Quam tô khòng pưng phóng viền Đài huyện

Chủm mú phóng viền nẳng đài huyện vịa xằng cọ đảy dệt cánh dệt đảy. Chơ pày cồng tác nẳng cơ sở cọ côn điều, tênh bek máy quay, tênh khắm Micro vạy quay phim, tênh thàm, tênh tọp hôm nang quam cận hà hăử vịa dệt khòng chảu. Ăn lỏ báu hê nặp họt pưng chu pày công tác nẳng phổng cuồng lắc cày, pày họt pưng bản phổng xùng, đảy bek máy nhang tìn, khảm pá phà pu hạng 10 cày số.

          Quỳnh Nhai lỏ huyện mi lài pi nọng chựa nọi côn kìn dú, pưa xương nặn vịa pày tẻm bai khòng pưng phóng viền côn Kèo, lưn xưa lỏ pưng côn dú cá đìn tăử khửn ma dệt vịa cọ pọ lài dak cha.

          Khạy nị, nok pưng chương trình tiếp, phát phong điện khòng Đài Trung ương cánh Đài tỉnh, Đài truyền thanh, Truyền hình huyện Quỳnh Nhai tuận nưng dệt 6 chương trình truyền hình( Quam Việt cánh quam pi nọng chựa nọi côn), 2 chương trình truyền hình. Vạy mi tục po tin, bai dệt chương trình, hư mỏi phóng viền đảy tẻm tin, bai phát nẳng phong điện địa phường, pọm cắp vịa nặn cọ đảy dệt mộm lẹo pưng tin bai măứ cánh pưng trang tin nẳng cơ sở hạng bườn cánh chuyên mục vạy lợp tăn phak pày pưng đài ứn.

          Chăm va khó mo dak cha, hak va cắp luông pùn lỏ xểm xài cái diên khòng dần cắp Đảng, Đảng cắp dần cài pưng chương trình phát thành cánh truyền hình, pưng phóng viền Đài Truyền thanh-truyền hình huyện Quỳnh Nhai nhẳn danh cận chóng hanh dệt lẹo đì nả vịa đảy giào. Pưa mặc muôn cắp nghê chảu lựa chọn, pi nọng cọ chóng hanh khảm pộn dak cha vạy àu pưng nang quam khòng huyện pày họt côn dần đảy văn nhất.

          Cài pưng vịa dệt báo chí, pưng phóng viền Đài truyền thành-truyền hình huyện Quỳnh Nhai, tỉnh Sơn La cọ hôm phân dệt pền pưng khù khặn luông chăn khòng puồng kìn đơi dú mự nị./.

CTV-Huyền dịch

ꪁꪫꪱꪣ ꪶꪕ ꪄꪮꪉ ꪝꪉꪳ ꪠꪮꪉ ꪪꪙꪸ ꪒꪱꪥ ꪭꪫꪙꪸ

ꪊꪣꪴ ꪢꪴ ꪠꪮꪉ ꪪꪙꪸ ꪘꪉꪰ ꪒꪱꪥ ꪭꪫꪙꪸ ꪫꪀꪸ ꪎꪉꪰ ꪁꪷ ꪼꪒ ꫃ꪥꪒ ꪵꪀꪉ ꪝꪮꪣ ꫃ꪥꪒ ꪼꪒ. ꫄ꪋ ꪼꪜ ꪶꪀꪉ ꪕꪱꪀ ꪘꪉꪰ ꫄ꪀ ꫄ꪎ ꪁꪷ ꫛ ꪒꪫꪸ, ꫃ꪕꪉ ꪵꪚꪀ ꪼꪢ ꪀꪫꪱꪥ ꪡꪣꪲ, ꫃ꪕꪉ ꪄꪣꪾ ꪣꪲ ꫄ꪀ ꪶꪤ ꪼꪫ ꪀꪫꪱꪥ ꪡꪣꪲ, ꫃ꪕꪉ ꪖꪱꪣ, ꫃ꪕꪉ ꪕꪮꪚ ꪶꪭꪣ ꪙꪱꪉ ꪁꪫꪱꪣ ꫄ꪁꪙ ꪬꪱ ꪻꪬ ꪫꪀꪸ ꫃ꪥꪒ ꪄꪮꪉ ꪹꪊꪱ. ꪯꪽ ꪨꪷ ꪹꪚꪱ ꫃ꪭ ꪙꪚꪾ ꪭꪮꪒ ꪝꪉꪳ ꪋꪴ ꪼꪜ ꪶꪀꪉ ꪕꪱꪀ ꪘꪉꪰ ꪝꪉꪳ ꪚꪱꪙ ꪶꪠꪉ ꪎꪴꪉ ꪨꪀꪰ ꪼꪀ, ꪼꪒ ꪵꪚꪀ ꪼꪢ ꪑꪱꪉ ꪔꪙꪲ ꪄꪱꪣ ꪜꪱ ꪠꪱ ꪝꪴ ꪭꪱꪉ 10 ꪼꪀ ꪶꪎ.

ꪀꪫꪥꪲ ꪐꪱꪥ ꪨꪷ ꪭꪫꪙꪸ ꪣꪲ ꪨꪱꪥ ꪝꪲ ꪙꪮꪉ ꪹꪋ ꪙꪮꪥ ꫛ ꪀꪙꪲ ꪤꪴ, ꪹꪝ ꪹꪏꪉ ꪙꪽ ꪫꪀꪸ ꪼꪜ ꪵꪔꪣ ꪛꪱꪥ ꪄꪮꪉ ꪝꪉꪳ ꪠꪮꪉ ꪪꪙꪸ ꫛ ꪵꪀꪫ ,ꪩꪙꪳ ꪹꪏ ꪨꪷ ꪝꪉꪳ ꫛ ꪤꪴ ꪀꪱ ꪒꪙꪲ ꪻꪔ ꪄꪙꪳ ꪣꪱ ꫃ꪥꪒ ꪫꪀꪸ ꪁꪷ ꪝꪷ ꪨꪱꪥ ꪥꪱꪀ ꪋꪱ. ꪝꪉꪳ ꪁꪫꪱꪣ ꪶꪕ ꫄ꪋ ꪼꪜ ꫃ꪥꪒ ꪫꪀꪸ ꪘꪉꪰ ꫄ꪀ ꫄ꪎ ꪀꪺꪉ ꪝꪉꪳ ꪣꪳ ꪬꪉꪲ ꫃ꪥꪒ ꫃ꪉ ꪁꪷ ꪝꪷ ꪨꪱꪥ ꪔꪱꪉ ꪨꪱꪥ ꪥꪮꪉ.

ꪼꪅ ꪙꪲ ꪙꪮꪀ ꪝꪉꪳ ꪹꪊꪉ ꪊꪉꪲ ꪔꪚꪸ, ꪠꪱꪒ ꪡꪮꪉ ꪓꪙꪸ ꪄꪮꪉ ꪒꪱꪥ ꪊꪴꪉ ꪹꪮꪉ ꪵꪀꪉ ꪒꪱꪥ ꪔꪉꪲ, ꪒꪱꪤ ꪊꪫꪙꪸ ꪵꪖꪉ ꪊꪫꪙꪸ ꪬꪉꪲ ꪭꪫꪙꪸ ꪀꪫꪥꪲ ꪐꪱꪥ ꪕꪺꪙ ꫜ ꫃ꪥꪒ 6 ꪹꪊꪉ ꪊꪉꪲ, ꪁꪫꪱꪣ ꪫꪒꪸ ꪵꪀꪉ ꪁꪫꪱꪣ ꪝꪲ ꪙꪮꪉ ꪹꪋ ꪙꪮꪥ ꫛ, 2 ꪹꪊꪉ ꪊꪉꪲ ꪊꪫꪙꪸ ꪬꪉꪲ. ꪼꪫ ꪣꪲ ꪕꪴꪀ ꪝꪷ ꪔꪙꪲ ꪛꪱꪥ ꫃ꪥꪒ ꪹꪊꪉ ꪊꪉꪲ, ꪭꪳ ꪢꪮꪥ ꪠꪮꪉ ꪪꪙꪸ ꪼꪒ ꪵꪔꪣ ꪔꪙꪲ ꪛꪱꪥ ꪠꪱꪒ ꪘꪉꪰ ꪡꪮꪉ ꪓꪙꪸ ꪒꪸ ꪹꪠꪉ ,ꪝꪮꪣ ꪀꪚꪾ ꪘꪱ ꪫꪀꪸ ꪙꪽ ꪁꪷ ꪼꪒ ꫃ꪤꪒ ꪶꪣꪣ ꪵꪩꪫ ꪝꪉꪳ ꪔꪙꪲ ꪛꪱꪤ ꪻꪢ ꪵꪀꪉ ꪝꪉꪳ ꪋꪱꪉ ꪕꪙꪲ ꫄ꪀ ꫄ꪎ ꪭꪱꪉ ꪹꪚꪙ ꪵꪀꪉ ꪊꪫꪙꪸ ꪣꪴꪀ ꪼꪫ ꫄ꪩꪚ ꪕꪽ ꪠꪱꪒ ꪼꪜ ꪝꪉꪳ ꪒꪱꪥ ꪮꪙꪳ. ꪋꪣꪾ ꪫꪱ ꪄꪷ ꪣꪷ ꪥꪱꪀ ꪋꪱ, ꪬꪱꪀ ꪫꪱ ꪀꪚꪾ ꪩꪺꪉ ꪜꪴꪙ ꪨꪷ ꫃ꪎꪣ ꪎꪱꪥ ꪀꪱꪥ ꪥꪙꪸ ꪄꪮꪉ ꫄ꪤꪙ ꪀꪚꪾ ꪒꪱꪉ ꪀꪱꪥ ꪝꪉꪳ ꪹꪊꪉ ꪊꪉꪲ ꪠꪱꪒ ꪵꪖꪉ ꪊꪫꪙꪸ ꪬꪉꪲ, ꪝꪉꪳ ꪠꪮꪉ ꪪꪙꪸ ꪒꪱꪥ ꪊꪫꪙꪸ ꪵꪖꪉ ꪊꪫꪙꪸ ꪬꪉꪲ ꪭꪫꪙꪸ ꪀꪫꪥꪲ ꪐꪱꪥ ꪐꪽ ꪵꪥꪉ ꪊꪮꪉ ꪵꪭꪉ ꫃ꪥꪒ ꪵꪩꪫ ꪒꪲ ꪘꪱ ꪫꪀꪸ ꪼꪒ ꪤꪱꪫ. ꪹꪝ ꪣꪀꪰ ꪣꪺꪙ ꪀꪚꪾ ꫃ꪉ ꪹꪊꪱ ꪹꪩꪀ ꪋꪮꪙ ꪝꪲ ꪙꪮꪉ ꪁꪷ ꪊꪮꪉ ꪵꪭꪉ ꪄꪱꪢ ꪶꪝꪙ ꪥꪱꪀ ꪋꪱ ꪼꪫ ꪹꪮꪱ ꪝꪉꪳ ꪙꪱꪉ ꪁꪫꪱꪙ ꪄꪮꪉ ꪭꪫꪙꪸ ꪼꪜ ꪭꪮꪒ ꫛ ꫄ꪤꪙ ꪼꪒ ꪫꪽ ꫄ꪐꪒ.

ꪀꪱꪥ ꪝꪉꪳ ꪫꪀꪸ ꫃ꪥꪒ ꪚꪱꪫ ꪊꪲ ꪝꪉꪳ ꪠꪮꪉ ꪪꪙꪸ ꪒꪱꪥ ꪊꪫꪙꪸ ꪬꪉꪲ ꪭꪫꪙꪸ ꪀꪫꪥꪲ ꪐꪱꪥ ,ꪔꪉꪲ ꫄ꪎꪙ ꪨꪱ ꪁꪷ ꪶꪭꪣ ꫄ꪡꪙ ꫃ꪥꪒ ꫃ꪜꪙ ꪝꪉꪳ ꪄꪴ ꪅꪽ ꪩꪺꪉ ꪋꪽ ꪄꪮꪉ ꪜꪺꪉ ꪀꪙꪲ ꫄ꪓꪥ ꪤꪴ ꪣꪳ ꪙꪲ.

ꪹꪩꪉ ꪬꪫꪙꪸ ꪥꪀꪲ