ꪛꪱꪥ ꪖꪳ 4 ꪣꪳ 22-02-ꪜꪲ 2017

ꪨꪱꪥ ꪹꪊꪱ ꪀꪣꪸ ꪎꪫꪱꪒ ꪼꪒ ꫛ ꪊꪺꪚ ꪹꪚ ꪹꪣꪱ ꪹꪨꪱ

ꪼꪅ ꪙꪲ ꪝꪉꪳ ꫛ ꪊꪺꪚ ꪹꪚ ꪹꪣꪱ ꪹꪨꪱ ꪹꪄꪱ ꪙꪮꪙ ꪹꪭꪙ ꪤꪱ ꪒꪱ ꪅꪫꪱ ꪔꪉꪲ ꪨꪱꪥ ꪹꪊꪱ ꪁꪷ ꪼꪒ ꪵꪕꪒ ꪕꪉꪸ. ꪝꪉꪳ ꫛ ꫃ꪊꪚ ꪘꪀꪰ ꪹꪏꪉ Phu A Sử, Chang A Hờ, Chẻo Sìn Hào ꪭꪮꪒ ꪼꪅ ꪁꪷ ꪹꪚꪱ ꪔꪱꪥ ꪼꪒ ꫛ ꪵꪩꪫ.

ꪹꪝ ꪼꪒ ꪊꪉꪲ ꪁꪫꪙꪸ ꪒꪸ ꪹꪠꪉ ꪋꪙꪸ ꪜꪱꪫ ꪘꪫꪸ ꪹꪋ ꪝꪮꪣ ꪀꪚꪾ ꪩꪺꪉ ꪁꪱꪒ ꪁꪙꪸ ꪄꪮꪉ ꪝꪉꪳ ꫄ꪀ ꪀꪫꪱꪙ ꪋꪙꪸ ꪜꪱꪫ ꪣꪳ 18-2 ꪁꪷ ꪣꪲ ꪀꪱꪤ 60 ꫛ ꪀꪙꪲ ꪭꪷ ꪔꪱꪉ ꪹꪨꪱ ꪒꪫꪸ ꪏꪳ ꪘꪉꪰ ꪎꪱ Sì Lởi Lầu ꪨꪉꪰ ꫄ꪋ ꪄꪱꪣ ꪘꪉꪰ ꪋꪱꪣ ꪮꪲ ꫃ꪔ ꫄ꪀ ꫄ꪎ ꪁꪷ ꪼꪜ ꪹꪭꪙ ꪤꪱ ꪒꪱ ꪅꪫꪱ ꪔꪉꪲ ꪼꪫ ꪀꪣꪸ ꪊꪱ. ꪭꪮꪒ ꪼꪅ ꪝꪀꪰ ꪵꪭꪉ ꪄꪮꪉ ꪝꪉꪳ ꫛ ꪊꪺꪚ ꪹꪚ ꪹꪣꪱ ꪹꪨꪱ ꪘꪉꪰ ꪹꪭꪙ ꪭꪱꪥ ꪒꪱꪉ ꪹꪤꪱ ꪤꪱ ꪘꪉꪰ ꪹꪭꪙ ꪤꪱ ꪒꪱ ꪅꪫꪱ ꪔꪉꪲ ꪨꪱꪥ ꪹꪊꪱ ꪁꪷ ꪼꪒ ꪵꪕꪒ ꪕꪉꪸ. ꪘꪉꪰ ꪊꪉꪴ ꫄ꪔꪣ ꪮꪲ ꫃ꪔ ꪭꪫꪙꪸ ꪠꪮꪉ ꪶꪖ ꪣꪲ 46 ꫛ ꪊꪺꪚ ꪹꪚ ꪹꪣꪱ ꪙꪮꪥ ꪁꪷ ꪬꪱꪫ ꪵꪭꪉ ꪮꪮꪀ.

ꪶꪎ ꫛ ꪊꪺꪚ ꪹꪚ ꪹꪣꪱ ꪹꪨꪱ ꪘꪉꪰ ꪹꪭꪙ ꪭꪱꪥ ꪄꪮꪉ ꪋꪺ ꪹꪭꪙ ꪩꪉꪴ Phu Vần Lẻng ꪁꪷ ꫃ꪬꪙ ꪣꪲ ꪮꪮꪀ ꪘꪉꪰ 5 ꪎꪱ ꪵꪒꪙ ꪹꪣꪉ ꪨꪷ Ma Ly Chải, Vàng Ma Chải, Sì Lở lầu, Mồ Sì San ꪵꪀꪉ Dào San ꪄꪮꪉ ꪭꪫꪙꪸ ꪠꪮꪉ ꪶꪖ. ꪬꪱꪀ ꪫꪱ ꪹꪝ ꪣꪲ ꪩꪺꪉ ꪁꪱꪒ ꪁꪙꪸ ꪄꪮꪉ ꪋꪴ ꫄ꪀꪚ ꪊꪉꪲ ꪁꪫꪙꪸ ꪒꪸ ꪹꪠꪉ; ꪝꪉꪳ ꫄ꪀ ꪀꪫꪱꪙ ꪣꪲ ꪊꪀꪳ ꪁꪫꪙꪸ, ꪩꪙꪳ ꪹꪏ ꪨꪷ ꪵꪘꪉ ꪮꪲ ꫃ꪔ ꪝꪮꪣ ꪀꪚꪾ ꪮꪲ ꪚꪱꪀ ꪎꪲ ꪹꪭꪙ ꪤꪱ ꪵꪝꪀ ꪣꪱꪤ ꪝꪉꪳ ꪠꪫꪙꪸ ꪤꪱ ꪶꪛ ꪮꪲ ꫃ꪔ ꪹꪝ ꪹꪏꪉ ꪙꪽ ꪹꪚꪱ ꪣꪲ ꪔꪣꪳ ꫛ ꪔꪱꪤ.

꫄ꪀ ꪀꪫꪱꪙ ꪣꪲ ꪊꪀꪳ ꪁꪫꪙꪸ ꪁꪷ ꪖꪴ ꪎꪸ 4.800 ꪨꪒꪲ ꪹꪨꪱ ꪹꪚꪱ ꪭꪴ ꪵꪊꪉ ꪚꪮꪙ ꫃ꪥꪒ ꪮꪮꪀ ꪘꪉꪰ 8 ꪎꪱ ꪵꪒꪙ ꪹꪣꪉ. ꪵꪏꪉ ꪙꪽ ꪹꪝ ꪣꪲ ꪩꪺꪉ ꪀꪾ ꪀꪫꪒꪸ ꪄꪮꪉ ꪊꪉꪲ ꪁꪫꪙꪸ ꪒꪸ ꪹꪠꪉ ꫄ꪀ ꪀꪫꪱꪙ ꪣꪲ ꪊꪀꪳ ꪁꪫꪙꪸ, ꪩꪙꪳ ꪹꪏ ꪨꪷ ꪝꪉꪳ ꪊꪣꪴ ꪢꪴ ꪀꪺꪙ ꪶꪓꪤ  ꪶꪀꪉ ꪮꪱꪙ ꪮꪲ ꫃ꪔ ꪤꪱꪫ ꪥꪀꪴ ꪜꪺꪉ ꪀꪙꪲ ꪩꪺꪉ ꪤꪴ ꪁꪷ ꪼꪒ ꪵꪕꪒ ꪕꪉꪸ. ꪯꪽ ꪙꪲ ꪨꪷ ꪛꪱꪥ ꪵꪮꪚ ꪀꪺꪉ ꪫꪀꪸ ꪀꪫꪱꪙ ꪨꪲ ꪕꪉꪸ ꪮꪱꪙ ꪁꪾ ꪀꪙꪲ ꪩꪙꪳ ꪹꪏ ꪨꪷ ꪢꪉꪰ ꪶꪠꪉ ꪀꪺꪉ ꪨꪀꪰ ꪼꪀ ꪶꪠꪉ ꪵꪒꪙ ꪹꪣꪉ.

ꪄꪀꪰ ꪁꪙꪸ- ꪕꪮꪉ ꪵꪯꪉ ꪥꪀꪲ