ꪗꪺꪙ ꪹꪊꪱ: ꫄ꪎꪙ ꪨꪱ: ꪜꪺꪉ ꪀꪙꪲ ꪩꪺꪉ ꪤꪴ ꪻꪢ ꪄꪮꪉ ꫛ ꫄ꪤꪙ ꪚꪱꪙ ꪀꪱꪒ

 ꪑꪱꪥ ꪼꪜ ꪤꪴ ꪚꪮꪙ ꪻꪢ

        ꪚꪱꪙ ꪀꪱꪒ ꪎꪱ ꪀꪷ ꪣꪱ, ꪤꪴ ꪨꪀꪷ ꪊꪉꪴ ꫄ꪔꪣ ꪭꪫꪙꪸ ꪗꪺꪙ ꪹꪊꪱ 50 ꪼꪀ ꪶꪎ ꪕꪱꪉ ꪼꪜ ꪣꪱ ꪤꪱꪀ ꪋꪱ ꪅꪀꪷ ꪅꪮꪣ  ꪝꪴ ꪋꪽ, ꪬꪺꪥ ꪭꪮꪉ ꪋꪮꪉ ꫄ꪩꪀ, ꪯꪽ ꪨꪷ ꪚꪮꪙ 3 ꪜꪱꪀ ꪕꪱꪉ ꪙꪣꪾ ꪣꪱ ꪶꪁꪚ ꪨꪷ ꪬꪺꪥ ꪊꪱꪙ, ꪬꪺꪥ ꪀꪱꪒ ꪵꪀꪉ ꪬꪺꪤ ꪀꪱꪉ ꫃ꪭ ꪙꪚꪾ ꪭꪮꪒ ꪝꪉꪳ ꪭꪺꪥ ꪭꪮꪉ ꪙꪮꪥ ꪢꪮꪥ ꪹꪕ ꪬꪱ ꪶꪠꪙ ꪻꪐ ꪙꪣꪾ ꪶꪝꪉ, ꪒꪙꪲ ꪒꪱꪙ ꪵꪔ ꪬꪺ ꪙꪣꪾ ꪼꪨ ꪣꪱ ꪶꪊꪙ ꪀꪮꪉ ꫄ꪤꪒ ꪒꪙꪲ ꪒꪱꪙ ꪁꪮꪒ ꪎꪮꪥ ꪁꪱꪙ ꪶꪋꪒ. ꪝꪉꪳ ꪜꪲ ꪀꪮꪙ ꪙꪲ, ꪶꪠꪙ ꪘꪮꪉ ꪁꪷ ꪶꪖꪣ ꪎꪸ ꪨꪱꪥ ꪹꪋꪉ ꪄꪮꪉ ꪹꪭꪙ ꪄꪮꪉ ꫛ ꫄ꪤꪙ ꪀꪺꪉ ꪚꪱꪙ , ꪹꪄꪱ ꪣꪺ ꪶꪠꪙ ꪜꪲ ꪻꪒ ꪁꪷ ꪣꪲ ꪹꪭꪙ ꪊꪺꪚ ꪁꪱꪙ ꪶꪋꪒ ꪵꪩꪫ ꫛ ꫜ ꪔꪱꪲ ꪼꪨ ꪙꪮꪉ, ꪹꪏꪉ ꪙꪽ ꪝꪲ ꪙꪮꪉ ꪁꪷ ꪹꪋꪱ ꪨꪷ. ꪼꪅ ꪙꪲ ꪼꪒ ꪑꪱꪥ ꪼꪜ ꪤꪴ ꪚꪮꪙ ꪻꪣ , ꪁꪷ ꪹꪚꪱ ꪼꪒ ꪹꪋꪱ ꪨꪷ ꪣꪱ ꪕꪱꪉ ꪶꪠꪙ ꪙꪮꪉ ꪹꪏꪉ ꪀꪮꪙ ꪙꪲ.

          ꪀꪱꪥ ꪩꪣꪾ ꪵꪩ ꪄꪮꪭ ꪭꪫꪙꪸ, ꪀꪺꪉ ꪋꪲ ꪮꪱꪫ ꪭꪮꪒ 100 ꪋꪺ ꪹꪭꪙ ꫄ꪤꪙ ꪄꪮꪉ ꪚꪱꪙ ꪭꪳ ꪣꪲ ꪋꪲ ꪮꪱꪫ ꪭꪮꪒ 40 ꪋꪺ ꪹꪭꪙ ꪤꪴ ꪶꪠꪉ ꪣꪲ ꪹꪏꪉ ꪋꪲ ꪀꪱꪒ ꪶꪋꪒ. ꪨꪱ ꪜꪲ 2016, ꪼꪒ ꪭꪫꪙꪸ ꪋꪮꪥ ꪹꪤ ꫃ꪤꪒ ꪁꪱꪚ ꪹꪭꪙ ꫄ꪉꪙ ꪶꪄꪙ ꪋꪙꪸꪶ ꪋꪲ ꪮꪱꪫ ꪭꪮꪒ 40 ꪋꪺ ꪹꪭꪙ ꫄ꪤꪙ ꪙꪲ ꪁꪷ ꪼꪒ ꪑꪱꪥ ꪼꪜ ꪤꪴ ꪚꪮꪙ ꪻꪢ ꪎꪉꪴꪴ ꪹꪏ ꪕꪉꪸ ꪮꪱꪙ ꪹꪏ ꪤꪴ ꪨꪀꪷ ꪚꪮꪙ ꪚꪮꪙ ꪤꪴ ꪹꪀꪱ 4 ꪼꪀ ꪶꪎ. ꪵꪔ ꪤꪱ ꪝꪴ ꪂꪉꪴ ꪠꪷ ꪶꪩꪉꪶ ꫃ꪬꪙ ꪕꪷ ꪝꪉꪳ ꪨꪱꪉ ꪹꪭꪙ ꪭꪱꪙ ꪣꪉꪴ ꪈꪮꪥ ꪵꪒꪉ ꪮꪮꪙ ꪔꪉꪷ ꫃ꪜꪙ ꪖꪽ 6ꪜꪙ ꪭꪱꪉ ꪩꪚꪸ ꪼꪜ ꪕꪮꪲ ꫃ꪎꪣ ꪕꪱꪉ ꫃ꪛ ꪶꪕꪉ ꪀꪫꪱꪉ ꪎꪱꪉ ꪝꪉꪸ ꪝꪚꪾ, ꪕꪱꪉ ꪹꪩꪱ ꪙꪣꪾ, ꪓꪙꪸ ꪼꪔ ꪭꪉꪴ ꪚꪯꪙ ꪶꪔꪀ ꫄ꪋ ꪁꪷ ꪼꪒ ꫃ꪤꪒ ꪶꪣꪣ ꪵꪩꪫ ꪵꪀꪉ ꪹꪮꪱ ꪹꪄꪱ ꪎꪴ. ꪋꪮꪣ  ꪼꪒ ꪋꪮꪥ ꪹꪥ ꪶꪄꪙ ꪋꪙꪸ ꪹꪋꪉ ꪄꪮꪉ ꪹꪭꪙ ꪤꪱꪫ ꪵꪩꪫ ꪼꪒ ꪭꪫꪙꪸ ꪋꪮꪥ ꫃ꪤꪒ ꪔꪱꪉ ꫃ꪛ ꪶꪕꪉ ꪝꪮꪣ ꪨꪱꪥ ꪶꪀꪉ ꪊꪉꪲ ꪮꪙꪳ ꪻꪢ ꪝꪲ ꪙꪮꪉ ꪁꪷ ꪮꪙꪸ ꪻꪊ ꫃ꪥꪒ ꪹꪥꪙ.

ꪼꪫ ꫛ ꫄ꪤꪙ ꪣꪲ ꪚꪮꪙ ꪀꪙꪲ ꪤꪴ ꪵꪕꪒ ꪕꪉꪸ ꪵꪀꪉ ꪢꪱ ꪼꪄ ꪫꪀꪸ ꫃ꪥꪒ ꪹꪥꪙ ꪀꪉꪲ ꫃ꪔ  , ꪭꪫꪙꪸ ꪁꪷ ꪋꪮꪥ ꪹꪥ ꪹꪋ ꪡꪽ ꪀꪷ ꪀꪙꪲ ꪢꪱꪀ ꫄ꪡꪙ ꪨꪱꪥ ꪨꪷ ꪢꪱꪀ ꪑꪱꪙ ꪣꪱꪀ ꪣꪺꪉ ꪎꪮꪉ ꪣꪱ ꪻꪬ ꪀꪱꪙ ꪶꪛ ꪶꪩꪉ ꪼꪜ ꪋꪮꪥ ꪝꪸ ꪙꪮꪉ ꪜꪴꪀ ꪵꪀꪉ ꪑꪱꪥ ꪋꪙꪸ 54  ꪵꪬꪀ ꪕꪱ ꪔꪱ ꪒꪙꪲ ꪜꪀꪴ ꪹꪄꪱ ꪩꪲ ꪹꪚꪱ ꫃ꪜꪙ ꪨꪱꪥ ꪣꪱꪙ ꪣꪱ ꪜꪀꪴ ꪀꪷ ꪀꪙꪲ ꪢꪱꪀ, ꪼꪄ ꪮꪮꪀ ꪩꪺꪉ ꫃ꪥꪒ ꪻꪢ ꪻꪬ ꫛ ꫄ꪤꪙ ꪘꪉꪷ ꪘꪲ.

ꪋꪣꪾ ꪫꪱ ꪑꪉꪷ ꪝꪷ ꪨꪱꪥ ꪥꪱꪀ ꪋꪱ ꪄꪷ ꪣꪷ, ꪬꪱꪀ ꪫꪱ ꪀꪚꪾ ꫛ ꫄ꪤꪙ ꪚꪱꪙ ꪀꪱꪒ ꪭꪳꪼꪙꪅ ꪙꪲ ꪊꪉꪷ ꪔꪉꪷ ꪶꪀꪀ ꪜꪺꪉ ꪀꪙꪲ ꪩꪺꪉ ꪤꪴ ꪻꪘꪶ ꪜꪺꪉ ꪀꪙꪲ ꪩꪺꪉ ꪤꪴ ꪵꪕꪒ ꪕꪉꪸ  ꪵꪀꪉ ꪢꪱ ꪼꪄ ꪝꪲ ꪙꪮꪉ ꪹꪚꪱ ꪹꪋꪱ ꪨꪷ ꪙꪣꪾ ꪙꪮꪉ ꪩꪱꪒ ꪖꪺꪣ ꫄ꪋ ꪣꪺ ꪶꪠꪙ ꪙꪮꪉ ꪣꪱ ꪭꪮꪒꪌ

                                                          ꪭꪫꪱꪉ ꪩꪮꪉ - ꪵꪭꪉ ꪥꪀꪲ

Thuận Châu, Sơn La: puông kin luông dú máư khong côn dân bản Cát nhại pày dú bón máư

Bản Cát, xã Cò Mạ, dú lắc trung tâm huyện Thuận Châu 50 cáy số, tang pay ma dạk cha khặc khom, pu chăn, huổi hong chong lậc, ặn cọ men 3 pák tang nặm ma cộp lỏ Huổi Chán, Huổi Cát cánh Huổi Càng, hê nặp họt lai huổi hong nọi mỏi tưa mi há phôn nháư, nặm, pông, đin đán té hùa nặm lày ma chốn còng dệt đin đán cọt soi cạn chột. Pưng pi cón nị, phôn nong cọ thôm xia lài chương khong khong côn dân cuông bản, khảu mua phôn pi đàư cọ mi hươn chuốp cạn chột, lẹo mi cá côn nưng tài lày nong, xương nặn pi nọng cọ chau lò. Khay nị đảy nhại pày dú bón máư, cọ báu đảy chau lo ma tang phôn nong lạt xương cón nị.

Cai lăm le khong huyện, cuông chi áo họt 100 chua hươn dân khong bản, hư mi chi áo họt 40 chua hươn dú nẳng phổng mi xương chi cạn chột. Lả pi 2016, đảy huyện choi dừa dệt cạp hươn, ngơn khôn chiên, chi áo họt 40 chua hươn nị cọ đảy nhại pày dú bón máư xung xưa, tiêng na xưa, dú lắc bón dú cáu 4 cay số. Té cá pu xùng phó lông, lỏ pưng làng hươn hạn mung ngỏi đanh òn đảy tẳng pên thăn liệp pày toi him tang bê tông quảng sáng, piêng pặp, tang lau uôn nặm xủ, điện tảy hung, bón tốc chợ, cọ đảy dệt mộm leọ cánh àu khảu xủ. Chọm đảy choi dừa khôn chiên hươn, lẹo đảy huyện choi dừa dệt tang bê tông, pọm cắp pưng công trình ứn máư, pi nọng phàư cọ yên chàư dệt dượn.

Vạy côn dân mi bón kin dú tẹt tiêng cánh mả khày vịa dệt dượn kinh tế, huyện cọ choi chựa phăn co kin mák phân lài lỏ mák muông, mák nhạn, xòng ma hảu cán bộ khuyến nông lông pày choi pi nọng púk cánh nhại chiên 54 héc ta púk khảu li đin chứt cháng pày púk cò kin mák, khày ók luông dệt máư hảu côn dân nẳng nỉ.

Chăm va nhăng pọ lài, khó mo, hák va cắp côn dân bản Cát hư khạy nị puông kin luông dú máư chắng tẹt tiêng cánh mả khày pi nọng báu đảy chau lò nặm nong lạt thuổm chơ mua phôn ma họt./.

                                                Hoàng Long - Hạnh dịch