ꪶꪠꪉ ꪙꪮꪉ ꪩꪱꪒ ꪖꪺꪣ ꪢꪴ ꪀꪱꪉ ꪊꪱꪥ ꪔꪉꪲ ꪮꪙꪸ ꪚꪱꪥ ꪎꪱꪉ ꪕꪾ ꪹꪩꪱ ꪜꪺꪉ ꪀꪙꪲ ꪩꪺꪉ ꪤꪴ

        ꪵꪔ ꪨꪉꪰ ꪋꪴ ꪶꪠꪙ ꪙꪮꪉ, ꪋꪺ ꪹꪭꪙ ꪹꪮꪥ ꪹꪨꪱ ꪖꪲ ꪢꪴ ꪤꪴ ꪚꪱꪘ ꪬꪱꪉ ꪈꪱꪉ ꪎꪱ ꪁꪣꪸ ꪙꪮꪥ ꪼꪒ ꪨꪱꪥ ꪒꪫꪱꪙ ꪶꪀꪉ ꪔꪱꪀ ꪄꪮꪉ ꪔꪉꪲ, ꪄꪮꪉ ꪭꪫꪙꪸ ꪵꪀꪉ ꪝꪉꪳ ꪒꪫꪱꪙ ꪬꪱꪀ ꪣꪺꪙ ꪻꪊ ꪣꪱ ꪋꪮꪥ ꪵꪀꪉ ꪖꪱꪣ ꪄꪱꪫ. ꪋꪴ ꪶꪠꪙ ꪘꪮꪉ ꪁꪷ ꫃ꪥꪒ ꪼꪨ ꪎꪸ ꪹꪋꪉ ꪄꪮꪉ ꪵꪀꪉ ꪹꪭꪙ ꪤꪱꪫ ꪄꪮꪉ ꪹꪮꪥ ꪢꪴ. ꪈꪾ ꪫꪱ ꪋꪲ ꪹꪚꪱ ꪣꪲ ꪵꪭꪉ ꫃ꪥꪒ ꪹꪥꪙ ꪨꪉꪰ ꪋꪴ ꪶꪠꪙ ꪙꪮꪉ ꪬꪱꪀ ꪫꪱ ꪭꪮꪒ ꪼꪅ ꪜꪺꪉ ꪀꪙꪲ ꪩꪺꪉ ꪤꪴ ꪄꪮꪉ ꪋꪺ ꪹꪭꪙ ꪹꪮꪥ ꪢꪴ ꪁꪷ ꪼꪒ ꪎꪱꪉ ꪶꪎꪣ ꪹꪨꪱ ꫃ꪢꪒ.

          ꪋꪺ ꪹꪭꪙ ꪯꪱꪥ ꪣꪺ ꪯꪱ ꫃ꪨꪉ ꪤꪴ ꪚꪱꪙ ꪄꪱꪫ ꪶꪤꪉ, ꪎꪱ ꪁꪣꪲ ꪙꪮꪥ ꪁꪷ ꪊꪺꪚ ꪙꪾ ꪙꪮꪉ ꫃ꪥꪒ ꪼꪨ ꪎꪸ ꫃ꪢꪒ ꪹꪋꪉ ꪄꪮꪉ ꪹꪭꪙ ꪤꪱꪫ. ꪭꪮꪒ ꪼꪅ, ꪋꪺ ꪹꪭꪙ ꪯꪱꪥ ꪁꪷ ꪔꪉꪰ ꪼ ꪒꪨꪱꪉ ꪹꪭꪙ ꪘꪱ ꪠꪱ ꪢꪽ ꪹꪏ. ꪙꪮꪀ ꪶꪎ ꫄ꪉꪙ ꪼꪒ ꪝꪲ ꪙꪮꪉ ꪀꪮꪚ ꪶꪭꪣ ꪢꪱ ꪋꪮꪥ ꪀꪱꪥ 80 ꪋꪫꪸ ꪢꪽ ꪼꪫ ꫃ꪤꪒ ꪹꪭꪙ, ꪋꪺ ꪹꪭꪙ ꪮꪱꪥ ꪑꪉꪰ ꪼꪒ ꪋꪮꪥ  ꪶꪔ ꪉꪺ ꫜ, ꪼꪒ ꪝꪉꪳ ꪒꪫꪱꪙ ꪬꪱꪀ ꪣꪺꪙ ꪻꪊ  ꪹꪮꪱ ꪢꪱ ꪋꪮꪥ ꪨꪱꪥ ꪹꪋꪉ ꪹꪭꪙ ꪹꪠꪙ ꪤꪱꪫ ꪹꪋꪉ ꪎꪴ ꪄꪮꪉ ꪻꪎ ꪀꪺꪉ ꪹꪭꪙ ꪵꪀꪉ ꪗꪄꪱ ꪙꪾ ꪁꪾ ꪀꪙꪲ...

          ꪁꪣꪲ ꪙꪮꪥ ꪨꪷ ꪎꪱ ꪊꪺꪚ ꪏꪒꪸ ꪬꪱꪥ ꪨꪱꪥ ꫄ꪐꪒ ꪨꪉꪰ ꪋꪴ ꪶꪠꪙ ꪙꪮꪉ ꪀꪚꪾ 6 ꫛ ꪔꪱꪥ ꪵꪀꪉ ꪹꪚꪱ ꫃ꪬꪙ ꪮꪮꪀ ꪕꪀꪲ, 17 ꪨꪱꪉ ꪹꪭꪙ ꪊꪺꪚ ꪼꪨ ꪙꪮꪶꪙ ꪬꪀꪰ ꪵꪜꪀ ꪼꪒ ꪑꪱꪥ ꪼꪜ  ꪤꪴ ꪚꪮꪙ ꪮꪙꪳ ꪭꪮꪙ ꪎꪽ. ꪀꪚꪾ ꪩꪺꪉ ꪋꪮꪥ ꪹꪥ ꪄꪮꪉ ꪹꪭꪙ ꪹꪘꪀ ꪵꪀꪉ ꪝꪉꪳ ꪶꪔ ꪊꪀꪳ ꪚꪮꪣ ꪤꪉꪸ, ꪩꪺꪉ ꪊꪮꪉ ꪵꪭꪉ ꪄꪮꪉ ꫄ꪀꪚ ꪮꪫꪥꪲ , ꪊꪉꪲ ꪁꪫꪙꪸ ꪓꪸ ꪹꪠꪉ ꪹꪏꪉ ꪙꪽ ꪭꪮꪒ ꪼꪅ ꪝꪉꪳ ꪋꪺ ꪹꪭꪙ ꪊꪺꪚ ꪏꪒꪸ ꪭꪱꪥ ꪶꪝ ꪙꪾ ꪙꪮꪉ ꪁꪷ ꪵꪕꪒ ꪕꪉꪸ ꪜꪺꪉ ꪀꪙꪲ ꪩꪺꪉ ꪤꪴ.

          ꪘꪮꪀ ꫛ ꫄ꪤꪙ ꪘꪉꪰ ꪎꪱ ꪁꪣꪲ ꪙꪮꪥ, ꪭꪮꪒ ꪼꪅ ꫛ ꫄ꪤꪙ ꪊꪺꪚ ꪏꪒꪸ ꪭꪱꪥ ꪘꪀꪰ ꪨꪉꪰ ꪋꪴ ꪶꪠꪙ ꪙꪮꪉ ꪘꪉꪰ ꪖꪲ ꫄ꪊꪙ ꪢꪴ ꪁꪱꪉ ꪊꪱꪥ ꪁꪷ ꪣꪲ ꪭꪮꪒ 600 ꪒꪪꪱꪙ ꪣꪱ ꪶꪋꪣ ꪋꪮꪥ ꫛ ꫄ꪤꪙ ꪶꪠꪉ ꪙꪮꪉ ꪩꪱꪒ ꪀꪚꪾ ꪶꪎ ꫄ꪉꪙ ꪀꪱꪥ 18 ꪔꪲꪦ ꪢꪽ, ꪹꪋꪉ ꪄꪮꪉ ꪔꪉꪲ ꪮꪮꪀ ꫄ꪉꪙ ꪋꪲ ꪮꪱꪫ ꪭꪮꪒ 5 ꪔꪲ ꪢꪽ.

          ꪝꪉꪳ ꪀꪷ ꪼꪣ ꪊꪺꪚ ꪶꪁꪙ ꪁꪰ ꪒꪱꪉ ꪭꪒꪳ ꪄꪙꪳ ꪶꪜꪉ ꪑꪮꪒ ꪵꪄꪫ ꪎꪫꪲ ꪵꪁꪣ ꪀꪮꪉ ꪒꪙꪲ ꪀꪮꪉ ꪏꪱꪥ ꪨꪉꪰ ꪋꪴ ꪙꪮꪉ ꪩꪱꪒ ꪜꪺꪉ ꪀꪙꪸ ꪩꪺꪉ ꪤꪴ ꪄꪮꪉ ꫛ ꫄ꪤꪙ ꪶꪠꪉ ꪊꪺꪚ ꪙꪮꪉ ꪨꪱꪒ ꪢꪴꪠ ꪀꪱꪉ ꪊꪱꪥ ꪁꪰ ꪒꪱꪉ ꪎꪱꪉ ꪶꪎꪣ ꪹꪩꪱ ꪫꪀꪸ ꫄ꪤꪒ ꪹꪥꪙ ꪁꪰ ꪹꪏꪉ ꪜꪺꪉ ꪀꪙꪲ ꪩꪺꪉ ꪤꪴ. ꪄꪱꪣ ꪶꪝꪙ ꪋꪴ ꪄꪴ ꪥꪱꪀ ꪋꪱ, ꫃ꪊꪚ ꪚꪱꪒ ꫛ ꫄ꪤꪙ ꪘꪉꪽ ꪘꪲ ꪒꪱꪉ ꪊꪮꪉ ꪵꪭꪉ ꪔꪉꪰ ꪵꪔꪉ ꪜꪺꪉ ꪀꪙꪲ ꪩꪺꪉ ꪤꪴ ꪮꪣꪲ ꪝꪰ ꪹꪏ.

Phổng nặm nong lạt thuổm Mù Cang Chải tỉnh Yên Bái

sảng tăm lau puông kin luông dú

          Té lăng chu phôn nong, chua hươn ưởi Lầu Thị Mú, dú bản Háng Gàng, xã Kim Nọi đảy lài đoàn công tác khong tỉnh, khong huyện cánh pưng đoàn hák muôn chaư ma choi cánh tham kháo. Chu phôn nong cọ dệt lày xia chương khong cánh hươn dảo khòng ưởi Mú. Ngắm va chi báu mi hanh dượn lăng chu phôn nong, hák va họt khạy puông kin luông dú khong chua hươn ưởi Mú cọ đảy sang xồm lau mết.

          Chua hươn ai Mùa A Lềnh dú bản Kháo Giống, xã Kim Nọi cọ chuốp nặm nong dệt lày xia mết chương hươn phườn dảo. Họt khạy, chua hươn ai cọ tẳng đảy làng hươn nà pha mẳn xưa. Nọk số ngơn đảy pi nọng cóp hôm ma choi cài 80 triệu mằn vạy dệt hươn, chua hươn ai nhẳng đảy choi tô ngua nưng, đảy pưng đoàn hák muôn chàư ma choi lai chương xủ khong sáư cuông hươn cánh choi cá khảu nặm căm kin....

          Kim Nọi lỏ xã chuốp xiệt hại lai nhất lăng chu phôn nong cắp 6 côn tài cánh báu hên ók tích, 17 làng hươn chuốp lày nong, hắc pé đảy nhại pày dú bón ứn họn sẳn. Cắp luông choi dừa khong Hươn nước cánh pưng tổ chức bóm riêng, luông chóng hanh khong cấp uỷ, chính quyên địa phương xương nặn họt khạy, pưng chua hươn chuốp xiệt hại pộ nặm nong lạt thuổm cọ tẹt tiêng puông kin luôn dú.

          Nọk côn dân nẳng xã Kim Nọi, họt khạy pưng chua hươn dân chuốp xiệt hại nắc lăng chu phôn nong nẳng thị trấn Mù Cang Chải cánh xã Lao Chải cọ tẹt tiêng puông kin luông dú. Toi báo cáo khong huyện Mù Cang Chải cọ mi họt 600 đoàn ma chôm choi côn dân phổng nong lạt, cắp số ngơn cài 18 tỷ mằn, cánh chương khòng tính ók ngơn chi áo họt 5 tỷ mằn.

          Pưng co mạy chuốp côn cọ đang hựt khửn pống nhọt kheo xiu kem cong đin còng sai lăng chu nong lạt, puông kin luông dú khong côn dân phổng nong lạt Mù Cang Chải cọ đang tựng dan sảng tăm lau vịa dệt dượn cọ xương puông kin luông dú. Khảm pộn chu khu dạk cha, chếp bát, côn dân đang chóng hanh tẳng tánh puông kin luông dú ím po xưa./.

                                                                   Đinh Tuấn - Hạnh dịch