Sìn Hồ: Lai Châu tủm pua chự phong nào cưm hẳư phủ côn cánh tồ tảnh liệng

          Sìn Hồ lỏ điạ phường chuốp siệt hại cuồng chu nào cưm hại hức tưa nị nẳng tỉnh Lai Châu cuồng 2 mự cài ma, tênh cá 9 xã phổng xùng pọm mi mók cụa, mười hăm cánh phồn dui. Nhiệt độ mự nào cưm nhất tạ mài đảy  nẳng tang nọk  chơ càng vên nẳng thị trấn Sìn Hồ cánh pưng xã xương: Tà Ngảo, Xà Dề Phìn, Làng Mô cánh thị trấn huyện pằn pâng pày té 5 họt 8 độ. Hák va tênh cưn nhiệt độ dón lông 5 độ pháp hạp họt pặc hanh khòng côn dần cánh tồ tảnh liệng.

          Pả Trần Thị Thu Hiền, Trưởng phọng nông nghiệp mả pe bản na huyện Sìn Hồ hẳư hụ: Khạy nị, tênh cá huyện mi pưng ngua quai cài 40 păn tồ; cuồng nặn phân lài xỏn hôm nẳng pưng xã phổng xùng. Pọm cắp vịa uồn pa, niếu chưa, chiên páo cánh chík bók hẳư côn dần cuồng nả vịa chự phong nào cưm hẳư tồ tảnh liệng nẳng cắp bón, họt khạy po hay me na cọ àu cài 2 păn tồ ngua tồ quai lông pày phổng tắm vạy vện ník xìa nào cưm.

          Pọm cắp vịa khâng chằư chự phong nào cưm hẳư tồ tảnh liệng, khạy nị huyện Sìn Hồ cọ uồn pa ngành giáo dục giào trách nhiệm hẳư pưng hươn trương hák khâng chằư chự phong nào cưm hẳư học sình. Cài nặn, pưng hươn trương chí khâng chằư  hẳư học sình dặng xừ chơ nhiệt dộ lông cỏng 10 độ, cánh xiếp lặt lịch ép hẳư chọp xồm. Nọk nặn ók nẳng pưng hươn trương nội trú, vịa chấp năm pưng luông pùn chự ún xương đảy mi tứm pha, xửa nào, hẳư kìn tứm khảu chương kìn, đằng lùa hẳư học sình phình ún cánh báu hẳư học sình pày tang nọk chơ nhiệt độ lông tắm lài. Say giáo Dương Công Thảnh, Hiệu trưởng trương tiểu học Làng Mô, huyện Sìn Hồ hẳư hụ: Hươn trương khạy nị mi 24 lớp ép, cắp dáo 400 học sình, cuồng nặn pằn 3 mi 2 ngon lớp dú nẳng pưng bản. Pọm cắp vịa uồn pa pưng í ai say nẳng pưng bón trương mi hỏng ép tạm tổ chức pảy lọm lớp ép, hươn trương nhăng tặt pùn hẳư pưng say giáo cạt kiên cắp ải êm học sình nung ún hẳư pưng làn.

  Khắc

ꪎꪙꪲ ꪶꪬ, ꪨꪱꪥ ꪹꪊꪱ: ꪔꪣꪴ ꪝꪺ ꪋꪳ ꪡꪮꪉ ꪘꪱꪫ ꪁꪣꪳ ꪻꪬ ꪠꪴ ꫛ ꪵꪀꪉ ꪶꪔ ꪵꪔꪉ ꪩꪉꪸ

ꪎꪙꪲ ꪶꪬ ꪨꪷ ꪒꪸ ꪹꪠꪉ ꪊꪺꪚ ꪏꪒꪸ ꪭꪱꪥ ꪨꪱꪥ ꪀꪺꪉ ꪋꪴ ꪘꪱꪫ ꪁꪣꪳ ꪭꪱꪥ ꪬꪀꪳ ꪹꪔ ꪙꪲ ꪘꪉꪰ ꪔꪉꪲ ꪨꪱꪥ ꪹꪊꪱ ꪀꪺꪉ ꪝꪉꪳ ꪣꪴ ꪀꪱꪥ ꪣꪱ ,꫃ꪕꪉ ꪀꪱ 9 ꪎꪱ ꪶꪠꪉ ꪎꪉꪴ ꪝꪮꪣ ꪣꪲ ꪢꪮꪀ ꪁꪺꪀ ꪵꪀꪉ ꪶꪠꪙ ꪤꪥꪴ. ꪑꪒꪸ ꪶꪓ ꪕꪱ ꪢꪱꪥ ꪼꪒ ꪘꪉꪰ ꪕꪱꪉ ꪙꪮꪀ ꫄ꪋ ꪀꪱꪉ ꫃ꪫꪙ ꪘꪉꪰ ꪖꪲ ꫄ꪊꪙ ꪎꪙꪲ ꪶꪬ ꪵꪀꪉ ꪝꪉꪳ ꪎꪱ ꪹꪏꪉ: ꪔꪱ ꪉꪱꪫ ,ꪎꪱ ꫃ꪤ ꪠꪙꪲ ,ꪨꪱꪉ ꪶꪣ ꪵꪀꪉ ꪖꪲ ꫄ꪊꪙ ꪭꪫꪙꪸ ꪵꪔ 5 ꪭꪮꪒ 8 ꪶꪓ.ꪬꪱꪀ ꪫꪱ ꫃ꪕꪉ ꪁꪙꪳ ꪤꪮꪙ ꪶꪩꪉ 5 ꪶꪓ ꪠꪱꪚ ꪭꪱꪚ ꪭꪮꪒ ꪝꪀꪰ ꪵꪭꪉ ꪄꪮꪉ ꫛ ꫄ꪤꪙ ꪵꪀꪉ ꪶꪔ ꪵꪔꪉ ꪩꪉꪸ.

ꪜꪱ ꫄ꪊꪙ ꪖꪲ ꪖꪴ ꪬꪙꪸ ,ꪹꪊꪉ ꪡꪮꪉ ꪶꪘꪉ ꪉꪚꪸ ꪢꪱ ꪵꪝ ꪚꪱꪙ ꪙꪱ ꪭꪫꪙꪸ ꪎꪙꪲ ꪶꪬ ꪻꪬ ꪭꪴ: ꪼꪅ ꪙꪲ ꪝꪉꪳ ꪉꪺ ,ꪁꪫꪱꪥ ꪄꪮꪉ ꫃ꪕꪉ ꪀꪱ ꪭꪫꪙꪸ ꪣꪲ ꪀꪱꪥ 40 ꪝꪽ ꪶꪔ; ꪀꪺꪉ ꪙꪽ ꫄ꪡꪙ ꪨꪱꪥ ꪎꪮꪙ ꪶꪭꪣ ꪘꪉꪰ ꪝꪉꪳ ꪎꪱ ꪶꪠꪉ ꪎꪉꪴ. ꪝꪮꪣ ꪀꪚꪾ ꪫꪀꪸ ꪮꪺꪙ ꪜꪱ ,ꪘꪫꪸ ꪹꪋ ,ꪋꪙꪸ ꪜꪱꪫ ꪵꪀꪉ ꪋꪲ ꪚꪮꪀ ꪻꪬ ꫛ ꫄ꪤꪙ ꪁꪺꪉ ꪘꪱ ꪫꪀꪸ ꪋꪳ ꪡꪮꪉ ꪘꪱꪫ ꪁꪣꪳ ꪻꪬ ꪶꪔ ꪵꪔꪉ ꪩꪉꪸ, ꪭꪮꪒ ꪼꪅ ꪝꪷ ꪼꪭ ꪵꪣ ꪙꪱ ꪁꪷ ꪹꪮꪱ ꪀꪱꪥ 2 ꪝꪽ ꪶꪔ ꪉꪺ ꪁꪫꪱꪥ ꪶꪩꪉ ꪼꪜ ꪀꪱ ꪶꪠꪉ ꪔꪾ ꪼꪫ ꫃ꪫꪙ ꪘꪲꪀ ꪎꪲ ꪘꪱꪫ ꪁꪣꪳ.

ꪝꪮꪣ ꪀꪚꪾ ꪫꪀꪸ ꫄ꪅꪉ ꪻꪊ ꪋꪳ ꪡꪮꪉ ꪘꪱꪫ ꪁꪣꪳ ꪻꪬ ꪶꪔ ꪵꪔꪉ ꪩꪉꪸ, ꪼꪅ ꪙꪲ ꪭꪫꪙꪸ ꪎꪙꪲ ꪶꪬ ꪁꪷ ꪮꪺꪙ ꪝꪱ ꪵꪈꪉ ꪤꪱꪫ ꪥꪴꪀ ꪤꪱꪫ ꪵꪊꪀ ꪑꪣꪸ ꪼꪬ ꪝꪉꪳ ꪹꪭꪙ ꪹꪋꪉ ꪬꪱꪀ ꫄ꪅꪉ ꪻꪊ ꪋꪳ ꪡꪮꪉ ꪘꪱꪫ ꪁꪣꪳ ꪻꪬ ꪭꪮꪒ ꪎꪉꪲ. ꪀꪱꪥ ꪙꪽ ,ꪝꪉꪳ ꪹꪭꪙ ꪹꪋꪉ ꪊꪲ ꫄ꪅꪉ ꪻꪊ ꪻꪬ ꪭꪮꪒ ꪎꪉꪲ ꪥꪉꪰ ꪎꪳ ꫄ꪋ ꪑꪒꪸ ꪶꪓ ꪶꪩꪉ ꪀꪮꪉ 10 ꪶꪓ ꪵꪀꪉ ꪎꪚꪸ ꪩꪀꪲ ꪵꪮꪚ ꪻꪬ ꪋꪮꪚ ꪶꪎꪣ. ꪙꪮꪀ ꪙꪽ ꪮꪮꪀ ,ꪘꪉꪰ ꪝꪉꪳ ꪹꪋꪉ ꪶꪘꪥ ꪊꪴ ꪭꪳ ꪼꪒ ꪣꪲ ꪔꪣꪳ ꪡꪱ ,ꪹꪎ ꪘꪱꪫ ,ꪻꪬ ꪀꪙꪲ ꪔꪣꪳ ꪹꪋꪉ ꪀꪙꪲ ,ꪒꪉꪰ ꪨꪺ ꪻꪬ ꪭꪮꪒ ꪎꪉꪲ ꪠꪉꪲ ꪮꪙꪴ ꪵꪀꪉ ꪹꪚꪱ ꪻꪬ ꪭꪮꪒ ꪎꪉꪲ ꪼꪜ ꪕꪱꪉ ꪙꪮꪀ ꫄ꪋ ꪡꪱ ꪘꪱꪫ ꪁꪣꪳ ꪨꪱꪥ. ꪼꪏ ꪤꪱꪫ ꪹꪤꪉ ꪶꪀꪉ ꪵꪖꪉ ,ꪬꪫꪸ ꪹꪊꪉ ꪹꪋꪉ ꪔꪫꪸ ꪭꪮꪒ ꪨꪱꪉ ꪶꪣ ,ꪭꪫꪙꪸ ꪎꪙꪲ ꪶꪬ ꪼꪬ ꪭꪴ: ꪹꪭꪙ ꪹꪋꪉ ꪼꪅ ꪣꪲ 24 ꫄ꪨꪚ ꪵꪮꪚ ꪀꪚꪾ ꪤꪱꪫ 400 ꪭꪮꪒ ꪎꪉꪲ ,ꪀꪺꪉ ꪙꪽ ꪜꪽ 3 ꪣꪲ 2 ꪉꪮꪙ ꫄ꪨꪚ ꪵꪮꪚ ꪤꪴ ꪘꪉꪰ ꪝꪉꪳ ꪚꪱꪙ. ꪝꪮꪣ ꪀꪚꪾ ꪘꪱ ꪫꪀꪸ ꪮꪺꪙ ꪝꪱ ꪝꪉꪳ ꪮꪲ ꪯꪱꪥ ꪼꪏ ꪘꪉꪰ ꪝꪉꪳ ꪚꪮꪙ ꪹꪋꪉ ꪣꪲ ꪬꪮꪉ ꪵꪮꪚ ꪕꪱꪣ ꪶꪔ ꪊꪀꪳ ꪼꪜ ꪩꪮꪣ ꫄ꪨꪚ ꪵꪮꪚ ,ꪹꪭꪙ ꪹꪋꪉ ꪑꪉꪰ ꪕꪒꪰ ꪜꪙꪴ ꪻꪬ ꪝꪉꪳ ꪼꪏ ꪤꪱꪫ ꪁꪱꪒ ꪁꪙꪸ ꪀꪚꪾ ꪮꪱꪤ ꫃ꪮꪣ ꪭꪮꪒ ꪎꪉꪲ ꪙꪉꪴ ꪮꪙꪴ ꪻꪬ ꪝꪉꪳ ꪨꪱꪙ.

ꪹꪩꪉ ꪬꪫꪙꪸ ꪥꪀꪲ