ꫛ ꫄ꪤꪙ ꪶꪠꪉ ꪎꪉꪴ ꪕꪙꪸ ꪯꪙꪸ ꪢꪱ ꪼꪄ ꪀꪉꪲ ꫃ꪔ ꪵꪔ ꪀꪷ ꪤꪱ

          ꪫꪀꪸ ꪜꪀꪴ ꪀꪷ ꪤꪱ ꪘꪉꪰ ꪎꪱ ꪯꪙꪸ ꪖꪱꪙ ꪹꪣ ꪵꪅꪀ ꪝꪷ ꪨꪱꪥ ꪥꪱꪀ ꪋꪱ. ꪹꪝ ꫛ ꫄ꪤꪙ ꪘꪉꪰ ꪘꪲ ꪁꪷ ꪵꪀꪫꪙ ꫄ꪅꪥ ꪀꪚꪾ ꪫꪀꪸ ꪜꪀꪴ ꪹꪄꪱ ꪹꪄꪱ ꪩꪲ . ꪹꪝ ꪹꪏꪉ ꪙꪽ ꪫꪀꪸ ꪘꪫꪸ ꪹꪋ ꪋꪙꪸ ꪜꪱꪫ ꪻꪬ ꪝꪲ ꪙꪮꪉ ꪭꪴ ꪼꪒ ꪄꪴ ꫄ꪨꪥ ꪒꪲ ꪄꪮꪉ ꪫꪀꪸ ꪜꪀꪴ ꪀꪷ ꪤꪱ ꪨꪷ ꪘꪱ ꪫꪀꪸ ꫄ꪁꪙ ꪼꪒ ꫃ꪥꪒ ꪙꪱꪙ ꪻꪊ.

          ꪨꪉꪰ  2 ꪜꪲ ꪊꪮꪉ ꪵꪭꪉ ꪘꪫꪸ ꪹꪋ ꪼꪅ ꪙꪲ ꪁꪷ ꪣꪲ 25 ꪋꪺ ꪹꪭꪙ ꪶꪋꪣ ꪭꪚꪾ ꪥꪳ ꪮꪱꪙ ꪀꪚꪾ ꪔꪱ ꪒꪙꪲ ꪄꪙꪳ ꪭꪮꪒ 6 ꪵꪬꪀ ꪕꪱ, ꪨꪱꪤ ꪶꪁꪚ 15 ꪹꪕ ꪵꪫꪒ ꪻꪎ ꪜꪲ 2015; ꪎꪱꪙ ꪹꪩꪉ ꪜꪽ ꫄ꪝꪉ ꪼꪜ ꪁꪒꪳ ꪼꪒ ꪵꪔ 250-300 ꫄ꪀꪙ ꪢꪮꪥ ꪣꪺ ꪘꪉꪰ ꪚꪮꪙ ꪎꪺꪙ ꪀꪫꪱꪉ 360 ꪹꪖꪀ ꪶꪣꪙ ꪒꪙꪲ. ꪵꪫꪒ ꪻꪎ ꪜꪀꪴ ꪹꪄꪱ ꪘꪉꪰ ꪎꪺꪒ ꪎꪉꪴ ꪶꪁꪚ 4-5 ꪹꪕ ꪖꪴ ꫄ꪑꪚ ꪜꪽ ꫄ꪝꪉ ꪼꪜ ꪄꪮꪉ ꪢꪮꪥ ꪋꪺ ꪹꪭꪙ ꪨꪷ ꪤꪱꪫ 300 ꪋꪫꪸ ꪢꪽ ꪢꪮꪥ ꪜꪲ. ꪥꪱꪙ ꪼꪜ ꪘꪱ, ꪝꪉꪳ ꪋꪺ ꪹꪭꪙ ꫄ꪤꪙ ꪎꪚꪳ ꪔꪱꪣ ꪼꪄ ꪀꪫꪱꪉ ꪔꪱ ꪒꪙꪲ ꪜꪀꪴ ꪀꪷ ꪤꪱ ꪄꪙꪳ 8 ꪵꪬꪀ ꪕꪱ.

          ꪬꪱꪀ ꪫꪱ ꪼꪫ ꪀꪷ ꪤꪱ ꪢꪱ ꪵꪝ ꪀꪺꪉ ꪥꪱꪣ ꪼꪜ ꪢꪱ, ꪭꪫꪙꪸ ꪕꪙꪸ ꪯꪙꪸ ꪁꪷ ꪒꪱꪉ ꪭꪮꪙ ꫄ꪅꪉ ꪎꪱꪫ ꪚꪮꪙ ꪄꪱꪥ ꪹꪋꪉ ꪭꪱꪉ ꪋꪮꪥ ꫛ ꫄ꪤꪙ ꪮꪙꪸ ꪻꪊ ꪜꪀꪴ ꪶꪚꪉ. ꪼꪅ ꪙꪲ ꪣꪲ ꪶꪁꪉ ꪕꪲ ꪹꪤꪀ ꪩꪫꪸ ꪶꪒꪉ ꪚꪀꪰ ꪁꪱꪒ ꪁꪙꪸ ꪀꪚꪾ ꪭꪫꪙꪸ ꪕꪙꪸ ꪯꪙꪸ ꫄ꪊꪚ ꪙꪣꪾ ꪥꪳ ꪮꪱꪙ. ꫄ꪒꪙ ꪫꪲ ꪙꪲ ꪋꪲ ꪐꪽ ꪏꪳ ꫃ꪕꪉ ꫃ꪢꪒ ꪀꪷ ꪤꪱ ꪻꪬ ꫛ ꫄ꪤꪙ ꪘꪉꪰ ꪶꪠꪉ.

          ꪀꪱꪥ ꪐꪽ ꪵꪥꪉ ꪩꪱꪉ ꪒꪲ ꪄꪮꪉ ꪥꪳ ꪮꪱꪙ ꪻꪬ ꫃ꪬꪙ ꪫꪀꪸ ꫄ꪊꪚ ꪙꪣꪾ ꪜꪀꪴ ꪀꪷ ꪤꪱ ꪘꪉꪰ ꪭꪫꪙꪸ ꪕꪙꪸ ꪯꪙꪸ ꪁꪒꪳ ꪔꪮꪚ ꪼꪒ ꪩꪱꪉ ꪮꪱꪫ ꪎꪴ ꪤꪱ ꪼꪅ ꪙꪲ, ꪎꪮꪉ ꪣꪱ ꪐꪽ ꪵꪥꪉ ꪩꪺꪉ ꪋꪮꪚ ꪵꪣꪙ ꪀꪺꪉ ꪫꪀꪸ ꪑꪱꪥ ꪜꪙꪸ ꪫꪀꪸ ꫃ꪥꪒ ꪀꪉꪲ ꫃ꪔ ꪌꪘꪉ ꪉꪚꪸ ꪘꪉꪰ ꪭꪫꪙꪸ, ꪶꪭꪣ ꫄ꪡꪙ ꪑꪷ ꪎꪉꪴ ꪖꪴ ꫄ꪑꪚ ꪻꪬ ꫛ ꫄ꪤꪙ.

          ꪀꪚꪾ ꪝꪉꪳ ꪑꪱꪥ ꪜꪙꪸ ꪀꪺꪉ ꪫꪀꪸ ꪜꪀꪴ ꪶꪚꪉ ꪵꪔꪉ ꪩꪉꪸ ꪁꪒꪳ ꪼꪒ ꪩꪱꪉ ꪒꪲ ꪀꪉꪲ ꫃ꪔ ꪎꪉꪴ, ꪶꪎ ꪋꪺ ꪹꪭꪙ ꪁꪒꪰ ꪘꪉꪰ ꪭꪫꪙꪸ ꪤꪮꪙ ꪶꪩꪉ ꪫꪽ. ꪵꪔ ꪙꪽ  ꪻꪬ ꫃ꪬꪙ ꪭꪫꪙꪸ ꪕꪙꪸ ꪯꪙꪸ ꪁꪷ ꪣꪲ ꪩꪺꪉ ꫃ꪥꪒ ꪩꪺꪉ ꪼꪜ ꪋꪮꪚ ꪵꪣꪙ ꪀꪺꪉ ꪫꪀꪸ ꫃ꪥꪒ ꪀꪉꪲ ꫃ꪔ ꪵꪀꪉ ꪋꪮꪥ ꪹꪤ ꪝꪷ ꪼꪭ ꪵꪣ ꪙꪱ.

    TTĐB- ꪕꪮꪉ ꪵꪯꪉ ꪥꪀꪲ