ꪜꪲ ꪵꪮꪚ ꪻꪢ ꪘꪉꪷ ꪶꪠꪉ ꪙꪮꪉ ꪩꪱꪒ ꪹꪣꪉ ꪩꪱ ꪶꪊꪙ ꪀꪮꪉ ꪄꪴ ꪹꪋꪱ ꪨꪷ

        ꪭꪮꪒ ꪣꪳ ꪙꪲ, ꪀꪚꪾ ꪩꪺꪉ ꪊꪮꪉ ꪵꪭꪉ ꪄꪮꪉ ꪊꪉꪲ ꪁꪫꪙꪸ ꪓꪸ ꪹꪠꪉ ꪪꪽ ꪡꪱꪫ ꪵꪀ ꪁꪣꪾ ꪏꪒꪸ ꪶꪝ ꪶꪠꪙ ꪙꪮꪉ ꫃ꪥꪒ ꪮꪮꪀ ꪵꪔ ꫃ꪕꪉ ꪁꪙꪳ ꪣꪳ 2.8. ꪼꪅ ꪙꪲ ꪣꪲ ꪵꪎ ꪶꪕ ꪁꪷ ꪣꪲ ꪹꪏꪉ ꪹꪣ ꪭꪮꪒ ꪋꪴ ꫄ꪎ ꪎꪱ ꪙꪣꪾ ꪜꪣꪾ - ꪀꪱꪉ ꪮꪮꪉ ꪶꪠꪉ ꪙꪮꪉ ꪩꪱꪒ ꪹꪣꪉ ꪩꪱ. ꪬꪱꪀ ꪫꪱꪵꪔ ꪚꪮꪙ ꪙꪲ ꪼꪫ ꪹꪣ ꪬꪮꪒ ꪚꪮꪙ ꪹꪋꪉ ꪊꪉꪲ ꪹꪏꪉ: ꪹꪋꪉ ꪔꪫꪸꪥ ꪭꪮꪀ ꪙꪣꪾ ꪜꪣꪾ ꪼꪒ ꪑꪱꪉ ꪔꪙꪲ ꪀꪱꪥ 3 ꪼꪀ ꪶꪎ , ꪩꪣꪸ ꪔꪮꪥ ꪬꪺꪥ ꪭꪮꪉ ꪙꪣꪾ ꪵꪀꪉ ꪎꪽ ꪝꪴ. ꫃ꪎꪣ ꪔꪱꪉ ꪹꪐ ꪝꪉꪸ ꪝꪚꪾ ꪮꪣ ꪵꪮꪫ ꪼꪜ ꪕꪮꪥ  ꪙꪱꪫ ꪝꪴ ꪼꪅ ꫃ꪬꪙ ꪕꪷ ꪘꪮꪙ ꪒꪱꪙ ꪻꪐ ꪙꪮꪥ ꪵꪀꪉ ꪙꪣꪾ ꪼꪨ ꪕꪫꪥꪸ, ꪼꪜ ꪣꪱ ꪩꪮꪉ ꪀꪱꪥ ꪁꪷ ꪤꪱꪙ.

          ꪹꪋꪉ ꪔꪫꪥꪸ ꪭꪮꪀ ꪙꪣꪾ ꪜꪣꪾ ꪀꪮꪙ ꪙꪲ ꪨꪷ ꪹꪋꪉ ꫜ ꪣꪸ ꪎꪺꪙ ꪀꪷ ꪼꪣ ꪀꪷ ꪚꪮꪀꪶ ꪼꪎ ꪁꪽ ꪵꪗꪉ ꪮꪣ ꪩꪮꪣ ꪼꪒ ꪒꪴ ꪨꪷ ꪚꪮꪙ ꪹꪋꪉ ꫜ ꪋꪽ ꫄ꪐꪒ ꪄꪮꪉ ꪭꪫꪙꪸ ꪹꪣꪉ ꪩꪱ. ꪹꪭꪙ ꪹꪋꪉ ꪒꪱꪉ ꪔꪉꪷ ꪵꪔꪉ ꪹꪋꪉ ꪁꪒꪳ ꫃ꪜꪙ ꪚꪮꪙ ꪹꪋꪉ ꪁꪒꪳ ꪼꪒ ꪕꪮꪥ ꪩꪺꪉ ꪜꪙꪴ ꪵꪠꪙ ꪹꪣꪉ ꪤꪱꪙ ꪶꪀꪀ ꪵꪅꪫꪀ. ꪬꪱꪀ ꪫꪱ ꪕꪷ ꪋꪴ ꪙꪮꪉ ꪒꪫꪥꪸ, ꫃ꪕꪉ ꪀꪱ ꪹꪭꪙ ꪹꪋꪉ ꫃ꪬꪙ ꪕꪷ ꪀꪮꪉ ꪒꪱꪙ ꪄꪺꪥ ꪄꪫꪱꪉ ꪵꪀꪉ 6ꪜꪙ ꪬꪮꪉ ꪙꪣꪾ ꪕꪫꪸꪥ ꪼꪨꪱ ꪀꪱꪥ. ꫃ꪕꪉ ꫃ꪢꪒ ꪝꪉꪳ ꪬꪮꪉ ꪵꪮꪚ, ꪹꪭꪙ ꪀꪙꪲ ꪵꪀꪉ ꪹꪭꪙ ꫃ꪥꪒ ꪹꪄꪱ ꪙꪣꪾ ꪁꪣꪾ ꪀꪙꪸ ꪊꪺꪚ ꪼꪨ ꪙꪮꪉ ꪎꪸ ꫃ꪢꪒ. ꪶꪀꪉ ꪵꪭꪉ ꪋꪲ ꪮꪱꪫ ꪭꪮꪒ 20 ꪜꪲ ꪔꪉꪷ ꪵꪔꪉ ꪹꪋꪉ ꫄ꪨꪚ ꪄꪮꪉ ꫄ꪕꪚ ꫃ꪖ ꪹꪭꪙ ꪹꪋꪉ ꪼꪅ ꪣꪲ ꪕꪷ ꪀꪮꪉ ꪒꪙꪲ ꪒꪱꪙ. 3 ꪚꪮꪙ ꪹꪋꪉ ꪀꪚꪾ 23 ꫄ꪨꪚ ꪵꪮꪚ ꪁꪷ ꪬꪀꪷ ꪵꪜ ꫃ꪢꪒ.

          ꫃ꪤꪒ ꪹꪏꪉ ꪏꪳ ꪼꪫ ꪝꪉꪳ ꪙꪮꪉ ꪣꪸ ꪹꪏꪉ ꪢꪱ ꫄ꪨꪚ ꫄ꪩꪚ ꪄꪱꪥ ꪤꪱꪉ ꪨꪷ ꪄꪴ ꪹꪋꪱ ꪨꪷ ꪻꪐ ꪄꪮꪉ ꪊꪣꪴ ꪢꪴ ꪼꪏ ꪤꪱꪫ ꪶꪠꪉ ꪙꪮꪉ ꪩꪱꪒ ꪙꪲ. ꪹꪝ ꪼꪅ ꪙꪲ, ꪣꪲ ꪕꪷ ꪠꪴ ꪻꪐ ꪘꪉꪷ ꪝꪉꪳ ꪚꪱꪙ ꪘꪱ ꪵꪕꪙ , ꪚꪱꪙ ꪮꪒꪲ, ꪬꪺꪥ ꪎꪮꪥ ꪊꪉꪷ ꪶꪩꪉ ꪣꪱ ꪀꪱ ꪎꪱ ꪼꪫ ꪐꪽ ꪬꪱꪉ ꪊꪫꪲ ꪋꪮꪥ. ꪫꪀꪸ ꪼꪜ ꪣꪱ ꪶꪒꪥ ꪀꪚꪾ ꪭꪮꪀ ꪎꪉꪲ ꪨꪷ ꪎꪒꪴ ꪕꪲ ꪬꪣꪸ ꪭꪱꪥ. ꪝꪮꪢ ꪀꪚꪾ ꪘꪱ ꪫꪀꪸ ꪙꪽ, ꪼꪅ ꪙꪲ ꪬꪱꪉ ꪭꪮꪥ ꪋꪺ ꪹꪭꪙ ꪑꪉꪷ ꪒꪱꪉ ꪼꪒ ꪀꪙꪲ ꪤꪴ  ꪘꪉꪷ ꪝꪉꪳ ꪖꪉꪸ ꪔꪚꪴ ꪕꪱꪣ ꪔꪉꪷ ꪭꪣꪸ ꪕꪱꪉ ꪩꪺꪙ ꪕꪷ ꪀꪮꪉ ꪒꪙꪲ ꪒꪱꪙ. ꪝꪉꪳ ꪨꪱꪙ ꪙꪮꪥ ꪹꪚꪱ ꪭꪴꪤ ꪊꪀꪷ ꪎꪉꪷ, ꪹꪚꪱ ꪭꪴꪤ ꪹꪭꪙ ꪹꪊꪱ ꪒꪱꪉ ꪼꪒ ꪔꪷ ꪘꪱ ꪀꪚꪾ ꪤꪱꪀ ꪋꪱ ꫄ꪋ ꪚꪮꪙ ꪶꪭꪣ ꪹꪭꪱ ꪄꪮꪉ ꪹꪊꪱ ꪹꪚꪱ ꪣꪲ. ꪻꪅ ꪹꪝ ꪀꪙꪲ ꪄꪮꪉ ꪝꪉꪳ ꪨꪱꪙ ꪙꪲ ꪣꪸ ꪕꪷ ꪢꪲ ꪶꪕꪣ ꪹꪄꪱ ꪀꪚꪾ ꪹꪀ ꪄꪱꪫ , ꪎꪺꪉ ꪹꪎ ꪝꪚꪾ ꪎꪳ ꪹꪚꪱ ꪣꪲ ꪎꪉꪷ.

          ꪀꪱꪉ ꪶꪠꪉ ꪙꪮꪉ ꪩꪱꪶꪶꪒ ꪼꪅ ꪣꪲ ꪀꪱꪥ 300 ꪼꪏ ꪤꪱꪫ ꪄꪮꪉ ꪭꪫꪙꪸ ꪹꪣꪉ ꪩꪱ ꪁꪷ ꪒꪱꪉ ꪼꪜ ꪋꪴ ꪚꪱꪙ , ꪙꪚꪾ ꪀꪱ ꪚꪱꪙ ꪨꪀꪾ ꫄ꪐꪒ ꪒꪱꪉ ꪹꪚꪱ ꪼꪜ ꪕꪱꪈ ꪻꪒ ꪼꪒ  ꪶꪝ ꪶꪠꪙ ꪙꪮꪉ ꪼꪫ ꪅꪽ ꪄꪱꪉ ꪋꪴ ꪄꪴ ꫄ꪁꪙ ꪬꪱ ꪼꪫ ꪔꪉꪷ ꪚꪮꪙ ꪹꪋꪉ. ꪶꪊꪙ ꪀꪮꪉ ꪨꪱꪥ ꪄꪴ ꪹꪋꪱ ꪨꪷ, ꫛ ꫃ꪤꪙ ꪶꪠꪉ ꪙꪣꪾ ꪙꪮꪉ ꪩꪱꪒ ꪹꪣꪉ ꪩꪱ ꪒꪱꪉ ꫄ꪁꪙ ꪔꪣꪳ ꪨꪱꪥ ꪩꪺꪉ ꪭꪀꪷ ꪵꪝꪉ, ꪋꪮꪥ ꪹꪥ, ꪼꪫ ꪝꪉꪳ ꪙꪮꪉ ꪭꪮꪀ ꪎꪉꪲ ꪘꪉꪷ ꪘꪲ ꪣꪲ ꪹꪏꪉ ꪼꪜ ꪭꪮꪒ ꪝꪉꪳ ꪚꪮꪙ ꪹꪋꪉ ꪼꪫ ꪔꪮꪙ ꪜꪲ ꪵꪮꪚ ꪻꪢ ꪵꪣꪙ ꪥꪱꪙ , ꪋꪣꪾ ꪫꪱ ꪨꪷ ꪝꪉꪳ ꪬꪮꪉ ꪵꪮꪚ ꪕꪱꪣ.

                                                          ꪶꪬꪉ ꪫꪒꪸ - ꪵꪭꪉ ꪥꪀꪲ

Pi ép máư nẳng phổng nong lạt Mương La

  chốn còng khu chau lo

          Họt mự nị, cắp luông chóng hanh khong chính quyên địa phương văn phạo kẻ cặm xiệt hại pộ phôn nong dệt ók té tênh cưn mự 2/8. Khay nị xe tô cọ mi xương mưa họt Trụ sở xã Nặm Pằm - càng ong phổng nong lạt Mương La. Hák va té bón nị vạy mưa họt bón trương chính xương: trương tiểu học Nặm Pằm, đảy nhang tin cài 3 cày số, liệp toi huổi hong nặm cánh săn pu. Xểm tang nhửa piêng pặp ỏm ẻo pày toi nao pu khay hên to cỏn đán nháư nọi cánh nặm lày tiêu, pày ma long cài cọ dản.

          Trương Tiểu học  Nặm Pằm cón nị lỏ trương nưng mi xuân co mạy, co bók, xay căn thanh ỏm lọm đảy đù lỏ chăn nhất khong huyện Mương La. Hươn trương đang chóng hanh tẳng tánh trưởng cựt đảy toi luông pun phén mương dan cốc khọe. Hák va to chu nong điêu, tênh cá hươn trương khạy hên to cong đán khuối khoang cánh pên hong nặm lày tiêu lày cài. Tênh mết pưng hỏng ép, hươn kin cánh hươn dệt khảu nặm căm kin chuốp lày pày nặm nong xia mết. Công hanh chi áo họt 20 pi tẳng tánh trương, lớp khong tập thể hươn trương khạy mi to cong đin đán. 3 bón trương cắp 23 lớp ép cọ hắc pé mết.

          Dệt xương xư vạy pưng nọng mi xương ma lớp lợp khai giảng lỏ khu chau lo nháư khong chủm mú say giáo phổng nong lạt nị. Pưa khay nị, mi to phủ nháư nẳng pưng bản Na Ten, bản Ít, bản Huổi Sói chăng lông ma cá xã vạy nhẳn hang cứu choi. Vịa pày ma đối cắp học sinh lỏ xút ty hiểm hại. Pọm cắp nả vịa nặn, khay nị hạng họi chua hươn nhăng đang đảy kin dú tạm nẳng pưng thiêng túp tẳng him tang, luận to còng đin đán. Pưng lan nọi báu hục hắc săng, báu hụ tay hươn đang đảy tó nả cắp lai khu dạk cha chơ bón hôm hạu khong chảu báu mi. Khay pựa kin khong pưng lan nọi nị mi to mì tôm, khảu cắp cưa khào, xuổng xửa, pặp sừ pọm báu mi sằng.

          Lung Nguyễn Thành Công, Bí thư huyện uỷ Mương La hảu hụ; Huyện cọ mi luông chấp năm chảnh thí vạy choi pưng nọng học sinh chuốp xiệt hại lằng chơ phôn nong nhại khảu pi ép máư. Nẳng trương Tiểu học Nặm Pằm chuốp nặm nong lựp xìa mết. hảu pưng nọng lông pày trương Trung học cơ sở ép cộp căn, păn ca vạy ép. Riêng bón trương Hùa Nặm ngay chăm trương thị trấn Ít Ong mi xương mi xương chiên pày trương nặn ép. Huyện chóng hanh họt mự 25/8 chu nọng học sinh pọm đảy ma trương ép. Pưng chương khong bók cánh ép, pặp sừ, tắng pan, chương khong chuông hong ép học tọp hom chu luông choi dừa, chôm choi khong pưng tổ chức, tựng côn:

          Càng phổng nong lạt, khay nị cài 300 say giáo khong huyện Mương La cọ đang pày chu bản, họt pưng bản lắc nhất đang báu ók pày tang đaư đảy pộ phôn nong vạy khặn khang chu khu cận hà vay tẳng bón trương. Chốn cong lai khu chau lo, côn dân phổng nặm nong Mương La đang cận tứm lai luông hặc panh, choi dừa, vạy pưng nọng học sinh nẳng mi xương pày họt pưng bón trương vạy tỏn pi pi ép máư men dan, chăm va lỏ pưng hỏng ép tạm./.

                                                          Hồng Việt - Hạnh dịch