Lai Chầu họn hưn vịa khốm kinh mo nựa làn nọi nẳng Sìn Hồ

          Chu vịa khốm kinh mo nựa làn nọi cướt sình ók cón nị cài bườn nưng cọ dệt chau lò bản cặt cung Chiêng Chằn 1, xã Chằn Nừa, huyện Sìn Hồ. Họt khạy, côn phít tội lỏ Lù Văn Phương, ók pì 1965 cọ chuốp cờ quàn cồng àn pắt xằng cánh khởi tố, hák va vịa chếp xảy mảy chằư nị đối cắp làn nọi nhinh 4 pì chư H cánh tay hươn báu đắp báu lưm đảy. Khù đáng va lỏ côn phít tội chính lỏ pi nọng hươn xẳư hươn chằm.

          Trung tá Trần Mạnh Hùng, phó trưởng công àn huyện Sìn Hồ hẳư hụ: Pưng côn khốm kinh mo nựa làn nọi nẳng phổng cuồng gian cài ma phân lài lỏ tay hươn cánh côn quén cánh mi cá côn mi trách nhiệm pảy chự lăm đù làn nọi, hôm mi cá ải ók, xay giáo. Báu xuốn to làn nọi nhinh lạ, lẹo mi cá làn nọi tra cọ chuốp khốm kinh mo nựa chếp xảy mảy chằư. Pưng côn chuốp khốm kinh mo nựa lỏ làn nọi cỏng 16 pì, báu hê hụ xiêng xằng ma tang luông chự phong cánh pháp luật. Cuồng lài chu vịa, làn nọi báu hụ đảy vịa chảu chuốp khốm kinh vạy tô xú côn nhắư hụ.

          Té hùa pì 2016 ma họt khạy, nẳng huyện Sìn Hồ cọ cướt sình ók 12 chu khốm kinh mo nựa làn nọi, phân lài lỏ nẳng phổng cuồng lắc cày, phổng pi nọng chựa nọi côn, luông hụ xiêng khòng dần mương nhăng tắm. Cọ pưa puồng kìn luông dú nhăng pọ lài dạk cha, xương nặn ải êm lâng khâng lò kình tế báu pồng chằư đù đì họt lụk nọi chảu. Lài hươn hư vang vạy hẳư hươn trương lăm đù, lưn xưa lỏ pưng học sình kìn dú nẳng trương lớp bán trú pưa xương nặn cọ hền mi ók san chu khốm kinh làn nọi trai.

          Toi trùng tán Trần Mạnh Hùng, pưa chính quyên địa phường báu dệt cằm quyết cánh luông hổm dằm báu pứt pười khòng chính tay hươn pưng làn chuốp dệt hại đàng dệt hẳư nạn khốm kinh mo nựa làn nọi nẳng phổng nhương tứm họn hưn xưa. Pưa pưng côn dệt hại hẳư pưng làn lâng lỏ pi nọng chằm chặn, côn quén khơi kìn dú xẳư chằm, ải êm pưng làn báu ngươn báu ngơ, tạu họt chơ chu vịa cướt sình ók chắng khoák hụ mưa. Xồng àu lằng báu cưn àu đảy.

          Pưng chu vịa khốm kinh mo nựa làn nọi nẳng pưng bản cặt cung Sìn Hồ đàng xút ty họn hưn. Cọ họt chơ cận mi luông cằm quyết dệt vịa khòng cấp uỷ Đảng, chính quyên địa phường cánh pưng cờ quàn mi chức quyên cuồng vịa phạt mằư pưng côn phít tội. Pưng phủ pền ải pền êm cọ cận nho xùng hùa chằư xiểng xạc phạng phong, pứt pười côn phít tội vạy pảy chự tiêng àn hẳư lụk nọng chảu./.

                                      Khắc Kiên-Tòng Anh dịch

ꪛꪱꪥ ꪖꪳ 4 ꪣꪳ 17-5-2017

ꪨꪱꪥ ꪹꪊꪱ ꪭꪮꪙ ꪭꪙꪳ ꪙꪱꪙ ꪶꪄꪣ ꪁꪉꪲ ꪣꪷ ꪹꪙ

ꪋꪴ ꪫꪀꪸ  ꪶꪄꪣ ꪁꪉꪲ ꪣꪷ ꪹꪙ ꪨꪱꪙ ꪙꪮꪥ ꪹꪀꪒ ꪎꪉꪲ ꪮꪮꪀ ꪀꪮꪙ ꪙꪲ ꪀꪱꪤ ꪵꪚꪙ ꫜ ꪁꪷ ꫃ꪥꪒ ꪹꪋꪱ ꪨꪷ ꪚꪱꪙ ꪁꪒꪰ ꪁꪉꪴ ꪋꪉꪸ ꪊꪽ 1, ꪎꪱ ꪊꪽ ꪹꪘ ꪭꪫꪙꪸ ꪎꪙꪲ ꪶꪬ. ꪭꪮꪒ ꪼꪅ ꫛ ꪠꪒꪲ ꪶꪕꪥ ꪨꪷ ꪩꪷ ꪪꪽ ꪹꪠꪉ ꪮꪮꪀ ꪜꪲ 1965 ꪁꪷ ꪊꪺꪚ ꫄ꪀ ꪀꪫꪱꪙ ꪶꪀꪉ ꪮꪱꪙ ꪜꪒꪰ ꪎꪉꪰ ꪬꪱꪀ ꪫꪱ ꪫꪀꪸ ꫃ꪊꪚ ꪼꪎ ꪼꪢ ꪻꪊ ꪙꪲ ꪶꪒꪥ ꪀꪚꪾ ꪨꪱꪙ ꪙꪮꪥ ꪑꪉꪲ ꪋꪳ H ꪹꪚꪱ ꪒꪚꪾ ꪹꪚꪱ ꪩꪣꪳ ꪼꪒ. ꪄꪴ ꪒꪱꪉ ꪫꪱ ꪨꪷ ꫛ ꪠꪒꪲ ꪶꪕꪥ ꪊꪉꪲ ꪨꪷ ꪝꪲ ꪙꪮꪉ ꪤꪴ ꪊꪣꪾ ꪹꪭꪙ.

          ꪊꪉꪴ ꪔꪱ ꫄ꪊꪙ ꪵꪣꪉ ꪬꪉꪴ ꪠꪽ ꪹꪊꪉ ꪶꪀꪉ ꪮꪱꪙ ꪭꪫꪙꪸ ꪎꪙꪲ ꪶꪬ ꪻꪬ ꪭꪴ: ꪝꪉꪳ ꫛ ꪶꪄꪣ ꪁꪉꪲ ꪣꪷ ꪹꪙ ꪨꪱꪙ ꪙꪮꪥ ꪘꪉꪰ ꪶꪠꪉ ꪀꪺꪉ ꪥꪱꪙ ꪀꪱꪥ ꪣꪱ ꫄ꪡꪙ ꪨꪱꪥ ꪨꪷ ꪼꪕ ꪹꪭꪙ ꪵꪀꪉ ꫜ ꪵꪀꪫꪙ ꪣꪲ ꪀꪱ ꪮꪱꪥ ꪮꪮꪀ ꪵꪀꪉ ꪼꪏ ꪤꪱꪫ. ꪹꪚꪱ ꪎꪺꪙ ꪕꪷ ꪨꪱꪙ ꪙꪮꪥ ꪑꪉꪲ ꪨꪱ ꪣꪲ ꪀꪱ ꪨꪱꪙ ꪙꪮꪥ ꪋꪱꪥ ꪁꪷ ꪊꪺꪚ  ꪶꪄꪣ ꪁꪉꪲ ꪣꪷ ꪹꪙ. ꪝꪉꪳ ꫛ  ꪶꪄꪣ ꪁꪉꪲ ꪣꪷ ꪹꪙ ꪨꪷ ꪨꪱꪙ ꪙꪮꪥ ꪀꪮꪉ 16 ꪜꪲ ꪹꪚꪱ ꫃ꪭ ꪭꪴ ꪏꪉꪸ ꪣꪱ ꪕꪱꪥ ꪠꪱꪚ ꪩꪺꪒ, ꪨꪱꪥ ꫛ ꪹꪚꪱ ꪭꪴ ꪶꪕ ꪻꪎ ꪠꪴ ꪻꪐ.

          ꪵꪔ ꪬꪺ ꪜꪲ 2016 ꪣꪱ ꪭꪮꪒ ꪼꪅ ꪘꪉꪰ ꪭꪫꪙꪸ ꪎꪙꪲ ꪶꪬ ꪁꪷ ꪹꪀꪒ ꪎꪉꪲ ꪮꪮꪀ 12 ꪋꪴ  ꪶꪄꪣ ꪁꪉꪲ ꪣꪷ ꪹꪙ ꪨꪱꪙ ꪙꪮꪥ ꫄ꪡꪙ ꪨꪱꪥ ꪨꪷ ꪘꪉꪰ ꪶꪠꪉ ꪀꪺꪉ ꪨꪀꪰ ꪼꪀ ꪶꪠꪉ ꪝꪲ ꪙꪮꪉ ꪹꪋ ꪙꪮꪥ ꫛ ꪩꪺꪉ ꪭꪴ ꪏꪉꪸ ꪄꪮꪉ ꫄ꪤꪙ ꪹꪣꪉ ꪑꪉꪰ ꪔꪣꪾ. ꪁꪷ ꪹꪝ ꪜꪺꪉ ꪀꪙꪲ ꪩꪺꪉ ꪤꪴ ꪑꪉꪰ ꪝꪷ ꪨꪱꪥ ꪥꪱꪀ ꪋꪱ ꪹꪏꪉ ꪙꪽ ꪮꪱꪥ ꫃ꪯꪣ ꫄ꪩꪉ ꫄ꪅꪉ ꪨꪷ ꪀꪉꪲ ꫃ꪔ ꪹꪚꪱ ꪶꪜꪉ ꪻꪊ ꪒꪴ ꪒꪲ ꪭꪮꪒ ꪩꪀꪴ ꪹꪔꪱ ꪨꪱꪥ ꪹꪭꪙ ꪫꪱꪉ ꪼꪫ ꪻꪬ ꪹꪭꪙ ꪹꪋꪉ ꪬꪱꪀ ꪩꪣꪾ ꪒꪴ ꪩꪙꪸꪳ ꪹꪏ ꪨꪷ ꪭꪮꪀ ꪎꪉꪲ ꪚꪱꪙ ꪊꪴ ꪹꪏꪉ ꪙꪽ ꪁꪷ ꫄ꪬꪙ ꪮꪮꪀ ꪏꪱꪙ ꪋꪴ ꪶꪄꪣ ꪁꪉꪲ ꪣꪷ ꪹꪙ ꪨꪱꪙ ꪙꪮꪥ ꪋꪱꪥ.

          ꪕꪮꪥ ꪊꪉꪴ ꪔꪱ ꫄ꪠꪙ ꪵꪣꪉ ꪬꪉꪴ ꪹꪝ ꪊꪉꪲ ꪁꪫꪙꪸ ꪒꪸ ꪹꪠꪉ ꪹꪚꪱ ꫃ꪭ ꫃ꪤꪒ ꪀꪣꪾ ꪀꪫꪒꪸ ꪵꪀꪉ ꪼꪕ ꪹꪭꪙ ꪝꪉꪳ ꪨꪱꪙ ꪑꪉꪰ ꪶꪬꪣ ꪤꪣꪾ ꪹꪕꪱ ꪭꪮꪒ ꫄ꪋ ꪋꪴ ꪫꪀꪸ ꪹꪀꪒ ꪎꪉꪲ ꪮꪮꪀ ꪊꪉꪰ ꪄꪫꪱ ꪭꪴꪤ ꪹꪣ. ꪁꪷ ꪭꪮꪒ ꫄ꪋ ꫄ꪁꪙ ꪣꪲ ꪩꪺꪉ ꪀꪣꪾ ꪀꪫꪒꪸ ꪄꪮꪉ ꫄ꪀꪚ ꪮꪫꪥꪲ ꪒꪱꪉ ꪊꪉꪲ ꪁꪫꪙꪸ ꪒꪲ ꪹꪠꪉ ꪵꪀꪉ ꪝꪉꪳ ꫄ꪀ ꪀꪫꪱꪙ ꪣꪲ ꪊꪀꪳ ꪁꪫꪙꪸ ꪀꪺꪉ ꪫꪀꪸ ꪡꪱꪒ ꪻꪢ ꪝꪉꪳ ꫛ ꪠꪒꪲ ꪶꪕꪥ. ꪝꪉꪳ ꪠꪴ ꫃ꪜꪙ ꪮꪱꪥ ꫃ꪜꪙ ꫃ꪯꪣ ꪁꪷ ꫄ꪁꪙ ꪑꪷ ꪎꪉꪴ ꪬꪺ ꪻꪊ ꪎꪉꪸ ꪎꪱꪀ ꪡꪱꪉ ꪡꪮꪉ ꪜꪒꪳ ꪹꪜꪥ ꫛ ꪠꪒꪲ ꪶꪕꪥ ꪼꪫ ꪼꪜ ꪋꪳ ꪕꪉꪸ ꪮꪱꪙ ꪻꪬ ꪩꪀꪴ ꪙꪮꪉ ꪹꪊꪱ.

                                      ꪄꪀꪰ ꪀꪙꪸ - ꪕꪮꪉ ꪵꪯꪉ ꪥꪀꪲ