Bài thứ 4 mự 19/4/2017

Yền Bái khâng chằư chự phong phay mảy pá cuồng mua lạnh lau

Huyện phổng xùng Mù Cang Chải, tỉnh Yền Bái mi cài 73 păn héc ta đìn pá, cuồng nặn pá pảy chự dáo 48 păn héc ta; pá hùa nặm hùa bó cài 20.100 nưng héc ta, cài nhăng to đăưg lỏ pá dệt dượn. Pưa nẳng bón đét lạnh hảnh khắư, xương nặn pì đằư nẳng huyện cọ cướt sình ók phay mảy pá. Riềng mua khồ pì cài cọ cướt sình ók 4 chu phay mảy pá, xiệt hại cài 125 héc ta.

Ngày cón chơ nhại khảu mua lạnh lau pì nị, huyện Mù Cang Chải cọ khâng chằư tẳng tánh luông pùn chự phong chất phay mảy pá hẳư cá 14 xã, thị trấn, chị bók tít tờn pưng chảu pá, pưng phổng bảo chự, Bàn quản lý pá chấp năm pưng luông pùn chự phong chất phay mảy pá. Nọk nặn ók, huyện cọ khâng chằư tọp hòm phủ côn cánh chương khòng vạy khặn khang chất phay mảy pá.

Huyện Văn Yền mi chi áo họt 140 păn héc ta pá. Hák va phạ đìn nẳng nỉ báu khắư khồ xương nẳng Mù Cang Chải, hư va nẳng Trạm Tấu, hák va lỏ mi cài 40 păn héc ta pá cò que, ặn nị lỏ tàng cò mi ca con kình tế xùng, lài nặm pi cánh phay mảy ngai. Pưa xương nặn Bàn uồn pa pảy chự pá khòng huyện cọ uồn pa chấp năm nả vịa pảy chự pá chọp xồm cắp khù mi tẹ khòng tựng xã, thị trấn. Cuồng nặn tít tờn Bàn uồn pa chu xã thị trấn chự mẳn chế độ trực bàn ma tang chự phong chất phay mảy pá cá vên cá cưn. Chị bók po me pi nọng lăm đù pá mạy que, các cành pá cuồng pưng mự phạ lạnh lau; báu đảy chọ pá dệt hay cuồng pưng mự phạ lôm luồng, cánh chơ càng vên đét khẻm.

Vạy dệt đì nả vịa chự phong chất phay mảy pá, cón mua khồ pì nị, chủm mú kiểm lầm tỉnh Yền Bái cọ xiếp lặt dáo 1.500 tổ đội chự phong phay mảy pá, cắp luông chôm hặp khòng cài 15 păn côn; tánh ók 310 tổ xung kích chự phong chất phay mảy pá cắp chủm mú cốc chính lỏ dần quần tự vệ; tẳng tánh luông pùn pảy chự pá nẳng lài xã; xòng ma, tổ chức hẳư chi áo họt 85 păn côn ký chỉa chào hẹn pảy chự cánh chất phay mảy pá. Pưng biển tống páo phay mảy pá nẳng pưng bón, pưng phổng mi xương chi chuốp phay mảy ngai cọ đảy tẳng tánh cánh tứm ten.

Cắp luông họn khâng khòng chu địa phường cánh ngành mi chức quyên toi luông pùn “ chủm mú nẳng cắp bón, chương khòng nẳng cắp bón, khảu nặm căm kìn dàu dà nẳng cắp bón, uồn pa nẳng  cắp bón”, Yền Bái đàng chóng hanh cuồng mua lạnh lau pì nị mi nọi tà đìn pá chuốp xiệt hại nhất pộ phay mảy pá dệt ók./.

Xuân-Anh dịch

ꪛꪱꪤ ꪖꪳ 4 ꪣꪳ 19-4-2017

ꪮꪙꪸ ꪚꪱꪥ ꫄ꪅꪉ ꪻꪊ ꪋꪳ ꪡꪮꪉ ꪼꪡ ꪼꪢ ꪜꪱ ꪀꪺꪉ ꪣꪺ ꪵꪩꪉ ꪹꪩꪱ

ꪭꪫꪙꪸ ꪶꪠꪉ ꪎꪉꪴ ꪢꪴ ꪀꪱꪉ ꪊꪱꪥ ꪔꪉꪲ ꪮꪙꪲ ꪚꪱꪥ ꪣꪲ ꪀꪱꪤ 73 ꪝꪽ ꪵꪬꪀ ꪕꪱ ꪒꪙꪲ ꪜꪱ, ꪀꪺꪉ ꪙꪽ ꪜꪱ ꪼꪜ ꪋꪳ ꪤꪱꪫ 48 ꪝꪽ ꪵꪬꪀ ꪕꪱ; ꪜꪱ ꪬꪺ ꪙꪣꪾ ꪬꪺ ꪚꪷ ꪀꪱꪤ 20.100 ꪵꪬꪀ ꪕꪱ, ꪀꪱꪤ ꪑꪉꪰ ꪕꪷ  ꪻꪒ ꪨꪷ ꪜꪱ ꫃ꪥꪒ ꪹꪥꪙ. ꪹꪝ ꪡꪱ ꪵꪒꪒ ꪵꪩꪉ ꪵꪬꪉ ꪻꪄ ꪹꪏꪉ ꪙꪽ ꪜꪲ ꪻꪒ ꪘꪉꪰ ꪭꪫꪙꪸ ꪁꪷ ꪹꪀꪒ ꪎꪉꪲ ꪮꪮꪀ ꪼꪡ ꪼꪢ ꪜꪱ. ꪤꪉꪸ ꪣꪺ ꪶꪄ ꪜꪲ ꪀꪱꪤ ꪀꪷ ꪹꪀꪒ ꪎꪉꪲ ꪮꪮꪀ 4 ꪋꪴ ꪼꪡ ꪼꪢ ꪜꪱ ꪏꪒꪸ ꪭꪱꪥ ꪀꪱꪤ 125 ꪵꪬꪀ ꪕꪱ.

ꪼꪘ ꪀꪮꪙ ꫄ꪋ ꪑꪱꪥ ꪹꪄꪱ ꪣꪺ ꪶꪄ ꪜꪲ ꪙꪲ, ꪭꪫꪙꪸ ꪢꪴ ꪀꪱꪉ ꪊꪱꪥ ꪁꪷ ꫄ꪅꪉ ꪻꪊ ꪔꪉꪰ ꪵꪔꪉ ꪩꪺꪉ ꪜꪙꪴ ꪋꪳ ꪡꪮꪉ ꪼꪡ ꪼꪢ ꪜꪱ ꪻꪬ ꪀꪱ 14 ꪎꪱ ꪗꪲ ꫄ꪊꪙ, ꪋꪲ ꪚꪮꪀ ꪝꪉꪳ ꪹꪊꪱ ꪜꪱ ꪝꪉꪳ ꪶꪠꪉ ꪼꪜ ꪋꪳ, ꪚꪱꪙ ꪀꪫꪱꪙ ꪨꪲ ꪜꪱ ꫄ꪊꪚ ꪙꪣꪾ ꪝꪉꪳ ꪩꪺꪉ ꪜꪙꪴ ꪋꪳ ꪡꪮꪉ ꪼꪡ ꪼꪢ ꪜꪱ. ꪙꪮꪀ ꪙꪽ ꪮꪮꪀ ꪭꪫꪙꪸ ꪁꪷ ꫄ꪅꪉ ꪻꪊ ꪕꪮꪚ ꪬꪮꪣ ꪠꪴ ꫛ ꪵꪀꪉ ꪊꪣꪴ ꪢꪴ ꪘꪉꪰ ꪀꪚꪾ ꪚꪮꪙ ꪼꪫ ꪅꪽ ꪅꪱꪉ ꫄ꪊꪒ ꪼꪡ ꪼꪢ ꪜꪱ.

ꪭꪫꪙꪸ ꪪꪽ ꪮꪙꪸ ꪣꪲ ꪤꪱꪫ 140 ꪝꪽ ꪵꪬꪀ ꪕꪱ ꪜꪱ. ꪬꪱꪀ ꪫꪱ ꪡꪱ ꪒꪙꪲ ꪘꪉꪰ ꪘꪲ ꪹꪚꪱ ꪻꪄ ꪶꪄ ꪹꪏꪉ ꪘꪉꪰ ꪢꪴ ꪀꪱꪉ ꪊꪱꪤ ꪵꪀꪉ ꪘꪉꪰ ꪋꪱꪣ ꪹꪔꪱ, ꪬꪱꪀ ꪫꪱ ꪨꪷ ꪣꪲ ꪀꪱꪥ 40 ꪝꪽ ꪵꪬꪀ ꪕꪱ ꪀꪷ ꪵꪁꪫ. ꪯꪽ ꪙꪲ ꪨꪷ ꪔꪱꪉ ꪀꪷ ꪣꪲ ꪁꪱ ꪁꪮꪙ ꪀꪉꪲ ꫃ꪔ ꪎꪉꪴ, ꪨꪱꪥ ꪙꪣꪾ ꪝꪲ ꪵꪀꪉ ꪼꪡ ꪼꪢ ꪉꪱꪥ. ꪹꪝ ꪵꪏꪉ ꪙꪽ ꪚꪱꪙ ꪮꪺꪙ ꪝꪱ ꪼꪜ ꪋꪳ ꪜꪱ ꪄꪮꪉ ꪭꪫꪙꪸ ꪁꪷ ꫄ꪊꪚ ꪙꪣꪾ ꪘꪱ ꪫꪀꪸ ꪼꪜ ꪋꪳ ꪜꪱ ꪋꪮꪚ ꪶꪎꪣ ꪀꪚꪾ ꪄꪴ ꪣꪲ ꪵꪕ ꪄꪮꪉ ꪕꪉꪳ ꪎꪱ ꪗꪲ ꫄ꪊꪙ. ꪋꪳ ꪢꪽ ꪫꪀꪸ ꪋꪳ ꪡꪮꪉ ꪀꪱꪀ ꪵꪀꪉ ꪀꪱ ꫃ꪫꪙ ꪀꪱ ꪁꪙꪳ. ꪋꪲ ꪚꪮꪀ ꪝꪲ ꪙꪮꪉ ꪩꪣꪾ ꪒꪴ ꪒꪲ ꪜꪱ ꪀꪷ ꪵꪁꪫ; ꪹꪚꪱ ꪼꪒ ꪋꪮꪀ ꪜꪱ ꫃ꪥꪒ ꪼꪭ ꫄ꪋ ꪀꪱꪉ ꫃ꪫꪙ ꪵꪀꪉ ꫄ꪋ ꪡꪱ ꪶꪩꪣ ꪨꪺꪉ.

ꪼꪫ ꫃ꪥꪒ ꪒꪲ ꪘꪱ ꪫꪀꪸ ꪋꪳ ꪡꪮꪉ ꪼꪡ ꪼꪢ ꪜꪱ ꪀꪮꪙ ꪣꪺ ꪶꪄ ꪜꪲ ꪙꪲ ꪊꪣꪴ ꪢꪴ ꪀꪣꪸ ꫄ꪨꪣ ꪔꪉꪲ ꪮꪙꪸ ꪚꪱꪥ ꪁꪷ ꪎꪚꪸ ꪩꪒꪰ ꪤꪱꪫ 1.500 ꪶꪔ ꪶꪓꪥ ꪋꪳ ꪡꪮꪉ ꪼꪡ ꪼꪢ ꪜꪱ, ꪀꪚꪾ ꪩꪺꪉ ꪶꪋꪣ ꪭꪚꪾ ꪄꪮꪉ ꪀꪱꪥ 15 ꪝꪽ ꫛ; ꪵꪔꪉ ꪮꪮꪀ 310 ꪶꪔ ꪎꪉꪴ ꪀꪀꪲ ꪋꪳ ꪡꪮꪉ ꫄ꪊꪒ ꪼꪡ ꪼꪢ ꪜꪱ ꪀꪚꪾ ꪊꪣꪴ ꪢꪴ ꪶꪀꪀ ꪊꪉꪲ ꪨꪷ ꫄ꪤꪙ ꪀꪺꪙ ꪕꪳ ꫃ꪫ; ꪵꪔꪉ ꪮꪮꪀ ꪩꪺꪉ ꪜꪙꪴ ꪼꪜ ꪋꪳ ꪜꪱ ꪘꪉꪰ ꪨꪱꪥ ꪎꪱ, ꪎꪮꪉ ꪣꪱ ꪶꪔ ꪊꪀꪳ ꪻꪬ ꪤꪱꪫ 85 ꪝꪽ ꫛ ꪀꪲ ꪊꪸ ꪊꪱꪫ ꪵꪭꪙ ꪼꪜ ꪋꪳ ꪜꪱ ꪵꪀꪉ ꫄ꪊꪒ ꪼꪡ ꪼꪢ ꪜꪱ.

ꪀꪚꪾ ꪩꪺꪉ ꪭꪮꪙ ꫄ꪅꪉ ꪄꪮꪉ ꪋꪴ ꪒꪸ ꪹꪠꪉ ꪵꪀꪉ ꪵꪈꪉ ꪣꪲ ꪊꪀꪳ ꪁꪫꪙꪸ ꪕꪮꪥ ꪩꪺꪉ ꪜꪙꪴ 4 ꪀꪚꪾ ꪚꪮꪙ ꪮꪙꪸ ꪚꪱꪥ ꪒꪱꪉ ꪊꪮꪉ ꪵꪭꪉ ꪀꪺꪉ ꪣꪺ ꪵꪩꪉ ꪹꪩꪱ ꪜꪲ ꪙꪲ ꪣꪲ ꪙꪮꪥ ꪔꪱ ꪒꪙꪲ ꪜꪱ ꪊꪺꪚ ꪏꪒꪸ ꪭꪱꪥ ꫄ꪐꪒ ꪶꪝ ꪼꪡ ꪼꪢ ꪜꪱ ꫃ꪥꪒ ꪮꪮꪀ.

        ꪋꪉꪲ ꪹꪖ ꪎꪺꪙ -ꪕꪮꪉ ꪵꪯꪉ ꪥꪀꪲ