ꪝꪷ ꪼꪭ ꪵꪣ ꪙꪱ ꪮꪙꪸ ꪚꪱꪥ ꪊꪮꪉ ꪵꪬꪉ ꪻꪎ ꪫꪀꪸ ꫃ꪥꪒ ꪹꪥꪙ

          ꪝꪉꪳ ꪣꪳ ꪙꪲ ꪼꪕ ꪹꪭꪙ ꪜꪱ ꪈꪫꪙꪸ ꪖꪲ ꪣꪥꪴ ꪶꪖꪙ ꪨꪱꪉ ꪋꪱꪉ, ꪎꪱ ꪎꪺꪙ ꪩꪱꪥ ꪒꪱꪉ ꪡꪮꪙ ꪹꪙꪉ ꫃ꪤꪒ ꪤꪱꪫ 7 ꪵꪬꪀ ꪕꪱ ꪒꪙꪲ ꪭꪣꪲ ꪙꪣꪾ ꪖꪱꪀ ꪚꪱ ꪼꪛ ꪜꪴꪀ ꪢꪱꪀ ꪵꪔꪉ ꪙꪣꪾ. ꪝꪉꪳ ꪜꪲ ꪀꪮꪙ ꪙꪲ, ꪶꪎ ꪕꪱ ꪒꪙꪲ ꪙꪲ ꫄ꪋ ꪙꪣꪾ ꪵꪬꪉ ꪶꪩꪉ ꫄ꪡꪙ ꪨꪱꪥ ꪼꪒ ꪜꪀꪴ ꪹꪄꪱ ꪩꪲ ꪵꪀꪉ ꪜꪀꪴ ꪐꪱ ꪼꪫ ꪵꪔꪉ ꪩꪉꪸ ꪉꪺ, ꪁꪫꪱꪥ , ꪖꪴ ꪼꪒ ꪹꪚꪱ ꪒꪱꪉ ꪕꪷ ꪻꪒ. 3 ꪜꪲ ꪊꪣꪾ ꪙꪲ, ꪜꪱ ꪣꪥꪴ ꪁꪷ ꪑꪱꪥ ꪼꪜ ꪜꪴꪀ ꪢꪱꪀ ꪵꪔꪉ ꪙꪣꪾ, ꪄꪱꪥ ꪼꪒ ꪀꪱ ꪁꪮꪙ ꪹꪏ ꪜꪀꪴ ꪐꪱ ꪵꪔꪉ ꪩꪉꪸ ꪎꪒꪷ ꪎꪉꪲ.

          ꪵꪩꪫ ꪀꪚꪾ ꪋꪺ ꪹꪭꪙ ꪯꪱꪥ ꪹꪋꪉ ꪈꪮꪀ ꪩꪉꪲ ꪤꪴ ꪶꪖꪙ ꫄ꪀꪥ ꪨꪺꪉ ꪁꪷ ꪹꪏꪉ ꪨꪱꪥ ꪋꪺ ꪹꪭꪙ ꪮꪙꪳ ꪼꪅ ꪒꪱꪉ ꪊꪮꪉ ꪵꪭꪉ ꪻꪎ ꪫꪀꪸ ꪜꪀꪴ ꪐꪱ ꪘꪉꪷ ꪔꪱ ꪒꪙꪲ ꪊꪲ ꪮꪱꪫ ꪭꪮꪒ ꪵꪬꪀ ꪕꪱ ꫛ ꪚꪮꪙ ꪭꪣꪸ ꪙꪣꪾ, ꪣꪺ ꪙꪣꪾ ꪙꪮꪉ ꫄ꪩꪉ ꪑꪉꪳ ꪖꪺꪣ. ꪀꪮꪙ ꪙꪽ, ꫄ꪋ ꪙꪣꪾ ꪵꪬꪉ ꪶꪩꪉ , ꫄ꪡꪙ ꪨꪱꪥ ꪔꪱ ꪒꪙꪸ ꪙꪲ ꪯꪱꪥ ꪩꪉꪸ ꫄ꪩꪉ ꪼꪬ ꪘꪱ ꪣꪺ ꪎꪺꪙ ꪬꪱꪀ ꪫꪱ ꪵꪔ ꪜꪲ 2014 ꪔꪱꪫ ꪣꪱ ꪋꪣꪾ ꪙꪲ ꪋꪍ ꪹꪭꪙ ꪯꪱꪥ ꪑꪱꪥ ꪣꪱ ꪜꪀꪴ ꪢꪱꪀ ꪖꪺ ꪩꪮꪀ.

          ꪎꪱ ꪎꪺꪙ ꪩꪱꪥ , ꪭꪫꪸꪙ ꪮꪙꪸ ꪚꪉꪲ ꪣꪲ ꪋꪲ ꪮꪱꪫ ꪭꪮꪒ 100 ꪵꪬꪀ ꪕꪱ ꪒꪙꪲ ꫃ꪥꪒ ꪹꪥꪙ ꪊꪍꪚ ꪙꪣꪾ ꪑꪉꪳ ꪖꪺꪣ. ꪜꪲ ꪙꪲꪶ ꪙꪣꪾ ꪙꪱꪙ ꪵꪬꪉ ꪹꪏ ꪋꪴ ꪜꪲ  ꪤꪱꪫ ꪹꪛꪙ ꫛ, ꪹꪏꪉ ꪙꪽ ꪫꪀꪸ ꪜꪀꪴ ꪶꪚꪉ ꪼꪒ ꪶꪭꪙ ꪣꪱ. ꪹꪝ ꪹꪏꪉ ꪙꪽ, ꪊꪉꪲ ꪁꪫꪸꪙ ꪓꪸ ꪹꪠꪉ  ꪁꪷ ꪮꪺꪙ ꪝꪱ ꪾꪜ ꪼꪭ ꪵꪣ ꪙꪱ ꪶꪭꪣ ꪵꪭꪉ ꪻꪎ ꪫꪀꪸ ꪼꪖ ꪚꪱꪙ ꪵꪀꪉ ꪜꪀꪴ ꪶꪚꪉ ꪻꪬ ꫄ꪩꪚ ꪶꪣ ꪑꪱꪣ ꪹꪚꪱ ꪷꪋ ꪙꪣꪾ ꪙꪮꪉ ꪣꪱ.

          ꪣꪱ ꪕꪱꪉ ꪹꪋ ꪡꪽ, ꪎꪱ ꪎꪺꪙ ꪩꪱꪥ ꪹꪊꪉ ꪹꪋ ꪝꪲ ꪙꪮꪉ ꪜꪀꪴ ꪝꪻꪉ ꪔꪱꪉ ꪀꪷ ꪣꪲ ꪁꪱ ꪁꪮꪙ ꪀꪉꪲ ꫃ꪔ ꪎꪉꪴ ꪵꪀꪉ ꪥꪱꪙ ꫄ꪋ ꪢꪱ ꪵꪝ ꪋꪮꪚ ꪀꪚꪾ ꪙꪣꪾ ꪵꪬꪉ. ꪩꪉꪳ ꪈꪫꪸꪙ ꪪꪽ ꪹꪖꪉ, ꪠꪷ ꪊꪴ ꪕꪀꪲ ꪮꪫꪲꪥ ꪚꪱꪙ ꫄ꪤꪙ ꪹꪣꪉ ꪎꪱ ꪎꪺꪙ ꪩꪱꪥ , ꪭꪫꪸꪙ ꪮꪙꪸ ꪚꪉꪲ , ꪔꪉꪲ ꪮꪙꪸ ꪚꪱꪥ ꪻꪬ ꪭꪴ:

          ꪝꪸ ꪙꪲ ꪋꪣꪾ ꪫꪱ ꪙꪣꪾ ꪙꪱꪙ ꪵꪬꪉ , ꪬꪱꪀ ꪫꪱꪭꪮꪒ ꪤꪱꪙ ꪙꪲ, ꪫꪀꪸ ꪜꪴꪀ ꪶꪚꪉ ꪘꪉꪷ ꪔꪱ ꪒꪙꪲ ꫄ꪩꪉ ꪊꪺꪚ ꪙꪣꪾ ꪑꪉꪳ ꪶꪖꪣ ꪄꪮꪭ ꪝꪷ ꪼꪭ ꪵꪣ ꪙꪱ ꪶꪠꪉ ꪘꪮꪉ ꪩꪺꪉ ꪖꪱꪀ ꪚꪱ ꪹꪪ ꪱꪊꪉꪴ ꪵꪀꪉ ꪎꪱ ꪎꪺꪙ ꪩꪱꪥ ꪹꪫꪱ ꪤꪉꪸ ꫄ꪡꪙ ꪨꪱꪥ ꪁꪷ ꫃ꪥꪒ ꪶꪣꪣ ꪵꪩꪫ.

Po hay me na Yên Bái chóng hanh sáư vịa dệt dượn

          Pưng mự nị, tay hươn pả Nguyễn Thị Mụi, thôn Làng Chang, xã Xuân Lai đang phọn nương dệt dáo 7 héc ta đin na him nặm Thác Bà vạy púk mák tành nặm. Pưng pi cón nị, số ta đin nị chơ nặm hảnh phân lài đảy púk khảu li cánh púk nhả vạy tảnh liệng tô ngua, tô quai, thu đảy cọ báu đang to đàư. Xam pi chăm nị, pả Mụi cọ nhaị pày púk mák tành nặm, khai đảy ca con xưa púk nhả tảnh liệng sắt sính.

          Lẹo đối cắp chua hươn ai Trương Ngọc Linh dú thôn Cây Luồng cọ xương lai chua hươn ứn khay đang chóng hanh sáư vịa púk nhả nẳng ta đin chi áo họt héc ta nưng bón him nặm, mua nặm nong nặm lâng nhưng thuổm. Cón nặn, chơ nặm hảnh lông, phân lai ta đin nị ai Linh lâng háy na mua xuân, hák va té pi 2014 táo ma chăm nị chua hươn ai nhại ma púk mák thúa lók.

          Xã Xuân Lai, huyện Yên Bình mi chi áo họt 100 héc ta đin dệt dượn chuốp nặm nhưng thuổm. PI nị, nặm nan  hảnh xưa chu pi chi áo họt bươn nưng, xương nặn vịa púk bồng cọ đảy hôn ma. Pưa xương nặn, chính quyên địa phương cọ uôn pa po hay me na hôm hanh sáư vịa thày bàn cánh púk hảu lợp mua nham báu chọ nặm nong ma.

          Ma tang chựa phăn, xã Xuân Lai chướng chưa pi nọng púk pưng tàng cò mi ca cón kinh tế xùng cánh dan chơ mả pe chóp cắp dan nặm hảnh.

          Pi nọng, chăm va nặm nan hảnh, haks va họt dan nị, vịa púk bồng nẳng ta đin lâng chuốp nặm nhưng thuổm khong po hay me na phổng nong luông Thác Bà vạu chung cánh xã Xuân Lai vạu riêng phân lai cọ đảy dệt mộm lẹo./.

                                                                   Thừa Xuân - Hạnh dịch