ꪓꪙꪸ ꪚꪙꪸ ꪊꪯꪉ ꪵꪭꪉ ꪼꪜ  ꪋꪳ ꪜꪱ  ꪹꪣꪉ ꪵꪐ

ꪣꪳ 1-3-2017, ꪼꪈ ꪨꪉꪰ ꫄ꪋ ꫃ꪀ ꪵꪭꪫꪀ 420 ꪄꪮꪉ  ꪮꪫꪥꪲ ꪚꪱꪙ ꫄ꪤꪙ ꪹꪣꪉ ꪔꪉꪲ ꪓꪙꪸ ꪚꪙꪸ ꪼꪒ ꫄ꪊꪚ ꪙꪾ, ꪤꪱꪫ 500 ꪀꪱꪙ ꪶꪛ ꪊꪙꪸ ꪎꪲ ꪝꪉꪳ ꪊꪣꪴ ꪢꪴ, ꪀꪺꪉ ꪙꪽ ꪶꪀꪀ ꪵꪀꪙ ꪨꪷ ꪶꪀꪉ ꪮꪱꪙ ꪔꪉꪲ ꪁꪷ ꪼꪒ ꪔꪣꪴ ꪝꪺ ꪹꪄꪱ ꪹꪣ ꪭꪫꪙꪸ ꪹꪣꪉ ꪵꪐ. 7 ꪶꪔ ꪶꪀꪉ ꪔꪱꪀ ꪫꪽ ꪡꪱꪫ ꪼꪒ ꪵꪔꪉ ꪮꪮꪀ ꪀꪺꪉ ꪙꪽ 6 ꪶꪔ ꪋꪀꪳ ꪹꪋꪱ ꪶꪩꪉ ꪼꪜ ꫄ꪀ ꫄ꪎ ꪩꪣꪾ ꪒꪴ 11 ꪎꪱ ꪵꪀꪉ ꪶꪔ ꪹꪖꪉ ꪋꪀꪳ ꫜ ꪘꪉꪰ ꪊꪉꪴ ꫄ꪔꪣ ꪭꪫꪙꪸ. ꪢꪱ ꪫꪀꪸ ꫄ꪁꪙ ꪬꪱ ꪶꪀꪀ ꪊꪉꪲ ꪨꪷ ꪐꪽ ꪵꪥꪉ ꪶꪎ ꫄ꪤꪙ ꪬꪉꪲ ꪑꪱꪥ ꪹꪄꪱ ꪣꪱ ꪻꪢ ꪵꪀꪉ ꪋꪙꪸ ꪜꪱꪫ ꪻꪬ ꫛ ꫄ꪤꪙ ꫄ꪅꪉ ꪼꪊ ꪼꪜ ꪋꪳ ꪜꪱ.

          ꪶꪋꪣ ꪭꪚꪾ ꪋꪴ ꪭꪮꪚ ꫄ꪤꪙ ꪘꪉꪰ ꪚꪱꪙ ꪏꪲ ꪣꪱ 2 ꪎꪱ ꪋꪉꪴ ꪊꪱꪥ ꪀꪚꪾ ꪶꪔ ꪶꪀꪉ ꪔꪱꪀ ꪨꪱꪥ ꪵꪈꪉ 59 ꪊꪺ ꪹꪭꪙ ꫄ꪤꪙ ꪀꪺꪉ ꪚꪱꪙ ꪝꪯꪣ ꪶꪎꪣ ꪻꪊ ꪀꪚꪾ ꪘꪱ ꪫꪀꪸ ꪋꪙꪸ ꪜꪱꪫ ꪹꪚꪱ ꪜꪣꪾ ꪩꪱꪫ ꪜꪱ ꪵꪀꪉ ꪹꪚꪱ ꪑꪱꪥ ꪼꪜ ꪝꪱꪥ ꪢꪱ ꪨꪱꪥ ꪚꪮꪙ. ꪩꪺꪉ ꪋꪙꪸ ꪜꪱꪫ ꪕꪮꪥ ꪁꪫꪱꪣ ꪵꪀꪫ ꪵꪀꪉ ꪁꪱꪫꪣ ꪶꪣꪉ ꪁꪷ ꪋꪮꪥ ꫛ ꫄ꪤꪙ ꪭꪴ ꪵꪊꪉ ꪹꪏ ꪝꪉꪳ ꪕꪒꪰ ꪜꪙꪴ ꪼꪒ ꫃ꪥꪒ ꪵꪁꪉ ꪹꪚꪱ ꪼꪒ ꫃ꪥꪒ ꪶꪒꪥ ꪀꪚꪾ ꪜꪱ. ꪕꪉꪲ ꪜꪱꪫ ꪀꪚꪾ ꫄ꪀ ꪀꪫꪱꪙ ꪣꪲ ꪊꪀꪳ ꪁꪫꪣꪸ ꫄ꪋ ꪣꪲ ꫛ ꫄ꪤꪙ ꪑꪱꪥ ꪵꪔ ꪚꪮꪙ ꪮꪙꪳ ꪣꪱ. ꪢꪉꪰ ꪜꪱꪉ ꪭꪮꪚ ꪚꪱꪙ ꪝꪉꪳ ꪋꪺ ꪹꪭꪙ ꫄ꪤꪙ ꪝꪮꪣ ꪶꪎꪣ ꪻꪊ ꪀꪲ ꪊꪸ ꪊꪱꪫ ꪵꪭꪙ ꪹꪚꪱ ꪑꪱꪥ ꪼꪜ ꪝꪱꪥ ꪣꪱ ꪹꪚꪱ ꪋꪮꪀ ꪼꪭ ꪠꪒꪲ ꪵꪠꪚ ꪣꪲ ꪎꪱꪀ ꪐꪽ ꪄꪮꪉ ꪹꪊꪉ ꪚꪱꪙ ꪵꪀꪉ ꪶꪔ ꪶꪀꪉ ꪔꪱꪀ.

          ꪬꪱꪀ ꪫꪱ ꪹꪚꪱ ꪋꪳ ꪭꪀꪸ ꪚꪮꪙ ꪻꪒ ꪁꪷ ꪼꪒ ꫛ ꫄ꪤꪙ ꪶꪎꪣ ꪻꪊ ꪶꪋꪣ ꪋꪮꪥ. ꪒꪮꪉ ꪀꪺꪙ ꪘꪉꪰ ꪎꪱ ꪵꪩꪉ ꪏꪴ ꪎꪙꪲ ꪚꪮꪙ ꪭꪮꪙ ꪭꪙꪳ ꫄ꪐꪒ ꪣꪱ ꪕꪱꪉ ꪠꪱ ꪜꪱ ꪵꪀꪉ ꪑꪱꪥ ꪼꪜ ꪝꪱꪥ ꪣꪱ ꪩꪱ ꪶꪩꪣ ꪘꪉꪰ ꪭꪫꪙꪸ ꪹꪣꪉ ꪵꪐ ꪝꪉꪳ ꪀꪱꪙ ꪶꪚ ꪊꪙꪸ ꪎꪲ ꪶꪔ ꪶꪀꪉ ꪔꪱꪀ ꪘꪉꪰ ꪘꪲ ꪵꪜꪀ ꪹꪏꪉ ꪹꪚꪱ ꪣꪲ ꪣꪳ ꪥꪉꪰ. 30 ꪀꪱꪙ ꪶꪚ ꪊꪙꪸ ꪎꪲ ꪀꪙꪲ ꪙꪮꪙ ꪘꪉꪰ ꪹꪭꪙ ꪪꪽ ꪬꪫꪱ ꪚꪱꪙ ꪠꪳ ꪣꪱ ꪁꪚꪾ ꪵꪁꪚ ꪀꪺꪉ ꪥꪱꪙ ꪼꪜ ꫃ꪥꪒ ꪫꪀꪸ. ꪣꪳ ꪻꪒ ꪏꪣꪴ ꪯꪱꪥ ꪁꪷ ꪼꪒ ꪄꪱꪣ ꪜꪱ ꪠꪱ ꪝꪴ ꪼꪜ ꪭꪮꪒ ꪝꪉꪳ ꪶꪠꪉ ꪜꪱ ꪭꪮꪒ ꪝꪉꪳ ꪚꪱꪙ ꪼꪫ ꪋꪙꪸ ꪜꪱꪫ ꫛ ꫄ꪤꪙ ꪀꪲ ꪊꪱꪫ ꪵꪭꪙ ꪹꪚꪱ ꪠꪱ ꪜꪱ ꪹꪚꪱ ꪑꪱꪥ ꪼꪜ ꪝꪱꪥ ꪣꪱ ꪩꪱ ꪶꪩꪣ.

          ꪊꪉꪴ ꪔꪱ ꫄ꪩꪣ ꪀꪺꪀ ꪹꪡꪉ ꪠꪷ ꪹꪊꪉ ꪡꪮꪉ PA 88 ꪶꪀꪉ ꪮꪱꪙ ꪔꪉꪲ ꪓꪙꪸ ꪚꪙꪸ, ꪶꪔ ꪠꪷ ꪡꪴ ꪵꪊꪀ ꪶꪠꪉ ꪎꪱ ꪵꪩꪉ ꪏꪴ ꪎꪙꪲ ꪻꪬ ꪭꪴ ꪎꪴ ꪼꪣ ꪜꪱꪒ ꪀꪺꪉ 4-5 ꪣꪳ ꫛ ꫜ ꪣꪲ ꪹꪏꪉ ꪜꪣꪾ ꪩꪱꪫ ꪼꪒ ꪀꪱꪥ 6 ꪝꪽ ꪹꪖꪀ ꪶꪣꪙ ꪜꪱ ꪼꪜ ꪋꪳ. ꪫꪀꪸ ꫃ꪥꪒ ꪄꪮꪉ ꪶꪢꪒ ꫛ ꪙꪲ ꪹꪑꪉ ꪣꪳ ꪹꪑꪉ ꪒꪀꪰ ꪵꪨꪣ. ꪣꪲ ꫛ ꪑꪉꪰ ꪁꪣꪾ ꪔꪷ ꪊꪣꪴ ꪢꪴ ꪣꪲ ꪊꪀꪳ ꪁꪫꪙꪸ.

          ꪄꪱꪣ ꪶꪝꪙ ꪝꪉꪳ ꪄꪴ ꪥꪱꪀ ꪋꪱ ꪨꪉꪰ ꪹꪚꪙ ꫜ ꪹꪄꪱ ꫃ꪥꪒ ꪫꪀꪸ ꪝꪉꪳ ꪶꪔ ꪶꪀꪉ ꪔꪱꪀ ꪁꪷ ꪶꪔ ꪊꪀꪳ 118 ꪜꪱꪉ ꪭꪮꪚ ꫄ꪤꪙ ꪀꪚꪾ 4.500 ꫛ ꪶꪋꪣ ꪭꪚꪾ; ꪠꪱꪒ ꪀꪱꪤ 2.700 ꪚꪸ ꪊꪸ ꪋꪙꪸ ꪜꪱꪫ ꪵꪀꪉ ꪶꪔ ꪊꪀꪳ ꪀꪱꪥ 4.300 ꪋꪺ ꪹꪭꪙ ꪀꪲ ꪊꪱꪫ ꪵꪭꪙ ꪹꪚꪱ ꪑꪱꪥ ꪼꪜ ꪝꪱꪥ ꪣꪱ ꪹꪚꪱ ꪠꪱ ꪜꪱ ꪠꪒꪲ ꪵꪠꪚ.

          ꪀꪱꪤ ꪒꪫꪸ ꪊꪱ ꪊꪣꪴ ꪢꪴ ꪣꪲ ꪊꪀꪳ ꪁꪫꪣꪸ ꪁꪷ ꪭꪴ ꪼꪒ 49 ꪋꪴ, 76 ꫛ ꪠꪱ ꪜꪱ, ꪀꪚꪾ 7ꪕꪉ ꫃ꪢꪒ ꪔꪱ ꪒꪙꪲ ꪜꪱ ꪶꪊꪚ ꪠꪱ 280 ꪝꪽ ꪹꪖꪀ ꪶꪣꪙ. ꫄ꪀ ꪀꪫꪱꪙ ꪶꪀꪉ ꪮꪱꪙ ꪁꪷ ꫄ꪄꪥ ꪶꪔ 15 ꪋꪴ, 16 ꫛ ꪠꪒꪲ ꪖꪀꪳ ꪠꪱ  ꪜꪱ, ꪡꪱꪒ ꪻꪢ ꫄ꪉꪙ 13 ꪋꪴ 14 ꫛ ꪠꪒꪲ ꪶꪕꪥ; ꪒꪱꪉ ꪒꪫꪸ ꪊꪱ ꪎꪱꪀ ꪣꪉꪲ 21 ꪋꪴ.

                                                          ꪫꪴ ꫄ꪩꪥ-ꪕꪮꪉ ꪵꪯꪉ ꪤꪀꪲ