ꪛꪱꪥ 2: ꪼꪫ ꪶꪠꪉ ꪎꪉꪴ ꪹꪚꪱ ꪣꪲ ꪝꪉꪳ ꪁꪫꪱꪣ ꪶꪕ ꪝꪺꪙ ꪻꪊ ꪵꪔ ꪹꪨꪱ

ꪹꪨꪱ ꫃ꪤꪒ ꪮꪮꪀ ꪝꪉꪳ ꪄꪴ ꪬꪣꪸ ꪭꪱꪥ, ꪣꪲ ꫄ꪋ ꫃ꪤꪒ ꫛ ꪶꪩꪣ ꪔꪱꪥ ꪫꪱ ꫛ ꪻꪒ ꪀꪙꪲ ꪨꪱꪥ ꪹꪨꪱ ꪵꪀꪭ ꪉꪫꪙꪸ ꪹꪨꪱ. ꪀꪺꪉ ꫄ꪋ ꪙꪽ, ꪫꪀꪸ ꪎꪫꪥꪸ ꪹꪨꪱ, ꪏꪳ ꪄꪱꪥ ꪹꪨꪱ ꪵꪀꪉ ꪎꪴ ꪝꪉꪳ ꪔꪱꪉ ꪹꪨꪱ ꪙꪲ ꪑꪉꪰ ꫃ꪬꪙ ꪮꪮꪀ ꪨꪱꪥ ꪀꪺꪉ ꪶꪠꪉ ꪎꪉꪴ ꫄ꪎꪙ ꪨꪱ. ꪹꪄꪱ ꪎꪱꪙꪶ ꪵꪜꪉ ꪨꪰ ꪝꪉꪳ ꪔꪱꪉ ꪼꪫ ꪜꪱꪙ ꫃ꪜꪙ ꪹꪨꪱ ꪼꪒ ꫄ꪡꪙ ꪨꪱꪥ ꪝꪲ ꪙꪮꪉ ꪬꪱꪀ ꪏꪳ  ꪘꪉꪰ ꫄ꪋ ꪩꪱꪒ ꪹꪏꪉ ꪙꪽ ꪹꪚꪱ ꪹꪏꪉ ꪐꪽ ꪵꪥꪉ ꪼꪒ ꫄ꪊꪒ ꪹꪩꪉ, ꪣꪲ ꪶꪓꪀ ꪫꪱ ꪹꪚꪱ.

ꪵꪔ ꪥꪱꪙ ꪀꪽ ꫄ꪕꪙ ꪝꪉꪳ ꪄꪴ ꪬꪣꪸ ꪭꪱꪥ  ꪵꪔ ꪹꪨꪱ ꫃ꪤꪒ ꪮꪮꪀ, ꪊꪣꪴ ꪢꪴ ꪵꪀꪉ ꪎꪮꪀ ꪕꪱꪉ ꪶꪀꪉ ꪮꪱꪙ ꪔꪉꪲ ꫄ꪎꪙ ꪨꪱ ꪁꪰ ꪔꪣꪳ ꪝꪺ ꪫꪀꪸ ꪕꪺꪙ ꪊꪱ, ꪀꪣꪸ ꪎꪫꪱꪶꪶꪒ ꪀꪾ ꪀꪫꪒꪸ, ꪀꪾ ꪀꪫꪒꪸ ꪡꪱꪒ ꪻꪢꪏꪳ ꪢꪉꪲ ꪝꪉꪳ ꫛ ꪠꪒꪲ ꪖꪀꪳ, ꪩꪙꪳ ꪹꪏ ꪨꪰ ꪶꪒꪥ ꪀꪚꪾ ꪝꪉꪳ ꫛ ꪨꪱꪥ ꪵꪎ ꪠꪒꪲ ꪖꪀꪳ ꪭꪮꪒ ꪩꪺꪉ ꪜꪙꪴ ꪣꪱ ꪕꪱꪉ ꪹꪨꪱ ꪚꪸ, ꪤꪮꪙ ꪎꪸ ꪝꪉꪳ ꪋꪴ ꪊꪺꪚ ꪋꪽ ꪙꪱꪙ ꪎꪮꪀ ꪕꪱꪉ ꪣꪸ ꪹꪏꪉ ꪋꪲ ꪹꪀꪒ ꪎꪉꪲ. ꪝꪉꪳ ꫄ꪀ ꫄ꪎ ꪯꪲ ꫄ꪔ ꪁꪱꪒ ꪁꪙꪸ ꪀꪚꪾ ꪫꪀꪸ ꪄꪱꪣ ꪤꪱ ꫃ꪛꪉ ꪀꪚꪾ ꪋꪙꪸ ꪜꪱꪫ, ꪋꪲ ꪚꪮꪀ ꪵꪀ ꪘꪱ ꪶꪕ ꪖꪲ ꪻꪬ ꫛ ꫃ꪜꪙ ꫃ꪛꪉ ꪭꪴ ꪣꪱ ꪄꪴ ꪬꪣꪸ ꪭꪱꪥ ꪄꪮꪉ ꪹꪨꪱ ꪚꪸ ꪵꪔ ꪙꪽ ꪀꪾ ꪀꪫꪒꪸ ꪫꪱꪉ ꪹꪨꪱ.

ꪚꪱꪙ ꪮꪺꪙ ꪝꪱ 389 - ꪚꪱꪙ ꪮꪺꪙ ꪝꪱ ꪋꪳ ꪡꪮꪉ ꪁꪱ ꪄꪱꪥ ꪹꪋꪉ ꪭꪱꪉ ꫃ꪫꪙ ꪘꪀꪲ ꪎꪸ ꫃ꪖꪫꪥꪶ ꪹꪋꪉ ꪬꪱꪉ ꪤꪱ ꪔꪉꪲ ꫄ꪎꪙ ꪨꪱ ꪁꪰ ꪔꪣꪳ ꪝꪺ ꪫꪀꪸ ꪀꪣꪸ ꪊꪱꪺ ꪡꪱꪒ ꪻꪢ ꪫꪀꪸ ꫃ꪥꪒ, ꪁꪱ ꪄꪱꪥ ꪹꪨꪱ ꪘꪉꪰ ꪀꪺꪉ ꪶꪠꪉ , ꪀꪱꪒ ꪁꪙꪸ ꪀꪚꪾ ꪫꪀꪸ ꪋꪙꪸ ꪜꪱꪫ ꪠꪱꪚ ꪩꪺꪒ ꪭꪮꪒ ꫄ꪤꪙ ꪹꪣꪉ, ꪑꪰ ꪎꪉꪴ ꪵꪊꪀ ꪑꪣꪸ ꪄꪮꪉ ꫛ ꫄ꪤꪙ ꪶꪒꪥ ꪀꪚꪾ ꪝꪉꪳ ꪔꪱꪉ ꪹꪨꪱ ꪤꪱ ꪹꪨꪱ ꪹꪚꪱ ꪐꪽ ꪝꪱꪙ ꫄ꪊꪒ ꪹꪩꪉ. ꪀꪺꪉ ꫄ꪋ ꪙꪽ ꪶꪜꪉ ꪻꪊ ꪶꪒꪥ ꪀꪚꪾ ꪹꪨ ꪹꪚꪱ ꪭꪴꪤ ꪵꪊꪉ ꪚꪮꪙ ꫃ꪥꪒ ꪮꪮꪀ. ꪀꪺꪉ ꪝꪉꪳ ꪹꪚꪙ ꪬꪺ ꪜꪲ ꪣꪱ ꪭꪮꪒ ꪼꪅ ꪤꪉꪸ ꪊꪣꪴ ꪢꪴ ꪀꪫꪱꪙ ꪨꪲ ꪖꪲ ꪹꪊꪉ ꪔꪉꪲ ꪁꪽ ꪀꪣꪸ ꪊꪱ 270 ꫄ꪀ ꫄ꪎ ꫄ꪀ ꫄ꪎ ꫃ꪥꪒ ꪹꪥꪙ, ꪁꪱ ꪄꪱꪥ ꪹꪨꪱ, ꪠꪱꪒ ꪻꪢ 143 ꫄ꪀ ꫄ꪎ ꪖꪴ ꪡꪱꪒ ꪀꪱꪥ 400 ꪋꪫꪥꪸ ꪢꪽ, ꪖꪴ ꪎꪸ ꪀꪱꪥ 1ꪌ600 ꪨꪒꪲ ꪹꪨꪱ ꪒꪮꪙ ꪶ ꪖꪴ ꪎꪸ ꪀꪱꪥ 6ꪌ300 ꪨꪒꪲ ꪹꪨꪱ, 230 ꪊꪱꪥ ꪹꪨꪱ ꪹꪚꪱ ꪭꪴ  ꪵꪊꪉ ꪚꪮꪙ ꫃ꪥꪒ ꪮꪮꪀ , ꪹꪚꪱ ꪣꪲ ꪵꪔꪣ ꪊꪚꪾ ꪕꪮꪥ ꪕꪒꪰ ꪜꪙꪴ.

ꪵꪔ ꪜꪲ 2013, ꪚꪱꪘ ꪹꪖꪉ ꪫꪴ ꪔꪉꪲ ꪮꪫꪥꪲ ꫄ꪎꪙ ꪨꪱ ꪁꪽ ꪜꪙꪴ ꪮꪮꪀ ꪋꪲ ꪖꪲ ꪶꪎ 25 ꪣꪱ ꪕꪱꪉ ꪑꪰ ꪎꪉꪴ ꪵꪊꪀ ꪑꪣꪸ ꪵꪀꪉ ꪎꪮꪣ ꪵꪜꪉ ꪫꪀꪸ ꫃ꪤꪒ ꪄꪮꪉ ꪀꪱꪙ ꪶꪛ ꪒꪱꪉ ꪪꪙꪸ, ꪶꪀꪉ ꪊꪀꪳ, ꪪꪙꪸ ꪊꪀꪳ. ꪨꪉꪰ 4 ꪜꪲ ꫄ꪊꪚ ꪙꪾ, ꪙꪮꪀ ꪩꪱꪉ ꪒꪲ ꫃ꪬꪘ ꪵꪊꪉ ꫄ꪐꪒ ꪊꪉꪲ ꪨꪰ ꪫꪀꪸ ꪀꪱ ꪔꪉꪲ ꪁꪽ ꫄ꪡꪙ ꪨꪱꪥ ꪁꪰ ꪹꪚꪱ ꫃ꪬꪙ ꪀꪱꪙ ꪶꪛ, ꪶꪀꪉ ꪊꪀꪳ, ꪪꪙꪸ ꪊꪀꪳ ꪀꪙꪲ ꪹꪨꪱ ꪀꪙꪲ ꪚꪸ ꪀꪮꪙ, ꪀꪺꪉ ꫄ꪋ ꫃ꪤꪒ ꪫꪀꪸ ꪩꪙꪳ ꪹꪏ ꪨꪰ ꪘꪉꪰ ꫄ꪀꪚ ꪎꪱ, ꪵꪠꪉ.

ꪩꪺꪉ ꪊꪮꪉ ꪵꪭꪉ ꪄꪮꪉ ꪝꪉꪳ ꪊꪣꪴ ꪢꪴ ꪣꪲ ꪊꪀꪳ ꪁꪫꪙꪸ ꪏꪳ ꪁꪰ ꪋꪲ ꪕꪱꪀ ꫃ꪜꪙ ꪩꪺꪉ ꪜꪙꪸ ꪻꪢ ꪄꪮꪉ ꫛ ꫄ꪤꪙ ꪣꪱ ꪕꪱꪉ ꪎꪴ ꪹꪨꪱ. ꪬꪱꪀ ꪫꪱ ꪼꪫ ꪶꪠꪉ ꪎꪉꪴ ꪅꪀꪰ ꪅꪰ ꪹꪚꪱ ꪣꪲ ꪝꪉꪳ ꪁꪫꪱꪣ ꪶꪕ ꪝꪺꪙ ꪻꪊ ꪵꪔ ꪹꪨꪱ ꪭꪳ ꫄ꪁꪙ ꪣꪲ ꪝꪉꪳ ꪫꪀꪸ ꫃ꪥꪒ ꪵꪊꪉ ꪖꪲ ꪄꪮꪉ ꪕꪉꪳ ꪚꪱꪙ ꪕꪉꪳ ꪋꪺ ꪹꪭꪙ ꪵꪀꪉ ꪢꪮꪥ ꫛ ꫃ꪤꪙ ꪶꪠꪉ ꪎꪉꪴ.

ꪚꪀꪲ ꪖꪫꪥꪲ - ꪵꪭꪉ ꪥꪀꪲ

Bài 2: Vạy phổng xùng báu mi pưng quam tô

puôn chàư té lảu

Lảu dệt ók pưng khu hiểm hại, mi chơ dệt côn lộm tài va côn đàư kin lảu lài cánh nghiên lảu. Cuông chơ nặn, vịa siêu lảu, sự khài cánh xủ pưng tàng lảu nị nhăng hên ók lài cuông phổng xùng Sơn La. Khảu san, pảnh lỏ pưng tàng vạy pản pên lảu đảy phân lai pi nọng hák sự nẳng chợ lạt xương nặn báu xương đàư nhẳn danh đảy chất lượng, mi độc va báu.

Té dan cẳn tơn pưng khu hiểm hại té lảu dệt ók, chúm mủ cảnh sát xók tang Công an tỉnh Sơn La cọ tủm pua vịa tuận tra, kiểm soát, căm quyết phạt màư xư minh pưng côn phít thứk, lưn xưa lỏ đối cắp pưng côn lái xe phít thứk họt luông pun ma tang lảu bia, dón xia pưng chu chuốp chọ nạn xók tang mi xương chi cướt sinh ók. Pưng cơ sở Y tế cạt kiên cắp vịa khám dà bệnh cắp chiên páo, chík bók kẻ na tô thí hảu côn pên bệnh ma khu hiểm hại khong lảu, bìa, té nặn căm quyết vang lảu.

Ban uôn pa 389 - Ban uôn pa chự phong cạ khài chương hang vện ník xìa thuế, chương hang giả tỉnh Sơn la cọ tủm pua nả vịa kiểm tra, phạt màư vịa dệt, cạ khài lảu nẳng cuông phổng, cạt kiên cắp vịa chiên páo pháp luật họt dân mương, nhõ xùng trách nhiệm khong côn dân đối cắp pưng tàng lảu giả, lảu báu nhẳn pao chất lượng. Cuông nặn pông chàư đối cắp lảu dân hák siêu, lảu báu hụ chảnh bón dệt ók...Cuông pưng bườn hùa pi ma họt khạy, riêng chủm mú quản lý thị trưởng tỉnh cọ kiểm tra 270 cơ sở dệt dượn, cạ khài lảu, phạt màư 143 cơ sở, thu phạt cài 400 triệu mằn, thu xia cài 1.600 lít lảu đón, thu xia cài 6.300 lít lảu, 230 chai lẻu báu hụ chảnh bón dệt ók, báu mi tem chắp toi tặt pun.

Té pi 2013, Ban Thường vụ Tỉnh uỷ Sơn la cọ pun ók chỉ thị số 25 ma tang nho xùng trách nhiệm cánh xỏm panh vịa dệt khong cán bộ, đảng viên, công chức, viên chức. Lằng cài 4 pi chấp năm,. nọk lang đi cựt đảy lỏ nhương mự nhương nho xùng xưa trách nhiệm, xỏm panh lợp tăn vịa dệt khong cán bộ, đảng viên, công chức, viên chức, lang đi hên chảnh nhất chính lỏ vịa cá tỉnh cọ phân lài cọ báu hên cán bộ, công chức, viên chức kin lảu, kin bia cón, cuông chơ dệt vịa lưn xưa lỏ nẳng cấp xã, phường.

Luông chóng hanh khong pưng chủm mú mi chức quyên xư cọ chi tạk pên luông piến máư khong côn dân ma tang xủ lảu. Hák va vạy phổng xùng khặc khọ báu mi pưng quam tô puôn chàư té lảu hư cận mi pưng vịa dệt chảnh thí khòng tựng bản, tựng chua hươn cánh mỏi côn dân phổng xùng./.

                                                                                                                                                                                                      B Thuỷ - Lương Hạnh