙꪲ ꪩꪺꪉ ꪤꪴ ꪄꪮꪉ ꫄ꪤꪙ ꪹꪣꪉ ꪔꪉꪲ ꪮꪙꪸ ꪚꪱꪥ ꪀꪚꪾ ꪀꪱꪥ 40 ꪨꪱꪉ ꪹꪭꪙ ꪊꪺꪚ ꪏꪒꪸ ꪭꪱꪥ ꪀꪺꪉ ꪙꪽ ꪣꪲ ꪋꪺ ꪹꪭꪙ ꪼꪒ ꪑꪱꪥ ꪭꪮꪙ ꪎꪽ ꪼꪜ ꪤꪴ ꪚꪮꪙ ꪮꪙꪳ; ꪀꪱꪥ 80 ꪵꪬꪀ ꪕꪱ ꪹꪄꪱ ꪙꪱ ꪤꪱꪫ 5 ꪵꪬꪀ ꪕꪱ ꪙꪱ ꪕꪱ ꪀꪱ, 16 ꪵꪬꪀ ꪕꪱ ꪘꪮꪉ ꪜꪱ ꪙꪱ ꪵꪋ ꪊꪺꪚ ꪙꪮꪉ ꪩꪱꪒ ꪒꪙꪲ ꪶꪖꪣ ꪎꪸ. ꪘꪉꪰ ꪚꪱꪙ ꪎꪱꪉ ꪐꪴ ꪎꪱ ꪶꪢ ꫃ꪤ ꪭꪫꪙꪸ ꪢꪴ ꪀꪱꪉ ꪊꪱꪥ ꪁꪷ ꪹꪀꪒ ꪎꪉꪲ ꪮꪮꪀ ꪒꪙꪲ ꪒꪱꪙ ꪁꪱꪙ ꪶꪋꪒ ꪶꪖꪣ ꪎꪸ ꪨꪱꪙ ꪖꪱꪫ ꪗꪲ ꪤꪱ 6 ꪜꪲ ꪊꪺꪚ ꪏꪒꪸ ꪣꪷ ꪵꪀꪉ ꪨꪱꪙ ꪙꪮꪥ ꪮꪙꪳ ꫜ 8 ꪜꪲ  ꪊꪺꪚ ꫃ꪊꪚ ꪚꪱꪒ.

ꪼꪅ ꪙꪲ ꪝꪉꪳ ꪒꪸ ꪹꪠꪉ ꪀꪺꪉ ꪔꪉꪲ ꪮꪙꪸ ꪚꪱꪤ ꪑꪉꪰ ꪒꪱꪉ ꪎꪚꪳ ꪔꪱꪣ ꪵꪀ ꪁꪣꪾ ꪏꪒꪸ ꪭꪱꪥ ꪶꪝ ꪶꪠꪙ ꪙꪯꪉ ꫃ꪥꪒ ꪮꪮꪀ ꪼꪜ ꪤꪳ ꪤꪱꪣ ꪖꪱꪣ ꪄꪱꪫ ꪋꪮꪥ ꪹꪤ ꪝꪉꪳ ꪋꪺ ꪹꪭꪙ ꪊꪺꪚ ꪏꪒꪸ ꪭꪱꪥ; ꪎꪮꪉ ꪣꪱ ꪔꪉꪰ ꪶꪀꪀ ꪩꪣꪾ ꪵꪩ ꪕꪮꪚ ꪬꪮꪣ ꪣꪲ ꫃ꪀ ꪵꪭꪫꪀ ꪑꪱꪥ ꪝꪉꪳ ꪋꪺ ꪹꪭꪙ ꫄ꪤꪙ ꪮꪮꪀ ꪄꪮꪥ ꪶꪠꪉ ꪬꪣꪸ ꪭꪱꪥ. ꪀꪺꪉ ꪥꪱꪙ ꪡꪱ ꪶꪠꪙ ꪨꪺꪉ ꪑꪉꪰ ꪒꪱꪉ ꪹꪀꪒ ꪎꪉꪲ ꪮꪮꪀ ꪊꪉꪲ ꪁꪫꪙꪸ ꪒꪸ ꪹꪠꪉ ꪁꪷ ꪔꪣꪴ ꪝꪺ ꪋꪙꪸ ꪜꪱꪫ ꪭꪮꪒ ꫛ ꫄ꪤꪙ ꪼꪫ ꫄ꪅꪉ ꪻꪊ ꪋꪳ ꪡꪮꪉ.

ꪶꪠꪙ ꪙꪮꪉ ꪝꪉꪳ ꪣꪳ ꪙꪲ ꪘꪉꪰ ꪔꪉꪲ ꪮꪙꪲ ꪚꪱꪥ ꪁꪷ ꫃ꪥꪒ ꪁꪱꪙ ꪶꪋꪒ ꪔꪱ ꪠꪉꪰ ꪵꪀꪉ ꪙꪮꪉ ꪩꪱꪒ ꪖꪺꪣ ꪘꪉꪰ ꪏꪱꪙ ꪚꪮꪙ ꪘꪉꪰ ꫃ꪎꪣ ꪕꪱꪉ ꪨꪺꪉ ꪶꪎ 32 ꪥꪱꪙ ꪼꪜ ꪀꪱꪥ ꪭꪫꪙꪸ ꪢꪴ ꪀꪱꪉ ꪊꪱꪥ; ꪙꪣꪾ ꪑꪉꪳ ꪖꪺꪣ ꪘꪉꪰ ꫃ꪎꪣ ꪕꪱꪉ ꪨꪺꪉ 70 ꪥꪱꪙ ꪼꪜ ꪀꪱꪥ ꪎꪱ ꪓꪱꪥ ꪶꪒꪉ ꪭꪫꪙꪸ ꪮꪙꪲ ꪚꪉꪲ; ꪁꪱꪙ ꪶꪋꪒ ꪶꪖꪣ ꪎꪸ ꪤꪱꪙ ꪕꪱꪉ ꪚꪉꪲ ꪗꪺꪙ-ꪓꪱꪥ ꪩꪀꪲ ꪭꪫꪙꪸ ꪪꪽ ꫄ꪊꪙ ꪥꪱꪙ ꪕꪱꪉ ꪓꪱꪥ ꪣꪉꪲ-ꪵꪛꪀ ꪬꪱ ꪭꪫꪙꪸ ꪮꪙꪲ ꪚꪉꪲ. ꪨꪱꪥ ꫃ꪎꪣ ꪕꪱꪉ ꪒꪮꪣ ꪚꪱꪙ ꪒꪮꪣ ꪎꪱ ꪁꪷ ꪊꪺꪚ ꪙꪣꪾ ꪑꪉꪳ ꪖꪺꪣ ꪒꪮꪣ ꪚꪮꪙ ꫃ꪥꪒ ꪭꪱꪥ ꪭꪮꪒ ꪜꪺꪉ ꪀꪙꪲ ꪩꪺꪉ ꪤꪴ ꪄꪮꪉ ꫄ꪤꪙ ꪹꪣꪉ. ꪏꪒꪸ ꪭꪱꪥ ꪶꪝ ꪶꪠꪙ ꪙꪮꪉ ꪘꪉꪰ ꪔꪉꪲ ꪮꪙꪸ ꪚꪱꪥ ꪵꪥꪉ ꪔꪉꪲ ꪤꪱꪫ 3 ꪔꪲ ꪢꪽ.

ꪼꪅ ꪙꪲ ꪘꪉꪰ ꪔꪉꪲ ꪮꪙꪸ ꪚꪱꪥ ꪡꪱ ꪶꪠꪙ ꪙꪮꪉ ꪹꪚꪱ ꪹꪉꪱ ꪣꪲ ꪹꪏꪉ ꪋꪲ ꪹꪀꪒ ꪎꪉꪲ ꪮꪮꪀ ꪒꪙꪲ ꪒꪱꪙ ꪁꪱꪙ ꪶꪋꪒ ꪙꪮꪉ ꪩꪱꪒ ꪨꪱꪥ ꪚꪮꪙ. ꪚꪱꪙ ꪮꪺꪙ ꪝꪱ ꪋꪳ ꪡꪮꪉ ꪶꪠꪙ ꪙꪮꪉ ꪔꪉꪲ ꪮꪙꪸ ꪚꪱꪥ ꪵꪀꪉ ꪊꪉꪲ ꪁꪫꪙꪸ ꪒꪸ ꪹꪠꪉ ꪒꪱꪉ ꪜꪀꪴ ꪋꪺꪙ ꪘꪱ ꪫꪀꪸ ꪋꪙꪸ ꪜꪱꪫ ꪋꪲ ꪚꪮꪀ ꫄ꪤꪙ ꪹꪣꪉ ꪋꪳ ꪡꪮꪉ ꪎꪮꪉ ꪣꪱ ꪔꪣꪴ ꪝꪺ ꪊꪣꪴ ꪢꪴ ꪀꪱꪀ ꪵꪀꪉ ꪀꪱ ꫃ꪫꪙ ꪀꪱ ꪁꪙꪳ ꪼꪫ  ꪵꪀ ꪼꪄ ꫄ꪩꪚ ꪕꪽ ꫄ꪋ ꪣꪲ ꪶꪠꪙ ꪙꪮꪉ ꪹꪀꪒ ꪎꪉꪲ ꪮꪮꪀ.