Côn púk mák mặn nẳng Sơn La chau lò pưa mák lông ca

       Phổng xuần quảng chi áo họt 4 héc ta khòng chua hươn lung Tong Văn Hoàn, bản Bóng Phiềng, xã Chiêng Cọ, thanh phố Sơn La púk xáp bang cò mặn hảu, cò cà phề mỏi pì cọ khài đảy hạng họi triệu ngơn. Khảu hùa mua thù pít mák, mák mặn khài đảy ca té 25 họt 30 păn mằn mỏi cần, chua hươn lung muôn hòm lài. Hák va khay nị ca mák mặn lông ca thúk lài, đảy to té 10 họt 15 păn mằn mỏi cần, dệt hẳư lung cánh pưng chua hươn púk mák mặn cuồng bản chau lò lài.

        Xã Chiêng Cọ khay nị mi dáo 900 héc ta mák mặn púk xáp bang xắư hay cà phề cánh cài 10 héc ta cò mặn ké. Pưng pì chằm nị púk mák mặn cựt đảy ca con kình tế xùng xưa cò cà phề pưa báu pường lài ngơn cánh cồng hanh lăm đù. Hák va pì đằư cọ xương nặn, cứ họt mua thù pít hư lông ca dệt hẳư côn dần chau lò. Pưa va tênh mết mák mặn cuồng phổng pọm đảy côn cạ ma thù sự, pưa xương nặn pi nọng mi xương xự thúk xự panh chơ đằư cọ đảy. Khay nị tênh cá tỉnh Sơn La mi cài 4 păn héc ta cò mặn, cắp sản lượng thù pít danh đù cựt đảy cào 40 păn tấn mák mỏi pì. Hák va nẳng Sơn La phân lài hính khài mák mặn tôm nuối, báu hê chế biến té mák mặn; vịa tẳng tánh chư xiềng cánh bón xự mák mặn báu hê nhẳn pao, phân lài lỏ côn cạ hák ma xự, xương nặn ca khửn lông báu ngau.

        Báu xuốn to riềng mák mặn lạ, cắp lài tàng chương hay khòng ứn xương cả phề, mák nhặn, mák muông vịa xáo hà bón khài, tẹt tiêng ca con hẳư po hay me na lâng lỏ bai toán dạk khòng ngành nồng nghiệp tỉnh Sơn La./.

                                                                   Hồng Việt-Anh dịch

                      ꫛ ꪜꪀꪴ ꪢꪱꪀ ꪣꪽ ꪘꪉꪰ ꫄ꪎꪙ ꪨꪱ ꪹꪋꪱ ꪨꪷ ꪹꪝ ꪢꪱꪀ ꪶꪩꪉ ꪁꪱ

          ꪶꪠꪉ ꪎꪺꪙ ꪀꪫꪱꪉ ꪤꪱꪫ 4 ꪵꪬꪀ ꪕꪱ ꪄꪮꪉ ꪋꪺ ꪹꪭꪙ ꪩꪉꪴ ꪕꪮꪉ ꪪꪽ ꪬꪫꪱꪙ ꪚꪱꪙ ꪚꪮꪉ ꪠꪉꪸ ꪎꪱ ꪋꪉꪸ ꪁꪷ ꪵꪗꪉ ꪶꪠ ꫄ꪎꪙ ꪨꪱ ꪜꪀꪴ ꪎꪱꪚ ꪚꪱꪉ ꪀꪷ ꪢꪱꪀ ꪙꪽ ꪹꪬꪱ ꪻꪎ ꪼꪭ ꪀꪱ ꫃ꪠ ꪢꪮꪥ ꪜꪲ ꪁꪷ ꪄꪱꪥ ꪼꪒ ꪭꪱꪉ ꪭꪮꪥ ꪋꪫꪸ ꪢꪽ. ꪹꪄꪱ ꪣꪺ ꪖꪴ ꪜꪒꪲ ꪢꪱꪀ ꪢꪱꪀ ꪣꪽ ꪄꪱꪥ ꪼꪒ ꪁꪱ ꪵꪔ 25 ꪭꪮꪒ 30 ꪝꪽ ꪢꪽ ꪢꪮꪥ ꫄ꪀꪙ ꪊꪺ ꪹꪭꪙ ꪩꪉꪴ ꪣꪺꪙ ꪬꪮꪣ ꪨꪱꪥ. ꪀꪱꪀ ꪫꪱ ꪼꪅ ꪙꪲ ꪁꪱ ꪢꪱꪀ ꪢꪽ ꪶꪩꪉ ꪁꪱ ꪖꪀꪴ ꪨꪱꪥ ꪼꪒ ꪕꪷ ꪵꪔ 10 ꪭꪮꪒ 15 ꪝꪽ ꪢꪽ ꪢꪮꪥ ꫄ꪀꪙ ꫃ꪥꪒ ꪻꪬ ꪩꪉꪴ ꪵꪀꪉ ꪨꪱꪥ ꪋꪺ ꪹꪭꪙ ꪜꪀꪴ ꪢꪱꪀ ꪣꪽ ꪹꪋꪱ ꪨꪷ ꪨꪱꪥ.

           ꪎꪱ ꪋꪉꪸ ꪁꪷ  ꪼꪅ ꪙꪲ ꪣꪲ ꪤꪱꪫ 900 ꪵꪬꪀ ꪕꪱ ꪢꪱꪀ ꪣꪽ ꪜꪀꪴ ꪎꪱꪚ ꪚꪱꪉ ꪻꪎ ꪼꪭ ꪀꪱ ꫃ꪠ ꪵꪁꪉ ꪀꪱꪥ 10 ꪵꪬꪀ ꪕꪱ ꪀꪷ ꪣꪽ ꪵꪀ. ꪝꪉꪳ ꪜꪲ ꪊꪣꪾ ꪙꪲ ꪜꪀꪴ ꪢꪱꪀ ꪣꪽ ꪁꪒꪳ ꪼꪒ ꪁꪱ ꪁꪮꪙ ꪀꪉꪲ ꫃ꪔ ꪎꪉꪴ ꪹꪏ ꪀꪱ ꫃ꪠ ꪹꪝ ꪹꪚꪱ ꪹꪜꪉ ꪨꪱꪥ ꫄ꪉꪙ ꪵꪀꪉ ꪶꪀꪉ ꪵꪭꪉ ꪩꪣꪾ ꪒꪴ. ꪬꪱꪀ ꪫꪱ ꪜꪲ ꪻꪒ ꪁꪷ ꪹꪏꪉ ꪙꪽ ꪀꪳ ꪭꪮꪒ ꪣꪺ ꪖꪴ ꪜꪒꪲ ꪢꪱꪀ ꪭꪳ ꪶꪩꪉ ꪁꪱ ꫃ꪥꪒ ꪻꪬ ꫛ ꫄ꪤꪙ ꪹꪋꪱ ꪨꪷ. ꪹꪝ ꪫꪱ ꫃ꪕꪉ ꫃ꪢꪒ ꪢꪱꪀ ꪣꪽ ꪘꪉꪰ ꪀꪺꪉ ꪶꪠꪉ ꪝꪮꪣ ꪼꪒ ꫛ ꪁꪱ ꪣꪱ ꪏꪳ ꪹꪝ ꪹꪏꪉ ꪙꪽ ꪝꪸ ꪙꪮꪉ ꪣꪲ ꪹꪏꪉ ꪏꪳ ꪖꪀꪴ ꪏꪳ ꪵꪝꪉ ꫄ꪋ ꪻꪒ ꪁꪷ ꪼꪒ.

          ꪼꪅ ꪙꪲ ꫃ꪕꪉ ꪀꪱ ꪔꪉꪲ ꫄ꪎꪙ ꪨꪱ ꪣꪲ ꪀꪱꪥ 4 ꪝꪽ ꪵꪬꪀ ꪕꪱ ꪀꪷ ꪣꪽ ꪀꪚꪾ ꪎꪱꪙ ꪹꪩꪉ ꪖꪴ ꪜꪒꪲ ꪵꪥꪉ ꪒꪴ ꪁꪒꪳ ꪼꪒ ꪀꪱꪥ 40 ꪝꪽ ꫄ꪔꪙ ꪢꪮꪥ ꪜꪲ. ꪬꪱꪀ ꪫꪱ ꪘꪉꪰ ꪔꪉꪲ ꫄ꪎꪙ ꪨꪱ ꫄ꪡꪙ ꪨꪱꪥ ꪬꪉꪲ ꪄꪱꪥ ꪶꪕꪣ ꪢꪱꪀ ꪹꪚꪱ ꫃ꪭ ꫃ꪠ ꪚꪙꪸ ꪵꪔ ꪢꪱꪀ ꪣꪽ ꫃ꪜꪙ ꪨꪱꪥ ꪔꪱꪉ ꪹꪋꪉ ꪭꪱꪉ. ꪫꪀꪸ ꪔꪉꪰ ꪵꪔꪉ ꪋꪳ ꪎꪉꪸ ꪵꪀꪉ ꪚꪮꪙ ꪏꪳ ꪢꪱꪀ ꪣꪽ ꪹꪚꪱ ꫃ꪭ ꪐꪽ ꪝꪱꪫ ꫄ꪡꪙ ꪨꪱꪥ ꪨꪷ ꫛ ꪁꪱ ꪬꪱꪀ ꪣꪱ ꪏꪳ ꪹꪏꪉ ꪙꪽ ꪁꪱ ꪄꪙꪳ ꪶꪩꪉ ꪹꪚꪱ ꪹꪉꪱ.

          ꪹꪚꪱ ꪎꪺꪙ ꪕꪷ ꪤꪉꪸ ꪢꪱꪀ ꪣꪽ ꪨꪱ, ꪀꪚꪾ ꪝꪉꪳ ꪔꪱꪉ ꪹꪋꪉ ꪼꪭ ꪄꪮꪉ ꪙꪱ ꪮꪙꪳ ꪹꪏꪉ ꪀꪱ ꫃ꪠ ꪢꪱꪀ ꪑꪱꪙ ꪢꪱꪀ ꪣꪺꪉ ꪫꪀꪸ ꪎꪱꪫ ꪬꪱ ꪚꪮꪙ ꪄꪱꪥ ꪵꪕꪒ ꪕꪉꪸ ꪁꪱ ꪁꪮꪙ ꪻꪬ ꪝꪷ ꪼꪭ ꪵꪣ ꪙꪱ ꫄ꪩꪉ ꪨꪷ ꪛꪱꪥ ꪔꪫꪱꪙ ꪤꪱꪀ ꪄꪮꪉ ꪵꪈꪉ ꪶꪘꪉ ꪉꪚꪸ ꪔꪉꪲ ꫄ꪎꪙ ꪨꪱ.

                                                                                         ꪶꪬꪉ ꪫꪒꪸ-ꪕꪮꪉ ꪵꪯꪉ ꪥꪀꪲ